༧གོང་ས་མཆོག་གིས་སྤྱི་ཚོགས་བདེ་སྐྱིད་དང་ལྡན་པ་ཞིག་ཡོང་བར་མཐར་ཐུག་ན་སྒེར་སོ་སོའི་སེམས་ཀྱི་ཞི་བདེ་ལེགས་པར་བསྐྲུན་ཐུབ་རྒྱུ་ཞེ་དྲགས་གལ་ཆེན་པོ་ཡིན་པ་དང་སེམས་ཀྱི་ཞི་བདེ་བསྐྲུན་རྒྱུ་དེའང་ཞེད་སྣང་དང་དངངས་སྐྲག་སྒོ་ནས་མིན་པར་སོ་སོས་དྭང་དུ་བླངས་ནས་བསྐྲུན་དགོས་པ་ཞིག་ཆགས་ཀྱི་ཡོད་སྐོར་གསུངས།
༧གོང་ས་མཆོག་ལ་ཨ་རིའི་ཞི་བདེའི་བསྟི་གནས་ཁང་ (U.S. Institute of Peace) གིས་ཇི་ལྟར་གསོལ་འདེབས་ཞུས་པ་ལྟར། འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་མགོ་ཁྲིད་ཁག་ཅིག་དང་ལྷན་དུ་བྱམས་བརྩེ་དང་ཤེས་ཡོན། འདྲ་མཉམ་བཅས་ཀྱི་བརྗོད་གཞིའི་ཐོག་ལ་དེ་རིང་ནས་ཉིན་གྲངས་གཉིས་རིང་དྲ་ལམ་བརྒྱུད་བཀའ་སློབ་དང་དྲི་བར་བཀའ་ལན་སྩལ་སོང་། ཐོག་མར་༧གོང་ས་རྒྱལ་བ་རིན་པོ་ཆེ་མཆོག་གིས་འཚམས་འདྲི་མཛད་གནང་རྗེས། ལས་རིམ་གཙོ་སྐྱོང་བ་བསྟི་གནས་ཁང་དེའི་སྤྱི་ཁྱབ་འགན་འཛིན་དང་དབུ་འཛིན་ལི་སི་གྷི་རན་ཌི་(Lise Grande) ལགས་ཀྱིས། ༧རྒྱལ་བ་རིན་པོ་ཆེ་དང་ཐུན་མོང་མ་ཡིན་པའི་ཐོག་ལ་དམིགས་བསལ་གྱིས་བཀའ་མོལ་ཞུ་རྒྱུ་བྱུང་བར་དགའ་ཚོར་ཆེན་པོ་བྱུང་། ང་ཚོའི་ཚོགས་པ་འདི་ཕྱི་ལོ་ ༡༩༨༤ ལོར་ཨ་རིའི་གྲོས་ཚོགས་འོག་མས་སྤྱི་ཚོགས་ནང་གྲོས་མོལ་གྱི་ལམ་ནས་དཀའ་རྙོག་སེལ་བའི་དོན་དུ་བཙུགས་པ་རེད། ང་ཚོའི་ཚོགས་པ་འདིའི་ནང་རྒྱལ་ཁབ་ ༨༥ ནས་འཐུས་མི་ ༣༠༠ ཡོད། ང་ཚོའི་ལས་འཆར་གཙོ་བོ་དང་ནུས་སྟོབས་ཅན་གྱི་ལས་འགུལ་འདི་ལ་སློབ་མ་ཕུགས་རེ་ཅན་ལ་མི་རབས་ཀྱི་འགྱུར་ལྡོག་ཐོག་ནས་གཞོན་སྐྱེས་མང་པོ་ཞིག་ལ་འདྲ་མཉམ་ཡོང་རྒྱུ་དང་། མཐོང་ཆུང་ཁྱད་གསོད་ལ་ཁ་གཏད་གཅོག་རྒྱུ་ལ་སོགས་པ་སྤྱི་ཚོགས་ལ་འདྲ་མཉམ་ཡོང་བའི་དོན་དུ་སློབ་སྟོན་ཞུ་ཡི་ཡོད། ད་ལོར་ང་ཚོས་དངོས་སུ་རྒྱལ་ཁབ་ ༢༦ ནས་ཚོགས་མི་ ༣༠༠ ཡིས་མཉམ་ཞུགས་ཐོག་ནས་ལེ་ཚན་འདིའི་ནང་གོ་སྐབས་ཕུལ་ཐུབ་པ་བྱུང་ཞེས་དང་། ལོ་བཞིའི་གོང་ལ་༧རྒྱལ་བ་རིན་པོ་ཆེ་མཆོག་ལ་དངོས་སུ་མཇལ་ཁ་ཞུ་རྒྱུ་བྱུང་ནས་ང་ཚོའི་སྤྱི་ཚོགས་ནང་ཞི་བདེ་འཛུགས་སྐྲུན་ཡོང་བའི་དོན་དུ་གནས་ཚུལ་གལ་འགངས་ཆེ་བ་ཆ་ཚང་ཐོག་ལ་གྲོས་མོལ་ཞུ་རྒྱུའི་གོ་སྐབས་བྱུང་སོང་། ཞེས་ངོ་སྤྲོད་གནང་འདུག
༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་གི་གཟུགས་པོའི་ཆ་ནས་ཞུས་པ་ཡིན་ན་ཐག་རིང་པོར་འགྲོ་སྐྱོད་བྱ་རྒྱུ་དཀའ་ལས་ཁག་པོ་ཆགས་ཀྱི་འདུག ཡིན་ནའང་ངོས་ཀྱི་བསམ་བློ་འདིའི་གྲུང་ཆ་སོགས་དཀའ་ངལ་རྩ་བ་ཉིད་ནས་མེད། བྱས་ཙང། དེང་དུས་ཀྱི་འཕྲུལ་ཆས་ཀྱི་རོགས་འདེགས་ལ་བརྟེན་ནས་ང་ཚོར་གྲོས་མོལ་ཞུ་རྒྱུའི་ཐོབ་ཐང་ཆ་ཚང་དང་གོ་སྐབས་ཆ་ཚང་ཡོད་པ་རེད། ངོས་རང་གཞོན་དུས་ནས་འཕྲུལ་རིགས་ལ་ཞེ་དྲགས་དགའ་པོ་ཡོད། འཕྲུལ་ཆས་ཀྱི་རིགས་ལ་སྐྱོན་ཆག་དེ་འདྲ་བྱུང་བའི་སྐབས། དཔེར་ན་གློག་བརྙན་བཟོ་རྒྱུའི་འཕྲུལ་འཁོར། ཡང་ན་ང་ཚོའི་ལག་པར་བཏགས་པའི་ཆུ་ཚོད་རིགས་ལ་ངོས་རང་གིས་བསྐྱར་གསོ་བྱས་ཐུབ་ཀྱི་ཡོད། ཕྱོགས་གཅིག་ནས་སོ་སོའི་ངོས་ནས་དུས་ཚོད་སྟོང་པའི་སྐབས་སུ་དུས་ཚོད་སྐྱེལ་རྒྱུ་དང་དགའ་ཉེ་བྱེད་སའི་བྱ་བ་གཅིག་ཀྱང་ཆགས་ཀྱི་ཡོད་པ་རེད། ང་ཚོའི་དུས་རབས་གསར་པ་འདིའི་ནང་འཕྲུལ་ཆས་བེད་སྤྱོད་བཏང་ནས་སོ་སོའི་ལས་དོན་བརྩམས་པའི་ཐོབ་ཐང་དང་ནུས་པ་ཡོད་རེད། དེར་བརྟེན་ཁྱེད་རང་ཚོའི་བསམ་ཚུལ་དང་དྲི་བ་གང་འདྲ་ཡིན་རུང་ང་ཚོས་གྲོས་མོལ་ལྷུག་པོའི་ཐོག་ནས་ཞུ་ཐུབ་ཀྱི་རེད། ཅེས་གསུངས་སོང་།
ཡང་༧གོང་ས་མཆོག་གིས། དེ་རིང་བྱམས་བརྩེ་དང་སློབ་སྦྱོང་། འདྲ་མཉམ་ཞེས་པའི་བརྗོད་གཞིའི་ཐོག་ལ་བཀའ་མོལ་ཞུ་རྒྱུ་རེད། ང་ཚོའི་འཛམ་གླིང་འདི་ག་དུས་ཡིན་རུང་འགྱུར་བ་འགྲོ་བཞིན་པ་རེད། ཕྱོགས་གཅིག་ནས་བསམ་བློ་གཏོང་ན་ང་རང་ཚོར་སེམས་ཤུགས་སྐྱེད་དགོས་པ་གཅིག་ལ། འདས་པའི་མི་རབས་བརྒྱ་ཕྲག་འགའ་ཤས་ཤིག་གི་གནས་ཚུལ་ལ་བལྟས་པ་ཡིན་ན་ཞེ་དྲགས་དྲག་རྩུབ་ཅན་ཞིག་ཆགས་ཡོད་པ་རེད། དམག་ཆེན་དང་པོ་དང་དམག་ཆེན་གཉིས་པ་དེ་འདྲ་བྱུང་ཡོད་པ་རེད། དེའི་སྐབས་ཀྱི་གནས་སྟངས་རིགས་ལ་ཕྱིར་བལྟས་བྱས་པ་དང་དེང་སང་གི་འཛམ་གླིང་མཉམ་དུ་བསྡུར་པ་ཡིན་ན། ཞི་བདེའི་ཐོག་ལ་འབོད་སྒྲ་སྒྲོག་མཁན་ཞེ་དྲགས་ཀྱིས་ཤུགས་ཆེན་པོ་ཡོད་རེད། དེ་ཡང་དབུ་ཁྲིད་ཚོའི་ཁྲོད་དུ་ཙམ་མིན་པར་མི་མང་དཀྱུས་མ་དང་དམངས་ཀྱི་ཐོག་ནས་འཛམ་གླིང་ཞི་བདེ་དགོས་ཀྱི་འདུག་ཟེར་བའི་འབོད་སྒྲ་འདི་ཞེ་དྲགས་ཤུགས་ཆེན་པོ་ཡོད་པ་རེད། འཛམ་གླིང་གི་ཞི་བདེ་ཟེར་ན། སྒེར་སོ་སོ་དང་སྤྱི་ཚོགས་ཆ་ཚང་གིས་སྤྱི་ཚོགས་ཞི་བདེ་ཅན་བཟོ་རྒྱུའི་ལས་འགན་གཅིག་གསུང་གི་ཡོད་པ་རེད། སྤྱིར་བཏང་ང་ཚོ་སྤྱི་ཚོགས་བག་ཕེབས་ཅན་ཡོང་བའི་དོན་དུ་སྤྱི་ཚོགས་ལབ་ཡོང་དུས་མི་སྒེར་མང་པོ་ཞིག་བསྡུས་པ་ལ་བརྟེན་ནས་བྱུང་བའི་ཚོགས་པ་གཅིག་ཆགས་ཀྱི་ཡོད་དུས། སྤྱི་ཚོགས་བདེ་སྐྱིད་དང་ལྡན་པ་ཡོང་བར་མཐར་ཐུག་ན་སྒེར་སོ་སོའི་སེམས་ཀྱི་ཞི་བདེ་ལེགས་པར་བསྐྲུན་ཐུབ་རྒྱུ་འདི་ཞེ་དྲགས་གལ་ཆེན་པོ་རེད། སེམས་ཀྱི་ཞི་བདེ་བསྐྲུན་པ་དེའང་ཞེད་སྣང་དང་དངངས་སྐྲག་སྒོ་ནས་མིན་པར་སོ་སོས་དྭང་དུ་བླངས་ནས་ནང་སེམས་ཀྱི་ཞི་བདེ་བསྐྲུན་དགོས་པ་ཞིག་ཆགས་ཀྱི་ཡོད་པ་རེད། ཅེས་གསུངས་སོང་།
ཡང་མགོན་པོ་མཆོག་གིས། འཛམ་གླིང་ས་ཕྱོགས་གང་སར་ཡོད་པའི་མི་ཆ་ཚང་གིས་འཛམ་གླིང་ཞི་བདེ་དགོས་པ་ཞིག་འདོད་ཀྱི་ཡོད་པ་རེད། དེང་སང་ལ་ཆ་བཞག་ན། སྤྱིར་བཏང་གི་གོ་མཚོན་ཡར་ཐོན་ཅན་ཞེ་དྲགས་ཆགས་ཡོད་པ་རེད། གོ་མཚོན་ཡར་ཐོན་ཅན་ཆགས་པར་བརྟེན། གལ་སྲིད་གོ་མཚོན་བེད་སྤྱོད་གཏང་རྒྱུའི་སྐབས་ཤིག་བྱུང་བ་ཡིན་ན། དེའི་འབྲས་བུ་དེ་ཞེ་དྲགས་ཚབས་ཆེན་པོ་ཆགས་ཀྱི་ཡོད་པ་རེད། འདས་པའི་མི་རབས་སྔ་མ་ཚོའི་སྐབས་སུ་རྙོག་དྲ་བྱུང་བ་ཡིན་ན། མཚོན་ཆ་ཆུང་ཚགས་རིགས་བེད་སྤྱོད་བཏང་བ་དང་། སྐབས་རེར་ལག་པས་མུར་རྫོག་གཞུས་པ་དེ་འདྲ་ཞེ་དྲགས་ཀྱི་ཚབས་ཆེན་པོ་མ་རེད། དེང་སང་གོ་མཚོན་ཡར་ཐོན་ཅན་དེ་འདྲའི་གོ་མཚོན་མང་པོ་ཡོད་དུས་ཞེ་དྲགས་ཀྱིས་ཉེན་ཁ་ཆེན་པོ་ཡོད་པ་རེད། དེར་བརྟེན། དེ་འདྲའི་སྐབས་སུ་འཛམ་གླིང་ཞི་བདེ་ཟེར་བ་དེ་ཞེ་དྲགས་གལ་ཆེན་པོ་རེད། དེ་ཡང་རྒྱུན་གཏན་ནས་ངོས་ནས་ཞུས་པ་བཞིན། ང་ཚོས་སྨོན་ལམ་བཏབ་ནས་བསྒྲུབ་ཐུབ་རྒྱུ་ཞིག་མ་རེད། འཛམ་གླིང་གི་ཞི་བདེ་ཟེར་དུས་དཀོན་མཆོག་དང་སངས་རྒྱས་བཅོམ་ལྡན་འདས་ལྟ་བུར་སྨོན་ལམ་བཏབས་ནའང་ཁ་ཡོད་ལག་ཡོད་ཀྱིས་ཕན་ཐོགས་བསྒྲུབ་རྒྱུ་དེ་ཞེ་དྲགས་ཁག་པོ་རེད། འོན་ཀྱང་འཚེ་བ་སྐྲུན་མཁན་ང་ཚོ་ཡིན་པས་འཚེ་བ་མེད་པ་བཟོ་བའི་ཐབས་ལམ་དེའང་ང་རང་ཚོ་མི་ལ་ཡོད་པ་རེད། ཅེས་བཀའ་སློབ་བསྩལ་སོང་།
༧གོང་ས་མཆོག་གིས། གལ་སྲིད་བསམ་བློ་དེ་སྙིང་རྗེ་ཅན་ཡིན་ན་གཞན་ཕོངས་བར་བྱ་བ་དང་གཞན་འཇིག་པར་བྱ་བའི་བསམ་བློ་རྩ་བ་ཉིད་ནས་ཤར་གྱི་མ་རེད། དེར་བརྟེན་བྱམས་སྙིང་རྗེ་དངའབྲེལ་བའི་སློབ་སྦྱོང་དེ་ང་ཚོའི་སློབ་སྦྱོང་གི་སྡེ་ཚན་ནང་བཅུག་དགོས་པ་དང་། ལྷག་པར་དུ་ཆུང་དུས་ནས་བཅུག་དགོས་པ་ཞིག་གལ་ཆེན་པོ་ཆགས་ཀྱི་ཡོད་པ་རེད། ང་ཚོ་སྤྱི་ཚོགས་ལ་བརྟེན་པའི་སེམས་ཅན་ཞིག་རེད། རང་གི་འཚོ་བའི་བདེ་སྡུག་དེའང་སྤྱི་ཚོགས་ལ་བརྟེན་བསྡད་ཀྱི་ཡོད་པར་བརྟེན། གང་ལ་བརྟེན་སའི་སྤྱི་ཚོགས་དེའི་ནང་གི་འགྲོ་བ་གཞན་གྱི་བདེ་སྐྱིད་བསྒྲུབ་རྒྱུ་དེ། རང་གི་བདེ་སྐྱིད་བསྒྲུབ་རྒྱུའི་ཐབས་ཤེས་ཡག་ཤོས་དེ་ཆགས་ཀྱི་ཡོད་པ་རེད། ཅེས་སོགས་སོང་།
དེ་ནས་དྲི་བ་དྲིས་ལན་གྱི་ལས་རིམ་ནང་། བྷང་ལ་དེ་ཞི་(Bangladesh) ནས་ཡིན་པའི་སློབ་མ་མི་ཐི་ལ་ཧོར་ (Mithila Hore) གྱིས། ཨ་མ་ཞིག་གིས་རང་གི་བུ་དང་བུ་མོར་དབྱེ་བ་མེད་པར་ཤེས་ཡོན་སྤྲོད་རྒྱུ་གལ་ཆེན་པོ་ཡིན་པའི་སྐོར་ལ་བཀའ་སློབ་གནང་རོགས་ཞུས་པར་༧གོང་ས་མཆོག་གིས། མང་གཙོ་ཚད་དང་ལྡན་པ་ཡོང་བར་སློབ་སྦྱོང་འདྲ་མཉམ་སྤྲོད་རྒྱུ་དེ་ཞེ་དྲགས་གལ་ཆེན་པོ་ཆགས་ཀྱི་ཡོད་པ་རེད། བུ་དང་བུ་མོ། ཕོ་མོ་གང་ཡིན་རུང་ཆ་ཚང་ལ་སློབ་སྦྱོང་ཆ་ཚང་བ་ཞིག་དགོས་ཀྱི་ཡོད་པ་རེད། དེ་འདྲའི་སློབ་སྦྱོང་ཆ་ཚང་རག་པ་ཡིན་ན། ང་ཚོའི་སྤྱི་ཚོགས་འདྲ་མཉམ་ཅན་ཞིག་ཏན་ཏན་བཟོས་ཐུབ་ཀྱི་རེད། འདྲ་མཉམ་གྱི་ཁོར་ཡུག་ངེས་པར་དུ་བསྐྲུན་ཐུབ་ཀྱི་རེད། དེར་བརྟེན་བུ་དང་བུ་མོའི་བར་དབྱེ་བ་ཕྱེས་པ་དེ་རྩ་བ་ནས་ནོར་བ་རེད། ཅེས་འཛམ་གླིང་ཞི་བདེ་བསྐྲུན་རྒྱུར་ཕོ་མོ་གཉིས་ཀར་སློབ་སྦྱོང་འདྲ་མཉམ་སྤྲོད་དགོས་པ་དེ་གལ་ཆེན་པོ་ཡིན་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ།
