རྒྱ་དཀར་ནག་གཉིས་བར་ས་མཚམས་རྩོད་རྙོག་ཞི་འགྲིག་ཡོང་ཐབས་སུ་ཉིན་གཅིག་རིང་གྲོས་མོལ་བྱས་ཡོད་ཀྱང་། རྒྱ་ནག་གིས་གྲོས་གཞིར་ངོས་ལེན་མ་བྱས་སྟབས་གྲུབ་འབྲས་གང་ཡང་ཐོན་མེད་པ་རེད།
ཁ་སང་ཕྱི་ཚེས་ ༡༠ ཉིན་གྱི་རྒྱ་གར་གི་སྔ་དྲོའི་ཆུ་ཚོད་ ༡༠།༣༠ ཙམ་ནས་ཕྱི་དྲོའི་བར་ལ་དྭགས་ཁུལ་གྱི་ (Moldo) ཞེས་པའི་ས་མཚམས་སུ་རྒྱ་གར་དང་རྒྱ་ནག་གཉིས་ཀྱི་རྒྱལ་སྲུང་དམག་དཔོན་དང་ལྷན་དུ་ས་མཚམས་རྩོད་རྙོག་གི་གྲོས་མོལ་ཐེངས་ ༡༣ པ་ཚོགས་ཏེ། ཕྱོགས་གཉིས་ངོས་ནས་གྲོས་མོལ་འགྲིག་མཐུན་ཡོང་བ་དང་ས་མཚམས་ཀྱི་དམག་མི་ཕྱིར་འཐེན་ཡོང་བར་རེ་སྒུག་བྱས་ཡོད་ཀྱང་། རྒྱ་ནག་གིས་གྲོས་མོལ་སྐབས་དམག་མི་ཕྱིར་འཐེན་བྱེད་པར་མོས་མཐུན་བྱས་མེད་སྟབས། རྒྱ་དཀར་ནག་གི་ས་མཚམས་རྩོད་རྙོག་ལ་གྲུབ་འབྲས་གང་ཡང་བྱུང་མེད་པ་རེད།
གྲོས་མོལ་དང་འབྲེལ་ནས་རྒྱ་གར་བདེ་སྲུང་ལྷན་ཁང་གིས། ང་ཚོས་གྲོས་མོལ་སྐབས། ཐབས་ཤེས་བྱས་ཏེ་བཟང་ཕྱོགས་སུ་འགྲོ་བར་འབད་པ་བྱས་པ་ཡིན་མོད། རྒྱ་ནག་ཕྱོགས་ནས་གྲོས་མཐུན་ཡོང་བར་འདོད་བློ་མེད་པ་མ་ཟད། མ་འོངས་པར་གྲོས་འཆམ་ཡོང་མིན་སོགས་ཀྱི་གནས་ཚུལ་གང་ཡང་མཁོ་སྤྲོད་བྱས་མ་སོང་། ཞེས་བརྗོད་ཡོད་པ་དང་། ད་ལྟ་རྒྱ་དཀར་ནག་གཉིས་བར་ལ་དྭགས་ཤར་ཕྱོགས་ཀྱི་ཊིག་ (Trig Heights) དང་དྷེམ་ཆོག་ (Demchok) སོགས་ས་ཁུལ་བཅུ་ནས་དཀའ་རྙོག་སེལ་ཐུབ་ཙམ་བྱུང་ཡོད་ཀྱང་། གྷལ་ཝན་ལུང་ཁུག་གི་ཉེ་འཁྲིས་ཀེ་ལོ་མེ་ཊར་ ༡༢༠ ཡི་མཚམས་དང་རིན་ཆེན་ལ་དང་རིག་བཟང་ལ་སོགས་སུ་ས་མཚམས་ཀྱི་རྩོད་རྙོག་གསར་པ་ལྔ་བྱུང་ཡོད་འདུག
ཕྱི་ཚེས་ ༩ ཉིན་རྒྱ་གར་གྱི་དམག་སྤྱི་གཞོན་པ་ (Chief Gen Manoj Naravane) ཡིས། རྒྱ་ནག་གིས་གྲོས་མཐུན་གྱི་སྒྲིག་ཁྲིམས་ལས་བརྒལ་ཏེ། ས་མཚམས་ཁུལ་དུ་སྡོད་ཁང་གསར་སྐྲུན་གྱིས། དམག་མིའི་མཐུན་རྐྱེན་ཡར་རྒྱས་གཏོང་བཞིན་འདུག གལ་ཏེ་འདི་ལོའི་དགུན་ཁའི་བར་རྒྱ་ནག་གི་དམག་དཔུང་མུ་མཐུད་ས་མཚམས་ཁུལ་དུ་གནས་པ་ཡིན་ན། རྒྱ་གར་དམག་མི་ཡང་ས་མཚམས་ཁུལ་དུ་སྡོད་ཀྱི་ཡིན་ལ། རྒྱ་གར་གཞུང་ནས་རྒྱ་ནག་གིས་ཇི་ལྟར་འཛུགས་སྐྲུན་ཡར་རྒྱས་གཏོང་གི་ཡོད་པ་དེར་ཞིབ་རྟོག་བྱ་རྒྱུ་ཡིན་སྐོར་བརྗོད་འདུག
ཐེངས་འདིར་རྒྱ་དཀར་ནག་དབར་གྲོས་མོལ་འཚོགས་དགོས་དོན་གཙོ་བོ་ནི། འདས་ལོའི་ཕྱི་ཟླ་ ༥ ནང་རྒྱ་ནག་གིས་ལ་དྭགས་ཤར་ཕྱོགས་ཁུལ་གྱི་ (Moldo) ས་མཚམས་སུ་དམག་མིའི་རིམ་པ་གསུམ་བཏང་བའི་གནད་དོན་དང་འབྲེལ་ནས། ཆུ་ཚན་ཁུལ་དུ་བཅའ་སྡོད་དམག་མིའི་(Patrolling Point 15) གྲངས་འབོར་ཇེ་མང་དུ་བཏང་བ་རྣམས་ཕྱིར་འཐེན་བྱ་དགོས་སྐོར་རེད་འདུག
གསར་འགོད་པ། བསྟན་འཛིན་ཕུར་བུ།
