རྒྱ་ནག་གཞུང་གིས་བོད་ལ་ཞི་བའི་བཅིངས་གྲོལ་བཏང་སྟེ་ལོ་ངོ་ ༧༠ འཁོར་ཡོད་ལུགས་ཀྱི་འཁྱོག་བརྗོད་དྲིལ་བསྒྲགས་ལ་དགག་ལན་ལོ་ངོ་ ༧༠ རིང་བོད་ལ་བཙན་འཛུལ་དྲག་གནོན་བྱས་པའི་དངོས་ཡོད་གནས་ཚུལ་བཀོད་པའི་རྒྱབ་ཤ་དཀར་པོ་ཅན་གྱི་དབྱིན་དེབ་ཅིག་དབུ་འབྱེད་གནང་སོང་།
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་བོད་མིའི་སྒྲིག་འཛུགས་ཀྱི་ལྷག་པ་ཚེ་རིང་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་དབུས་བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱིས་དཔར་སྐྲུན་བྱས་པའི་བོད་ལ་ལོ་ངོ་བདུན་ཅུའི་བཙན་འཛུལ་དང་གནའ་གནོན་ ( 70 Years of Occupation and Oppression ) ཞེས་པའི་དབྱིན་ཡིག་གི་ལན་འདེབས་དཔེ་དེབ་ཅིག་དབུ་འབྱེད་གནང་སོང་། དཔེ་དེབ་དེའི་ནང་རྒྱ་ནག་གཞུང་གིས་བོད་སར་བཙན་འཛུལ་དྲག་གནོན་བྱས་པའི་མི་ལོ་བདུན་ཅུ་ཡི་ལོ་རྒྱུས་ཀྱི་སྐྱོ་གར་མང་པོ་ཞིག་གསལ་སྟོན་བྱས་ཡོད་པ་དང་། རྒྱ་ནག་གཞུང་གིས་བོད་ནང་གི་འཛུགས་སྐྲུན་གྱི་ལས་གཞི་ཁོ་ནར་ཁ་གཡར་ནས་བོད་ནང་དུ་བདེ་སྐྱིད་ཀྱི་འཚོ་བ་སྐྲུན་བཞིན་པའི་འུར་བསྒྲགས་བྱས་ཏེ། རྒྱལ་སྤྱིའི་ཚོགས་སྡེ་ཁག་ལ་འཁྱོག་བཤད་དང་སྒྲོ་འདོགས་བྱེད་མུས་ཡིན་པ་ལྟར། དེ་རིང་དཔར་སྐྲུན་བྱས་པའི་དབྱིན་ཡིག་དཔེ་དེབ་དེས། རྒྱ་ནག་གཞུང་གིས་བོད་ནང་མི་ལོ་བདུན་ཅུའི་རིང་ལ་སྤེལ་བའི་བཙན་འཛུལ་དང་གནའ་གནོན་གྱི་སྲིས་ཇུས་ཐེར་འདོན་དང་སྐྱོན་བརྗོད་བྱས་ཡོད་པ་དང་། དཔེ་དེབ་དེ་ནི་འདི་ལོའི་ཕྱི་ཟླ་ ༥ ཚེས་ ༢༣ ཉིན་རྒྱ་ནག་གཞུང་གིས་བོད་ཞི་བའི་བཅིངས་གྲོལ་བཏང་ནས་ལོ་ངོ་བདུན་ཅུ་ཟེར་བ་དྲིལ་བསྒྲགས་བྱས་པ་དང་བསྟུན་ཏེ། རྒྱལ་སྤྱིར་འགྲེམས་སྤེལ་བྱས་པའི་རྒྱབ་ཤ་དཀར་པོ་ཟེར་བའི་དཔེ་དེབ་དེའི་ཁྱོག་བཤད་དག་ལ་བྲིས་པའི་དགག་ལན་གྱི་དཔེ་དེབ་ཅིག་རེད། དེ་བཞིན་རིང་མིན་དཔེ་དེབ་དེ་བོད་ཡིག་དང་རྒྱ་ཡིག་གཉིས་སུ་ཕབ་བསྒྱུར་བྱས་ནས་དྲ་ཐོག་ཏུ་གཞག་རྒྱུ་ཡིན་འདུག
མཛད་སྒོའི་སྟེང་སྲིད་སྐྱོང་སྤེན་པ་ཚེ་རིང་མཆོག་གིས། འདི་ལོའི་ཕྱི་ཟླ་ ༥ ཚེས་ ༢༣ ཉིན་རྒྱ་ནག་གཞུང་གིས་བོད་སར་བཙན་འཛུལ་དང་བོད་མིར་དྲག་གནོན་བྱས་ནས་ལོ་ངོ་བདུན་ཅུ་ཕྱིན་ཡོད་ཀྱང་། བོད་ས་ཞི་བའི་བཅིངས་གྲོལ་བཏང་བའི་དྲིལ་བསྒྲགས་དང་འབྲེལ་ནས་རྒྱབ་ཤ་དཀར་པོ་ཞེས་པའི་དཔེ་དེབ་ཅིག་འགྲེམས་སྤེལ་བྱས་ཡོད་པ་རེད། ད་བར་དབུས་བོད་མིའི་སྒྲིག་འཛུགས་ནས་རྒྱ་ནག་གཞུང་གིས་བཏོན་པའི་རྒྱབ་ཤ་དཀར་པོའི་དཔེ་དེབ་དེ་དག་ལ་དགག་ལན་བརྒྱབ་ཡོད་ཀྱང་། ༢༠༡༨ ལོར་རྒྱ་ནག་གཞུང་གིས་བཏོན་པའི་རྒྱབ་ཤ་དཀར་པོའི་དཔེ་དེབ་དེར་དགག་ལན་གྱི་དཔེ་དེབ་བཏོན་ཐུབ་མེད་པས། ད་ལན་ངེས་པར་དུ་དགག་ལན་གྱི་དཔེ་དེབ་ཅིག་འདོན་དགོས་པའི་དམིགས་ཡུལ་བཟུང་ཡོད་པ་རེད། སྤྱིར་རྒྱ་ནག་གཞུང་གིས་གནས་དོན་ཅི་ཞིག་ལ་འགྲེལ་བརྗོད་བྱས་ནའང་། རྒྱ་ནག་རྒྱལ་ཁབ་དང་རྒྱ་གཞུང་ལ་ཁེ་ཕན་དང་དངོས་ཡོད་ཀྱི་གནས་ཚུལ་ལ་གཞི་མི་བཅོལ་བར། རྒྱ་ནག་ནང་གི་རྒྱ་མི་རྣམས་ལ་མགོ་སྐོར་འཁྱོག་བཤད་བྱས་པ་དང་རྒྱལ་སྤྱིའི་སྤྱི་ཚོགས་ལ་བསླུ་བྲིད་བྱེད་མུས་ཡིན་པ་གསལ་པོ་ཡིན་པས། ད་ལན་ཚང་མས་མཉམ་རུབ་ཀྱིས་རྒྱབ་ཤ་དཀར་པོར་དགག་པའི་དཔེ་དེབ་ཅིག་འགྲེམས་སྤེལ་ཐུབ་ཡོད་སྐོར་སོགས་གསུངས་སོང་།
ཡང་སྲིད་སྐྱོང་མཆོག་གིས། རྒྱ་ནག་གཞུང་གིས་བོད་ཞི་བའི་བཅིངས་གྲོལ་བཏང་ནས་ལོ་ངོ་བདུན་ཅུ་ཕྱིན་པ་བསྒྲགས་མུས་ཡིན་པ་ལྟར། ལོ་རྒྱུས་ཀྱི་འཕེལ་རིམ་ཁྲོད་དུ་འཁྱོག་བཤད་བྱས་པའི་གནས་དོན་མང་པོ་ཞིག་ལ། བོད་མིའི་སྒྲིག་འཛུགས་ཀྱི་ངོས་ནས་བོད་ཀྱི་ལོ་རྒྱུས་ཀྱི་གནས་བབ་སོགས་མཚོན་པའི་གནས་དོན་མང་པོ་ཞིག་ལ་གསལ་འདེབས་བྱས་ཟིན་ཡོད་སྟབས། རྒྱ་ནག་གཞུང་གིས་བོད་ཀྱི་ལོ་རྒྱུས་ཀྱི་གནས་བབ་ཐོག་ལ་ཁྱོག་བཤད་བྱས་པ་གསར་པ་རེ་མེད་ན། དེ་སྔོན་གྱི་གནས་དོན་དག་ལ་ལན་འདེབས་ཟིན་པས། བོད་ཀྱི་དངོས་ཡོད་ལོ་རྒྱུས་ཀྱི་གནས་བབ་སྐོར་གྱི་གནས་དོན་མང་པོ་ཞིག་རང་སོར་གནས་ཡོད་པ་རེད། དཔེ་དེབ་དེའི་ནང་དུ་བོད་ནང་དུ་རྒྱ་ནག་གཞུང་གིས་བཙན་འཛུལ་བྱས་ཡོད་ཀྱང་། བོད་ཞི་བའི་བཅིངས་གྲོལ་བཏང་ཡོད་ཚུལ་བསྒྲགས་མུས་ཡིན་པ་ནི་གདོང་འབག་གྱོན་པ་ཞིག་ཡིན་སྐོར་དང་། དེ་བཞིན་རྒྱ་ནག་གཞུང་གིས་དཀའ་རྙོག་གང་འདྲ་ཞིག་ཡིན་ཡང་། དེ་དྲིལ་བསྒྲགས་གྱི་ཐབས་ལམ་ནི་བོད་ནང་དུ་འཛུགས་སྐྲུན་ཁོ་ནར་གཞི་བཅོལ་ནས་བསྒྲགས་མུས་ཡིན་པས། ཕྱིའི་འཛུགས་སྐྲུན་གྱི་ལས་གཞི་ཁོ་ནས་བོད་ནང་གི་བོད་མི་རྣམས་ཀྱིས་རྒྱ་ནག་གཞུང་ལ་མ་བསྟུན་ཐབས་མེད་གྱུར་ཏེ། བོད་མི་ཚོར་གནའ་གནོན་དམ་དྲག་བྱེད་མུས་ཡིན་པའི་སྐོར། བོད་ཀྱི་སྐད་ཡིག་རྩ་མེད་གཏོང་ཐབས་སླད་སྔོན་འགྲོ་ནས་རྒྱ་ཡིག་སྦྱང་དགོས་པ་དང་། བོད་ཡིག་ཤེས་མཁན་རྣམས་ལ་ལས་ཀ་མི་སྟེར་བའི་དཀའ་ཁག་གི་རིགས་མང་པོ་ཞིག་འཁོད་ཡོད་པ་དང་། མ་འོངས་པར་བོད་མི་ཚོས་༧གོང་ས་སྐྱབས་མགོན་ཆེན་པོ་མཆོག་གིས་ཕྱག་སྟོན་གནང་བའི་གཉིས་ཕན་དབུ་མའི་ལམ་ལ་ཤར་སྐྱོད་བྱ་དགོས་པ་སོགས་འཁོད་ཡོད་སྐོར་གསུངས་སོང་།
དཔལ་ལྡན།
གོང་གསལ་གསར་འགྱུར་ནང་འདེམས་ཐོན་སྲིད་སྐྱོང་གི་གསུང་བཤད་ནང་ད་སྔོན་བོད་མིའི་སྒྲིག་ནས་འཛུགས་ནས་༢༠༡༨ ལོའི་རྒྱ་ནག་གི་རྒྱབ་ཤ་དཀར་པོའི་ཡིག་ཆ་ལ་ལན་འདེབས་བྱས་མེད་ཚུལ་གཏམ་བཟང་གི་ཚུལ་དུ་བཤད་པ་དང་། རང་གི་ད་ལམ་ལན་འདེབ་བྱེད་ཀྱི་ཡོད་པའི་གཏམ་བཤད་གནང་འདུག་ཀྱང་ཕྱི་དྲིལ་ལས་ཁུངས་དྲ་རྒྱའི་ནང་༢༠༡༨ ལོར་སྔ་རྗེས་ལན་འདེབས་རྒྱས་བསྡུས་གནང་ཡོད་པ་གསལ་འདུག དེས་ན་གཞུང་གི་འགན་འཛིན་གྱིས་ཐུགས་སྣང་དང་འགན་ཆེ་ཙམ་བཞེས་དགོས་པ་གལ་ཆེན་དུ་མཐོང་ན་ཐུགས་ཞིབ་གནང་གལ།།