ཨ་ཧྥེ་རི་ཁ་ཡིན་པའི་བརྩམས་སྒྲུང་རྩོམ་པ་པོ་སྐུ་ཞབས་ཨབ་དྷུལ་ར་ཛག་གྷུར་ནཱ་ཡིས་གཙོ་བོ་མི་སེར་སྤེལ་ཡུལ་རིང་ལུགས་ཀྱི་ཤུགས་རྐྱེན་དང་དཀྱིལ་ཤར་ཡུལ་གྲུའི་མཚོ་འགག་གི་སྐྱབས་བཅོལ་བ་རྣམས་ཀྱི་ལས་དབང་མཚོན་པའི་བརྩམས་སྒྲུང་བརྩམས་པར་བརྟེན་ནོ་སྦེལ་རྩོམ་རིག་གཟེངས་རྟགས་ཐོབ་ཡོད་འདུག
‘The theme of the refugee’s disruption run throughout his work’ … Abdulrazak Gurnah. Photograph: Simone Padovani/Awakening/Getty Images
དེ་རིང་ནོ་སྦེལ་གཟེངས་རྟགས་ཚོགས་ཆུང་གིས་འདི་ལོའི་ནོ་སྦེལ་རྩོམ་རིག་གཟེངས་རྟགས་དེ། མི་སེར་སྤེལ་ཡུལ་རིང་ལུགས་ཀྱི་ཤུགས་རྐྱེན་དང་ཨ་ཧྤེ་རི་ཁ་དང་དཀྱིལ་ཤར་ཡུལ་གྲུའི་མཚོ་འགག་གི་སྐྱབས་བཅོལ་བ་རྣམས་ཀྱི་ལས་དབང་དམར་རྗེན་དུ་བཏོན་གནང་བའི་ངོས་འཛིན་འོག ཨ་ཧྥེ་རི་ཁ་ཤར་མའི་རྒྱལ་ཁབ་ཏན་ཛ་ནི་ཡ་ (tanzania) ནས་སྐྱེས་ཤིང་། ད་ལྟ་དབྱིན་ཡུལ་དུ་བཅའ་སྡོད་བརྩམས་སྒྲུང་རྩོམ་པ་པོ་སྐུ་ཞབས་ཨབ་དྷུལ་ར་ཛག་གྷུར་ནཱ་ (Abdulrazak Gurnah) ལགས་སུ་འབུལ་རྒྱུའི་གསལ་བསྒྲགས་བྱས་སོང་།
གཟེངས་རྟགས་ཚོགས་ཆུང་གི་གསལ་བསྒྲགས་སྟེང་། སྐུ་ཞབས་ཨབ་དྷུལ་ར་ཛག་གྷུར་ནཱ་ཡིས་དོན་འབྲས་མ་སོན་པའི་གྱེན་ལོག་བརྗོད་སྙིང་དུ་བྱས་པའི་བརྩམས་སྒྲུང་ཐོག་མ་གྱེས་ཁའི་དྲན་པ་ (Memory of Departure) ནས་ཉེ་ཆར་གྱི་བརྩམས་སྒྲུང་བརྗིད་ཉམས་ཅན་ (Magnificent) དང་སྐྱེ་བ་ཕྱི་མ་ (Afterlives)བཅས་ཀྱི་ནང་། ཕྱིའི་འཛམ་གླིང་གིས་ཨ་ཧྥེ་རི་ཁ་ཤར་མར་ལྟ་བའི་བསམ་ཚུལ་ནོར་འཁྲུལ་ཅན་བསལ་ཏེ་རྒྱུས་མངའ་མེད་པའི་ཨ་ཧྥེ་རི་ཁའི་གནས་སྟངས་ངོ་མ་གསལ་སྟོན་བྱས་ཡོད་པ་མ་ཟད། དུས་རབས་ཉི་ཤུའི་ནང་ཊན་ཛ་ནི་ཡར་འཚར་ལོངས་བྱུང་བའི་བྱིས་པ་ཞིག་གི་གཏམ་རྒྱུད་བརྗོད་དོན་དུ་བྱས་པའི་སྒྲུང་རིང་ལྷ་ཡུལ་ (Paradise) ཞེས་པ་དེ་ནི་ཁོང་གི་བརྩམས་ཆོས་བཞི་པ་དང་། ཁོང་ལ་རྩོམ་རིག་གི་སྟེང་ནས་གདེང་འཇོག་ཆེན་པོ་ཐོབ་སའི་ཚབ་མཚོན་བརྩམས་ཆོས་སུ་གྱུར་ཡོད་ལ། སྒྲུང་རིང་དེར་རྒྱལ་སྤྱིའི་ཐོག་གྲགས་པ་ཆེ་བའི་རྩོམ་རིག་གི་བྱ་དགའ་ (Booker Prize) ཡང་ཐོབ་མྱོང་ཡོད་པ་རེད།
བརྩམས་སྒྲུང་རྩོམ་པ་པོ་ཨབ་དྷུལ་ར་ཛག་གྷུར་ནཱ་ནི་དུས་རབས་ ༡༩ དང་༢༠ ནང་འཇར་མ་ནི་དང་དབྱིན་ཇིའི་མི་སེར་སྤེལ་ཡུལ་དུ་གྱུར་ཞིང་། ཕྱི་ལོ་ ༡༩༦༡ ལོར་རང་བཙན་ཐོབ་པའི་ཨ་ཧྥེ་རི་ཁའི་རྒྱལ་ཁབ་ཊན་ཛ་ནི་ཡ་ (Tanzania) གྱི་རང་སྐྱོང་ས་ཁུལ་ཛན་ཛི་བྷར་མཚོ་གླིང་ (Zanzibar Island) དུ་ཕྱི་ལོ་ ༡༩༤༨ ལོར་སྐྱེས་ཤིང་། ཕྱི་ལོ་ ༡༩༦༨ ནང་རང་ཡུལ་བཞག་སྟེ་དབྱིན་ཡུལ་དུ་སྐྱབས་བཅོལ་འགྲོ་དགོས་བྱུང་བ་དང་། ཕྱི་ལོ་ ༡༩༨༢ ལོར་ཀེན་ཊི་གཙུག་ལག་སློབ་གྲྭ་ཆེན་མོ་ནས་ (University of Kent) འབུམ་རམས་པའི་བསླབ་པ་མཐར་སོན་པ་དང། ཉེ་ཆར་རྒས་ཡོལ་མ་ཞུས་བར་དུ་ཀེན་ཊི་སློབ་ཆེན་དུ་དབྱིན་ཡིག་དང་མི་སེར་སྤེལ་ཡུལ་ཕྱི་མའི་རྩོམ་རིག་གི་སློབ་དཔོན་གནང་འདུག ཁོང་གིས་ད་བར་དབྱིན་ཡིག་སྟེང་ནས་སྒྲུང་རིང་ ༡༠ དང་སྒྲུང་ཐུང་ཁ་ཤས་བརྩམས་གནང་ཡོད་འདུག་ལ། འདས་ལོར་པར་སྐྲུན་འགྲེམ་སྤེལ་བྱས་པའི་སྐྱེ་བ་ཕྱི་མ་ (Afterlives) ཞེས་པའི་སྒྲུང་རིང་དེ་ནི་ཁོང་གི་བརྩམས་ཆོས་གསར་ཤོས་དེ་ཆགས་ཀྱི་ཡོད་འདུག
གསར་འགོད་པ། བསྟན་འཛིན་ཕུར་བུ། པ་སངས་ཚེ་རིང་།
