རྒྱ་ནག་གིས་ཉིན་གྲངས་བཞིར་བསྟུད་མར་ཐའེ་ཝན་མཚོ་འགོག་ཏུ་འཐབ་འཁྲུག་གནམ་གྲུ་མང་ཤོས་མངགས་གཏོང་གིས་ཐའེ་ཝན་ལ་འཇིགས་སྐུལ་བྱས་ཡོད་འདུག
ཕྱི་ཟླ་ ༡༠ ཚེས་ ༡ ཉིན་རྒྱ་ནག་གི་རྒྱལ་སྟོན་དུས་ཆེན་འཚོགས་པ་དང་བསྟུན་ནས། རྒྱ་ནག་གཞུང་གིས་ཉིན་གསུམ་བསྟུན་མར་ཐའེ་ཝན་གྱི་བདེ་སྲུང་འོག་ཏུ་ཡོད་པའི་པ་ར་ཊ་སི་གླིང་ཕྲན་ (Pratas Islands) གྱི་མཁའ་ལམ་དུ་འཐབ་འཁྲུག་གནམ་གྲུ་ཤར་གཏོང་བྱས་ནས་དྲག་ཤུགས་ངོམ་གྱིན་ཡོད་པ་ལྟར། ཁ་སང་ཡང་བསྐྱར་རྒྱ་ནག་གཞུང་གི་དྲག་ཆས་གནམ་གྲུ་ ༥༦ ཐའེ་ཝན་གྱི་མཁའ་ལམ་དུ་སིམ་འཛུལ་བྱས་ནས་དྲག་ཤུགས་ངོམ་ཡོད་སྟབས། འདས་པའི་ཉིན་གྲངས་བཞི་བསྟུན་མར་རྒྱ་ནག་གཞུང་གིས་ཐའེ་ཝན་གྱི་མཁའ་ལམ་དུ་འཐབ་འཁྲུག་གནམ་གྲུ་ཁྱོན་ ༡༥༠ ཙམ་མངགས་གཏོང་བྱས་ནས་དྲག་པོའི་སྟོབས་ཤུགས་ངོམ་སྟེ་ཐའེ་ཝན་གཞུང་ལ་འཇིགས་སྐུལ་བྱས་ཡོད་ཅིང་། ཐའེ་ཝན་གཞུང་གིས་ རྒྱ་ནག་གིས་ཐའེ་ཝན་མཚོ་འགོག་ཁུལ་གྱི་ཞི་བདེ་དང་བརྟན་རླིང་ལ་དོ་ཕོག་ཚབས་ཆེན་བཟོ་ཡི་ཡོད་པའི་སྐྱོན་བརྗོད་བྱས་ཡོད་པ་རེད།
ཐའེ་ཝན་གྱི་རྒྱ་ནག་ལས་དོན་ཚན་པའི་མགྲིན་ཚབ་པ་ (Chiu chui cheng) ཡིས། ང་ཚོས་རྒྱ་ནག་གཞུང་གིས་དྲག་སྤྱོད་དང་འགན་ཁུར་མེད་པའི་ལས་དོན་དེ་དག་གང་མགྱོགས་མཚམས་འཇོག་བྱ་དགོས་པའི་འབོད་སྐུལ་ཞུ་ཡི་ཡོད། རྒྱ་ནག་གཞུང་གིས་ཐའེ་ཝན་མཚོ་འགོག་ཁུལ་དུ་ཕྱོགས་གཉིས་བར་རྙོག་དྲ་བཟོས་ཏེ། ཐའེ་ཝན་གྱི་བདེ་འཇགས་དང་ཁྲིམས་སྒྲིག་ལ་སྡིག་ར་སྐུལ་གྱི་ཡོད་པས། ཐའེ་ཝན་གྱིས་ནམ་ཡང་རྒྱ་ནག་གི་འཇིགས་སྐུལ་ལ་ངོས་ལེན་བྱ་རྒྱུ་མིན། ཞེས་ལན་འདེབས་བྱས་འདུག
རྒྱ་ནག་གཞུང་གིས་ཐའེ་ཝན་མཚོ་འགོག་ཁུལ་དུ་མཁའ་དམག་གི་དྲག་ཤུགས་རྔམ་སྟོན་བྱས་པ་ནི་ཨ་རིར་ཉེན་བརྡ་ཞིག་ཡིན་ཚུལ་དང་འབྲེལ། རྒྱ་ནག་ཕྱི་སྲིད་བློན་ཆེན་ལྷན་ཁང་ཟེར་བས། ཨ་རིས་ཐའེ་ཝན་གྱི་རང་བཙན་སྲུང་སྐྱོབ་བྱེད་པར་ཇུས་གཏོགས་གང་ཡང་མེད་པས། རྒྱ་ནག་གིས་ཐའེ་ཝན་གྱི་རང་བཙན་དང་འབྲེལ་བའི་ལྐོག་ཇུས་ཀུན་ལ་ཐར་ལམ་མེད་པའི་རྒོལ་ལན་སློག་རྒྱུ་ཡིན། ཞེས་ཨ་རིས་འཕྲད་མར་ཐའེ་ཝན་རང་བཙན་ལ་རྒྱབ་སྐྱོར་དང་སྐུལ་མ་བྱ་རྒྱུ་མཚམས་འཇོག་དགོས་པའི་ཉེན་བརྡ་བཏང་ཡོད་འདུག
གནད་དོན་འདིའི་ཐད་གནས་དོན་དབྱེ་ཞིབ་པ་ཚོས། ཐའེ་ཝན་རང་བཙན་གཙང་མའི་གཞུང་འཛིན་ཚོགས་པར་རྒྱབ་སྐྱོར་བྱེད་མཁན་ཇེ་མང་དུ་འགྲོ་མུས་ཡིན་པར་བརྟེན། རྒྱ་ནག་གཞུང་གིས་ཐའེ་ཝན་གྱི་སྲིད་ཇུས་ལ་འཇིགས་སྐུལ་དང་སེམས་འཚབ་ཇེ་ཆེར་ཕྱིན་ཡོད་ཅིང་། སྲིད་འཛིན་ཚའེ་ཡེ་ཝན་གྱིས་བདམས་པའི་སྲིད་ཇུས་ལ་ངོས་ལེན་བྱ་འདོད་མེད་པའི་རྣམ་འགྱུར་སྟོན་གྱི་ཡོད་པའི་ཚོད་དཔག་བྱེད་ཀྱི་ཡོད་པ་རེད་འདུག
དཔལ་ལྡན།
