ཤིན་ཅང་གི་དམར་ཤོག་དྲུང་ཆེ་གཞོན་པ་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེར་བསྐོས།

རྒྱ་ནག་གཞུང་གིས་དེ་སྔོན་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་གཞོན་པ་རྒྱ་མི་ཝང་ཅིན་ཀྲིན་ཟེར་བ་ཞིག་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་རུ་བསྐོ་བཞག་བྱས་འདུག

རྒྱ་ནག་གཞུང་གིས་ཆེས་དམ་དྲག་ཆེ་ཞིང་ཚོར་བ་སྐྱེན་པའི་བོད་རང་སྐྱོང་ལྗོངས་ཟེར་བ་དང་ཡུ་གུར་མི་རིགས་རང་སྐྱོང་ཁུལ་ཟེར་བ་གཉིས་ཀྱི་དམར་ཤོག་དྲུང་ཆེ་རྣམས་ཕན་ཚུན་བརྗེ་སྤོར་གྱིས་བསྐོ་བཞག་བྱེད་སྲོལ་ཡོད་པ་ལྟར། དེ་རིང་རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཕྱི་ལོ་ ༢༠༡༩ ནས ༢༠༢༠ བར་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་གཞོན་པ་དང་། སྲིད་ཁྲིམས་ལྷན་ཚོགས་ཀྱི་འགན་འཛིན། ཡུ་གུར་ཐོན་སྐྱེད་འཛུགས་སྐྲུན་དམག་སྡེའི་མགོ་འཁྲིད་ཀྱི་འགན་འཁུར་མྱོང་བའི་རྒྱ་མི་ཝང་ཅིན་ཀྲིན་ཟེར་བ་ཞིག བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་རུ་བསྐོ་བཞག་བྱས་ཡོད་འདུག

རྒྱ་མི་ཝང་ཅིན་ཀྲིན་ནི་ཕྱི་ལོ་ ༡༩༦༣ ལོར་ཧྲན་ཏུང་ལིན་ཞི་རུ་སྐྱེས་ཤིང་། ཧྲན་ཏུང་སློབ་ཆེན་ནས་སྤྱི་ཚོགས་རིང་ལུགས་ཐོག་ཞིབ་འཇུག་ཐོན། དེ་ནས་དོ་དམ་རིག་པའི་ཐོག་འབུམ་རམས་པའི་བསླབ་པ་མཐར་སོན་རྗེས། ཕྱི་ལོ་ ༡༩༨༧ ཙམ་ནས་རྒྱ་ནག་དམར་ཤོག་ཚོགས་པའི་ནང་འཛུལ་ཞུགས་བྱས་ཏེ། ཕྱི་ལོ ༡༩༩༣ ནས་ལོ་གཅིག་མ་ཟིན་རིང་ཡུན་ནན་ཞིང་ཆེན་གྱི་དམར་ཤོག་དྲུང་ཆེ་བྱས། ཕྱི་ལོ ༡༩༩༥ ནས་ལོ་འགའ་བསྟུད་མར་ཡུན་ནན་ཞིང་ཆེན་ཁུན་མིན་གྲོང་ཁྱེར་གྱི་སྤྱི་ཁྱབ་འགན་འཛིན་གཞོན་པ་དང་། སྤྱི་ཁྱབ་འགན་འཛིན། སྲིད་ཁྲིམས་འགན་འཛིན། དྲིལ་བསྒྲགས་འགན་འཛིན། དེ་བཞིན་ཕྱི་ལོ་ ༢༠༠༥ ནས་ ༢༠༠༧ བར་ཡུན་ནན་ཞིང་ཆེན་མཐོ་རིམ་མི་དམངས་ཁྲིམས་ཁང་ཟེར་བའི་མགོ་འཛིན་གཞོན་པ་སོགས་བྱས་མྱོང་ཡོད་པ་རེད་འདུག

 ཕྱི་ལོ་ ༢༠༡༢ ནས་ཧུའུ་པེ་ཞིང་ཆེན་གྱི་མགོ་འཁྲིད་གཞོན་པ་སོགས་བྱས། ཕྱི་ལོ་ ༢༠༡༩ ཟླ་ ༡ ནས་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་ཚོགས་པའི་རྒྱུན་ལས་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཕྱི་ལོ་ ༢༠༢༠ ཟླ་ ༥ ནས་ལོ་དེའི་ཕྱི་ཟླ་ ༩ པའི་བར་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཤིན་ཅང་ཐོན་སྐྱེད་འཛུགས་སྐྲུན་དམག་སྡེའི་དམར་ཤོག་དྲུང་ཆེ། རྒྱ་ནག་ཡུ་གུར་འཛུགས་སྐྲུན་ལྷན་ཚོགས་ཀྱི་མགོ་འཁྲིད་སོགས་ཡིན་འདུག

བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཝུའུ་དབྱིང་ཅེ་ཡིས་ཕྱི་ལོ་ ༢༠༡༦ ཟླ་ ༨ ནས་ཕྱི་ཟླ་ ༡༠ ཚེས་ ༡༩ བར་དྲུང་ཆེ་བྱས་ཏེ། བོད་རང་སྐྱོང་ལྗོངས་ཀྱིས་ཁ་བྲལ་གྱི་སིམ་འཛུལ་དང་སྟོབས་ཤུགས་ལ་ཕྱོགས་ཡོངས་ནས་ཡིད་གཟབ་ཆེན་པོའི་ངང་ཁ་བྲལ་བར་ངོ་རྒོལ་བྱེད་པའི་སློབ་གསོའི་ཁ་ཕྱོགས་ཡང་དག་སྟངས་འཛིན་ནན་པོ་བྱས་ཏེ། ཁ་བྲལ་བར་ངོ་རྒོལ་བྱེད་པའི་ནུས་ཤུགས་ཆེ་རུ་གཏོང་དགོས་སྐོར་དང་། སྤྲུལ་སྐུའི་ཡང་སྲིད་སྐོར་གྱི་ཆོས་ལུགས་ཆོ་ག་དང་ལོ་རྒྱུས་ཀྱི་ངེས་སྲོལ་ལ་སྟངས་འཛིན་ཡང་དག་དང་། བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཆམ་མཐུན་ཡོང་བར་སྐུལ་འདེད་ཧུར་ཐག་གཏོང་དགོས་སྐོར་སོགས་བརྗོད་དེ་དམ་དྲག་དང་བཙན་གནོན་ཤུགས་ཆེན་བྱས་ཡོད་འདུག

གསར་འགོད་པ། དཔལ་ལྡན།