བོད་རིགས་གཞོན་ནུ་ཞིག་ལ་ལོ་ ༡༥ བཙོན་འཇུག་ཁྲིམས་ཐག་བཅད།

བོད་རིགས་གཞོན་སྐྱེས་ཤིག་ལ་དུག་རྫས་ཉོ་ཚོང་བྱས་པའི་ཉེས་མིང་འོག་ལོ་ ༡༥ ཡི་བཙོན་འཇུག་ཁྲིམས་ཐག་བཅད་ཡོད་པ་རེད།

ཉེ་ལམ་རྒྱ་ནག་གིས་བཅད་བགོས་བྱས་པའི་སི་ཀྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཟེར་བའི་ཁོངས་ཀྱི་དར་རྩེ་མདོའི་ར་རྔ་ཁའི་བོད་ཡིག་སློབ་འབྲིང་དུ་བོད་རིགས་གཞོན་སྐྱེས་པད་ག་གེ་མོ་ཟེར་བ་ཞིག་གིས་དུག་རྫས་ཉོ་ཚོང་བྱས་པའི་ཉེས་མིང་འོག དར་མདོ་གྲོང་ཁྱེར་མི་དམངས་ཁྲིམས་ཁང་ཟེར་བས། ལོ་ངོ་ ༡༥ ཡི་བཙོན་འཇུག་ཁྲིམས་ཐག་བཅད་ཡོད་འདུག

རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ད་ལན་དར་མདོ་གྲོང་ཁྱེར་མི་དམངས་ཁྲིམས་ཁང་ཟེར་བས་པད་ཆེ་ག་གེ་མོའི་གྱོད་དོན་དེ་དངོས་སུ། ར་རྔ་ཁ་བོད་ཡིག་སློབ་འབྲིང་དུ་དགེ་སློབ་ ༡༠༠ ལྷག་བསྡུ་སྐོང་གིས་ཁྲིམས་ར་འཚོགས་ཡོད་པ་མ་ཟད། ཁྲིམས་རའི་ཡུལ་དངོས་རླུང་འཕྲིན་ནང་ཐད་གཏོང་གིས་ས་ཁུལ་གཞན་གྱི་དགེ་སློབ་ ༢༠༠༠ ལྷག་མཉམ་ཞུགས་བྱེད་དུ་བཅུག་ཡོད་འདུག་ལ། པད་ཀྱི་གྱོད་དོན་ར་རྔ་ཁ་བོད་ཡིག་སློབ་འབྲིང་དུ་བསྡུས་ཏེ་དགེ་སློབ་བརྒྱ་ཕྲག་མང་པོ་བསྡུ་སྐོང་བྱེད་དོན་ནི་དགེ་རྒན་དང་སློབ་མ་རྣམས་ལའང་གོ་བསྐོན་སློབ་གསོ་རྒྱག་ཆེད་ཡིན་སྐོར་བསྒྲགས་ཡོད་པ་རེད།དར་མདོ་གྲོང་ཁྱེར་ཉེན་རྟོག་པས་པདྨ་འཛིན་བཟུང་བྱེད་སྐབས། ཁོའི་ལག་ཏུ་དུག་རྫས་གྷི་རམ་ ༡༤༦ ཡོད་པ་དང་། ཁོས་ཕྱི་ལོ་ ༢༠༢༠ ཟླ་ ༡༡ ཙམ་ནས་དུག་རྫས་བཙོངས་ཡོད་སྐོར་བརྗོད་དེ། ལོ་ངོ་ ༡༥ བཙོན་འཇུག་ཁྲིམས་ཐག་བཅད་ཡོད་འདུག གནས་ཚུལ་ནང་ཁོས་དུག་རྫས་བཙོངས་ཡོད་སྐོར་བརྗོད་པ་ཙམ་ལས་དོན་དངོས་ཀྱི་རྒྱབ་ལྗོངས་གང་ཡིན་སོགས་ཀྱི་ཞིབ་ཕྲ་མི་འདུག་ལ། ད་ལྟ་པདྨ་ནི་རང་ལོ་ ༡༩ ལས་སོན་མེད་པའི་གཞོན་ནུ་ཞིག་ཡིན་པ་རེད།