འབྲོག་པའི་རྩྭ་སའི་འཛིན་ཡིག་ཕྱིར་བསྡུས་ནས་རྩྭ་ས་བཙན་འཕྲོག་བྱེད་ཀྱི་འདུག

 རྒྱ་ནག་གཞུང་གིས་སྐྱེ་རྒུ་མདོ་ཁྲིན་ཏུའུ་རྫོང་གི་འབྲོག་སྡེ་ཁག་ཏུ་དེ་སྔ་རྩྭ་སའི་བདག་དབང་ལོ་ ༥༠ རིང་འབྲོག་པ་ཚོར་ཡོད་ལུགས་བརྗོད་དེ་འགྲེམས་སྤེལ་བྱས་པའི་རྩྭ་སའི་འཛིན་ཡིག་ཅེས་པ་ཕྱིར་བསྡུ་བྱས་ཏེ་ད་ནས་བཟུང་རྩྭ་སའི་བདག་དབང་རྒྱལ་ཁབ་ལ་ཡོད་པ་རེད་ཅེས་མི་མང་ལ་བཙན་གྱིས་མོས་མཐུན་ཡོད་པའི་མིང་རྟགས་རྒྱག་ཏུ་འཇུག་གི་ཡོད་འདུག

དེ་རིང་འདི་གར་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཕྱི་ལོ་ ༢༠༠༡ ཟླ་ ༡༠ ཚེས་ ༣༡ ཉིན་རྒྱ་ནག་གཞུང་གིས་བོད་མི་ཚོ་ལ་སོ་སོའི་རྩྭ་སའི་བདག་དབང་དེ་བོད་མི་རང་ཉིད་ལ་ཡོད་པ་དང་། ལོ་ངོ་ ༥༠ རིང་རྩྭ་སའི་བདག་དབང་ལ་སུ་གཅིག་གིས་ཐེ་བྱུས་བྱེད་མི་ཆོག་སྐོར་བརྗོད་དེ་རྩ་སའི་འཛིན་ཡིག་དེ་སྤྲད་ཡོད་ཀྱང་། ད་ལོ་ནས་འཛིན་ཡིག་དེ་རྒྱ་ནག་གཞུང་གིས་ཕྱིར་བསྡུ་བྱེད་བཞིན་པ་མ་ཟད། རྒྱ་གཞུང་གི་དམིགས་ཡུལ་གཙོ་བོ་ནི་འབྲོག་པ་ཚོ་ས་གནས་གཅིག་ཏུ་བསྡུས་ཏེ་སྟངས་འཛིན་དམ་དྲག་བྱེད་བདེ་བའི་ཆེད་དུ་ཡིན་ལ། འབྲོག་པ་མང་ཚོགས་ནས་ཕྱུགས་རིགས་ཀྱི་འཕེལ་ཁ་རྒྱས་ཤིང་སྔར་གྱི་རང་དབང་ལྡན་པའི་འབྲོག་པའི་འཚོ་ཐབས་ལ་དགའ་མོས་ཀྱིས་རྒྱ་གཞུང་གི་བྱེད་བབ་དེར་འདོད་མོས་བྱེད་ཀྱི་མེད་པ་མ་ཟད། གྲོང་གསེབ་ཅན་ཏུ་བསྒྱུར་ཏེ་མཐར་ས་རྩྭ་མེད་ལ་ཕྱུག་རིགས་ཀྱང་མེད་པ་ཞིག་ཏུ་འགྱུར་འགྲོ་ཉེན་ཡོད་པའི་སེམས་འཚབ་བྱེད་བཞིན་ཡོད་འདུག

སྤྱིར་རྒྱ་ནག་གཞུང་གིས་དེ་སྔོན་ནས་མཚོ་སྔོན་ཕྱོགས་ཀྱི་འབྲོག་པ་ཚོར་རྩྭ་ས་གཞུང་བཞེས་ཀྱི་ལས་གཞི་ལག་བསྟར་བྱས་ཡོད་པ་མ་ཟད། སྔ་ལོར་རྒྱ་ནག་གཞུང་གིས་མཚོ་སྔོན་ཞིང་ཆེན་གྱི་རྫོང་ཁག་སོ་སོའི་སྲིད་གཞུང་གིས་མི་མང་བསྡུ་སྐོང་བྱས་ཏེ། རྩྭ་སའི་སྐོར་གྱི་ཚོགས་འདུ་ཟེར་བ་ཞིག་བསྡུས་ཏེ། རྩྭ་སའི་བདག་དབང་སྐོར་ཀྱི་ལམ་སྟོན་དང་ས་འཛིན་ལག་དེབ་ཟེར་བའི་ཤོག་གྲངས་ ༡༧ ཅན་གྱི་ཡིག་ཆ་ཞིག་ཁྱབ་བསྒྲགས་བྱས་ཏེ། འབྲོག་པའི་རྩྭ་ས་ནི་རྒྱལ་ཁབ་ལ་དབང་བས་རྒྱལ་ཁབ་ལ་ག་དུས་དགོས་མཁོ་ཡོད་ན། དེ་དུས་གཞུང་བཞེས་གཏང་ཆོག་པ་སོགས་ཀྱི་དྲིལ་བསྒྲགས་བྱས་ནས་ལག་བསྟར་མགོ་འཛུགས་བྱས་ཡོད་འདུག

སྔར་ལོར་རྒྱ་ནག་གཞུང་གིས་རྩྭ་ས་ཁག་ཕྱིར་བསྡུ་བྱེད་སྐབས་འདི་གའི་གསར་འགོད་པས་བོད་གནས་ཉམས་ཞིབ་པ་པདྨ་རྒྱལ་ལགས་སུ་གནད་དོན་དེའི་སྐོར་དྲིས་པར་ཁོང་གིས། ད་ལྟའི་ཆར་རྒྱ་ནག་གཞུང་གིས་བོད་མཚོ་སྔོན་ཕྱོགས་སུ་རྩྭ་དཔོན་ལམ་ལུགས་དང་ཆུ་དཔོན་ལམ་ལུགས། ཕྱུགས་སྐྱུར་རྩྭ་འདེམས་ལམ་ལུགས་སོགས་འབྲོག་པའི་རྩྭ་ཐང་དང་འབྲེལ་བའི་སྲིད་ཇུས་སྣ་ཚོགས་ཤིག་འཐེན་བཞིན་ཡོད་པ་དང་། སྤྱིར་ན་རྩྭ་ཐང་དང་འབྲེལ་བའི་སྲིད་ཇུས་མང་པོ་ཞིག་ལ་མིང་སྣ་ཚོགས་བཏགས་ཡོད་པ་ལས། ཡིན་པ་དེ་སྔོན་རྒྱ་ནག་གཞུང་གིས་རྩྭ་ས་འགན་གཙང་ལེན་ཞེས་རྩྭ་ཐང་དང་ཞིང་ས་སོགས་ཀྱི་བདག་དབང་རྒྱལ་ཁབ་ལ་ཡོད་པ་ལས་མི་མང་ལ་མེད་པའི་སྲིད་ཇུས་དེའི་ཁོངས་གཏོགས་ཡིན་པ་དང་། ད་ལྟའི་ཆར་དེ་སྔོན་གྱི་རྩྭ་སའི་སྲིད་ཇུས་མང་པོ་ཞིག་ལ་གྲུབ་འབྲས་གང་ཡང་མ་བྱུང་སྟབས། རྒྱ་ནག་གཞུང་གིས་འབྲོག་པ་ཚོའི་ཕྱུགས་རིགས་ཀྱི་གྲངས་ཀ་ལ་ཚོད་འཛིན་དང་རྩྭ་སའི་བདག་དབང་རྒྱལ་ཁབ་ལ་ཡོད་སྐོར་བརྗོད་དེ། རྩྭ་ཕྱུགས་དོ་མཉམ་ཟེར་བའི་ལས་གཞི་ཞིག་སྤེལ་བཞིན་ཡོད་པ་དང་། ལས་གཞི་དེའི་ནང་ཁྱིམ་ཚང་མང་པོ་མཉམ་དུ་བསྡུས་ནས་མཉམ་ལས་ཁང་ཞེས་པ་ཞིག་ཆེད་འཛུགས་བྱས་ཏེ། འབྲོག་པའི་ཕྱུགས་རིགས་ཀྱི་གྲངས་ཀ་ལ་ཚད་བཀག་བཟོས་ཏེ། རྩྭ་སར་གནོད་སྐྱོན་མི་ཡོང་བ་བཟོ་དགོས་སྐོར་བརྗོད་ཡོད་པ་རེད།

རྒྱ་ནག་གཞུང་གིས་མཚོ་སྔོན་ཞིང་ཆེན་གྱི་འབྲོག་པའི་རྩྭ་སའི་འཛིན་ཡིག་ཅེས་པའི་དཔེ་དེབ་དམར་པོ་ཞིག་འགྲེམས་སྤེལ་བྱས་ཡོད་པའི་ནང། རྩྭ་སའི་བདག་དབང་སྐོར་ནས་རྒྱལ་ཁབ་ཀྱི་འཛུགས་སྐྲུན་དོན་དུ་རྩྭ་ས་སྡུད་སྤྱོད་དང་། འགན་གཙང་ལེན་བྱེད་མཁན་གནས་སྤོར་བ་དང་བདག་ཉར་བྱེད་པའི་ནུས་པ་ཤོར་བ། གཞན་ལ་བརྒྱུད་སྤྲོད་བྱེད་པ། ཕྱིར་སྤྲོད་པ། བུ་ཕྲུག་གིས་རྒྱུད་འཛིན་བྱེད་པ་བཅས་ཀྱི་དབང་གིས་རྩྭ་ས་བཀོལ་དབང་འགྱུར་ལྡོག་བྱུང་ཚེ། རྩྭ་སའི་འཛིན་ཡིག་བཟུང་ནས་ལས་ཁུངས་སུ་འགྱུར་ལྡོག་གི་འགྲོ་ལུགས་ལྟར་སྒྱུར་བཅོས་བྱེད་དགོས། རིམ་པ་སོ་སོའི་སྲིད་གཞུང་དང་རྩྭ་ཐང་ལྟ་ཞིབ་དོ་དམ་སྡེ་ཁག་གིས་རྩྭ་བེད་སྤྱོད་གནས་ཚུལ་ཞིབ་དཔྱོད་བྱེད་སྐབས་རང་འགུལ་གྱིས་འཛིན་ཡིག་སྟོན་དགོས་པ། རྩྭ་ས་བཀོལ་སྤྱོད་བྱེད་པའི་དུས་ཡུན་ནི་འཛིན་ཡིག་གནང་བའི་ཉིན་ནས་བཟུང་མ་མཐའ་ལོ་ལྔ་བཅུ་ལ་འཕོ་འགྱུར་མི་བྱེད་ཅེས་དོན་ཚན་ལྔ་བཀོད་འདུག་ཀྱང་། སྲིད་གཞུང་གི་དགོས་མཁོ་ལྟར་རྩྭ་སའི་འཛིན་ཡིག་ཕྱིར་བསྡུས་ནས་ས་ཆ་གཞུང་གིས་ལེན་འགྲོ་ཡི་ཡོད་འདུག

རྒྱ་གར་ལྷོ་ཕྱོགས་གསར་འགོད་པ།དོན་གྲུབ་བཀྲ་ཤིས།