དེ་རིང་སྔ་དྲོ་ཆུ་ཚོད་ ༩།༣༠ སྟེང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཉིན་གྲངས་གཉིས་རིང་གི་གྲོས་ཚོགས་ཚོགས་དུས་དང་པོ་དངོས་སུ་མགོ་བཙུགས་ཏེ། སྔ་དྲོའི་ཚོགས་ཐུན་སྟེང་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ ༨ སྤྱི་མོས་གཏན་འབེབ་དང་། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་དོན་ཚན་ ༥ ཅན་ཞིག་གི་ཐོག་སྤྱི་ཡོངས་ནས་བགྲོ་གླིང་དང་། ཆེའི་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཞིག་ཚུད་མ་སོང་།
དེ་ཡང་ཚོགས་འདུའི་ཐོག་མར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གཏམ་བཤད་སྤེལ་དོན། ང་ཚོར་བཙན་བྱོལ་བོད་མིའི་བཅའ་ཁྲིམས་ཀྱིས་བསྐུར་བའི་འགན་དབང་གཙོ་བོ་དེ། བོད་དོན་བདེན་མཐའ་གསལ་ཐབས་དང་། བཙན་བྱོལ་སྤྱི་ཚོགས་ཀྱི་བདེ་དོན་ལ་གཟིགས་སྐྱོང་བྱ་རྒྱུ། གནས་སྐབས་བོད་ནང་གི་བོད་མིའི་དཀའ་ངལ་སེལ་རྒྱུ། དེ་བཞིན་བོད་ཀྱི་ཁོར་ཡུག་གི་གནས་སྟངས་བཅས་ཀྱི་ཐོག་ལ། བཙན་བྱོལ་སྒྲིག་འཛུགས་འཛིན་སྐྱོང་གི་ཐོག་ནས་ཡིན་ནའང་འདྲ། གྲོས་ཚོགས་ཀྱི་ལས་དོན་བྱེད་ཕྱོགས་ཡིན་ནའང་འདྲ་དམིགས་ཡུལ་དེའི་ཐོག་ནས་འགྲོ་ཐུབ་དགོས་པ་རེད། ཅེས་དང་། ད་ལན་དམིགས་བསལ་༧གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་གྲོས་ཆོད་ཅིག་ཁྱེར་ཡོད་པ་དང་། གྲོས་ཆོད་དེ་ནི་གཙོ་བོ་བར་ལམ་ང་ཚོའི་སྤྱི་ཚོགས་དང་སྒྲིག་འཛུགས་ཀྱི་གནས་སྟངས་སོགས་གང་ཅིའི་ཐད་ལ་དཀའ་ངལ་ཆེ་ཆུང་སྣ་ཚོགས་པ་ཕྲད་ནས་གྲོས་ཚོགས་འཚོག་མ་ཐུབ་པར་ཟླ་བ་ ༤ ལྷག་ཕྱིན་པ་རེད། དེར་བརྟེན་ང་ཚོས་འདེམས་ཐོན་འཐུས་མི་ནང་ཁུལ་ཚོགས་ཏེ་ལྷག་བསམ་རྣམ་དག་གིས་ནུས་པ་བཏོན་ཡོད་རེད་དེ། གཅིག་གྱུར་གྱི་བློ་མཉམ་པ་ཞིག་མ་རག་དུས་འུ་ཐུག་ཐབས་ཟད་ཀྱི་གནས་སྟངས་འོག་བཅའ་ཁྲིམས་དོན་ཚན་ ༡ པོའི་དགོངས་དོན་གྱི་ཐོག་ནས་༧སྐྱབས་མགོན་རིན་པོ་ཆེ་མཆོག་ལ་མཛད་དཀའ་མ་བཟོས་ཐབས་མེད་ཆགས་པ་རེད། ༧སྐྱབས་མགོན་རིན་པོ་ཆེ་མཆོག་ལ་ཡར་མཚན་འཁོད་སྙན་ཞུའི་ཐོག་ནས་སྙན་གསེང་ཞུས་པ་བཞིན། ཕྱིས་སུ་བཀའ་ཡིག་རིན་པོ་ཆེ་ཕྱིར་སྩལ་གནང་བ་གཞིར་བཟུང་གི་ཐོག་ནས་དེ་རིང་ང་ཚོའི་གྲོས་ཚོགས་འདི་རྒྱུན་ལྡན་ནང་བཞིན་འགྲོ་ཐུབ་པའི་གནས་སྟངས་ཆགས་པ་རེད། འདི་ཡང་༧སྐྱབས་མགོན་རིན་པོ་ཆེའི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་དུས། ང་ཚོས་དེར་བཀའ་དྲིན་རྗེས་དྲན་གྱི་གྲོས་ཆོད་གཅིག་དང་། དེ་དང་འབྲེལ་ནས་བར་ལམ་གྱི་གནས་སྟངས་ཀྱི་ཐོག་ནས་༧སྐྱབས་མགོན་རིན་པོ་ཆེ་མཆོག་ཐུགས་དམ་སད་རྐྱེན་དེ་འདྲ་བྱུང་བ་བཀའ་ཡིག་རིན་པོ་ཆེ་ནང་གསལ་བསྡད་ཡོད་རེད། དེ་ཚོའི་ཐོག་ནས་ང་ཚོས་མཐོལ་བཤགས་ཞུ་རྒྱུ་དང་རྒྱ་ཆེའི་མང་ཚོགས་ལའང་བཟོད་གསོལ་ཞུ་རྒྱུ། དེ་བཞིན་ང་ཚོའི་མ་འོངས་པའི་ལས་དོན་ཐོག་ལ་ནུས་པ་མཉམ་སྤུང་ཡོང་ཆེད་ཚང་མས་ཕྱར་གྲུ་མཉམ་འདེགས་ཞུ་ཐུབ་པར་ལས་ཀྱི་སྣེ་མོ་བ་གཙོས་པའི་རྒྱ་ཆེ་མང་ཚོགས་དང་བཅས་པས་འགན་འཁུར་བཞེས་དགོས་པའི་གནས་སྟངས་ཆགས་བསྡད་ཡོད་པ་རེད། ཅེས་གསུངས་སོང་།
ཡང་ཁོང་གིས། ང་ཚོའི་གྲོས་ཚོགས་ཀྱི་འགྲོ་སྟངས་འདི་ཕྱོགས་འགལ་ཚོགས་པ་དང་གཞུང་འཛིན་ཚོགས་པའི་རྣམ་པ་གང་ཡང་ཡོད་པ་མ་རེད། ང་ཚོ་དཀྱིལ་འཁོར་འདིའི་ནང་བསླེབས་ནས་དམ་བཅའ་ཕུལ་བ་ནས་བཟུང་སྟེ་བོད་ཀྱི་སྤྱི་མི་ཞིག་ཆགས་ཡོད་པ་རེད། དེར་བརྟེན་མཚམས་རེར་གྲོས་ཚོགས་ནང་ཆོལ་ཁའི་རྣམ་པ་དང་། གཞུང་འཛིན་དང་ཕྱོགས་འགལ་གྱི་རྣམ་པ་དེ་འདྲ་ཐོན་ཡོང་གི་འདུག དེ་ཚོའི་རིགས་ལ་ང་ཚོས་ཐུགས་གཟབ་གནང་དགོས་པ་དེ་གལ་ཆེན་པོ་རེད། ང་ཚོས་ལེགས་ཉེས་ཀྱི་རྣམ་དཔྱོད་རྩལ་དུ་བཏོན་ནས་འཛིན་སྐྱོང་དང་གྲོས་ཚོགས་ཀྱི་ལེགས་པའི་ཆ་གང་ཡང་རུང་བ་དེར་ལེགས་བརྗོད་དང་རྒྱབ་སྐྱོར་གནང་ཐུབ་དགོས་རྒྱུ་དང་། ཉེས་པའི་ཆ་གང་ནས་ཡོང་བ་ཡིན་ནའང་དེར་ལམ་སྟོན་དང་བྱ་ར་སྟངས་འཛིན་གནང་ཐུབ་པ་དགོས་པ་རེད། ཅེས་དང་། གྲོས་ཚོགས་ཀྱི་ལས་རིམ་སྐབས་སྤྱི་འཐུས་རྣམ་པས་རང་གི་དགོངས་ཚུལ་དང་དགོས་འདུན་རྣམས་གསལ་འདོན་བྱ་རྒྱུ་ལས། ཕན་ཚུན་དབར་ཚིག་མཚོན་འཕེན་པ་དང་སྐྱོན་འཛུགས་རིགས་མི་ཡོང་བ་གཙོ་འདོན་གནང་དགོས་པའི་རེ་སྐུལ་ཞུས་སོང་།
སྲིད་སྐྱོང་སྤེན་པ་ཚེ་རིང་མཆོག་ནས་དགའ་བསུའི་གཏམ་བཤད་སྤེལ་བའི་ནང་། བར་ལམ་ཟླ་ཤས་ནང་བཙན་བྱོལ་སྤྱི་ཚོགས་ནང་དཀའ་རྙོག་བྱུང་བ་རེད། དེ་ཡང་༧སྤྱི་ནོར་གོང་ས་སྐྱབས་མགོན་རིན་པོ་ཆེ་མཆོག་གི་བཀའ་ཡིག་ཕེབས་པ་བརྒྱུད་ནས་སེལ་ཐུབ་པ་བྱུང་བ་རེད། ད་ལྟ་བར་དུ་ང་ཚོའི་བཙན་བྱོལ་སྤྱི་ཚོགས་འདི་གང་ཡིན་པ་ཚང་མ་༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཡིན་པ་དེ་སྨྲོས་མེད་རེད། ང་ཚོས་དེ་ལྟར་ངོས་འཛིན་ཞུ་ཡི་ཡོད་ལ། བཀུར་འོས་སྤྱི་འཐུས་རྣམ་པས་ཀྱང་བཀའ་ཡིག་ཕེབས་པའི་རྗེས་ལ་གནས་ཚུལ་གཙང་མ་ཆགས་པའི་གསལ་བསྒྲགས་དང་། ལྷག་པར་དུ་མང་ཚོགས་ནང་ལ་དེའི་སྐོར་གླེང་སློང་མི་དགོས་པའི་གསལ་བསྒྲགས་བསྐྱངས་གནང་པ་རེད། ད་ལྟའི་དུས་ཚོད་འདི་ལ་རྒྱལ་སྤྱིའི་ཆབ་སྲིད་ཀྱི་གནས་བབ་དང་། རྒྱལ་སྤྱི་ཁྱོན་ཡོངས་ཀྱིས་རྒྱ་ནག་ལ་ལྟ་སྟངས། དེ་བཞིན་བོད་ནང་གི་ཛ་དྲག་གནས་སྟངས་དང་། བོད་དང་མཉམ་པའི་གནད་དོན་གཞན་ཡུ་གུར་མི་རིགས་དང་ཧོང་ཀོང་གི་གནད་དོན། གཞན་ཡང་ཉེ་ཆར་ཐའེ་ཝན་དང་རྒྱ་ནག་གཞུང་དབར་དྲག་པོའི་ཐབས་ཇུས་འདོན་བཞིན་ཡོད་པའི་གནས་ཚུལ་ཐོན་བཞིན་པའི་སྐབས་འདིར། བོད་ཕྱི་ནང་གཉིས་ཀྱི་བོད་མི་ཚང་མས་གོ་སྐབས་འདི་མ་བརླག་པར་དམ་འཛིན་བྱ་དགོས་པ་དེ་གལ་ཆེན་པོ་ཆགས་ཡོད། ལྷག་པར་དུ་འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་འདིས་བོད་ནང་གི་བོད་མི་ཚོའི་སྐུ་ཚབ་མཚོན་དགོས་ཀྱི་ཡོད་སྟབས། བོད་ནང་དཀའ་ངལ་ག་རེ་འཕྲད་ཀྱི་ཡོད་ནའང་འཛམ་གླིང་ལ་ཕྱིར་བསྒྲགས་བྱས་པ་བརྒྱུད་ནས་རྒྱབ་སྐྱོར་འཐོབ་དགོས་པར་བརྟེན། དེ་རིང་ནས་བཟུང་ང་ཚོས་འདས་པའི་དཀའ་རྙོག་གང་ཡིན་པ་དག་ལ་བསྙད་མི་དགོས་པར། མ་འོངས་པའི་གོམ་པ་མདུན་སྤོས་ཐོག་ལ་བསྐྱོད་དགོས། ཅེས་དང་། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་ཡིག་བརྒྱུད་ནས་ད་བར་ཕྲད་པའི་དཀའ་ངལ་དག་བསལ་ཟིན་པར་ངོས་འཛིན་ཞུ་ཡི་ཡོད་པ་དང་། གྲོས་ཚོགས་ར་བའི་ནང་དུ་འདས་ཟིན་པའི་དཀའ་རྙོག་ཐད་གླེང་སློང་མི་དགོས་པའི་རེ་སྐུལ་ཞུས་གནང་སོང་།
འདི་ལོར་སྤྱི་ལྷན་གྱི་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་ཁོངས་སུ། རྒྱ་གར་གྱི་ཆེས་མཐོའི་ཁྲིམས་ཁང་གི་ཁྲིམས་རྩོད་པ་དང་རྩོམ་པ་པོ་བོད་དོན་རྒྱབ་སྐྱོར་བ་སྐུ་ཞབས་ན་རེ་ཤི་མ་ཐུར་ (Naresh Mathur) ལགས་དང་། རྒྱ་གར་གྱི་སྤྱི་ཚོགས་ཞབས་ཞུ་བ་སྐུ་ཞབས་དྷ་ཝར་ཀོ་སན་ཌར་ནི་ (Dwarko Sundrani) ལགས། རྒྱ་གར་གཞུང་གི་ཁྲིམས་དོན་སྤྱི་ཁྱབ་ཟུར་པ་སྐུ་ཞབས་སོ་ལི་སོ་རབ་ཇི་ (Soli Sorabjee) ལགས། ལག་ནའོ་གྲོང་ཁྱེར་གྱི་སྤྱི་ཁྱབ་ཟུར་པ་འབུམ་རམས་པ་སྐུ་ཞབས་ཌའོ་ཇི་གྷུབ་ཏ་ (Dauji Gupta) ལགས། རྒྱ་གར་དབུས་གཞུང་གི་བློན་ཆེན་ཟུར་པ་སྐུ་ཞབས་ཅོ་དྷ་རི་ཨ་ཇིཏ་སིངྒ་ (Chaudhary Ajit Singh) ལགས། དེ་བཞིན་བོད་མི་མང་སྤྱི་ཟུར་རྒྱལ་ནོར་ཚེ་དབང་ལགས་དང་། སྤྱི་ཟུར་བདེ་སྐྱིད་སྒྲོལ་དཀར་ལགས། ཨེལ་སལ་ཝེ་ཌོར་རྒྱལ་ཁབ་ནས་ཡིན་པའི་ཁྲིམས་རྩོད་པ་གྲངས་ཅན་དང་བོད་དོན་རྒྱབ་སྐྱོར་བ་རྙིང་གྲས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr. Alfredo Martinez Moreno) ལགས་བཅས་ཡོད་འདུག
དེ་བཞིན་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་ཁྲོད། རྒྱ་ནག་དམར་གཞུང་གིས་བོད་ཞི་བའི་བཅིངས་འགྲོལ་ཟེར་བ་བཏང་ནས་ལོ་ངོ་ ༧༠ འཁོར་བ་སྒྲོག་བཞིན་ཡོད་ན་ཡང་། བོད་ཡུལ་རྒྱ་ཡུལ་དུ་བསྒྱུར་རྒྱུའི་མི་སེར་སྤེལ་བའི་སྲིད་བྱུས་འོག་རིག་གནས་གསར་བརྗེ་ཆེན་པོ་དང་། དམངས་གཙོ་བཅོས་བསྒྱུར་ཟེར་བ་སོགས་མི་སྤྱོད་ལས་འདས་པའི་གདུག་རྩུབ་ཀྱི་ལས་འགུལ་རིམ་པར་སྤེལ་ནས་བོད་ཀྱི་སྣོད་བཅུད་མི་རིགས་རིག་གཞུང་དང་བཅས་པ་ཡོངས་རྫོགས་རྩ་མེད་གཏོང་ཆེད་བོད་ནང་གི་རིག་གཞུང་གི་བསྟི་གནས་དགོན་སྡེ་སྟོང་ཕྲག་དྲུག་ལྷག་རྩ་གཏོར་དང་ཆོས་དད་རང་དབང་བཙན་འཕྲོག སྐད་ཡིག་ཉམས་དམས། རང་བྱུང་ཁོར་ཡུག་ལ་གཏོར་སྐྱོན། འགྲོ་བ་མིའི་ཐོབ་ཐང་ལ་རྡོག་རོལ་གྱིས་མི་འབུམ་ཕྲག་བཅུ་གཉིས་ལྷག་གི་ཚེ་སྲོག་འཕྲོག་པ་སོགས། གཞིས་བཞུགས་བོད་མི་རྣམས་ལ་འགྲོ་བ་མིའི་ཐོབ་ཐང་ཡེ་ནས་མེད་པར་དྲག་པའི་ལྕགས་སྒྲོག་བཅིངས་ནས་ད་བར་ཆེས་མུན་ནག་ངང་གནས་བཞིན་པ་ཞིག་ཏུ་ངོས་འཛིན་བྱ་རྒྱུ་ཡིན། ཞེས་དང་། ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་ལིམ་པིག་རྩེད་འགྲན་དེ་བཞིན་རྒྱ་ནག་གི་རྒྱལ་ས་པེ་ཅིན་དུ་འཚོག་གཏན་འཁེལ་ཡོད་པར་བརྟེན། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་ནས་འཛམ་གླིང་ཡོངས་ཁྱབ་ཏུ་ཞུ་གཏུག་གི་ལས་འགུལ་སྤེལ་གལ་ཆེ་སྐོར་བཅས་རེད་འདུག
གསར་འགོད་པ། པ་སངས་ཚེ་རིང་།
