བོད་ཀྱི་ཆབ་སྲིད་བཙོན་པ་གྲྭ་དགེ་འདུན་གྲགས་པ་ལགས་ཀློད་གྲོལ་བཏང་ཡོད་ཀྱང་། སྐུ་གཟུགས་གནས་སྟངས་བདེ་ཐང་མིན་པའི་རྐྱེན་གྱིས་ཁྲི་ཏུན་གྲོང་ཁྱེར་གྱི་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་འདུག
དེ་རིང་འདི་གའི་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༦ ཟླ་ ༨ ཚེས་ ༢༦ ཉིན་འཛིན་བཟུང་བྱས་པའི་མཛོད་དགེ་སོག་ཚང་དགོན་པའི་གྲྭ་དགེ་འདུན་གྲགས་པ་ལགས། འདི་ལོའི་ཕྱི་ཟླ་ ༨ པའི་ཟླ་མཇུག་ཙམ་ལ་ཀློད་གྲོལ་བཏང་ཡོད་ཀྱང་། ཁོང་ལ་མཁྲིས་ནད་ཀྱི་ནད་གཞིའི་རྐྱེན་པས། ཁྲི་ཏུན་གྲོང་ཁྱེར་གྱི་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་འདུག
གནས་ཚུལ་མཁོ་སྤྲོད་པས། ཕྱི་ཟླ་༨ པའི་ཟླ་མཇུག་ཙམ་ལ་དགེ་འདུན་གྲགས་པ་ལགས་ཀློད་གྲོལ་ཐོབ་ཐང་ནས་རང་ཁྱིམ་དུ་འབྱོར་ཡོད་ནའང་། ཁོང་གི་སྐུ་གཟུགས་བདེ་ཐང་མིན་པ་ཙམ་དུ་མ་ཟད། མཁྲིས་ནད་ཀྱི་རྐྱེན་པས་ད་ཆར་རྒྱ་ནག་གི་ཁྲི་ཏུན་གྲོང་ཁྱེར་གྱི་སྨན་ཁང་ཞིག་ཏུ་སྨན་བཅོས་བྱེད་དུ་ཕྱིན་འདུག ད་ལྟ་ཁོང་གི་འགྲོ་འདུག་ལ་ལྟ་རྟོག་ནན་མོ་བྱེད་བཞིན་ཡོད་པའི་རྐྱེན་གྱིས། ནང་མི་སྤུན་མཆེད་སུ་གཅིག་ཀྱང་ཁོང་གི་གནས་སྟངས་དང་གནས་ཚུལ་གླེང་སློང་བྱེད་ཐབས་མེད་པ་ཆགས་འདུག ཅེས་བརྗོད་བྱུང་ལ། གྲྭ་དགེ་འདུན་གྲགས་པ་ལགས་ཀློད་གྲོལ་བཏང་སྟེ། ཟླ་གཉིས་ཙམ་འགྲོ་བཞིན་ཡོད་པ་དང་། ཁོང་བཙོན་གྲོལ་བཏང་བ་ཙམ་ལས་འགྲོ་འདུག་གི་རང་དབང་གང་མེད་པའི་ཁར། ཟླ་རེ་བཞིན་ངེས་པར་དུ་ས་གནས་ཉེན་རྟོག་ཁང་དུ་འགྲོ་དགོས་ཀྱི་ཡོད་འདུག
ཕྱི་ལོ་ ༢༠༡༦ ཟླ་ ༨ ཚེས་ ༢༤ ཉིན་གྱི་མཚན་མོར་མཛོད་དགེ་སོང་ཚང་དགོན་པའི་གྲྭ་དགེ་འདུན་གྲགས་པ་དང་བློ་བཟང་ཤེས་རབ་གཉིས་གྲྭ་ཤག་ཏུ་རྒྱ་གཞུང་ཉེན་རྟོག་པས་འཛིན་བཟུང་བྱས་པ་དང་། ཟླ་བཅུའི་རྗེས་སྟེ་ཕྱི་ལོ་ ༢༠༡༧ ཟླ་ ༦ པའི་ཚེས་ ༡༧ ཡས་མས་ཤིག་ལ་ཟི་ཁྲོན་ཞིང་ཆེན་རྔ་པ་བོད་རིགས་ཆང་རིགས་རང་སྐྱོང་ས་ཁུལ་རྒྱལ་རོང་ཁྲོ་ཆུ་རྫོང་གི་ཁྲིམས་ཁང་ཞིག་གིས། དགེ་འདུན་པ་ཁོང་གཉིས་ལ་རྒྱལ་ཁབ་ཁ་བྲལ་དང་བོད་ཕྱི་ཕྱོགས་སུ་འབྲེལ་གཏུག་བྱས་ལུགས་ཀྱི་ནག་ཉེས་བཙུགས་ཏེ། གྲ་དགེ་འདུན་གྲགས་པར་ལོ་ ༥ བཙོན་འཇུག་དང་བློ་བཟང་ཤེས་རབ་ལ་ལོ་ ༤ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག སྐབས་དེར་དགེ་འདུན་པ་ཁོང་གཉིས་ཀྱི་ཁྲིམས་རྩོད་པར་ཉེས་འཛུགས་དག་འབུད་བྱེད་དབང་མེད་པ་དང་། ཞུ་སྦྱོར་བའི་ངོས་ནས་དག་སེལ་གྱི་སྐད་ཆ་བཤད་པའི་ཐོབ་ཐང་མེད་པ། ཁྲིམས་རའི་ནང་ཟུར་ཉན་དུ་འགྲོ་མཁན་ཚོར་དམ་དྲག་ནན་མོ་བྱས་པར་མ་ཟད། ཕ་མ་སྤུན་མཆེད་སོགས་སུའང་ཐུགས་འཕྲད་བྱེད་དུ་བཅུག་མེད་པ་རེད།
ཕྱི་ལོ་ ༢༠༡༦ ལོར་དགེ་འདུན་པ་ཁོང་གཉིས་འཛིན་བཟུང་བཀག་ཉར་བྱེད་དོན་ཐད། མང་ཚོགས་ཁྲོད་ཁོང་གཉིས་ཀྱིས་བོད་ཕྱི་ཕྱོགས་ཀྱི་གསར་འགྱུར་གནས་ཚུལ་རིགས་ལ་ལྟ་ཉན་བྱས་བ་ཡིན་ཚུལ་སོགས་བསྒྲགས་ཡོད་ཀྱང་། ཕྱིས་སུ་ཁོང་གཉིས་འཛིན་བཟུང་བྱེད་དོན་ནི་ཕྱི་ལོ་ ༢༠༡༠ ལོར་མཛོད་དགེ་རྫོང་ཐང་སྐོར་གྲོང་རྡལ་ས་གནས་རྒྱ་གཞུང་གིས་༼མཁར་གྲོང་ལྗང་མདོག་ཅན་དུ་བསྒྱུར་བ་༽ཞེས་པའི་འཛུགས་སྐྲུན་སྲིད་ཇུས་ལ་ཁ་གཡར་ནས། མཛོད་དགེ་རྫོང་ཐང་སྐོར་ཡུལ་ཚོ་སྐ་བར་མ་སྡེ་བའི་རྩྭ་ས་མུའུ་༤༠༠ དང་ཁྱིམ་ཚང་༢༠ ལྷག་གི་ས་ཁང་བཙན་འཕྲོག་བྱས་པའི་ཐད་ལ། ས་གནས་མི་མང་གིས་ཕྱི་ལོ་ ༢༠༡༥ ཟླ་ ༡ པོ་ནས་ཕལ་ཆེར་ལོ་གཅིག་གི་རིང་རྩྭ་སའི་བདག་དབང་ཕྱིར་སྤྲོད་དགོས་པའི་ཞི་རྒོལ་དང་ཞུ་གཏུག་གི་གནས་ཚུལ་ཕྱི་ཕྱོགས་སུ་བསྒྲགས་པའི་དོགས་གཞི་ཡིན་འདུག
ད་ལྟ་རང་ལོ་༤༥ ཡས་མས་ཤིག་ཡིན་པའི་དགེ་འདུན་གྲགས་པའི་ཕ་ཡུལ་ནི་ཟི་ཁྲོན་མཛོད་དགེ་རྫོང་ཐང་སྐོར་སོག་ཚང་སྡེ་བ་ཡིན་པ་དང་། ཁོང་ནི་སོག་ཚང་དགོན་རྒྱུད་པ་གྲ་ཚང་གསང་འདུས་ཁམས་ཚན་ནས་ཡིན་པ་རེད། གྲྭ་བློ་བཟང་ཤེས་རབ་ལགས་ད་ལྟ་དགུང་ལོ་ ༤༠ ཙམ་ཡིན་པ་དང་ཕ་ཡུལ་ཐང་སྐོར་ཡུལ་ཚོའི་མགོ་སེར་སྡེ་པ་ནས་ཡིན་འདུག
གསར་འགོད་པ། སྐལ་བཟང་སྦྱིན་པ།
