འཆར་ཅན་ལོ་རེར་གཏོང་སྲོལ་ཡོད་པའི་རྒྱ་གར་རྒྱལ་ཡོངས་ཀྱི་ཡིག་རྒྱུགས་དེ་དུས་ཚིགས་གཅིག་ནས་གཉིས་ལ་བགོས་ཡོད་སྟབས། ད་ལྟ་ནས་བཙན་བྱོལ་བོད་མིའི་སློབ་གྲྭ་ཁག་གིས་སློབ་མ་རྣམས་ལ་ལམ་སྟོན་གྱི་གཙོས་གྲ་སྒྲིག་ཨང་གསར་རེད་འདུག
རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ (CBSE) ཀྱིས། འཆར་ཅན་ལོ་རེའི་ལོ་མཇུག་ཏུ་རྒྱ་གར་རྒྱལ་ཡོངས་ཀྱི་ཡིག་རྒྱུགས་གཏོང་སྲོལ་ཡོད་པའི་སྒྲོམ་གཞིར་འགྱུར་བ་བཏང་སྟེ་དུས་ཚིགས་གཅིག་ནས་གཉིས་ལ་བགོས་ཡོད་པ་དང་། ཕྱི་ལོ་ ༢༠༢༢ ལོའི་རྒྱ་གར་རྒྱལ་ཡོངས་ཀྱི་འཛིན་རིམ་ ༡༠ པ་དང་ ༡༢ པའི་ཡིག་རྒྱུགས་དེ། འདི་ལོའི་ཕྱི་ཟླ་ ༡༡ དང་ ༡༢ ནང་དུས་ཚིགས་དང་པོའི་ཡིག་རྒྱུགས་དང་། ཕྱི་ལོ་ ༢༠༢༢ ལོའི་ཟླ་ ༣ དང་ ༤ པའི་ནང་དུས་ཚིགས་གཉིས་པའི་ཡིག་རྒྱུགས་གཏོང་གཏན་འཁེལ་ཡོད་འདུག
དེ་རིང་འདི་གའི་གསར་འགོད་པས་སམ་བྷོ་ཊའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་སུ་ད་ལྟའི་ཆར་འཛིན་རིམ་ ༡༠ པ་དང་ ༡༢ པའི་རྒྱལ་ཡོངས་ཡིག་རྒྱུགས་གཏོང་ཕྱོགས་ཐད་འགྱུར་བ་ཕྱིན་ཡོད་སྟབས། གྲ་སྒྲིག་ག་འདྲ་གནང་གི་ཡོད་མེད་དྲིས་སྐབས། ད་ལོར་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ནས་ (CBSE) ལམ་སྟོན་ཕེབས་པ་ལྟར་ཡིག་རྒྱུགས་ཐད་འགྱུར་བ་ཏོག་ཙམ་ཕྱིན་ཡོད་པས། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་དུས་ཚིགས་དང་པོ་དང་གཉིས་པའི་ནང་ག་རེ་གནང་དགོས་པ་ཆ་ཚང་ལམ་སྟོན་ཡོད་པ་གཞིར་བཟུང་གིས་ང་ཚོས་ཤར་སྐྱོད་གནང་གི་ཡོད། ཅེས་དང་། སམ་བྷོ་ཊའི་ནང་འཛིན་རིམ་བཅུ་པའི་སློབ་གྲྭ་ ༩ ཡོད་པའི་ནང་སློབ་ཕྲུག་ ༢༠༧ ནས་ཡིག་རྒྱུགས་ནང་མཉམ་ཞུགས་གནང་གི་ཡོད་པ་དང་། འཛིན་རིམ་བཅུ་གཉིས་ཀྱི་སློབ་གྲྭ་ ༤ ཡོད་པའི་ནང་སློབ་ཕྲུག་ ༡༢༤ ཡིག་རྒྱུགས་ནང་མཉམ་ཞུགས་གནང་གི་ཡོད་སྐོར་བརྗོད་བྱུང་།
ཡང་གསར་འགོད་པས་བོད་ཁྱིམ་སློབ་གྲྭའི་ཤེས་ཡོན་འགན་འཛིན་བསོད་ནམས་སྲིད་ཆོས་ལགས་སུ་གནད་དོན་དེའི་ཐད་བཀའ་འདྲི་ཞུས་པར་ཁོང་གིས། དེ་སྔ་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་འཛིན་རིམ་ ༡༠ དང་ ༡༢ སློབ་ཚན་ནང་དུས་ཚིགས་དང་པོ་དང་དུས་ཚིགས་གཉིས་པའི་སློབ་ཚན་གང་ཡོད་པ་རྣམས་གཏན་འབེབས་བྱས་ཟིན་པ་རེད། ད་དུང་སློབ་ཁྲིད་གནང་སྟངས་ནི་དུས་རྒྱུན་ལྟར་གཅིག་མཚུངས་རེད། འོན་ཀྱང་ཡིག་རྒྱུགས་གཏོང་སྟངས་ཀྱི་ཐོག་ལ་ཁྱད་པར་ཏོག་ཙམ་ཡོད་པ་རེད། ང་ཚོས་ཤེས་རྟོགས་བྱུང་བ་ནི་དུས་ཚིགས་དང་པོ་དེ་ཕྱི་ཟླ་ ༡༡ གི་དཀྱིལ་ནས་ཡིག་རྒྱུགས་གཏོང་རྒྱུ་ཡིན་པ་དང་དུས་ཚིགས་གཉིས་པ་དེ་ཕྱི་ཟླ་ ༣ དང་ ༤ ནང་གཏོང་རྒྱུ་རེད་འདུག དེ་ཡང་རྒྱ་གར་དབུས་གཞུང་གིས་ལམ་སྟོན་ཕེབས་པ་ལྟར་འབྲེལ་ཡོད་སློབ་སྤྱི་དང་དགེ་རྒན་ཚོར་གསལ་བཤད་ཆ་ཚང་ཞུས་ཟིན་པ་ཡིན། དེ་བཞིན་སློབ་ཚན་གཏན་འབེབས་གང་གནང་བ་དེའི་སྐོར་གསལ་བཤད་ཕྱིན་ཚར་ཡོད་རེད་བསམ་གྱི་འདུག ད་དུང་དྲི་བ་ཡོང་སྟངས་དང་ལན་རྒྱག་སྟངས་ལ་འགྱུར་བ་ཏོག་ཙམ་ཡོད་པས་ཕྲུ་གུ་ཚོར་འགྲེལ་བརྗོད་ཆ་ཚང་བརྒྱབ་ཚར་བ་རེད། ཅེས་བརྗོད་བྱུང་།
སྤྱིར་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་པ་དང་བཅུ་གཉིས་པའི་ཡིག་རྒྱུགས་དུས་ཚིགས་གཉིས་ལ་འགོས་པ་ཙམ་ལས། སློབ་ཕྲུག་གི་བསླབ་གཞིར་འགྱུར་བ་ཕྱིན་མེད་པ་དང་། རང་རེའི་བཙན་བྱོལ་བོད་མིའི་སློབ་གྲྭ་ཁག་གིས་འབྲེལ་ཡོད་མངའ་སྡེ་སོ་སོའི་བཀོད་ཁྱབ་ལམ་སྟོན་གཞིར་བཟུང་། འཛིན་རིམ་བཅུ་པ་དང་བཅུ་གཉིས་པའི་སློབ་མ་ཡོངས་སློབ་གྲྭར་འཛིན་གྲྭ་འཚོགས་མུས་ཡིན་པ་མ་ཟད། ཏོག་དབྱིབས་གཉན་རིམས་ཀྱི་ལམ་སྟོན་གཞིར་བཞག་ཐོག དེ་སྔ་ནས་དྲ་ལམ་བརྒྱུད་སློབ་ཁྲིད་གནང་དགོས་པའི་རིགས་ལ་ཆད་ལྷག་མེད་པར་དྲ་ཐོག་སློབ་ཁྲིད་དང་། སློབ་གྲྭར་ཡོད་པའི་དགེ་སློབ་ཚང་མས་ཁ་རས་གྱོན་པ་དང་རྒྱང་ཐག་འཇོག་པ་སོགས་སློབ་གསོའི་བྱ་བཞག་མུ་མཐུད་སྐྱོང་གི་ཡོད་འདུག
རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ནས་ཕྱི་ལོ་ ༢༠༢༢ ལོའི་རྒྱ་གར་རྒྱལ་ཡོངས་ཀྱི་འཛིན་རིམ་ ༡༠ པ་དང་ ༡༢ པའི་ཡིག་རྒྱུགས་ཆེན་མོའི་སྒྲོམ་གཞི་གསར་པ་བཟོས་པར་བརྟེན། སྤྱི་ཚོགས་ནང་དུས་ཚིགས་དང་པོའི་ཡིག་རྒྱུགས་དྲ་ལམ་དང་སློབ་གྲྭར་དངོས་སུ་གཏང་རྒྱུ་ཡིན་མིན། དེ་བཞིན་དུས་ཚིགས་དང་པོ་དང་དུས་ཚིགས་གཉིས་པའི་ཡིག་རྒྱུགས་དེ་གཉིས་ཀྱི་བརྒྱ་ཆ་བགོ་སྟངས་གང་འདྲ་ཆགས་ཀྱི་ཡོད་མེད། ཡིག་རྒྱུགས་ག་དུས་གཏོང་གི་ཡོད་མེད་སོགས་སློབ་ཕྲུག་ཚོར་དོགས་གཞི་མང་པོ་བྱུང་གི་ཡོད།
གསར་འགོད་པ། བསྟན་འཛིན་ཕུར་བུ།
