རྒྱ་ནག་གཞུང་གིས་རྫ་དབོན་པོ་དགོན་གྱི་དགེ་འདུན་པ་གསུམ་པོ་ཀློད་གློལ་བཏང་ཡོད་ཀྱང་རྫ་སྨད་ཁུལ་གྱི་སྡེ་བ་གཞན་ལའང་དམ་དྲག་ནན་མོ་བྱེད་བཞིན་ཡོད་པའི་རྐྱེན་གྱིས་བོད་མི་རྣམས་ཀྱི་འགྲོ་འདུག་སྤྱོད་གསུམ་ལ་དཀའ་ངལ་ཆེན་པོ་འཕྲད་མུས་ཡིན་འདུག
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། དེ་སྔོན་རྫ་སྨད་དབོན་པོ་རུ་དམག་མི་ཕོན་ཆེན་འབྱོར་ཏེ་རྫ་དབོན་པོའི་སྡེ་དགོན་གཉིས་ཀྱི་སེར་སྐྱ་མི་མང་ལ་འདྲི་རྩད་སྔོག་བཤེར་བྱས་པ་བརྒྱུད། ༧གོང་ས་རྒྱལ་བ་རིན་པོ་མཆོག་གི་སྐུ་པར་སྒྲིག་གཤོམ་ཉར་ཚགས་བྱས་པ་དང་། ཕྱི་ཕྱོགས་ལ་འབྲེལ་བ་བྱས་པའི་ཉེས་མིང་འོག སྔ་གཞུག་ཏུ་འཛིན་བཟུང་བཀག་ཉར་བྱས་པའི་བོད་མི་རྣམས་འདི་ལོའི་ཕྱི་ཟླ་ ༩ ཚེས་ ༢༣ དང་ ༢༦། ༢༧ ཉིན་བཅས་སུ་ཀློད་གྲོལ་བཏང་ཡོད་ཀྱང་། རྫ་དབོན་པོ་དགོན་གྱི་དགེ་འདུན་པ་གསུམ་མུ་མཐུད་བཀག་ཉར་བྱས་ཡོད་ཀྱང་། ཉེ་སྔོན་ཁོང་རྣམ་པ་གསུམ་ཡང་ཀློད་གྲོལ་བཏང་ཡོད་པའི་གནས་ཚུལ་ཐོན་ཡོད་ནའང་ག་དུས་ཀློད་གྲོལ་བཏང་བ་དང་ཁོང་ཚོའི་གནས་སྟངས་གང་འདྲ་ཡོད་མེད་སོགས་ཤེས་རྟོགས་ཐུབ་ཀྱི་མེད་པ་རེད།
གནས་ཚུལ་མཁོ་སྤྲོད་པས། ད་ལྟ་རྒྱ་ནག་གཞུང་གིས་རྫ་སྨད་དབོན་པོ་ཙམ་མ་ཡིན་པར་ཉེ་འཁོར་སྡེ་བ་གཞན་གྱི་སེར་སྐྱ་མི་མང་གི་ཁ་པར་སོགས་ཀྱང་བཙན་འཕྲོག་བྱས་ཏེ། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་ཡོད་མེད་དང་། ཕྱི་རྒྱལ་དུ་ཡོད་པའི་བོད་མིར་འབྲེལ་འདྲིས་ཡོད་མེད་ཀྱི་ཞིབ་བཤེར་བྱེད་མགོ་བཙུགས་ཏེ་ཉུལ་ཞིབ་དང་ལྟ་རྟོག་བྱེད་མུས་ཡིན་པ་མ་ཟད། སྐད་འཕྲིན་སོགས་སུ་ཚོགས་པ་བཙུགས་མི་ཆོག་པ་དང་། གལ་ཏེ་ཚོགས་པ་སོགས་བཙུགས་དགོས་ཁེལ་ཚེ། ས་གནས་ལས་ཁུངས་ནས་བཀའ་འཁྲོལ་ཐོབ་དགོས་པའམ། སྲིད་གཞུང་གི་ལས་བྱེད་ཅིག་ངེས་པར་དུ་ཚོགས་པའི་ནང་དུ་བཅུག་དགོས་སྐོར་སོགས་འགྲེལ་བརྗོད་གནང་བྱུང་།
འདི་ལོའི་ཕྱི་ཟླ་ ༨ ཚེས་ ༢༥ ནས་ ༢༩ བར་དུ། རྒྱ་ནག་གཞུང་གིས་རྫ་དབོན་པོ་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་བོད་མི་རྣམས་ལ་འབྲེལ་འདྲིས་བྱས་པའི་ཉེས་མིང་འོག བོད་མི་ ༥༣ ཙམ་འཛིན་བཟུང་བཀག་ཉར་བྱས་ཡོད་པ་དང་། ཕྱི་ཟླ ༨ ཚེས་ ༢༢ ནས་བཟུང་སྔ་གཞུག་ཏུ་ཉེས་མིང་དེའི་འོག རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་བཙན་འཁྲིད་བྱས། ཡང་ཟླ་ ༩ ཕྱི་ཚེས ༣ ཉིན་རྫ་སྨད་དབོན་པོ་དགོན་གྱི་དགེ་འདུན་པ་དྲུག་དང་། དབོན་པོ་སྡེ་བའི་བུད་མེད་གཉིས་བཅས་སྔ་གཞུག་ཏུ་བོད་མི་སེར་སྐྱ་ཁྱོན་ ༡༢༡ ཡས་མས་སེར་ཤུལ་རྫོང་ཐོག་ཏུ་བཙན་འཁྲིད་བཀག་ཉར་བྱས་ཡོད་པ་མ་ཟད། བཀག་ཉར་འོག་ཏུ་ཡོད་པའི་བུད་མེད་སྐལ་སྒྲོན་ཞེས་པ་ཞིག་ལ་ནད་གཞི་ལྕི་མོ་ཕོག་ཡོད་པའི་གནས་ཚུལ་ཐོན་ཡོད་ཀྱང་། ད་ལྟ་བུད་མེད་སྐལ་སྒྲོལ་ལགས་ཀྱིས་གནས་སྟངས་ག་འདྲ་ཡོད་མེད་ཤེས་རྟོགས་ཐུབ་ཀྱི་མི་འདུག
གསར་འགོད་པ། དཔལ་ལྡན།
