ཀུ་ལུ་རྫོང་ཁོངས་སུ་ཡོད་པའི་བྷུན་ཏར་དགེ་འོས་མཐོ་སློབ་ཁང་གི་ཁང་པ་རྣམས་ཀུ་ལུ་མ་ནི་ལི་དང་སུན་མཚོ་མན་གསུམ་དུ་གནས་སྡོད་བོད་ནས་ཡོང་བའི་གསར་འབྱོར་དཀའ་ངལ་ཅན་གྱི་ཁྱིམ་ཚང་ ༤༨ ལ་བགྲོ་འགྲེམས་གནང་ཡོད་འདུག 
བྷུན་ཏར་དགེ་འོས་མཐོ་སློབ་ཁང་ཕྱི་ལོ་ ༢༠༡༦ ཙམ་ནས་བཟུང་སྟོང་པར་ལྷག་ཡོད་སྟབས། ཟླ་འདིའི་ཕྱི་ཚེས་ ༢༠ ཉིན་ནང་སྲིད་ལས་ཁུངས་ཀྱི་དྲུང་འཕར་ཟླ་བ་ཚུལ་ཁྲིམས་ལགས་སོགས་ས་གནས་སུ་ཆེད་ཕེབས་ཀྱིས་ཀུ་ལུ་མ་ན་ལི་ཁུལ་ནས་ཁྱིམ་ཚང་ ༡༧ དང་། སུན་མཚོ་མན་གསུམ་ནས་ཁྱིམ་ཚང་ ༣༡ བཅས་བོད་ནས་འབྱོར་བའི་དཀའ་ངལ་ཅན་གྱི་ཁྱིམ་ཚང་ཁྱོན་བསྡོམས་ ༤༨ ལ་སྡོད་ཁང་བགོ་འགྲེམས་གནང་ཡོད་འདུག
འདི་གའི་གསར་འགོད་པར་ས་གནས་ནས་གནས་ཚུལ་མཁོ་གཏོང་གནང་བ་ལྟར་ན། ནང་སྲིད་ལས་ཁུངས་ཀྱི་དྲུང་འཕར་ཟླ་བ་ཚུལ་ཁྲིམས་ལགས་དང་། འཆར་ཚན་འགན་འཛིན་བསྟན་འཛིན་མཁྱེན་རབ་དང་འབྲེལ་ལས་བསོད་ནམས་སྟོབས་རྒྱལ་བཅས་ས་གནས་སུ་ཕེབས་ཏེ། ཕྱི་ཚེས་ ༡༩ ཉིན་ས་གནས་འགོ་འཛིན་ལས་ཁུངས་དང་ཟུང་འབྲེལ་ཐོག་སྡོད་ཁང་སོ་སོར་ཁང་ཨང་སྦྱར་བ་དང་། ཚོགས་ཁང་དང་རྒྱན་ཤོག་གོ་སྒྲིག དེ་བཞིན་ཁྱིམ་ཚང་རེ་རེར་གན་ཡིག་འཇོག་རྒྱུའི་ཡིག་ཆ་སོགས་ལ་བསྐྱར་ཞིབ་བཅས་གནང་རྗེས། ཟླ་འདིའི་ཕྱི་ ༢༠ ཉིན་བྷུན་ཏར་དགེ་འོས་མཐོ་སློབ་ཀྱི་ཚོགས་ཁང་ནང་རྒྱན་ཤོག་གི་ལམ་ནས་ཁྱིམ་ཚང་སོ་སོར་སྡོད་ཁང་བགོ་འགྲེམས་གནང་ཡོད་པ་དང་སྦྲགས་གཉིས་མོས་གན་རྒྱ་བཞག་གནང་ཡོད་འདུག
དེའི་ཐད་ས་གནས་མགོ་འཛིན་ཐུབ་བསྟན་ཆོས་འཕེལ་ལགས་ཀྱིས། ཁང་པ་དེ་དག་མཚོ་པདྨ་དང་མ་ཎ་ལི་སོགས་ཀྱི་ཁུལ་དུ་ཁ་འཐོར་དུ་གནས་པའི་བོད་ནས་ཕེབས་པའི་གསར་འབྱོར་རྣམས་ཀྱི་ཆེད་དུ་དམིགས་ཏེ་བགོ་འགྲེམས་གནང་ཡོད། དེ་ཡང་ནང་སྲིད་ལས་ཁུངས་ཀྱི་གཏན་འབེབ་བཞིན་ནང་མིའི་གྲངས་ཚད་ལ་གཞིགས་ནས་ཁང་པ་བགོ་འགྲེམས་བྱས་ཡོད། ཁང་པ་དེ་དག་སྒེར་གྱིས་བཙོང་མི་ཆོག་པ་དང་། ཁྱིམ་ཚང་སོ་སོའི་ནང་མི་རྣམས་ཕྱི་རྒྱལ་དུ་ཕྱིན་པའམ། སོ་སོའི་འཚོ་བ་འཁྱོངས་ནས་ས་གནས་གཞན་ལ་གནས་སྤོར་བྱེད་ཚེ། ཁང་པ་དེ་དག་ནང་སྲིད་ལས་ཁུངས་སུ་རྩིས་སྤྲོད་བྱ་དགོས་པ་ལས། དེ་མིན་དོ་བདག་རྣམས་གནས་སྡོད་བྱེད་རིང་ཁང་པ་སྒེར་ལ་དབང་བ་དང་སྒེར་གྱིས་བདག་གཅེས་བྱ་དགོས་པ་ལས། ཁང་པར་ཐོག་རྩེག་དང་གཡས་གཡོན་དུ་ཁང་པ་གསར་པ་འཛུགས་སྐྲུན་མི་ཆོག་པའི་སྐོར་སོགས་འགྲེལ་བརྗོད་གནང་བྱུང་།
བྷུན་ཏར་དགེ་འོས་མཐོ་སློབ་ཁང་ནི་མ་ནཱ་ལེ་ནས་སྤྱི་ལེ་ ༣༠ ཙམ་གྱི་སར་ཡོད་ཅིང་། ཕྱི་ལོ་ ༢༠༡༢ ཟླ་ ༩ ནང་དངོས་སུ་སྒོ་འབྱེད་གནང་སྟེ་ཕྱི་ལོ་ ༢༠༡༦ ལོར་དགེ་འོས་སྦྱོང་བརྡར་བ་ཐེངས་དང་པོ་དེ་ཐོན་རྗེས། དགེ་འོས་སྦྱོང་བརྡར་ཝ་ཎ་དབུས་གཙུག་ལག་མཐོ་སློབ་ཁང་དུ་གནས་སྤོར་བྱས་ཡོད་སྟབས། ད་བར་ལོ་ ༦ ཙམ་རིང་བྷུན་ཏར་སྦྱོང་བརྡར་ཁང་སྒོ་བརྒྱབ་ཡོད་འདུག སྦྱོང་བརྡར་ཁང་དེར་ཁོར་ཡུག་རྒྱ་ཆེན་པོ་དེ་ཙམ་མེད་ཀྱང་ལས་བྱེད་ཀྱི་ལས་ཤག་དང་འཛིན་ཁང་། སློབ་གཉེར་བའི་སྡོད་ཁང་སོགས་ཕྱི་འཛུགས་སྐྲུན་གྱི་ཆ་རྐྱེན་འཛོམས་པོ་ཡོད་འདུག
གསར་འགོད་པ། དཔལ་ལྡན།
