རྒྱ་གར་གྱི་མི་འབོར་བརྒྱ་ཆ་ ༣༥ ལོ་ན་ ༡༨ སོན་མེད་པ་དང་ཏོག་དབྱིབས་འགོག་ཁབ་ཐོབ་མེད་པར་བརྟེན་ཕྱི་ཕྱོགས་སུ་མཁའ་ལམ་སྒོ་འབྱེད་བྱ་རྒྱུ་ཡིན་པའི་ཡོངས་ཁྱབ་གསལ་བསྒྲགས་བཏང་རྗེས་འཕྲོད་བསྟེན་ཆེད་མཁས་པ་མང་པོས་ནད་རླབས་གསུམ་པ་ཁྱབ་ཉེན་ཡོད་པའི་ཉེན་བརྡ་བཏང་འདུག
འདི་ལོའི་ལོ་མགོར་རྒྱ་གར་ནང་དུ་ཏོག་དབྱིབས་རིམས་ནད་ཁྱབ་གདལ་ཤུགས་ཆེན་ཕྱིན་པའི་རྐྱེན་གྱིས་དབུས་གཞུང་དང་མངའ་སྡེ་ཁག་གིས་ཐེམ་སྤང་གི་བཀག་རྒྱ་ཡུན་རིང་བསྡམས་པ་དང་། རྒྱལ་ཁབ་ཕན་ཚུན་བར་འགྲོ་འོང་གི་གནམ་གྲུའི་རིགས་མཚམས་འཇོག་བྱས་ཏེ། རྒྱ་གར་དུ་ལོ་ལྟར་ཡོང་མུས་ཡིན་པའི་ཡུལ་སྐོར་སྤྲོ་འཆམ་པ་རྣམས་བཀག་ཡོད་ཀྱང་། རང་ལོ་ ༡༨ ཅན་གྱི་མི་འབོར་བརྒྱ་ཆ་ ༧༠ ལ་འགོག་ཁབ་དང་པོ་ཐོབ་པ་དང་། བརྒྱ་ཆ་ ༣༠ ལ་འགོག་ཁབ་དང་པོ་དང་གཉིས་པ་གཉིས་ཀ་ཐོབ་ཟིན་པར་བརྟེན། དེ་རིང་ནས་བཟུང་ཡུལ་སྐོར་སྤྲོ་འཆམ་གྱི་ཐོངས་མཆན་ཐོབ་པའི་ཕྱི་རྒྱལ་བ་རྣམས་ཆེད་གཏོང་གནམ་གྲུ་(chartered fligts )བརྒྱུད་རྒྱ་གར་ནང་དུ་ཡོང་ཆོག་པ་དང་། རིང་མིན་ཕྱི་ཟླ་ ༡༡ ཚེས་ ༡༥ ནས་རྒྱུན་ལྡན་གྱི་གནམ་གྲུ་ ( Regular flights ) བརྒྱུད་ནས་རྒྱ་གར་དུ་ཡོང་ཆོག་པའི་གསལ་བསྒྲགས་གནང་འདུག
རྒྱ་གར་ལྷོ་ཕྱོགས་མོམ་བྷེ་གྲོང་ཁྱེར་དུ་རྟེན་གཞི་བྱས་པའི་ཚན་རིག་པ་དང་རྟོག་ཞིབ་པ་སྐུ་ཞབས་ཨྰ་མིད་( Amit Dutt) ལགས་ཀྱིས། རྒྱ་གར་ནང་དུ་ཡུལ་སྐོར་སྤྲོ་འཆམ་པ་འཛུལ་ཆོག་པ་བཟོས་པ་དེས། ཏོག་དབྱིབས་འགོག་ཁབ་བརྒྱབ་མེད་པ་དང་འགོག་ཁབ་གཅིག་ལས་ཐོབ་མེད་པའི་རྒྱ་གར་མི་སེར་རྣམས་ལ་ཉེན་ཁ་ཆེན་པོ་ཡོད་པ་དང་། རྒྱ་གར་དུ་ཏོག་དབྱིབས་རིམས་ནད་ཀྱི་ནད་རླབས་གསུམ་པ་མཆེད་ཉེན་ཡོད་སྐོར་བརྗོད་འདུག དེ་བཞིན་རྒྱ་གར་འཕྲོད་བསྟེན་སྐོར་གྱི་གནད་ཡོད་མི་སྣ་ཁག་ཅིག་གིས་ཀྱང་འདས་པའི་ཟླ་བ་ནས་རྒྱ་གར་ནང་དུ་ཆོས་ཕྱོགས་ཀྱི་དུས་ཆེན་མང་པོ་ཞིག་འགྲོ་མུས་ཡིན་པའི་ཁར། རྒྱ་གར་གྱི་དྷི་ཝ་ལི ( Dewali ) སོགས་བསླེབ་གྲབས་ཡོད་སྟབས། ཏོག་དབྱིབས་རིམས་ནད་ཁྱབ་གདལ་མི་འགྲོ་སླད། སྔོན་འགོག་དང་དོགས་ཟོན་སོགས་བྱ་དགོས་པའི་སྔོན་བརྡ་བཏང་ཡོད་པ་རེད།
འདི་ལོར་རྒྱ་གར་ནང་ཏོག་དབྱིབས་ནད་ཡམས་ཁྱབ་གདལ་ཤུགས་ཆེན་ཕྱིན་ནས་གཞུང་དམངས་གཉིས་ལ་དཀའ་ངལ་ཆེན་པོ་འཕྲད་ཡོད་སྟབས། རྒྱ་གར་གྱིས་འདས་ལོའི་ཕྱི་ཟླ་ ༣ ནས་ཕྱི་རྒྱལ་གྱི་ཡུལ་སྐོར་བར་འགྲོ་འོང་གི་གནམ་གྲུ་བཀག་འགོག་བྱས་ཏེ། རྒྱ་གར་གཞུང་གིས་ལོ་༡ དང་ཕྱེད་ཀ་ལྷག་གི་རྗེས་སུ་ཡུལ་སྐོར་སྤྲོ་འཆམ་བ་རྣམས་རྒྱ་གར་དུ་ཡོང་ཆོག་པའི་ཆོག་མཆན་སྤྲད་ཡོད་དང་། ཕྱི་རྒྱལ་ནས་ཡོང་མཁན་རིགས་ཀྱིས་ཏོག་དབྱིབས་འགོག་ཁབ་གཉིས་ཀ་བརྒྱབ་ཚར་བ་དགོས་ཤིང་། ཆུ་ཚོད་ ༧༢ གོང་གི་ཏོག་དབྱིབས་ནད་རྟགས་ཐོན་མེད་པའི་བརྟག་དཔྱད་ཀྱི་གྲུབ་འབྲས་དགོས་པ་ལས། དམིགས་བསལ་གྱི་ཟུར་བཀག་སོགས་གང་ཡང་བསྡད་མི་དགོས་པ་རེད་འདུག
ད་ལྟ་རྒྱ་གར་གྱི་མི་འབོར་བརྒྱ་ཆ་ ༧༠ ལྷག་ཟིན་པའི་མི་གྲངས་ས་ཡ་ ༩༥༠ ལྷག་ལ་ཏོག་དབྱིབས་འགོག་ཁབ་དང་པོ་ཐོབ་ཡོད་པ་དང་། མི་འབོར་གྱི་བརྒྱ་ཆ་ ༣༠ ལ་ཏོག་དབྱིབས་འགོག་ཁབ་གཉིས་ཀ་ཐོབ་ཟིན་ཡོད་ཀྱང་། རྒྱ་གར་གི་མི་འབོར་བརྒྱ་ཆ་ ༣༥ ལོ་ ༡༨ ཟིན་མེད་པས་ད་ལྟའང་འགོག་ཁབ་ཐོབ་མེད་པར་བརྟེན། ཆེད་མཁས་མི་སྣ་མང་པོ་ཞིག་གིས། ད་ལྟ་ནད་པ་མི་ཉུང་བ་ཞིག་ཡོད་པ་དང་། རྒྱ་གར་གྱི་མི་སེར་ཚང་མར་ཏོག་དབྱིབས་སྔོན་འགོག་སྨན་ཁབ་ཐོབ་མེད་པའི་ཁར། ཏོག་དབྱིབས་རིམས་ནད་རྩ་མེད་དུ་གཏོང་ཐུབ་མེད་སྟབས། མཁའ་ལམ་ཚང་མ་ཕྱེ་ནས་འགྲོ་འོང་བཀག་འགོག་མི་བྱེད་པ་དེ་སྔ་དྲགས་པ་དང་། ཉེན་ཁ་ཅན་ཞིག་ཡིན་པའི་ཉེན་བརྡའང་གཏོང་གི་ཡོད་འདུག
ཕྱི་ལོ་ ༢༠༢༠ མགོ་ཙམ་ནས་བཟུང་རྒྱ་གར་ནང་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་དུ་འགྲོ་བའི་མགོ་བརྩམས་ཡོད་པ་དང་། ད་བར་དུ་ཁྱོན་ཏོག་དབྱིབས་ནད་པ་ས་ཡ་ ༣༤ (༣༤༠༣༧༥༩༢)ལྷག་བྱུང་ཡོད་པའི་ཁྲོད་ནས། མི་གྲངས་འབུམ་ ༤ (༤༥༡ ༨༤༧)ལྷག་འདས་གྲོངས་སུ་ཕྱིན་ཡོད་ཅིང་། ཏོག་དབྱིབས་ཀྱིས་མནར་བཞིན་པ་མི་གྲངས་ ༡༩༧༣༢༩ ཡས་མས་ཡོད་འདུག
གསར་འགོད་པ། དཔལ་ལྡན།
ད་དུང་གཟབ་གཟབ་བྱེད་རྒྱུ་ཤིན་ཏུ་གལ་འགངས་ཆེ་བར་མཐོང་སོང་བས། དེ་ལུགས་ཐུགས་འཇགས་འཚལ།