ཨོ་ལིམ་ཕིག་རྩེད་འགྲན་རྒྱ་ནག་ནང་འཚོག་རྒྱུ་མཚམས་འཇོག་དགོས་པའི་འབོད་སྐུལ་འོག གྷི་རེ་སིའི་ནང་རྩེད་འགྲན་གྱི་དཔལ་འབར་དེ་རྒྱ་ནག་ལ་རྩིས་སྤྲོད་བྱེད་འཆར་ཡོད་པར་ངོ་རྒོལ་བྱས་རྐྱེན་བུ་མོ་གཉིས་འཛིན་བཟུང་བྱས་ཡོད་འདུག
རྒྱ་ནག་ནང་དགུན་ཁའི་ཨོ་རྩལ་རྩེད་འགྲན་འཚོག་པར་ཟླ་གསུམ་ལྷག་ཙམ་མ་གཏོགས་མེད་པའི་སྐབས་འདིར། རྒྱལ་སྤྱིའི་ཨོ་རྩལ་མཐུན་ཚོགས་ཀྱིས་རྩེད་འགྲན་གྱི་མཇུག་སྐྱོང་སྙིང་དོན་མཚོན་པའི་ཨོ་རྩལ་དཔལ་འབར་རྒྱ་ནག་ལ་རྩིས་སྤྲོད་ལ་ཉེ་བའི་སྐབས་དང་བསྟུན། ཁ་སང་བོད་རང་བཙན་སློབ་ཕྲུག་ཚོགས་པའི་ཚོགས་མི་ཚེ་ལྷ་རྫོགས་སངས་ལགས་དང་། ཧོང་ཀོང་གི་གསར་བརྗེའི་ལས་འགུལ་བ་ཇོའེ་སཱོ་གཉིས་ནས། གནའ་བོའི་རྒྱལ་ཁབ་གྷི་རེ་སིའི་གྲོང་ཁྱེར་ཨོ་ལིམ་པེ་ཡ་སྟེ། ཨོ་ལིམ་ཕིག་རྩེད་འགྲན་གྱི་དཔལ་འབར་རྩིས་སྤྲོད་བྱེད་ཡུལ་དུ། བོད་ལ་རང་དབང་དགོས་པ་དང་ཧོང་ཀོང་གི་གསར་བརྗེའི་ལས་འགུལ་ལ་རང་དབང་དགོས་པ་སོགས་ཀྱི་འབོད་སྐུལ་འོག རྒྱ་ནག་གི་ཨོ་རྩལ་འགྲན་བསྡུར་མཚམས་འཇོག་དགོས་པའི་ངོ་རྒོལ་ལས་འགུལ་སྤེལ་སྐབས། ས་གནས་ཉེན་རྟོག་པས་འཛིན་བཟུང་གིས་འཁྲིད་ཡོད་འདུག་ལ། ད་ལྟ་ད་དུང་ཀྱང་གློད་མེད་པ་རེད་འདུག
དེ་འབྲེལ་ཨ་རིའི་ (AP) གསར་ཁང་གི་གནས་ཚུལ་ནང་། ཚེ་ལྷ་དང་ཇོའེ་སཱོ་གཉིས་ཨོ་ལིམ་ཕིག་གི་དཔའ་འབར་སྒྲོན་སའི་ཡུལ་དངོས་སུ་འབྱོར་བ་དང་བོད་གྱི་རྒྱལ་དར་དང་ཧོང་ཀོང་གི་གསར་བརྗེའི་དར་ཆ་སོགས་སྒྲེངས་ཤར་བྱས་ཡོད་ཀྱང་། དུས་ཡུན་སྐར་མ་ཁ་ཤས་ལས་མ་འགོར་བར་ཉེན་རྟོག་པ་བཅུ་གྲངས་ཤིག་ཡོང་ནས་ཁོ་གཉིས་བཙན་ཁྲིད་བྱས་ཡོད་འདུག་ལ། ནེའུ་ཡོག་ཏུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས། ཚེ་ལྷ་ལགས་དང་ཇོའེ་སཱོ་གཉིས་ནི་ཨ་རིའི་མི་སེར་ཡིན་པ་དང་། རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་གནང་མཁན་ (No Beijing 2022) ཞེས་པའི་ཚོགས་མི་ཡིན་སྐོར་འགྲེལ་བརྗོད་བྱས་ཡོད་འདུག
ཚེ་ལྷ་ལགས་ཀྱིས། ད་ནི་རྒྱལ་སྤྱིའི་ཚོགས་སྡེ་ཁག་དང་མི་མང་གཉིད་སད་པའི་ཐོག་ནས་པེ་ཅིན་གྱི་ཨོ་རྩལ་འགྲན་ཚོགས་མཚམས་འཇོག་བྱེད་པའི་རྒྱབ་ཏུ་ལངས་དགོས་པའི་དུས་ལ་འབབ་ཡོད། ཨོ་རྩལ་མཐུན་ཚོགས་ཀྱིས་རྒྱ་ནག་གི་རིགས་རྒྱུད་རྩ་གཏོར་གྱི་བྱ་སྤྱོད་ལ་རྒྱབ་སྐྱོར་བྱེད་ཀྱི་ཡོད་པ་མཚོན་ཡོད། ཅེས་བརྗོད་ཡོད་པ་དང་། ཇོའི་སཱོ་ལགས་ཀྱིས། རྒྱལ་སྤྱིའི་ཨོ་ལིམ་ཕིག་གི་མཐུན་ཚོགས་ཀྱིས་རྒྱ་ནག་གིསབོད་དང་ཧོང་ཀོང་། ནང་སོག་དང་ཤར་ཊུ་ཁི་སི་ཐན་ནང་རིགས་རྒྱུད་རྩ་གཏོར་དང་འགྲོ་བ་མིའི་ནག་ཉེས་ཀྱི་བྱ་སྤྱོད་སྤེལ་བཞིན་པའི་རྒྱབ་སྐྱོར་བྱེད་བཞིན་ཡོད་པའི་བརྡ་སྟོན་གྱི་ཡོད། ཅེས་བརྗོད་ཡོད་འདུག
ཐའེ་པེ་དུས་བབ་ཀྱི་གནས་ཚུལ་ལྟར་ན། དེ་རིང་ཨོ་ལིམ་ཕིག་རྩེད་འགྲན་གྱི་དཔལ་འབར་དེ་རྒྱ་ནག་ལ་རྩིས་སྤྲོད་ཀྱི་ཚོད་ལྟའི་སྦྱོང་བརྡར་ཞིག་བྱས་ཡོད་པ་དང་། དཔལ་འབར་རྩིས་སྤྲོད་ཀྱི་མཛད་སྒོ་དངོས་དེ་སང་ཉིན་ཡིན་སྟབས། འགྲོ་བ་མིའི་ཐོབ་ཐང་གི་གཙོས་རང་དབང་དང་ཐོབ་ཐང་རྩོད་མཁན་གྱི་རྒྱལ་སྤྱིའི་ཚོགས་སྡེ་ཁག་ནས་ངོ་རྒོལ་ལས་འགུལ་སྤེལ་འཆར་ཡོད་འདུག
གསར་འགོད་པ། སྐལ་བཟང་སྦྱིན་པ།
