སྐབས་བཅུ་བདུན་པའི་བོད་མི་མང་སྤྱི་འཐུས་རྣམ་པས་བཅའ་ཁྲིམས་གཞིར་བཟུང་དམ་འབུལ་ཞུས་གནང་སོང་།

དེ་རིང་སྔ་དྲོར་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་མདུན་དུ་བར་བརྒལ་ཚོགས་གཙོ་མཆོག་ནས་དམ་འབུལ་ཞུས་གྲུབ་མཚམས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ་སྤྱི་འཐུས་རྣམ་པས་བཅའ་ཁྲིམས་གཞིར་བཟུང་བར་བརྒལ་ཚོགས་གཙོའི་མདུན་དུ་ལས་འཁུར་དམ་འབུལ་ཞུས་གནང་སོང་།

དེ་རིང་སྔ་དྲོ་ཆུ་ཚོད་ ༡༠།༣༠ སྟེང་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་བདུན་པའི་དགོངས་དོན་འོག སྐབས་བཅུ་དྲུག་པའི་སྤྱི་འཐུས་རྒྱུན་ལས་ནས་བསྐོ་གཞག་གནང་བའི་སྤྱི་འཐུས་ཟླ་བ་ཚེ་རིང་ལགས་ཀྱིས་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་མདུན་དུ་བར་བརྒལ་ཚོགས་གཙོའི་ལས་འཁུར་དམ་འབུལ་ཞུས་གནང་སོང་།

དམ་འབུལ་མཛད་སྒོའི་སྐབས་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས། སྤྱིར་བཏང་བྱས་ན་བར་བརྒལ་ཚོགས་གཙོའི་དམ་འབུལ་ལས་རིམ་དེ་ཕྱི་ལོ་ ༢༠༢༡ ཟླ་ ༦ ཚེས་ ༨ ཉིན་ཁྲིམས་ལུགས་གཞིར་བཟུང་གྲུབ་ཚར་ཡོད་པ་རེད། ཡིན་ན་ཡང་། ཁ་སང་ཚེས་ ༧ ཉིན་ཚོགས་དྲུང་ལས་ཁུངས་ནས་ཡིག་ཆུང་ཞིག་བཏང་བའི་ནང་བར་བརྒལ་ཚོགས་གཙོའི་དམ་འབུལ་ཕྱི་ལོ་ ༢༠༢༡ ཟླ་ ༡༠ ཚེས་ ༨ ཉིན་བཞེས་གནང་ཡོང་བ་ཞུ་ཞེས་བཀོད་འདུག དེར་ཁྲིམས་ཞིབ་ཁང་ནས་ཡིག་ལན་བཏང་སྟེ། བར་བརྒལ་ཚོགས་གཙོ་ནས་བཅའ་ཁྲིམས་དོན་ཚན་ཞེ་བདུན་པའི་དགོངས་དོན་ཁྲིམས་ཞིབ་པ་ཆེ་བའི་མདུན་དུ་དམ་འབུལ་ཞུས་ཟིན་སྟབས། དེ་ནས་ཞུ་དོན་བཞིན་བར་བརྒལ་ཚོགས་གཙོས་བསྐྱར་དུ་དམ་འབུལ་ཞུ་རྒྱུ་བཅའ་ཁྲིམས་སུ་གསལ་མི་འདུག་ཅེས་ལབ་ཡོད། དེ་རྗེས་ཚོགས་དྲུང་ལས་ཁུངས་ནས་བསྐྱར་དུ་ཡི་གེ་བཏང་སྟེ། བར་བརྒལ་ཚོགས་གཙོས་ཁྲིམས་ཞིབ་པ་ཆེ་བའི་མདུན་དམ་འབུལ་ཞུས་སྐབས། དམ་བཅའི་ཚིག་གཞི་ཇི་བཞིན་བྱུང་མེད་པ། དཔེར་ན་དྲང་བདེན་ལྷག་བསམ་བཟོད་མེད་ཀྱི་ཚབ་ཏུ་ལྷག་བསམ་མགོ་མེད་སོགས་གསུངས་པར་བརྟེན་ཞེས་བཀོད་འདུག དེའི་ཐོག་ཞིབ་འཇུག་བྱས་སྐབས། དེ་དུས་ཁྲིམས་ཞིབ་པ་ཆེ་བའི་མདུན་དམ་བཅའི་ཚིག་གཞི་གནང་བ་ཇི་བཞིན་བར་བརྒལ་ཚོགས་གཙོས་རྗེས་ཟློས་ཏག་ཏག་ཅིག་བྱུང་མེད་པ་དངོས་བདེན་རེད་འདུག སྐབས་དེར་ཁྲིམས་ཞིབ་པ་ཆེ་བས་དེའི་ཐོག་དོ་སྣང་བྱུང་མི་འདུག ལས་འཁུར་དམ་བཅའ་འབུལ་རྒྱུ་དེ་བཙན་བྱོལ་བོད་མིའི་བཅའ་ཁྲིམས་ཀྱི་བྱ་རིམ་ཞིག་ཡིན་པ་དང་། དམ་བཅའི་ཚིག་དོན་རྣམས་ནོར་འཁྲུལ་མེད་པའི་ཐོག་ནས་ལྗགས་ཀློག་ཁས་ལེན་གནང་དགོས་པ་ཡིན་སྟབས། དམ་བཅའི་ཚིག་གཞི་ནོར་འཁྲུལ་ཤོར་ཆགས་ཀྱི་མ་རེད། དེར་བརྟེན། ཕྱི་ལོ་ ༢༠༢༡ ཟླ་ ༡༠ ཚེས་ ༨ ཉིན་ནོར་འཁྲུལ་བྱུང་བའི་བར་བརྒལ་ཚོགས་གཙོའི་དམ་འབུལ་དེ་ཉིད་ཕྱིར་བསྡུ་བྱས་ཏེ། ད་ལྟ་བསྐྱར་དུ་དམ་འབུལ་གྱི་ལས་རིམ་འདི་གོ་སྒྲིག་བྱས་པ་ཡིན། ཞེས་འགྲེལ་བརྗོད་གནང་སོང་།

དེ་རྗེས་ཆུ་ཚོད་ ༡༡།༡༥ སྟེང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། བར་བརྒལ་ཚོགས་གཙོ་དབུ་བཞུགས་ཐོག་བདམས་ཐོན་སྤྱི་འཐུས་ཚང་མས་བཅའ་ཁྲིམས་དོན་ཚན་ཞེ་བདུན་པའི་དགོངས་དོན་འོག་སྐབས་བཅུ་བདུན་པའི་བོད་མི་མང་སྤྱི་འཐུས་ཀྱི་ལས་འཁུར་དམ་འབུལ་ཞུས་གནང་སོང་བ་དང་། སྐབས་དེར་བར་བརྒལ་ཚོགས་གཙོ་ཟླ་བ་ཚེ་རིང་མཆོག་གིས་ཚོགས་གཙོའི་གསུང་བཤད་གནང་སྐབས། ཐོག་མར་སྲིད་སྐྱོང་མཆོག་དང་སྤྱི་འཐུས་རྣམ་པར་འཚམས་འདྲི་ཞུས་པ་དང་སྦྲགས། དང་པོ་དེར་བདག་ཅག་གི་འདི་ཕྱི་གཉིས་ཀྱི་སྐྱབས་གནས་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་བཏང་བའི་ཐོག་ནས། སྐབས་བཅུ་བདུན་པའི་བོད་མི་མང་སྤྱི་འཐུས་ཡོངས་རྫོགས་བཅའ་ཁྲིམས་ཀྱི་དགོངས་དོན་བཞིན་དེ་རིང་དམ་འབུལ་ལེགས་གྲུབ་བྱུང་བར་ངས་བར་བརྒལ་ཚོགས་གཙོའི་ངོས་ནས་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ད་གནས་ཚུལ་མང་པོ་ཞུ་མ་དགོས་པར། དེ་རིང་ནས་བཟུང་ལོ་ལྔའི་རིང་ལ་ང་ཚོ་ཚང་མ་རྡོག་རྩ་གཅིག་སྒྲིལ་གནང་བའི་ཐོག་ནས་མང་ཚོགས་ཀྱིས་རེ་བ་དང་ཡིད་ཆེས་བྱས་པ་གཞིར་བཟུང་། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་ལྟར། བོད་མིའི་ཚབ་མཚོན་དང་སྤྱི་དོན་གྱི་ཐོག་ལ་ནུས་པ་མཉམ་སྤུངས་གནང་རྒྱུ་ནི་ང་ཚོའི་ལས་འགན་གཙོ་བོ་དེ་ཆགས་པ་རེད། དེར་བརྟེན། དེའི་ཐོག་ཚང་མས་གནང་ཐུབ་པའི་རེ་བ་ཞུ་ཡི་ཡོད། ཅེས་གསུངས་སོང་།

དེ་རིང་ཉིན་རྒྱབ་ཆུ་ཚོད་ ༢ སྟེང་བོད་མི་མང་སྤྱི་འཐུས་རྒྱུན་ལས་ཁང་དུ་བཅའ་ཁྲིམས་དོན་ཚན་ཞེ་ལྔ་བའི་དགོངས་དོན་གཞིར་བཟུང་། སྐབས་བཅུ་བདུན་པའི་སྤྱི་འཐུས་རྣམ་པས་སྤྱི་འཐུས་ལྷན་ཚོགས་ཀྱི་ཚོགས་གཙོ་དང་ཚོགས་གཞོན་གཉིས་གསང་བའི་འོས་བསྡུ་བྱ་གཏན་འཁེལ་ཡོད་པ་དང་། སང་ཉིན་ཕྱི་ཚེས་ ༩ ཉིན་གྱི་ཞོགས་པའི་ཆུ་ཚོད་ ༩ སྟེང་སྤྱི་འཐུས་ཚོགས་གཙོ་དང་ཚོགས་གཞོན་གཉིས་ནས་ཁྲིམས་ཞིབ་པ་ཆེ་བའི་མདུན་དུ་ལས་འཁུར་དམ་འབུལ་ཞུ་གཏན་འཁེལ་ཡོད་པ་རེད།

གསར་འགོད་པ། སྐལ་བཟང་སྦྱིན་པ།