དེ་རིང་དང་སང་ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཨུ་རུ་སུའི་དད་ལྡན་དོན་གཉེར་ཅན་རྣམས་ལ་དྲ་ལམ་ཐད་གཏོང་བརྒྱུད་མདོ་སྡེ་རྒྱན་གྱི་གསུང་ཆོས་དང་ཆོས་ཞུ་བའི་དྲི་བར་བཀའ་ལན་གནང་གི་འདུག
ཨུ་རུ་སུའི་ནང་པའི་རྗེས་འཇུག་པ་རྣམས་ནས་ཇི་ལྟར་གསོལ་བ་བཏབ་པ་ལྟར། དེ་རིང་ནས་ཉིན་གཉིས་རིང་༧གོང་ས་སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་རྗེ་བཙུན་བྱམས་པ་མགོན་པོས་མཛད་པའི་མདོ་སྡེ་རྒྱན་གྱི་གསུང་ཆོས་དབུ་འཛུགས་གནང་བ་དང་བསྟུན། ཆོས་དད་ཡོད་མེད་དང་ནང་པ་ཡིན་མིན་གྱི་དབྱེ་བ་མེད་པར་སེམས་ཁམས་རིག་པ་དང་ཤེས་ཡོན་གྱི་འདུ་ཤེས་ཀྱི་ཐོག་ནས་ནང་པ་སངས་རྒྱས་པའི་ལྟ་གྲུབ་དང་ཚད་མ་རིག་པའི་སྐོར་ལ་དོ་སྣང་གསར་པ་ཞིག་ཡོང་གི་ཡོད་པ་ལྟར། ང་ཚོ་བོད་སོག་གཉིས་ནས་ཞབས་འདེགས་སྒྲུབ་རྒྱུའི་གོ་སྐབས་ཤིག་ཏན་ཏན་ཡོད་སྐོར་གསུངས་སོང་།
ཐོག་མར་༧གོང་ས་མཆོག་གིས། བཅོམ་ལྡན་འདས་ཀྱིས་ངའི་བསྟན་པ་འདི་བྱང་ནས་བྱང་དུ་དར་ཡོང་ཟེར་ནས་གསུངས་པ་དེ་ཡོད་པ་རེད། རྒྱ་གར་བྱང་རྒྱུད་ཀྱི་གཙོ་བོ་ནཱ་ལེཎྜ་ནས་སངས་རྒྱས་ཀྱི་བསྟན་པ་ཤུགས་ཆེན་པོ་དར་ཏེ་བོད་ལ་བསླེབས་པ་རེད། དེ་ནས་སོག་པོ་ལ་སོགས་པའི་ཡུལ་གྲུ་ཁག་མང་པོ་ཞིག་ལ་བོད་ནས་སངས་རྒྱས་ཀྱི་ཆོས་དར་ཏེ་བསྟན་པ་བྱང་ནས་བྱང་དུ་དར་ཡོང་ཟེར་ནས་གསུངས་པ་འདི་དེ་འདྲ་ཞིག་ལ་གོ་བ་ལེན་གྱི་ཡོད་པ་རེད། དངོས་ཡོད་གནས་ཚུལ་ལ་དུས་རབས་ཁ་ཤས་ཤིག་གི་རིང་ལ་ཨེ་ཤ་ཡའི་ལུང་པའི་ནང་དུ་སངས་རྒྱས་ཀྱི་ཆོས། དེ་ཡང་དཔལ་ནཱ་ལེནྜ་ཡི་ཆོས་བརྒྱུད་དྲི་མ་མེད་པ་ལུང་དང་རིག་པའི་ཐོག་ནས་གཏན་ལ་ཕབ་པ་ཞིག་དད་པ་གཅིག་པོ་མིན་པར། རིག་པའི་ཐོག་ནས་དཔྱད་པ་བྱས་ཏེ་འགྲོ་བ་དང་ཀླུ་སྒྲུབ་ཡབ་སྲས་ཀྱི་གཞུང་དང་། ཐོགས་མེད་སྐུ་མཆེད་ཀྱི་གཞུང་སོགས་ཀླུ་སྒྲུབ་ཡབ་སྲས་ཀྱི་གཞུང་འདི་ཚོ་གཙོ་བོ་བྱེད་ཀྱི་ཡོད་པ་རེད། གཞུང་འདི་ཚོ་ཡག་པོ་བལྟ་བར་ཚད་མ་རིག་པའི་འགྲོ་སྟངས་ཤེས་དགོས་ཀྱི་ཡོད་རེད། དེར་བརྟེན། དེ་སྔ་ང་ཚོ་བོད་ལ་གཞུང་པུ་ཏི་ལྔ་ཡོད་པ་རེད། དེའི་ནང་ནས་མཛོད་འདུལ་གཉིས་བསླབ་བྱ་སྤྱིར་བཏང་ཡོད་པ་ཞིག་རེད། གལ་ཆེ་བ་དེ་ཚད་མ་རྣམ་འགྲེལ་དང་དབུ་མ། ཕར་ཕྱིན་འདི་ཚོར་སློབ་གཉེར་བྱ་རྒྱུ་གཙོ་བོ་དེ་རེད། དེ་འདྲ་སོང་ཙང་ཧོར་གྱི་ཡུལ་ལའང་བོད་ལ་སློབ་གཉེར་བྱེད་སྟངས་ལྟར་བསྟན་པ་བྱང་ནས་བྱང་དུ་དར་ཡོང་གསུངས་པ་ཇི་བཞིན་ཧོར་གྱི་ཡུལ་ཁག་གིས་གཞུང་ཆེན་ཡག་པོ་ཞེ་དྲགས་བལྟས་པ་རེད། ཅེས་གསུངས་སོང་།
མུ་མཐུད་༧རྒྱལ་བ་རིན་པོ་ཆེ་མཆོག་གིས། ངོས་རང་ལོ་ཆུང་དུས་སྒོ་མང་གི་དགེ་བཤེས་ཕལ་ཆེ་བ་སོག་པོ་རེད། སེ་ར་བྱེས་ཀྱི་དགེ་བཤེས་ཁྲོད་སོག་པོ་ཁ་ཤས་ཡོད་རེད་ལ་དགའ་ལྡན་བྱང་རྩེ་ནས་སོག་པོ་ཁ་ཤས་ཤིག་ཡོད་པ་རེད། གང་ལྟར་སྒོ་མང་གི་དགེ་བཤེས་མང་ཆེ་བ་སོག་པོ་རེད་འདུག ངོས་རང་ཆུང་ཆུང་སྐབས་སུ་གཞུང་ཆེན་སྤྱི་དང་ལྷག་པར་རྟགས་གསལ་གཏོང་རྒྱུ་དེ་ཚོའི་གྲས་གཙོ་བོ་སློབ་མཁན་དེ་སོག་པོ་རེད། མདོར་ན་བོད་ཀྱི་དགེ་བཤེས་ལྷག་པར་དུ་སྒོ་མང་གི་མཁས་པ་ཡིན་ན་ཧ་ལམ་སོག་པོ་ཡིན་པས་ཁྱབ་པ་ལྟ་བུ་བཤད་ཆོག་གི་རེད། དེར་བརྟེན་སྔར་སངས་རྒྱས་ཀྱི་བསྟན་པ་བོད་གངས་ཅན་ལྗོངས་ལ་ཡོད་པ་དེ་ཧོར་གྱི་ཡུལ་ལ་དར་རྒྱས་ཆེན་པོ་ཆགས་ཏེ་བསྐྱར་དུ་བོད་ནང་དུ་སོག་པོའི་དཔེ་ཆ་མང་པོ་ཞིག་བོད་ཀྱི་སངས་རྒྱས་ཀྱི་བསྟན་པར་ཐོས་བསམ་སྒོམ་གསུམ་གྱི་ཐོག་ནས་བཤད་སྒྲུབ་ཟུང་སྦྲེལ་གྱིས་བསྟན་པ་འཛིན་སྐྱོང་སྤེལ་གསུམ་གནང་ཡོད་པ་རེད། ད་ལྟའི་ཆར་ང་ཚོ་བཙན་བྱོལ་བ་ཆགས་ཡོད་པའི་གནས་ཚུལ་ཉམ་ཐག་པོ་རེད་དེ། ཡིན་ནའང་གྲྭ་ས་ལ་དེང་སང་སོག་པོ་ཁ་ཤས་ཡོད་རེད་ལ། ལྷག་པར་དུ་བར་སྐབས་ཤིག་ནས་སོག་པོའི་གྲྭ་རྒྱུན་གང་ལ་གང་འཚམས་ཤིག་རྒྱ་གར་དུ་འབྱོར་ནས་སྒོ་མང་དུ་སོག་པོའི་གྲྭ་རྒྱུན་ཏོག་ཙམ་ཡོད་རེད། དེ་སྔ་ཡིན་ན་ང་ཚོའི་བོད་ལ་བླ་མ་ཡིད་གསུམ་ཟེར་བའི་མིང་བཏགས་ཏེ་བསྡད་ཀྱི་ཡོད་པ་རེད། བར་སྐབས་ནས་བོད་ཀྱི་སངས་རྒྱས་པའི་ཆོས་འདི་དངོས་གནས་དྲང་གནས་ཀྱི་ཚད་མ་རིག་པ། ལྟ་གྲུབ་གཏིང་ཟབ་པོ་ཡོད་པའི་ཆོས་ལུགས་ཤིག་ཡིན་པ་འཛམ་བུ་གླིང་ཡོངས་གྲགས་ཀྱིས་ཕལ་ཆེར་ངོས་ལེན་ཡོད་པ་ལྟ་བུ་རེད། དེར་བརྟེན་ང་ཚོ་བོད་ཀྱི་སངས་རྒྱས་ཀྱི་བསྟན་པ་འདི་དཔལ་ནཱ་ལེནྜའི་ཆོས་བརྒྱུད་ཕལ་ཆེར་དྲི་མ་མེད་པ་ཆགས་འདུག ཤྲི་ལངྒ་དང་འབར་མ། ཐའེ་ལིན་ཌི་རྒྱལ་ཁབ་ཀྱིས་པཱ་ལིའི་ཆོས་བརྒྱུད་འཛིན་གྱི་ཡོད་པ་དེ་སངས་རྒྱས་ཀྱི་ཆོས་བརྒྱུད་གཞི་མ་ལྟ་བུ་རེད་ལ། མདོའི་ཉམས་ལེན་དེ་ཚོ་ཞེ་དྲགས་ཡག་པོ་ཡོད་རེད། ཚད་མ་རིག་པ་དང་དབུ་མ། དེ་བཞིན་ཚད་མ་རིག་པའི་ཐོག་ནས་དཔྱད་པ་བྱ་རྒྱུ་དེ་ཚོའི་གྲས་ནི་ཕལ་ཆེར་ནཱ་ལེནྜའི་ཆོས་བརྒྱུད་འཛིན་མཁན་ང་ཚོ་བོད་སོག་གཉིས་པོ་རྐྱང་རྐྱང་རེད། དེང་སང་བཙན་བྱོལ་དུ་བོད་པ་བསླེབས་པ་དེ་ཚོས་གཞུང་ཆེན་སློབ་གཉེར་བྱ་རྒྱུ་དེ་གལ་ཆེན་པོ་ཞིག་ལ་རྩིས་ནས་གདན་ས་གསུམ་གཙོ་བོར་གྱུར་བའི་བཤད་གྲྭ་ཆེན་པོ་འདི་ཚོ་ང་ཚོ་རྒྱ་གར་ལ་བསྐྱར་གསོ་བྱས་ཏེ་ཡག་ཐག་ཆོད་བཙུགས་ཡོད་པ་རེད། ཅེས་གསུངས་སོང་།
ཡང་མགོན་པོ་མཆོག་གིས། དེ་རིང་ཨུ་རུ་སུའི་ཆོས་གྲོགས་ཚོར་སྐད་ཆ་ཤོད་རྒྱུའི་གོ་སྐབས་བྱུང་བར་ཞེ་དྲགས་དགའ་པོ་བྱུང་། རིམ་པས་སོག་པོའི་གྲྭ་རྒྱུན་སྟོང་ཕྲག་ཁ་ཤས་ཤིག་རྒྱ་གར་ནང་དུ་བསླེབས་ཏེ་སློབ་སྦྱོང་བྱེད་བཞིན་པ་རེད། དེ་སྔོན་ངོས་རང་སོག་ཡུལ་དུ་སླེབས་པའི་སྐབས། སོག་པོའི་མཁན་པོ་དང་ངོས་གཉིས་སྐད་ཆ་བྱུང་། སྔོན་མ་ངོས་རང་དགའ་ལྡན་དགོན་པར་དང་པོ་བསླེབས་པའི་སྐབས། ཁྱེད་རང་ཚོ་སོག་པོའི་ཆོས་གྲོགས་ཚོས་མནྜལ་ཕུལ་ཏེ་མནྜལ་གྱི་གདངས་བཏང་སྟེ་གསུངས་དུས་ངོས་རང་སེམས་པ་ཞེ་དྲགས་སྐྱོ་བྱུང་ལ་མིག་ཆུ་ཤོར་བྱུང་། གང་ལྟར་དེའི་ཚེ་དེའི་དུས་ཆེན་པོ་ཧོར་གྱི་ཡུལ་ལའང་སངས་རྒྱས་ཀྱི་བསྟན་པ་ཞེ་དྲགས་ཉམས་བཞིན་ཡོད་རེད། དེ་དག་སླར་གསོ་ཡོང་བའི་རྣམ་པ་གསལ་པོ་འདུག ཨུ་རུ་སུ་དམར་པོའི་འོག་ལ་ཆོས་ལ་བསམ་བཞིན་དུ་དགག་པ་བརྒྱབ་སྟེ་ཡོང་གི་ཡོད་པའི་གནས་སྟངས་འོག་ངོས་རང་སོག་ཡུལ་དུ་བསླེབས་པའི་དུས། དངོས་གནས་དྲང་གནས་ཀྱི་ཆོས་ཀྱི་དད་པ་གཡོ་བ་མེད་པ་ཞིག་འདུག སློབ་གཉེར་བྱ་རྒྱུ་དེ་གལ་ཆེན་པོ་རེད། འདོན་པ་བཏོན་བསྡད་པ་ཙམ་མིན་པར་སློབ་གཉེར་བརྒྱག་རྒྱུ་དེ་ཞེ་དྲགས་གལ་ཆེན་པོ་རེད་འདུག་ཟེར་ནས་སོག་པོའི་མཁན་པོ་དང་ལྷན་དུ་སྐད་ཆ་བྱུང་། ཐོགས་མེད་ཀྱི་གཞུང་བྱམས་ཆོས་སྡེ་ལྔ་ཟེར་བ་འདིའི་ནང་ནས་མངོན་རྟོགས་རྒྱན་དང་མདོ་སྡེ་རྒྱན་གཉིས་པོ་དེ་གཙོ་ཆེ་བ་ཆགས་ཀྱི་ཡོད་པ་རེད། མངོན་རྟོགས་རྒྱན་དེ་ང་ཚོ་ཆུང་དུས་སྐབས་སུ་བློ་ལ་འཛིན་གྱི་ཡོད་རེད། མངོན་རྟོགས་རྒྱན་འདི་ཚོ་བཅོམ་ལྡན་འདས་ཀྱི་ཤེར་ཕྱིན་གྱི་དོན་དག་གི་ས་བཅད་བསྒྲིགས་པ་ཞིག་རེད་འདུག ཤེར་ཕྱིན་གཞུང་གི་གཙོ་བོ་དབུ་མའི་ལྟ་བ་འདི་དབུ་མ་རྩ་བ་ཤེས་རབ་དང་དབུ་མ་འཇུག་པ་འདི་ཚོ་གལ་ཆེན་པོ་རེད་འདུག ལྟ་གྲུབ་དང་སེམས་ཁམས་རིག་པའི་སྐོར་ལ་སྐད་ཆ་ཤོད་སྐབས་ཚན་རིག་པ་མང་པོ་ཞིག་གིས་དགའ་མོས་ཆེན་པོ་བྱས་ཏེ། ང་ཚོར་བསླབ་པའི་སེམས་ཁམས་རིག་པའི་སྐོར་གྱི་གཞུང་ལུགས་དེ་དག་ལ་ཚན་རིག་པས་དམིགས་བསལ་དོ་སྣང་དང་དགའ་པོ་བྱེད་པ་ཡོང་གི་འདུག དེར་བརྟེན་དེང་སང་འཛམ་བུ་གླིང་འདིའི་སྒང་ལ་བོད་ཀྱི་ནང་ཆོས་ཟེར་དུས་ཆེ་མཐོང་ཡོད་པ་ཞིག་ཆགས་ཡོད་རེད། དེ་ཡང་ང་ཚོའི་གཞུང་ཆེན་འདི་ཚོ་གཙོ་བོ་རིག་པས་དཔྱད་པ་བྱ་རྒྱུ་ཡོད་པས་རེད། ང་ཚོ་བོད་གངས་ཅན་ལྗོངས་ཀྱི་དཔལ་ནཱ་ལེནྜའི་ཆོས་བརྒྱུད་འཛིན་མཁན་གྱིས་རིག་པས་དཔྱད་པ་བྱས་པ་དེ་གཙོ་བོར་བྱས་པས་ཆེ་མཐོང་སྤྲོད་ཀྱི་ཡོད་པ་རེད། ང་ཚོའི་འཛམ་བུ་གླིང་འདིའི་སྒང་ལ་ངོམ་ཆོག་པ་ཡོད་པ་དེ་ང་ཚོ་བོད་སོག་གཉིས་ལ་སོགས་པའི་ཡུལ་གྲུ་འདི་ཚོར་སངས་རྒྱས་ཀྱི་བསྟན་པ་སླར་གསོ་ཡག་པོ་བྱ་ཐུབ་ན། ཆོས་དད་ཡོད་མེད་དང་ནང་པ་ཡིན་མིན་གྱི་དབྱེ་བ་མེད་པར་སེམས་ཁམས་རིག་པ་དང་ཤེས་ཡོན་གྱི་འདུ་ཤེས་ཀྱི་ཐོག་ནས་ནང་པ་སངས་རྒྱས་པའི་ལྟ་གྲུབ་དང་ཚད་མ་རིག་པའི་སྐོར་དེ་ཚོའི་གྲས་ལ་དོ་སྣང་གསར་པ་ཞིག་ཡོང་གི་འདུག་ལ། ང་ཚོས་ཞབས་འདེགས་སྒྲུབ་རྒྱུའི་གོ་སྐབས་ཤིག་ཏན་ཏན་ཡོད་རེད། ཅེས་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ།
