འདས་པའི་བདུན་ཕྲག་གཅིག་རིང་བོད་མི་ ༣༢ ཙམ་ལ་ཏོག་དབྱིབས་རིམས་ནད་འགོས་ཡོད་པ་དང་བོད་མི་ ༢ ཙམ་ཏོག་དབྱིབས་རིམས་ནད་ཀྱི་རྐྱེན་གྱིས་འདས་གྲོངས་སུ་ཕྱིན་ཡོད་འདུག
ཁ་སང་ཉིན་རྒྱབ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསར་བསྒྲགས་ཐེངས་ ༨༣ སྤེལ་བ་ལྟར་ན། འདས་པའི་བདུན་ཕྲག་ནང་རྒྱ་གར་ནང་གི་ས་གནས་ ༩ དང་བལ་ཡུལ་གྱི་ས་གནས་གྲངས་ ༢ ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༨༥ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༡༨༢ བཅས་ཁྱོན་བསྡོམས་ཟུར་བཀག་ཏུ་སྡོད་མཁན་མི་གྲངས་ ༢༦༧ ཡོད་པ་དང་། རྒྱ་གར་དང་བལ་ཡུལ་ནང་བོད་མི་ ༣༢ ཙམ་ལ་ཏོག་དབྱིབས་རིམས་ནད་འགོས་ཡོད་པ་དང་། མི་གྲངས་ ༢ ཙམ་རྐྱེན་འདས་སུ་ཕྱིན་ཡོད་འདུག
གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། སྤྱིར་རྒྱ་གར་ནང་དུ་ཏོག་དབྱིབས་རིམས་ནད་ཀྱི་ཕྱོགས་ཡོངས་ཀྱི་གནས་སྟངས་ཇེ་ལེགས་སུ་འགྲོ་མུས་ཡིན་ཡང་། ཉེ་ལམ་རྒྱ་གར་ནང་དུ་ཆོས་ཕྱོགས་ཀྱི་ལས་རིམ་མང་པོ་ཞིག་སྤེལ་གྱིན་ཡོད་པས། རིམས་ནད་འགོས་མཁན་གྱི་མི་གྲངས་ཇེ་མང་དུ་འགྲོ་མུས་ཡིན་པ་དང་། ཟླ་ ༡༡ ཚེས་ ༡ ཉིན་ནས་རྒྱ་གར་རྒྱལ་ས་ལྡི་ལི་ཁུལ་གྱི་དམའ་རིམ་དང་། འབྲིང་རིམ། མཐོ་སློབ་སློབ་གྲྭ་སོགས་འཚོག་འཆར་ཡོད་པ་དང་། རྒྱུན་ལྡན་བཞིན་ཚོང་གི་ལས་རིགས་དག་གཉེར་འཆར་ཡོད་སྟབས། རིམས་ནད་འགོས་ཁྱབ་ཀྱི་ཉེན་ཁ་ཆེན་པོ་ཞིག་ཡོད་པས། ཚང་མས་རིམས་ནད་ལ་དོགས་གཟོན་དང་རང་རང་གི་འཕྲོད་བསྟེན་ལ་དོ་སྣང་ཆེན་པོ་བྱ་དགོས་པ་དང་། དགུན་ཚོང་ལ་སྐྱོད་མཁན་བོད་མི་རྣམས་ཀྱིས་ས་ཁུལ་དེ་དག་གི་སྨན་ཁང་སོགས་ལ་འབྲེལ་འདྲིས་ཀྱིས། སྔོན་ཚུད་ནས་གྲ་སྒྲིག་འཐུས་ཚང་བྱ་དགོས་པ་དང་། བོད་མི་དགུན་ཚོང་ལ་སྐྱོད་མཁན་ཚོས་ས་གནས་ཁག་གི་ཏོག་དབྱིབས་རིམས་ནད་ཀྱི་སྒྲིག་གཞིར་བརྩི་སྲུང་བྱ་རྒྱུ་གལ་ཆེན་ཡིན་སྐོར་གྱི་ལམ་སྟོན་སོགས་གནང་འདུག
ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས། རྒྱ་གར་ནང་དུ་ཆོས་ཕྱོགས་ཀྱི་ལས་རིམ་མང་པོ་ཞིག་སྤེལ་མུས་ཡིན་སྟབས། ཏོག་དབྱིབས་རིམས་ནད་འགོས་མཁན་གྱི་གྲངས་འབོར་ཇེ་མང་དུ་འགྲོ་མུས་ཡིན་པ་དང་། ལྷག་པར་བཞུགས་སྒར་ཁུལ་གྱི་ཀང་ར་རྫོང་སོགས་ཀྱི་ནང་དུའང་ནད་པ་ཇེ་མང་དུ་འགྲོ་ཡི་ཡོད་སྟབས། མི་ཚོགས་འདུ་འཛོམས་ཀྱི་རིགས་ལ་གཡོལ་དགོས་པ་དང་། ཁ་རས་གྱོན་དགོས་པ། ལག་པ་སོགས་དུག་སེལ་ཡང་ཡང་བྱས་ཏེ། སོ་སོའི་འཕྲོད་བསྟེན་ལ་དོ་སྣང་དང་ཡིད་གཟབ་ཀྱིས། ཁྲོམ་གཞུང་དུ་བར་ཐག་སོགས་འཇོག་དགོས་པ་དང་། འགོག་ཁབ་བརྒྱབ་མེད་པའི་བོད་མི་རྣམས་ཀྱིས་ངེས་པར་དུ་འགོག་ཁབ་བརྒྱག་དགོས་སྐོར་གྱི་ལམ་སྟོན་སོགས་གནང་བྱུང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་ ༦༧༣༦ བྱུང་བའི་ཁྲོད་དྲག་སྐྱེད་ཟིན་པ་ ༦༥༢༨ དང་། རྐྱེན་འདས་སུ་ཕྱིན་པ་ ༡༥༥། ད་ལྟ་ཏོག་ནད་ཀྱིས་མནར་བཞིན་པ་བོད་མི་ ༥༣ ཡོད་འདུག དེ་བཞིན་རྒྱ་གར་ནང་ཏོག་དབྱིབས་འགོག་ཁབ་གཉིས་ཀ་བརྒྱབ་ཟིན་པའི་མི་གྲངས་ ༤༤༠༧༨ དང་། དང་པོ་བརྒྱབ་ཟིན་པའི་མི་གྲངས་ ༧༢༢༨ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༦༦༩༧ ཡོད་འདུག
གསར་འགོད་པ། དཔལ་ལྡན།
