ཉིན་གྲངས་གཉིས་ལྷག་རིང་སྐབས་ ༡༧ པའི་འདེམས་ཐོན་སྤྱི་འཐུས་རྣམ་པས་དམ་འབུལ་གྱི་དཀའ་རྙོག་སེལ་ཐབས་ཐད་ནང་མོལ་གནང་ཡོད་ཀྱང་འགྲིག་ཐབས་གཏན་ནས་མ་བྱུང་བར་བརྟེན་༧གོང་ས་རྒྱལ་བ་རིན་པོ་ཆེ་མཆོག་ནས་ལམ་སྟོན་བཀའ་སློབ་གང་གནང་ཐོག་ཤར་བསྐྱོད་ཞུ་རྒྱུའི་སྤྱི་མོས་མཚན་འཁོད་སྙན་ཞུ་ཕུལ་ཡོད་འདུག
ཁ་སང་ཕྱི་ཚེས་ ༢༩ ཉིན་གྱི་ཉིན་རྒྱབ་ཆུ་ཚོད་ ༢།༣༠ ཙམ་གྱི་ཐོག་སྐབས་བཅུ་བདུན་པའི་འདེམས་ཐོན་སྤྱི་འཐུས་རྣམ་པའི་ནང་མོལ་ཚོགས་འདུ་གྲུབ་མཚམས། གསར་འགོད་པས་ཚོགས་འདུ་གཙོ་སྐྱོང་བ་མཁན་པ་བསོད་ནམས་བསྟན་འཕེལ་ལགས་སུ་ཐག་གཅོད་ཇི་བྱུང་བཀའ་འདྲི་ཞུས་པར་ཁོང་གིས། ད་ལྟའི་ཆར་ཚོགས་འདུར་ཐག་གཅོད་ཇི་བྱུང་སོགས་ཀྱི་སྐོར་ནས་བོད་མིའི་གསར་ཁང་ཁག་ལ་འགྲེལ་བརྗོད་བྱ་རྒྱུ་མིན་པ་དང་། གལ་ཏེ་མ་འོངས་པར་ཞུ་དགོས་བྱུང་ཚེ་གསར་འགོད་པར་འབྲེལ་བ་ཞུ་ངེས་ཡིན་སྐོར་གསུངས་ཡོད་པ་རེད། འོན་ཀྱང་། དེ་རིང་འདི་གའི་གསར་འགོད་པར་འབྲེལ་ཡོད་མི་སྣ་ཞིག་གིས་འགྲེལ་བརྗོད་གནང་བ་ལྟར་ན། ནང་མོལ་ཚོགས་འདུའི་སྐབས་སྤྱི་འཐུས་རྣམ་པས་བཅའ་ཁྲིམས་དོན་ཚན་ ༤༧ གཞིར་བཟུང་བར་བརྒལ་ཚོགས་གཙོའི་མདུན་དུ་དམ་བཅའ་འབུལ་རྒྱུ་དང་། ད་ལྟའི་ཕྱོགས་གཉིས་ཀའི་དམ་འབུལ་ངོས་ལེན་བྱེད་རྒྱུ་དང་ཡང་ན་ཚང་མས་རྩ་དགོངས་ཞུ་རྒྱུ། ཡང་ན་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་འཁོད་སྙན་ཞུ་འབུལ་རྒྱུ་སོགས་དཀའ་རྙོག་སེལ་ཐབས་ཀྱི་དོན་ཚན་ཁག་ཅིག་གི་ཐོག་གོ་བསྡུར་དང་གསང་བའི་འོས་བསྡུ་གནང་ཡོད་ཀྱང་། ཐབས་ལམ་གཞན་ཁག་གི་ཐོག་རྒྱབ་སྐྱོར་གསུམ་ཆ་གཉིས་མ་ཟིན་པར་ནང་འགྲིག་ཡོང་ཐབས་གཏན་ནས་མ་བྱུང་བརྟེན། སྤྱི་མོས་ཐོག་ནས་མཚན་འཁོད་སྙན་ཞུ་འབུལ་རྒྱུའི་ཐག་གཅོད་བྱུང་ཡོད་འདུག
བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་ལེའུ་དང་པོའི་དོན་ཚན་དང་པོའི་ནང་གསེས་གཉིས་པའི་ནང་དུ། ༧གོང་ས་༧སྐྱབས་མགོན་ཆེན་པོ་མཆོག་གིས་དགོས་གལ་ནམ་གཟིགས་སྐབས་དང་། འགོ་འཁྲིད་རྣམས་ཀྱིས་གསོལ་འདེབས་ནམ་ཞུས་ལ་བོད་མི་རིགས་དང་། སྤྱི་ཚོགས། བསྟན་སྲིད་ཀྱི་གལ་ཆེའི་ལས་དོན་ཐོག་གྲོས་ཚོགས་དང་བཀའ་ཤག་གི་དགོངས་པའི་དཔྱད་གཞིར་དགོངས་འཆར་གནང་རྒྱུ་ཞེས་གསལ་ཡོད་པ་ལྟར། དཀའ་རྙོག་འདི་མུར་ལྷག་སྟེ་བོད་མིའི་སྒྲིག་འཛུགས་དང་རང་རེའི་སྤྱི་ཚོགས་ལ་དཀའ་ངལ་ཆེན་པོ་ཞིག་མ་འཕྲད་པའི་ཆེད་དུ༧གོང་ས་རྒྱལ་བ་རིན་པོ་ཆེ་མཆོག་ནས་ལམ་སྟོན་བཀའ་སློབ་ག་རེ་ཕེབས་པ་ཡིན་ནའང་སྤྱི་བོའི་གཙུག་ཏུ་བཀུར་ཏེ་ལམ་སྟོན་ཐོག་ཤར་བསྐྱོད་ཞུ་རྒྱུའི་སྤྱི་མོས་གསོལ་འདེབས་ཞུས་ཡོད་འདུག
གསར་འགོད་པ། པ་སངས་ཚེ་རིང་།
ཞབས་འདྲེན་རེད། ངོ་ཚ་རྒྱུ་མེད་མཁན་གྱི་སྤྱི་འཐུས་རྣམས། རྙོག་དྲ་འདི་ཁྱེད་རང་ཚོས་བཟོས་པ་རེད། བཙོག་པ་འདི་ཁྱེད་ཚོས་ང་རྒྱལ་གྱིས་བཟོས་པ་རེད། ༸གོང་ས་མཆོག་རྙོག་དྲ་འདིའི་ནང་ཕེབས་དགོས་པ་བཟོས་དགོས་དོན་མེད། ད་ལན་སོ་སོས་བཟོས་པའི་ཆང་དེ་སོ་སོས་འཐུང་མི་ཐུབ་པ་རེད་དམ། རྗེས་མར་ཡང་མི་ཡིས་ཆེད་དུ་བཟོས་པའི་རྙོག་དྲ་འདི་ལྟར་གྱི་ནང་ལའང་༸གོང་ས་མཆོག་ཐུགས་མི་བདེ་བ་བཟོ་རྒྱུ་ཡིན་ནམ། བཙན་བྱོལ་གཞུང་གི་འགོ་གཙོ་རྣམས་ཞབས་འདྲེན་རེད། སོ་སོའི་ལས་འགན་ལས་ནམ་བར་དུ་གཡོལ་ཐབས་བྱ་རྒྱུ་ཡིན་ནམ། བློ་སེང་གིས་བཟོས་པའི་རྙོག་དྲ་འདི་མི་གཅིག་གཉིས་ཙམ་གྱི་ང་རྒྱལ་ལ་བརྟེན་ནས་བྱུང་བ་རེད་ཀྱང་། བཙན་བྱོལ་གཞུང་གི་ད་ལྟའི་འགོ་གཙོ་རྣམས་ལ་ཁྲིམས་འགལ་གྱི་རྙོག་དྲ་འདི་ལྟ་བུ་ཞིག་གཙང་མ་བཟོ་རྒྱུའི་འཇོན་ཐང་མེད་ན། བོད་མི་མང་གི་བདེ་དོན་དང་མ་འོངས་བོད་ཀྱི་དཀའ་ངལ་ཇི་ལྟར་སེལ་རྒྱུ་ཡིན་ནམ། བསམ་བློ་ཐོངས་བོད་མི་ཚོ།
ད་འཇིགས་ཀ