སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་རྒྱ་ནག་གཞུང་གིས་འཛིན་བཟུང་བཙན་འཁྲིད་བྱས་ཏེ་ཟླ་གཉིས་དང་ཕྱེད་ཙམ་འགྲོ་བཞིན་ཡོད་ཀྱང་ཁོང་མོར་སྙིང་ནད་ཡོད་པས་ཟུར་འཇོག་བྱས་ཡོད་ལུགས་ཙམ་གཞུང་ཕྱོགས་ནས་བརྗོད་ཡོད་པ་ཙམ་ལས་གང་དུ་ཡོད་མེད་ཀྱང་ཤེས་རྟོགས་ཐུབ་ཀྱི་མེད་པར་བརྟེན་ནང་མི་ཚོས་སེམས་འཚབ་ཆེན་པོ་བྱེད་ཀྱི་ཡོད་འདུག
འདི་གའི་གསར་འགོད་པས་ཁུངས་ལྡན་གནས་ཚུལ་ཤེས་རྟོགས་བྱུང་བ་ལྟར་ན། འདི་ལོའི་ཕྱི་ཟླ་ ༧ པའི་ནང་རྒྱ་ནག་གཞུང་གིས་སེང་འབྲུག་སྟག་རྩེ་སློབ་གྲྭ་བཙན་གྱིས་སྒོ་བརྒྱབ་ཏུ་བཅུག་པའི་རྐྱེན་གྱིས། སློབ་གྲྭ་དེར་དགེ་རྒན་གྱི་ཕྱག་ལས་གནང་མྱོང་བའི་རིན་ཆེན་སྐྱིད་ལགས་ཀྱིས་སྔ་དགོང་གི་ཟས་མ་བཟས་པར་ཉིན་བཅུ་གྲངས་ཤིག་ཕྱིན་ཏེ་གཟུགས་པོའི་གནས་སྟངས་ཧ་ཅང་ཞན་པོ་ཆགས་ཡོད་པར་བརྟེན། ཁོང་མོའི་ཕ་མ་དང་སྤུན་མཆེད་སོགས་ཀྱིས་སེམས་ཁུར་བྱས་ནས་སྨན་ཁང་དུ་འཁྲིད་ཐབས་བྱས་ཡོད་ཀྱང་། འགྲོ་རོགས་བྱས་མེད་པ་དང་། ཕྱིས་སུ་ས་གནས་ཉེན་རྟོག་པ་ཡོང་ནས་རྒྱལ་ཁབ་ལ་ངོ་ལོག་བྱས་པའི་ཉེས་མིང་གཡོགས་ཏེ། ས་གནས་སྨན་ཁང་ཞིག་ཏུ་བཙན་འཁྲིད་བྱས་ནས་ཉིན་གྲངས་ ༢ རིང་བཀག་ཉར་བྱས་རྗེས། ཟི་ལིང་གི་ཞིང་ཆེན་སྨན་ཁང་དུ་འཇོག་རྒྱུ་ཡིན་ཟེར་ནས་བཙན་འཁྲིད་བྱས་ཡོད་པ་ལྟར། དགེ་རྒན་རིན་ཆེན་སྐྱིད་ལགས་གར་ཡོད་ཆ་མེད་དུ་གྱུར་ནས་ཟླ་གཉིས་དང་ཕྱེད་ཙམ་འགྲོ་ཡི་ཡོད་སྟབས། ཁོང་མོའི་ནང་མི་ཚོས་བློ་འཚབ་ཆེན་པོས་མཚོ་སྔོན་ཞིང་ཆེན་གྱི་འབྲེལ་ཡོད་ལས་ཁུངས་ལ་འབྲེལ་གཏུག་བྱས་ཏེ་རྒྱུས་ལོན་བྱེད་ཐབས་བྱས་ཀྱང་། རིན་ཆེན་སྐྱིད་ལགས་ལ་སྙིང་གི་ན་ཚ་ཡོད་སྟབས་སྨན་ཁང་དུ་ཟུར་འཇོག་བྱེད་ཡོད་སྐོར་སོགས་བཤད་ཡོད་པ་ཙམ་ལས། ད་ལྟ་ཁོང་མོ་གང་དུ་ཡོད་མེད་དང་གཟུགས་གཞིའི་གནས་སྟངས་ག་འདྲ་ཡོད་སོགས་གཏན་ནས་བཤད་མེད་པར་བརྟེན། ཁོང་མོའི་ནང་མི་བུ་ཕྲུག་ཚོས་སེམས་འཚབ་ཆེན་པོ་བྱེད་མུས་ཡིན་འདུག
འདི་ལོའི་ཕྱི་ཟླ་ ༧ ནང་རྒྱ་ནག་གཞུང་གིས་མགོ་ལོག་ཁུལ་དར་ལག་རྫོང་ཁོངས་ཀྱི་སེང་འབྲུག་སྟག་རྩེའི་བཅའ་སྡོད་སློབ་གྲྭ་དང་། རྨ་ཆེན་རྫོང་ཁོངས་ཀྱི་སློབ་གྲྭ་གསུམ། དགའ་བདེ་རྫོང་ཁོངས་ཀྱི་སློབ་གྲྭ་གཅིག གཅིག་སྒྲིལ་རྫོང་ཁོངས་ཀྱི་སློབ་གྲྭ་གཉིས་བཅས་སྒེར་གཉེར་སློབ་གྲྭ་ཁག་བདུན་སྒོ་བརྒྱག་དགོས་པའི་ཐག་གཅོད་བྱས་ཏེ། ཕྱི་ཟླ་ ༩ ཚེས་ ༠༡ ནང་ཚུད་ཚང་མ་བརྒྱ་ཆ་བརྒྱ་ཐམ་པ་སྒོ་བརྒྱག་ཚར་བ་བྱས་ཏེ་ ༩ ཚེས་ ༡ ནས་དབུས་གཞུང་གི་ཆེད་མངགས་མགོ་ཁྲིད་ཚོས་དངོས་སུ་ལྟ་ཞིབ་བྱས་ཏེ་དྭང་ལེན་བྱ་རྒྱུའི་ཐག་གཅོད་བྱས་དགོས་པ་ལྟར། ཕྱི་ཟླ ༧ ཚེས་ ༨ ཉིན་སེང་འབྲུག་སྟག་རྩེའི་སློབ་གྲྭ་དངོས་སུ་སྒོ་བརྒྱབ་བཅུག་ཡོད་པ་མ་ཟད། སློབ་མ་ཚོ་གཞུང་གཉེར་སློབ་གྲྭ་ཁག་ཏུ་མངག་གཏོང་བྱ་རྒྱུ་ཡིན་སྐོར་བསྒྲགས་ཡོད་པ་ལྟར། སློབ་གྲྭ་དེའི་དྭ་ཕྲུག་འགའ་གཞུང་གཉེར་སློབ་གྲྭ་ཁག་ཏུ་བཏང་ཡོད་ཀྱང་། རེ་ཟུང་གི་ཐོབ་ཐང་ལག་ཁྱེར་སོགས་ས་གནས་གཞན་ནས་བཟོས་ཡོད་པས། སློབ་གྲྭར་འགྲོ་མ་ཐུབ་པར་དཀའ་ངལ་འཕྲད་མུས་ཡིན་པ་དང་། སློབ་མ་ ༡༠༠ ལྷག་དར་ལག་རྫོང་གཞུང་གི་སློབ་གྲྭར་བཅུག་སྟེ། སློབ་མ་དེ་ཚོས་རྒྱ་ནག་གཞུང་གི་བཀྲིན་སོགས་དྲན་དགོས་པའི་བཙན་སྐུལ་སློབ་གསོ་སྤྲོད་ཀྱི་ཡོད་པ་མ་ཟད། ཁོང་ཚོའི་ཕ་མ་ཚོར་ཚོགས་འདུ་ལན་མང་བསྡུ་མུས་ཡིན་འདུག
དགེ་རྒན་རིན་ཆེན་སྐྱིད་ལགས་ནི་རང་ལོ་ ༤༠ ཡས་མས་ཡིན་ཞིང་། དེ་སྔོན་སེང་འབྲུག་སྟག་རྩེ་སློབ་གྲྭའི་འཛིན་རིམ་གསུམ་པའི་བོད་ཡིག་དགེ་རྒན་ཞིག་ཡིན་པ་དང་། ཁོང་མོའི་ཁྱིམ་དུ་ལོ་ན་ ༡༣ ཅན་ཀྱི་བུ་མོ་ཞིག་དང་ལོ་ ༧༩ ཡིན་པའི་ཨ་མ་དང་བཟའ་ཟླ་བཅས་ཁྱོན་བཟའ་མི་ ༥ ཡོད་འདུག
གསར་འགོད་པ། དཔལ་ལྡན།
