ཉེ་ཆར་གཞུང་འཛིན་གུ་ཡངས་དམངས་གཙོ་ཚོགས་པའི་མགོ་ཁྲིད་དུ་བདམས་ཐོན་བྱུང་བའི་ཡུལ་དེའི་བློན་ཆེན་ཟུར་པ་སྐུ་ཞབས་ཧྥུ་མིའོ་ཀི་ཤི་ཌ་ (Fumio Kishida) ཉི་ཧོང་གི་སྲིད་བློན་གསར་པར་བསྐོ་གཞག་གནང་རྒྱུ་ཡིན་མིན་ཐད། དེ་རིང་ཉི་ཧོང་གི་གྲོས་ཚོགས་གོང་འོག་ནང་འོས་བསྡུ་བྱས་པ་བརྒྱུད་མང་མོས་རྒྱབ་སྐྱོར་ཐོབ་པར་བརྟེན། དེ་རིང་ནས་ཁོང་གིས་དངོས་སུ་ལས་ཁུར་མགོ་བརྩམས་ཡོད་འདུག
གྲོས་ཚོགས་ཀྱི་འོས་བསྡུ་མ་འཚོག་གོང་སྐུ་ཞབས་ཀི་ཤི་ཌ་མཆོག་གིས་གསར་འགོད་པར། ད་ལན་དོན་དམ་པའི་མགོ་འཛུགས་གསར་བ་ཞིག་ཆགས་རྒྱུ་རེད། ངས་མ་འོངས་པའི་ཆེད་དུ་ཆོད་སེམས་བརྟན་པོའི་ཐོག་ནས་དཀའ་ངལ་དག་ལ་གདོང་ལེན་བྱ་འདུན་ཡོད། ཅེས་བརྗོད་འདུག་ལ། ཉི་ཧོང་དུས་བབ་གསར་ཁང་གི་དེ་འབྲེལ་གནས་ཚུལ་ལྟར་ན། དེ་རིང་སྲིད་བློན་དུ་དངོས་སུ་བསྐོ་གཞག་བྱུང་བ་དང་འབྲེལ། སྐུ་ཞབས་ཀི་ཤི་ཌ་མཆོག་གིས་འཛིན་སྐྱོང་གསར་པའི་བློན་ཆེན་ཁག་གི་མིང་ཐོ་གསལ་བསྒྲགས་གནང་ཡོད་ཅིང་། དེ་སྔ་དང་མི་འདྲ་བར་འཛིན་སྐྱོང་གསར་པའི་བློན་ཆེན་ ༢༠ ཁྲོད་དུ་གཞོན་སྐྱེས་ ༡༣ ལྷག་ཡོད་པ་དང་། བུད་མེད་བློན་ཆེན་ ༣ ཡོད་སྐོར་བཀོད་འདུག་ལ། དེ་བཞིན་གཞུང་འཛིན་གུ་ཡངས་དམངས་གཙོ་ཚོགས་པའི་ནང་ཁུལ་གྱི་ཁ་གཏད་ཤོག་ཁག་ལའང་གོ་གནས་མཐོན་པོ་སྤྲད་ཡོད་འདུག
ཉེ་ལམ་ནས་ཉི་ཧོང་དང་རྒྱ་ནག་གི་འབྲེལ་བ་དེ་སྔར་ལས་ཅུང་ཛ་དྲག་ལྟ་བུར་གྱུར་ཡོད་ཅིང་། དབྱེ་ཞིབ་པ་རྣམས་ཀྱིས་སྲིད་བློན་གསར་པ་ཀི་ཤི་ཌ་མཆོག་གི་རྒྱ་ནག་ལ་ལྟ་ཕྱོགས་ཇི་ཡིན་སོགས་དང་འབྲེལ་ནས། ཉེ་ཆར་སྐུ་ཞབས་ཀི་ཤི་ཌ་ཡིས་འོས་བསྡུའི་སྔོན་དུ། སྲིད་འཛིན་མ་གཏོགས་སྲིད་དོན་ཚོགས་པའི་ཚོགས་མི་སུ་རུང་ཞིག་གིས་བསྟུད་མར་ལོ་གསུམ་ལས་མང་བ་མགོ་ཁྲིད་དང་འགན་འཛིན་གྱི་ལས་འཁུར་ཞུ་ཆོག་གི་མེད་སྐོར་བརྗོད་དེ། དོན་དུ་རྒྱ་ནག་གཞུང་དང་འབྲེལ་ལམ་ཡག་པོ་ཡོད་ཅིང་། དུས་རྒྱུན་ཉི་ཧོང་གི་ཆབ་སྲིད་ར་བའི་ནང་རྒྱ་ནག་གཞུང་ལ་རྒྱབ་སྐྱོར་ཤུགས་ཆེ་ཤོས་བྱེད་མཁན་གཞུང་འཛིན་གུ་ཡངས་དམངས་གཙོའི་ཚོགས་པའི་ (Liberal Democratic Party, LDP) སྤྱི་ཁྱབ་དྲུང་ཆེ་ཊོ་ཤི་ཧི་རོ་ནི་ཀའེ་ (Toshihiro Nikai) ཟེར་བ་དེས་འདས་པའི་ལོ་ལྔའི་རིང་བསྟུད་མར་དྲུང་ཆེའི་ལས་གནས་བཟུང་བ་དེར་དགག་བྱ་བཏོན་ཡོད་འདུག་ལ། སྲིད་བློན་དུ་བདམས་ཐོན་བྱུང་རྗེས་སྤྱི་ཁྱབ་དྲུང་ཆེ་གསར་པ་ཞིག་བསྐོ་རྒྱུ་ཡིན་པའི་ཚོད་དཔག་བྱེད་ཀྱིན་འདུག དེ་བཞིན་སྐུ་ཞབས་ཀི་ཤི་ཌ་མཆོག་གིས་དེ་སྔོན་སྲིད་བློན་ལས་ཁུངས་ཀྱི་ཁོངས་སུ་འགྲོ་བ་མིའི་ཐོབ་ཐང་དང་འབྲེལ་བའི་ལས་ཁུངས་གསར་བ་ཞིག་འཛུགས་རྒྱུ་ཡིན་སྐོར་བརྗོད་ཡོད་ལ། དེ་ནི་གཙོ་བོ་རྒྱ་ནག་ལ་དམིགས་པ་ཞིག་ཡིན་སྐོར་འགྲེལ་བརྗོད་བྱེད་མཁན་འདུག
སྲིད་བློན་ཧྥུ་མིའོ་ཀི་ཤི་ཌ་མཆོག་གི་སྣེ་ཁྲིད་པའི་ཉི་ཧོང་གི་གཞུང་གསར་པའི་གདོང་ལེན་བྱ་དགོས་པའི་གནད་དོན་གཙོ་བོ་གཅིག་ནི། ཟླ་འདིའི་ཕྱི་ཚེས་ ༣༡ ཉིན་བསྡུ་འཆར་ཡོད་པའི་ཉི་ཧོང་གི་རྒྱལ་ཡོངས་འོས་བསྡུ་སྟེ། གྲོས་ཚོགས་འོག་མའི་འོས་བསྡུ་དེ་ཉིད་ཡིན་ཞིང་། འབྱུང་འགྱུར་ཟླ་བ་གཅིག་ལྷག་གི་སྲིད་བློན་གྱི་ལས་ཡུན་རིང་སྐུ་ཞབས་ཀི་ཤི་ཌ་མཆོག་ནས་གུ་ཡངས་དམངས་གཙོ་ཚོགས་པའི་སྣེ་ཁྲིད་དེ་རྒྱལ་ཡོངས་འོས་བསྡུར་རྒྱལ་ཁ་མ་བླངས་ཚེ། ཉི་ཧོང་ལ་བསྐྱར་དུ་དུས་ཡུན་ཐུང་ཐུང་ནང་སྲིད་བློན་གསར་བ་ཞིག་སླེབས་ངེས་པའི་གནས་སྟངས་ལ་ལྷུང་ཡོད་པ་རེད། ད་ལྟའི་ཆར་གཞུང་འཛིན་གུ་ཡངས་དམངས་གཙོ་ཚོགས་པར་ཕོག་བཞིན་པའི་སྐྱོན་བརྗོད་ཆེ་ཤོས་དེ་ཏོག་དབྱིབས་གཉན་རིམས་སྟངས་འཛིན་ཐད་ཡིན་སྟབས། སྲིད་བློན་གསར་པ་མཆོག་ནས་འཕྲོད་བསྟེན་བློན་ཆེན་དང་། ཏོག་དབྱིབས་གཉན་རིམས་འགོག་རྒོལ་དང་སྔོན་འགོག་སྨན་ཁབ་བློན་ཆེན་གཉིས་ཀ་གསར་པ་བསྐོ་རྒྱུ་ཡིན་འདུག་པ་མ་ཟད། གཉན་རིམས་འགོག་རྒོལ་གྱི་ཆེད་དུ་རྒྱལ་ཡོངས་ནང་གཞི་རྒྱ་ཆེ་བའི་སྐབས་འཕྲལ་སྨན་ཁང་འཛུགས་རྒྱུ་ཡིན་འདུག
འདས་ལོར་མང་ཚོགས་ཀྱིས་དགའ་མོས་ཆེན་པོ་བྱ་སའི་ཉི་ཧོང་གི་སྲིད་བློན་ཤིན་ཛོ་ཨ་བྷེ་ (Shinzo Abe)མཆོག་ནས་སྙུང་གཞིའི་རྐྱེན་པས་རྩ་དགོངས་ཞུས་རྗེས། ཁོང་གི་ཕྱག་གཡས་པ་ལྟར་གྱུར་བའི་སྐུ་ཞབས་ཡོ་ཤི་ཧེ་དྷི་སུ་གྷ་ (Yoshihide Suga) མཆོག་སྲིད་བློན་དུ་བསྐོས་ཡོད་ནའང་། འདས་པའི་ལོ་གཅིག་ནང་ཉི་ཧོང་ནང་གི་ཏོག་དབྱིབས་གཉན་རིམས་ཀྱི་འགོག་རྒོལ་ཐབས་ཇུས་དང་། ལྷག་པར་དུ་མང་ཚོགས་ཀྱི་བློ་འཚབ་དང་སྐྱོན་བརྗོད་སོགས་ལ་ལྟོས་མེད་ཀྱིས་ཨོ་ལིམ་ཕིག་རྩེད་འགྲན་འཚོགས་པ་སོགས་ལ་བརྟེན་ནས། རྒྱལ་ཡོངས་ནང་སྲིད་བློན་ཟུར་པ་སུ་གྷར་དགའ་མོས་བྱེད་མཁན་ཇེ་ཉུང་དུ་སོང་བ་དང་བསྟུན། འདི་ལོའི་ཉི་ཧོང་གི་རྒྱལ་ཡོངས་འོས་བསྡུའི་ཆེད་དུ་འདེམས་སྒྲུག་བྱེད་ཀྱི་ཡོད་པའི་གཞུང་འཛིན་གུ་ཡངས་དམངས་གཙོ་ཚོགས་པའི་མགོ་ཁྲིད་ཀྱི་འོས་མིའི་ཁོངས་སུ་ཞུགས་རྒྱུ་མིན་པའི་གསལ་བསྒྲགས་གནང་ཡོད་པར་བརྟེན། ཟླ་སྔོན་མའི་ཕྱི་ཚེས་ ༢༩ ཉིན་སྲིད་དོན་ཚོགས་པའི་མགོ་འཁྲིད་ཀྱི་འོས་བསྡུ་བསྡུས་ཏེ་སྐུ་ཞབས་ཀི་ཤི་ཌ་མཆོག་འོས་འདེམས་བྱུང་བ་ཞིག་ཡིན་པ་རེད།
ཉི་ཧོང་དེ་འཛམ་གླིང་ནང་གི་ཡར་ཐོན་དམངས་གཙོའི་རྒྱལ་ཁབ་ཅིག་ཡིན་ནའང་། བར་སྐབས་ཤིག་ལ་མ་གཏོགས་དམག་ཆེན་གཉིས་པའི་རྗེས་སུ་ཉི་ཧོང་གི་གཞུང་དེ་གུ་ཡངས་དམངས་གཙོ་ཚོགས་པས་བཟུང་ཡོད་པ་རེད། དེ་ཡང་ཕྱི་ལོ་ ༡༩༩༣ ནས་ ༡༩༩༤ བར་ལོ་གཅིག་རིང་ཁ་གཏད་སྲིད་དོན་ཚོགས་པའི་གཞུང་འཛིན་བཙུགས་པ་ཙམ་ལས། དེ་མིན་ཕྱི་ལོ་ ༡༩༥༥ ལོ་ནས་བཟུང་ཕྱི་ལོ་ ༢༠༠༩ བར་ཉི་ཧོང་གི་གཞུང་དེ་གུ་ཡངས་དམངས་གཙོ་ཚོགས་པས་བཟུང་ཞིང་། ཕྱི་ལོ་ ༢༠༠༩ ལོར་ཁ་གཏད་ཚོགས་པར་གཞུང་འཛིན་གྱི་གོ་སྐབས་བྱུང་ཡོད་ནའང་། ཕྱི་ལ་ ༢༠༡༡ ལོར་ཉི་ཧོང་དུ་ས་འགུལ་དང་ཆུ་ལོག་གི་གོད་ཆག་ཆེན་པོ་བྱུང་རྐྱེན་འོག་གཞུང་འཛིན་ཚོགས་པར་རྒྱབ་སྐྱོར་མ་ཐོབ་པ་དང་། ཕྱི་ལོ་ ༢༠༡༢ ལོར་ཤིན་ཛོ་ཨ་བྷེ་མཆོག་གིས་སྣེ་ཁྲིད་པའི་གུ་ཡངས་དམངས་གཙོ་ཚོགས་པ་གཞུང་འཛིན་དུ་བསྐྱར་ལོག་བྱུང་སྟེ། སྐུ་ཞབས་ཤིན་ཛོ་ཨ་བྷེ་མཆོག་ཉི་ཧོང་གི་ལས་ཡུན་རིང་ཤོས་ཀྱི་སྲིད་བློན་དུ་གྱུར་ཡོད་པ་རེད།
སྤྱིར་དམངས་གཙོའི་རྒྱལ་ཁབ་གཞན་དང་མི་འདྲ་བར་ཉི་ཧོང་གི་ཆབ་སྲིད་ནང་སྲིད་བློན་བརྗེ་བསྒྱུར་གྱི་དོན་རྐྱེན་བསྟུན་མར་བྱུང་ཡོད་པ་རེད། དེ་ཡང་འཛམ་གླིང་དམག་ཆེན་གཉིས་པའི་རྗེས་ཉི་ཧོང་གི་སྲིད་བློན་གྱི་ལོ་ཡུན་ལོ་ལྔ་ཟིན་མཁན་གྱི་སྲིད་བློན་ལྔ་མ་གཏོགས་བྱུང་མེད་པ་རེད། དེ་ཡང་ཕྱི་ལོ་ ༡༩༨༧ ལོ་ནས་ ༢༠༠༡ བར་ལོ་ ༡༤ རིང་ཉི་ཧོང་ལ་སྲིད་བློན་ ༡༠ བྱུང་ཡོད་ཅིང་། ཕྱི་ལོ་ ༢༠༠༡ ལོར་མི་མང་གི་རྒྱབ་སྐྱོར་ཚད་མཐོན་པོ་ཐོན་པའི་སྲིད་བློན་ཇུ་ནི་ཆི་རོ་ཀོའི་ཛུ་མི་ (Junichiro Koizumi) མཆོག་གིས་ལས་ཡུན་ཆ་ཚང་རིང་སྲིད་བློན་གྱི་འགན་འཁུར་ཞུས་ཏེ་ཕྱི་ལོ་ ༢༠༠༦ ལོར་རྒྱལ་ཡོངས་འོས་བསྡུ་བྱས་རྗེས། ཕྱི་ལོ་ ༢༠༡༦ བར་ལོ་དྲུག་རིང་ཡང་བསྐྱར་སྲིད་བློན་བརྗེ་བསྒྱུར་གྱི་དོན་རྐྱེན་བསྟུད་མར་བྱུང་སྟེ། ལོ་ ༦ དེའི་རིང་ཤིན་ཛོ་ཨ་བྷེ་ཚུད་པའི་སྲིད་བློན་ ༦ བྱུང་བ་རེད། ཕྱི་ལོ་ ༢༠༡༢ ལོར་ཤིན་ཛོ་ཨ་བྷེ་ཡང་བསྐྱར་སྲིད་བློན་དུ་འོས་འདེམས་བྱུང་རྗེས་འདས་ལོ་བར་ལས་འཁུར་རྒྱུན་མཐུད་ནས་ཞུས་པར་བརྟེན། ཉི་ཧོང་གི་སྲིད་བློན་བརྗེ་བསྒྱུར་གྱི་ལམ་ལུགས་དེ་མཇུག་བསྒྲིལ་ཡོད་པར་ཡིད་ཆེས་བྱས་ཡོད་ནའང། ཁོང་གི་རྗེས་འཛིན་སྲིད་བློན་སུ་གྷ་ཡིས་ཀྱང་ལོ་གཅིག་རྗེས་རྩ་དགོངས་ཞུས་པའི་དོན་རྐྱེན་དེས་ཉི་ཧོང་གི་ཆབ་སྲིད་དེ་སྔར་བཞིན་སྲིད་བློན་བརྗེ་བསྒྱུར་གྱི་ལམ་ལུགས་དང་བྲལ་མེད་པ་དྲན་གསོ་བྱས་ཡོད་པ་རེད།
ད་ལྟ་རང་ལོ་ ༦༤ ཡིན་པའི་ཉི་ཧོང་གི་སྲིད་བློན་ཐེངས་ ༡༠༠ པ་སྐུ་ཞབས་ཧྥུ་མིའོ་ཀི་ཤི་ཌ་ནི་ཆབ་སྲིད་མི་སྣའི་ཁྱིམ་ཚང་ནས་འཁྲུངས་པ་ཞིག་ཡིན་སྟེ། ཁོང་གི་པཱ་ལགས་དང་སྤོ་ལགས་གཉིས་ཀ་ཉི་ཧོང་གི་གྲོས་ཚོགས་འཐུས་མི་ཡིན་པ་རེད། ཕྱི་ལོ་ ༡༩༩༣ ལོར་ཉི་ཧོང་གི་གྲོས་ཚོགས་འཐུས་མིའི་འོས་འདེམས་ནང་རྒྱལ་ཁ་ཐོབ་སྟེ། ཉི་ཧོང་གི་སྲིད་དོན་ཚོགས་པ་ཆེ་ཤོས་གུ་ཡངས་དམངས་གཙོ་ཚོགས་པའི་གནད་ཡོད་མི་སྣར་གྱུར་བ་མ་ཟད། ཉི་ཧོང་གི་དེང་རབས་ལོ་རྒྱུས་ཁྲོད་ཀྱི་ཕྱི་འབྲེལ་བློན་ཆེན་ལས་ཡུན་རིང་ཤོས་དེར་གྱུར་ཡོད། འཛམ་གླིང་དམག་ཆེན་གཉིས་པའི་སྐབས་རྡུལ་ཕྲན་མཚོན་ཆ་གཡུག་སའི་ས་ཁུལ་ཧི་རོ་ཤི་མ་ (Hiroshima) ནས་ཡིན་པའི་རྐྱེན་གྱིས། སྐུ་ཞབས་ཀི་ཤི་ཌ་ནི་ཉི་ཧོང་གི་ཆབ་སྲིད་མི་སྣའི་ཁྲོད་དུ་རྡུལ་ཕྲན་མཚོན་ཆ་བཀོལ་སྤྱོད་ལ་དགག་པ་ཤུགས་ཆེ་ཤོས་རྒྱག་མཁན་ཞིག་ཡིན་པ་རེད།
གསར་འགོད་པ། པ་སངས་ཚེ་རིང་།
