སེམས་མ་འདུལ་བའི་དབང་གིས་ལས་ངན་པ་བསགས་ཏེ་སྡུག་བསྔལ་ཡོང་གི་ཡོད་རེད།

༧གོང་ས་མཆོག་ནས་ང་ཚོའི་སངས་རྒྱས་པའི་གཞུང་གི་ནང་ནས་བདག་ཉིད་བདག་གི་མགོན་ཟེར་གྱི་ཡོད་པ་ལྟར་སོ་སོའི་མ་འོངས་པར་བདེ་བ་དང་སྡུག་བསྔལ་གང་འདྲ་ཡོང་རྒྱུ་དེ་སོ་སོའི་ལག་པར་ཡོད་པ་རེད་ཅེས་གསུངས།

དེ་རིང་ནས་ཉིན་གཉིས་རིང་༧གོང་ས་མཆོག་གིས་ཐའེ་ཝན་གྱི་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་བ་བཏབ་པ་ལྟར། དྲ་ལམ་བརྒྱུད་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་གསུང་ཆོས་དང་དྲི་བར་བཀའ་ལན་སྩལ་གནང་སོང་།

ཐོག་མར་༧རྒྱལ་བ་རིན་པོ་ཆེ་མཆོག་གིས། ཐའེ་ཝན་གྱི་ཆོས་གྲོགས་ངོ་ཤེས་རྙིང་པ་དེ་འདྲར་ཐུག་པར་དགའ་པོ་ཞེ་དྲགས་བྱུང་། ང་རང་ཚོའི་ཆོས་ཕྱོགས་ཀྱི་ཐོག་ནས་བླ་མ་དང་སློབ་མའི་འབྲེལ་བ་བྱུང་བ་དེ་དག་གི་རེ་བ་འདི་ཚེ་རབས་ནས་ཚེ་རབས་བར་དུ་བསྡད་ཀྱི་རེད། དེར་བརྟེན་དེ་རིང་བསྐྱར་དུ་ཐུག་པར་དགའ་པོ་ཞེ་དྲགས་བྱུང་། ཐུགས་རྗེ་ཆེ་ཟེར་གྱི་ཡིན། དེ་རིང་གི་བཀའ་ཆོས་འདི་རྟེན་འབྲེལ་བསྟོད་པ་བཤད་རྒྱུ་དེ་རེད། རྟེན་འབྲེལ་བསྟོད་པའི་གཞུང་མ་གསུང་གོང་དུ་སྤྱི་བཤད་ཅིག་བཤད་འདོད་བྱུང་སོང་། དེ་ཡང་ལོ་ ༢༥༠༠ གོང་ལ་སངས་རྒྱས་བཅོམ་ལྡན་འདས་རྒྱ་གར་དུ་ཆོས་སྟོན་པའི་དོན་དུ་ཕེབས་པ་རེད། ང་ཚོའི་སངས་རྒྱས་པའི་གཞུང་གི་ནང་ནས་བདག་ཉིད་བདག་གི་མགོན་ཟེར་གྱི་ཡོད་རེད། སོ་སོའི་མ་འོངས་པར་བདེ་བ་སྡུག་བསྔལ་གང་འདྲ་ཡོང་རྒྱུ་དེ་སོ་སོའི་ལག་པར་ཡོད་པ་རེད། དེ་ཡང་། བདག་ཉིད་བདག་གི་མགོན་ཡིན་གྱི། གཞན་ལྟ་སུ་ཞིག་མགོན་དུ་འགྱུར། ཞེས་གསུངས་ཀྱི་ཡོད་རེད། དེར་བརྟེན་བཅོམ་ལྡན་འདས་ཀྱིས་བླང་དོར་གྱི་གནད་བསྟེན་པ་རེད། ང་རང་ཚོ་རྗེས་འཇུག་གི་གདུལ་བྱ་ཚོས་བཅོམ་ལྡན་འདས་ཀྱི་བླང་དོར་གྱི་གནད་བསྟེན་པ་འདི་དག་ལག་ལེན་བསྟར་པས་གསང་ལམ་གྲོལ་རྒྱུ་ཆགས་ཀྱི་ཡོད་པ་རེད་མ་གཏོགས། སྟོན་པ་སངས་རྒྱས་ཁོང་རང་གིས་བྱེད་ནུས་གཅིག་པོའི་ཐོག་ནས་གསང་ལམ་གྲོལ་ཐུབ་རྒྱུ་ཡོང་པ་ཡོད་མ་རེད། ཅེས་གསུངས་སོང་།

ཡང་༧གོང་ས་མཆོག་གིས། བཅོམ་ལྡན་འདས་ཀྱིས་དང་པོ་བདེན་བཞིའི་ཆོས་འཁོར་གནང་སྟེ་བདེན་བཞིའི་རྣམ་གཞག་གསུངས་པ་རེད། རྒྱུ་མཚན་ནི་ང་ཚོས་སྡུག་བསྔལ་མི་འདོད་པ་དང་བདེ་བ་འདོད་ཀྱི་ཡོད་རེད། བདེ་བ་དང་སྡུག་བསྔལ་ཟེར་བ་དེ་རྒྱུ་དང་རྐྱེན་ལ་བརྟེན་ནས་ཡོང་བ་མ་གཏོགས་གློ་བུར་དུ་བྱུང་བ་མ་རེད། དེར་བརྟེན་དང་པོ་སྡུག་བསྔལ་ཤེས་པར་བྱ། དེ་ཡང་སྡུག་བསྔལ་ལ་རིམ་པ་གསུམ་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་ཟེར་ནས་སྡུག་བསྔལ་ཕྲ་རགས་མང་པོ་བཤད་ཀྱི་ཡོད་པ་རེད། དང་པོ་སྡུག་བསྔལ་ཤེས་དགོས་རེད། ང་རང་ཚོའི་མི་འདོད་པའི་སྡུག་བསྔལ་འདི་ལས་གྲོལ་བར་སྔོན་ལ་མི་འདོད་པའི་སྡུག་བསྔལ་གྱི་རིམ་པ་གང་འདྲ་ཡོད་པ་ཞིབ་ཚགས་པོའི་ཐོག་ནས་ཤེས་དགོས་རེད། དེ་ནས་སྡུག་བསྔལ་འདི་རྒྱུ་མེད་རྐྱེན་མེད་ཀྱི་ཐོག་ནས་བྱུང་བ་མ་རེད། ཕྱིའི་རྒྱུ་དང་རྐྱེན་ལ་བརྟེན་ནས་བྱུང་བའང་མ་རེད། རང་གི་སེམས་མ་འདུལ་བའི་དབང་གིས་སྡུག་བསྔལ་ཡོང་གི་ཡོད་པ་རེད། དེར་བརྟེན་སེམས་མ་འདུལ་བའི་དབང་གིས་ལས་ངན་པ་བསགས་པས་སྡུག་བསྔལ་ཡོང་གི་ཡོད་པ་རེད། དེ་འདྲ་སོང་ཙང་ལས་ཀྱི་ཀུན་འབྱུང་དང་ཉོན་མོངས་པའི་ཀུན་འབྱུང་ཟེར་བ་གསུང་ཡོང་གི་ཡོད་པ་རེད། སྡུག་བསྔལ་མི་འདོད་པ་དང་སྡུག་བསྔལ་ལས་ཐར་འདོད་ཀྱི་བློ་ཡོད་རེད་ལ། སྡུག་བསྔལ་ལས་ཐར་རྒྱུའི་ཐབས་ཤེས་འདི་སྡུག་བསྔལ་གྱི་རྒྱུ་རྩད་གཅོད་ནས་སྡུག་བསྔལ་ལས་ཐར་བ་བྱེད་དགོས་རེད། གལ་ཆེ་ཤོས་འདི་སྡུག་བསྔལ་ལས་གཏན་དུ་ཐར་རྒྱུ་ཡོད་མེད་དེ་རེད། སྡུག་བསྔལ་ཤེས་པར་བྱ། ཀུན་འབྱུང་སྤོང་བར་བྱ། འགོག་པ་སྔོན་དུ་བྱ་ཟེར་བའི་འགོག་བདེན་ཐོབ་རྒྱུ་དེ་གསུངས་ཡོད་པ་རེད། འདི་ནི་སངས་རྒྱས་པའི་ཆོས་ཀྱི་ཁྱད་ཆོས་གཟབ་ནན་ཞིག་རེད་འདུག  འགོག་བདེན་ཟེར་བ་མེད་ན་ཆོས་བྱས་ནས་ཉི་མ་གང་སྐྱེལ་ལྟ་བུ་རེད། ཡང་ན་སངས་རྒྱས་ལ་སྐྱབས་སུ་མཆིས་ནས་སྨོན་ལམ་རེ་ཞིག་བརྒྱབ་རྒྱུ་མ་གཏོགས་མེད་པ་ལྟ་བུ་རེད། འགོག་བདེན་ཟེར་བ་ཡོད་པས་སྡུག་བསྔལ་གྱི་རྒྱུ། ལས་ཀྱི་ཀུན་འབྱུང་དང་ཉོན་མོངས་པའི་ཀུན་འབྱུང་ཟེར་བ་དེ་སྤོངས་ཐུབ་རྒྱུ་ཡོད་རེད། རྩ་བའི་ནང་། ལས་དང་ཉོན་མོངས་ཟད་པའི་མཐར། ལས་དང་ཉོན་མོངས་རྣམ་རྟོག་ལས། དེ་དག་སྤྲོས་ལས་སྤྲོས་པ་ནི། སྟོང་པ་ཉིད་ཀྱིས་འགག་པར་འགྱུར། ཟེར་བ་འདི་གནད་འགག་ཆེན་པོ་རེད་འདུག  མགོན་པོ་ཀླུ་སྒྲུབ་ཀྱི་རྩ་བ་ཤེས་རབ་ཀྱི་འབྲེལ་བ་མང་པོ་ཡོད་པའི་ནང་ནས་འབྲེལ་བ་གསལ་ཤོས་གཅིག་ནི་དཔལ་ལྡན་ཟླ་བ་གྲགས་པའི་དབུ་མ་འཇུག་པ་ཆགས་ཀྱི་ཡོད་སྐོར་སོགས་གསུངས་སོང་།

དེ་ནས་དྲི་བ་དྲིས་ལན་སྐབས། ཆོས་ཞུ་བ་(Liu Chin Tsai) ལགས་ཀྱིས་ཉིན་རེའི་འཚོ་བའི་ནང་རྟེན་འབྱུང་གི་ལྟ་བ་ལ་ཉམས་ལེན་ཇི་ལྟར་བྱ་དགོས་པ་དང་རྟེན་འབྱུང་སྟོང་པ་གསུངས་པ་འདིས་གོ་ལའི་ཚ་དྲོད་དང་ཁོར་ཡུག་གི་ཉམས་རྒུད་ཆུང་དུ་གཏོང་རྒྱུའི་ཕན་ཐོགས་ཡོད་མེད་སྐོར་དྲིས་པར་༧གོང་ས་མཆོག་གིས། ངོས་རང་ཞོགས་པར་གཉིད་སད་པ་དང་ང་ཟེར་བ་ཞིག་བློ་ལ་བསླེབས་ཡོང་གི་འདུག  ང་ག་པར་འདུག་བསམ་བློ་བཏང་ན་ང་ཟེར་བ་འདི། ངས་མཐོང་བསྡད་པ་དེ་ངའི་ལུས་རེད་། ངའི་ངག་རེད། ངའི་སེམས་རེད། འོན་ཀྱང་ང་ག་པར་འདུག་ཟེར་ནས་བཙལ་ཡང་རྙེད་རྒྱུ་མི་འདུག ང་ཟེར་བ་མཛུབ་མོ་བཙུགས་ས་ཁྱོན་ནས་མེད་པ་ཆགས་ཡོང་དུས་ང་མེད་པ་མ་རེད། ང་ཡོད་རེད། གང་འདྲ་ཡོད་རེད་ཟེར་ན་ཕུང་པོ་ལ་བརྟེན་ནས་བཏགས་ཙམ་གཅིག་རེད་མ་གཏོགས་འགྲོ་ས་མི་འདུག་བསམ་པ་ཞིག་བློ་ལ་བསླེབས་ཡོང་གི་འདུག  རྟེན་ནས་འབྱུང་བ། རྟེན་ནས་བཏགས་པ་ཟེར་བ་དེ་རེད།  རྟེན་འབྱུང་སྟོང་པ་གསུངས་པ་འདིས་གོ་ལའི་ཚ་དྲོད་དང་ཁོར་ཡུག་གི་ཉམས་རྒུད་ཆུང་དུ་གཏོང་རྒྱུའི་ཕན་ཐོགས་ཟེར་བ་འདི་ཐད་ཀར་ཕལ་ཆེར་འབྲེལ་བ་ཨ་ཡོད། འདི་ཚོ་ཆོས་ཀྱི་སྐད་ཆ་བཤད་ཀྱི་ཡོད་རེད། གོ་ལའི་ཚ་དྲོད་འདི་ཚོས་གང་ཟག་སོ་སོའི་བསམ་བློའི་ནང་ལ་གཏི་མུག་བདེན་འཛིན་དང་འབྲེལ་བ་ཡོད་པ་རེད་དེ། འདི་ཡང་ཐ་སྙད་ཁོ་རང་གི་འགྲོ་སྟངས་ཤིག་རེད། དེར་བརྟེན་འཛམ་གླིང་གི་དྲོད་ཆེ་རུ་འགྲོ་ཡི་ཡོད་པ་དང་ཚ་དྲོད་རྐྱེན་གྱིས་ཁོར་ཡུག་ཉམས་རྒུད་འགྲོ་བ་དེ་ཚོའི་གྲས་སྟོང་ཉིད་ཀྱི་ལྟ་བ་དང་འབྲེལ་ནས་བསམ་བློ་གཏང་དགོས་ཀྱི་མི་འདུག  ཚ་དྲོད་ག་པར་ཡོད་པ་དང་ཚ་དྲོད་ཟེར་ན་ག་རེ་ཟེར་ནས་བསམ་བློ་བཏང་ན་སྟོང་ཉིད་ཀྱི་སྐད་ཆ་བསླེབས་ཀྱི་ཡོད་པ་རེད། སྤྱིར་བཏང་འཛམ་གླིང་གི་ཚ་དྲོད་སྲོག་ཆགས་དུད་འགྲོ་ཚོས་ཤེས་ཀྱི་ཡོད་རེད། དུད་འགྲོ་ཚོས་སྟོང་ཉིད་ཀྱི་ལྟ་བ་ལ་དཔྱད་པ་བྱས་ཏེ་རྟེན་ནས་བཏགས་པའི་རྟེན་འབྱུང་ཤེས་པའི་ཐོག་ནས་ཚ་དྲོད་ལ་ཡིད་གཟབ་བྱ་རྒྱུའི་སྐད་ཆ་གང་ཡང་མ་རེད། ཅེས་བཀའ་ལན་གནང་སོང་།

གསར་འགོད་པ། བསྟན་འཛིན་ཕུར་བུ།