ལ་དྭགས་ཁྲིག་སེ་ཚུལ་ཁྲིམས་རྣམ་དག་གླིང་གི་མཁན་རིན་པོ་ཆེ་༧སྐྱབས་རྗེ་ཤར་སྤྲུལ་རྗེ་བཙུན་ངག་དབང་བྱམས་པ་བསྟན་འཛིན་མཆོག་ནས་ཕྱི་ལོ་ ༡༩༦༨ ཙམ་ནས་བཟུང་ལ་དྭགས་མི་མང་གི་ཆེད་དུ་ཆོས་སྲིད་གཉིས་ཀྱི་ཐོག་ནས་རླབས་ཆེན་གྱི་མཛད་འགན་བཞེས་དང་བཞེས་བཞིན་པར་ཆེ་བསྟོད་དུ་ཕྱི་ལོ་ ༢༠༢༡ ལོའི་ལ་དྭགས་དཔལ་རྔམ་གཟེངས་རྟགས་ཕུལ་ཡོད་འདུག
ལ་དྭགས་དབུས་གཞུང་མངའ་སྡེ་དབུ་བརྙེས་པའི་དུས་སྟོན་ཉིན་མོ་ཕྱི་ཟླ་ ༡༠ ཚེས་ ༣༡ ཉིན། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་གླེ་ཡིས། ལ་དྭགས་ཁྲིག་སེ་ཚུལ་ཁྲིམས་རྣམ་དག་གླིང་གི་མཁན་རིན་པོ་ཆེ་༧སྐྱབས་རྗེ་ཤར་སྤྲུལ་རྗེ་བཙུན་ངག་དབང་བྱམས་པ་བསྟན་འཛིན་དཔལ་བཟང་པོ་མཆོག་གིས། ལོ་མང་རིང་ཆོས་སྲིད་གཉིས་ཀྱི་ཐོག་ནས་ལ་དྭགས་ཀྱི་མི་རིགས་དང་སྤྱི་ཚོགས་ལ་བྱམས་བརྩེ་དང་ལྷག་བསམ་རྣམ་པར་དག་པའི་སྒོ་ནས་ཞབས་འདེགས་ཞུས་ཏེ་ཤུགས་རྐྱེན་ཆེན་པོ་བསླེབས་པའི་ངོས་འཛིན་འོག ལ་དྭགས་སུ་སྙན་གྲགས་ཡོད་པའི་ཕྱི་ལོ་ ༢༠༢༡ ལོའི་ལ་དྭགས་དཔལ་རྔམ་གཟེངས་རྟགས་ཕུལ་ཡོད་འདུག
འཇམ་དབྱངས་སློབ་གྲྭའི་ངེས་སྟོན་པ་དགེ་བཤེས་བློ་བཟང་བསམ་གཏན་ལགས་སུ་༧སྐྱབས་རྗེ་ཁྲིག་རྩེ་རིན་པོ་ཆེ་མཆོག་ལ་ཕྱི་ལོ་ ༢༠༢༡ ལོའི་ལ་དྭགས་དཔལ་རྔམ་གཟེངས་རྟགས་ཐོབ་པའི་བཀའ་འདྲི་ཞུས་པར་ཁོང་གིས། ལ་དྭགས་དཔལ་རྔམ་གཟེངས་རྟགས་འདི་ནི་ལོ་ ༤༠༠ གོང་ལ་དྭགས་ཀྱི་རྒྱལ་པོ་སེངྒེ་རྣམ་རྒྱལ་ཞལ་བཞུགས་པའི་སྐབས་སུ་ལ་དྭགས་ཀྱི་མི་མང་ལ་ཆོས་སྲིད་གཉིས་ཀྱི་ཐོག་ནས་བཀའ་དྲིན་བསྐྱངས་ཡོད་པ་རྣམས་ཀྱི་རྗེས་དྲན་སླད་བཀའ་དྲིན་རྗེས་དྲན་གྱི་གཟེངས་རྟགས་ཤིག་རེད་འདུག གཟེངས་རྟགས་འདི་འབུལ་མགོ་བཙུགས་ནས་ལོ་ལྔ་ཕྱིན་འདུག དེ་ཡང་ཁྲིག་རྩེ་རིན་པོ་ཆེ་མཆོག་ལ་ཕུལ་བའི་གཟེངས་རྟགས་འདི་ཐེངས་ལྔ་པ་རེད། རིན་པོ་ཆེ་མཆོག་བོད་ནས་ཕེབས་པ་ནས་བཟུང་ལ་དྭགས་ཀྱི་མི་མང་དང་དགོན་སྡེ་ཁག་ལ་ཕྱག་ལས་གནང་ཡོད་པ་རེད། དེ་ཡང་ལོ་ངོ་ ༤༠ དང་ ༥༠ ཙམ་གྱི་བར་དུ་ལ་དྭགས་ཀྱི་མི་མང་གི་ཆེད་དུ་ཞབས་འདེགས་རླབས་པོ་ཆེ་སྒྲུབ་གནང་ཡོད་པ་མ་ཟད། རྒྱ་གར་གཞུང་གི་གྲོས་ཚོགས་གོང་མའི་འཐུས་མི་གནང་ཡོད་རེད་ལ། ང་ཚོ་ལ་དྭགས་ཡོངས་ཀྱི་དགོན་པ་ཚོགས་ཆེན་ཞེས་པ་ཞིག་ཡོད་པ་དེར་ཚོགས་གཙོ་ལོ་མང་པོར་གནང་ཡོད་རེད། དེ་བཞིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ (Ladakh Autonomous Hill Development Council) ནང་བཀའ་བློན་གྱི་ཕྱག་ལས་གནང་ཡོད་པ་སོགས་ཆོས་སྲིད་གཉིས་ཀྱིས་ལ་དྭགས་མི་མང་ལ་ཞབས་འདེགས་མང་པོ་བསྒྲུབས་པའི་བཀའ་དྲིན་མཚོན་དོན་དུ་གཟེངས་རྟགས་ཕུལ་བ་ཡིན་སྐོར་གསུངས་བྱུང་།
ཡང་དགེ་བཤེས་ལགས་ཀྱིས། ད་ལྟ་ལ་དྭགས་ལ་ཡོད་པའི་དགོན་པ་རང་གི་འཛིན་སྐྱོང་སྤེལ་གསུམ་ཐོག་ཕྱག་ལས་གནང་གི་ཡོད་ལ། དམིགས་བསལ་༧སྐུ་མདུན་གྱིས་དགའ་ལྡན་གྱི་ཤེས་ཡོན་བསྟི་གནས་ཁང་གི་དཔེ་མཛོད་ཁང་རྒྱ་ཆེན་པོ་ཤེས་རབ་དགའ་ཚལ་ཞེས་པ་ཞིག་འཛུགས་སྐྲུན་གནང་ཡོད་པ་དེར། དེང་དུས་ཀྱི་ཤེས་ཡོན་དང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ཐོག་ནས་སློབ་ཁྲིད་གནང་རྒྱུ་མཚོན་པའི་སྐྱ་སེར་སུ་འདྲ་ཞིག་གིས་ཀྱང་དེ་ལ་སློབ་སྦྱོང་བྱ་ཡུལ་ཡོད་པའི་བསྟི་གནས་ཁང་ཞིག་ཕྱི་ལོ་ ༢༠༢༠ ལོར་དབུ་འབྱེད་གནང་ཡོད་པ་རེད། དེ་བཞིན་༧གོང་ས་མཆོག་གི་བཀའ་དགོངས་གཞིར་བཟུང་ཕྱག་ལས་གནང་བཞིན་ཡོད་པ་ལྟར་དགོན་པའི་ཕྱི་ནང་བར་གསུམ་དང་ལ་དྭགས་ཀྱི་དགོན་པ་ཡོངས་རྫོགས་ཀྱི་ཚོགས་ཆེན་སྐབས་སུ་སློབ་སྟོན་གནང་ཞིང་། ལ་དྭགས་ཀྱི་མ་འོངས་པའི་བྱེད་ཕྱོགས་ཀྱི་ཐོག་ལ་སློབ་སྟོན་གནང་རྒྱུ་སོགས་ཕྱག་ལས་གནང་དང་གནང་བཞིན་ཡོད་སྐོར་སོགས་གསུངས་བྱུང་།
ཁ་སང་ཕྱི་ཚེས་ ༢ ཉིན་རྒྱལ་སྤྱིའི་དགེ་ལྡན་ལྷན་ཚོགས་ (Geluk International Foundation) ཀྱིས་གཟེངས་བསྟོད་འཚམས་འདྲི་གནང་བའི་ནང་། ད་ལམ་ལ་དྭགས་ས་ཁུལ་རྒྱ་གར་དབུས་གཞུང་གིས་ཐད་ཀར་འཛིན་སྐྱོང་དབུ་འཛུགས་གནང་བའི་དུས་དྲན་ལོ་འཁོར་དུས་སྟོན་གྱི་གཞུང་འབྲེལ་མཛད་སྒོ་གལ་ཆེའི་སྐབས། ༧སྐྱབས་རྗེ་ཁྲིག་སེ་རིན་པོ་ཆེ་མཆོག་ཉིད་ལ་ལ་དྭགས་མང་ཡུལ་མི་མང་ཡོངས་ནས་དམིགས་བསལ་གྱིས་ཆེ་མཐོང་སྙན་གྲགས་ཆེ་བའི་དཔལ་རྔམས་གཟེངས་རྟགས་ཕུལ་བར་དགྱེས་བཞེས་མཛད་གནང་འདུག་པར། འཇམ་མགོན་ཆོས་ཀྱི་རྒྱལ་པོའི་རྗེས་འཇུག་འཛམ་གླིང་གང་སར་ཁྱབ་པའི་དགེ་ལུགས་པ་ཡོངས་ཀྱི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུས་པ་དང་། སླད་མར་རིན་པོ་ཆེ་མཆོག་བསྟན་འགྲོ་སྤྱི་དང་ལྷག་པར་དུ་དགེ་ལྡན་བསྟན་པའི་མཛེས་རྒྱན་དམ་པར་སྐུ་ཚེ་རྡོ་རྗེའི་ཁམས་སུ་བརྟན་ཅིང་མཛད་འཕྲིན་གོང་དུ་འཕེལ་བའི་ཡིད་སྨོན་ཤུགས་དྲག་ཡོད་སྐོར་བཀོད་འདུག
ཡང་གདན་ས་བཀྲ་ཤིས་ལྷུན་པོའི་རིག་གཞུང་འཛིན་སྐྱོང་བླ་སྤྱི་ལྷན་ཁང་ནས་རིན་པོ་ཆེ་མཆོག་ལ་འཚམས་འཕྲིན་ཞིག་བསྐུར་བའི་ནང་། དེང་གི་ཆར་མགོན་པོ་གང་ཉིད་ནས་བསྟན་པ་འཛིན་སྐྱོང་སྤེལ་གསུམ་གྱི་སྣང་བ་ཆེན་པོས་འཇིག་རྟེན་ཁམས་ཀུན་ཁྱབ་པར་མཛད་དེ་སྐྱེ་འགྲོ་མཐའ་དག་དང་གདུལ་བྱའི་ཚོགས་སྨིན་གྲོལ་གྱི་ལམ་ལ་འགོད་པར་བཀའ་དྲིན་གཞལ་དཀར་གྱུར་པ་དང་། ད་ལམ་ལ་དྭགས་དབུས་གཞུང་མངའ་སྡེ་དབུ་ཚུགས་པའི་དུས་སྟོན་མཛད་སྒོའི་ཐོག་༧སྐྱབས་རྗེ་རིན་པོ་ཆེ་མཆོག་ལ་ལ་དྭགས་མང་ཡུལ་མི་མང་ཡོངས་ནས་དམིགས་བསལ་ཆེ་མཐོང་ཐོག་སྙན་གྲགས་ཆེ་བའི་དཔལ་རྔམ་གཟེངས་རྟགས་འབུལ་བཞེས་མཛད་འདུག་པར། ལྷོ་ཕྱོགས་གདན་ས་བཀྲ་ཤིས་ལྷུན་པོའི་འདུས་མང་སྤྱི་ནས་དགའ་དད་སྤྲོ་གསུམ་གྱི་སྒོ་ནས་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ་ཞེས་འཁོད་འདུག
ཟླ་འདིའི་ཕྱི་ཚེས་ ༡ ཉིན་དཔལ་ལྡན་འབྲས་སྤུངས་སྒོ་མང་གྲྭ་ཚང་ (Drepung Gomang Monstic College) ནས་རིན་པོ་ཆེ་མཆོག་ལ་འཚམས་འདྲི་མཛད་པའི་ནང་། འདི་ལོའི་ཕྱི་ཟླ་ ༡༠ ཚེས་ ༣༡ ཉིན་ལ་དྭགས་དབུས་གཞུང་མངའ་སྡེ་དབུ་ཚུགས་པའི་དུས་སྟོན་སྲུང་གཙི་ཟབ་རྒྱས་ཞུས་པའི་མཛད་སྒོའི་ཐོག སྐུ་ཉིད་ལ་དྭགས་ཡོངས་ཀྱི་ཆེས་མཐོའི་གཟེངས་རྟགས་གྲགས་ཅན། ལ་དྭགས་དཔལ་རྔམ་གཟེངས་རྟགས་ཞེས་པ་དངོས་སུ་འབུལ་བཞེས་ཀྱིས། ལ་དྭགས་མི་མང་ཡོངས་ནས་དམིགས་བསལ་ཆེ་མཐོང་ཕུལ་བའི་གནས་ཚུལ་ཐོན་པར། འདི་ག་རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་བཀྲ་ཤིས་སྒོ་མང་གྲྭ་ཚང་གི་མཁན་བླ་འདུས་མང་ཡོངས་ནས་འཚམས་འདྲི་བཀྲ་ཤིས་བདེ་ལེགས་ཞུས་པ་དང་། རིན་པོ་ཆེ་མཆོག་གིས་ལོ་མང་པོའི་རིང་བསྟན་པའི་མཛད་འཕྲིན་བསྐྱངས་པ་སྤྱི་དང་ལ་དྭགས་མི་མང་གི་བདེ་དོན་ཁོ་ནའི་ཆེད་དུ་ཆོས་སྲིད་གང་ཐད་ནས་མཛད་རྗེས་བསྐྱངས་ཤིང་། ཁྱད་པར་དུ་༧གོང་ས་མཆོག་གི་བཀའ་སློབ་ལམ་སྟོན་འོག་ཤར་སྐྱོད་ཀྱིས་ལ་དྭགས་ནང་ཆོས་ལུགས་མཐུན་འབྲེལ་གོང་སྤེལ་གཏོང་རྒྱུ་དང་ཁོར་ཡུག་སྲུང་སྐྱོབ་གནང་རྒྱུ་སོགས་རླབས་ཆེན་གྱི་མཛད་འཕྲིན་རྒྱ་ཆེར་བསྐྱངས་དང་སྐྱོང་བཞིན་པར་དགའ་གུས་ཆེན་པོས་ཡི་རངས་བསྔགས་བརྗོད་ཞུས་ཡོད་འདུག་ལ། སླད་མར་རིན་པོ་ཆེ་མཆོག་སྐུ་ཚེ་ཡུན་དུ་བརྟན་ཅིང་རླབས་ཆེན་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་གྱིས་འགྲུབ་པ་དང་། མ་འོངས་པར་༧རྒྱལ་བའི་བཀའ་དགོངས་བཞིན། ལ་དྭགས་མི་མང་དང་ལ་དྭགས་བསྟན་སྲིད་སྤྱིར་སྨན་པའི་རླབས་ཆེན་གྱི་མཛད་བཟང་དག་མུ་མཐུད་སྐྱོང་གནང་ཡོང་བའི་སྨོན་འདུན་ཞུས་ཡོད་འདུག
འདི་ལོའི་ཕྱི་ཟླ་ ༡༠ ཚེས་ ༣༡ ཉིན་འབྲས་སྒོ་མང་མངའ་རིས་ཁང་ཚན་རིག་གཞུང་གཅེས་འཛིན་ཚོགས་པ་ནས་རིན་པོ་ཆེ་མཆོག་ལ་འཚམས་འདྲི་ཞུ་ཡིག་ཕུལ་བའི་ནང་། རིན་པོ་ཆེ་མཆོག་ལ་དྭགས་གཤམ་སྟོད་གཞུང་གསུམ་གྱི་མི་མང་ཡོངས་ལ་དབང་ལུང་འཁྲིད་གསུམ་གནང་ནས་བསྟན་པ་འཛིན་སྐྱོང་སྤེལ་གསུམ་རྒྱ་ཆེར་མཛད་པ་དང་། རིན་པོ་ཆེ་མཆོག་ནི་འབྲས་སྒོ་མང་མངའ་རིས་ཁང་ཚན་ལའང་སྐུ་དྲིན་ཆེན་པོ་ཡིན་སྐོར་དང་། ༧གོང་ས་མཆོག་གིས་ཇི་ལྟར་བཀའ་ཕེབས་པ་ལྟར་བཀའ་བཞིན་སྒྲུབ་པ་སོགས་ཀྱི་ཆོས་ཕྱོགས་ཀྱི་མཛད་བཟང་དང་། ལ་དྭགས་ཀྱི་མི་རིགས་དང་སྤྱི་ཚོགས་ལ་བྱམས་བརྩེ་དང་ལྷག་བསམ་རྣམ་དག་གི་སྒོ་ནས་ཞབས་ཏོག་འགངས་ཅན་ཞུས་ཤིང་། སྤྱི་ཚོགས་ནང་ཆོས་སྲིད་གཉིས་ཀྱི་ཡར་རྒྱས་ཐོག་ཕྱག་ལས་མཛད་པར་བརྟེན། གཟེངས་རྟགས་དེ་ཕུལ་ནས་ཡི་རང་དང་བསྔགས་བརྗོད་ཞུས་ཡོད་སྐོར་བཀོད་འདུག
༸སྐྱབས་རྗེ་ཤར་པ་སྤྲུལ་སྐུ་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་ཕྱི་ལོ་ ༡༩༤༣ ཟླ་ ༥ ཚེས་ ༢༠ ཉིན་ལ་དྭགས་ཆུ་ཤོད་གྲོང་མིང་འབིས་ལུ་པ་ཞེས་པའི་ཁྱིམ་དུ། ཡབ་ཡེ་ཤེས་དཔལ་འབྱོར་ཕུན་ཚོགས་དང་། ཡུམ་ཚེ་བརྟན་དཔལ་འཛིན་གཉིས་ཀྱི་སྲས་སུ་སྐུ་འཁྲུངས་པ་དང་། ཕྱི་ལོ་ ༡༩༥༣ ལོར་ཐོས་བསམ་སློབ་གཉེར་གནང་ཕྱིར་བོད་དུ་ཕེབས་ཏེ་ཕྱི་ལོ་ ༡༩༥༩ བར་དཔལ་ལྡན་བཀྲ་ཤིས་སྒོ་མང་གྲྭ་ཚང་དུ་གཞུང་ཆེན་ཁག་ལ་སློབ་གཉེར་གནང་། དེ་ནས་ཕྱི་ལོ་ ༡༩༦༨ ནས་ ༢༠༠༦ བར་དུ་ལ་དྭགས་མི་མང་གི་བདེ་སྡུག་སླད་རྒྱ་གར་གྲོས་ཚོགས་གོང་མའི་འཐུས་མི་གནང་མྱོང་བ་སོགས་ཆོས་སྲིད་གཉིས་ཀྱི་མཛད་པ་རླབས་ཆེན་བསྐྱངས་དང་སྐྱོང་བཞིན་ཡོད་འདུག
གསར་འགོད་པ། བསྟན་འཛིན་ཕུར་བུ།
