སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ནས་བོད་དོན་རྒྱབ་སྐྱོར་བ་རི་ཀི་ལགས་སྐུ་གྲོངས་བར་དམ་པ་ཁོང་གི་ཤུལ་ལུས་ནང་མི་རྣམས་ལ་ཐུགས་གསོ་དང་གདུང་སེམས་མཉམ་སྐྱེད་ཞུས་གནང་འདུག
ཟླ ༡༠ ཚེས་ ༣༡ ཉིན་བོད་དོན་རྒྱབ་སྐྱོར་བ་སྐུ་ཞབས་རི་ཀི (Riki Hyde-Chambers) ལགས་དགུང་གྲངས་ ༧༧ ཐོག་དབྱིན་ཡུལ་གྱི་སྨན་ཁང་ཞིག་ཏུ་འདས་གྲོངས་སུ་ཕྱིན་ཡོད་པར་བརྟེན། ཁ་སང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དམ་པ་ཁོང་གི་བུ་ཕྲུག་གཉིས་ཀྱི་མིང་ཐོག་ཏུ་ཐུགས་གསོའི་འཕྲིན་ཡིག་ཅིག་བསྐུར་གནང་བའི་ནང་། ང་ཚོས་སྐུ་ཞབས་རི་ཀི་ལགས་དགོངས་པ་རྫོགས་པའི་གནས་ཚུལ་ཐོས་དུས་བློ་ཕམ་ཆེན་པོ་བྱུང་། ངས་སྐབས་བཅུ་བདུན་པའི་སྤྱི་འཐུས་ལྷན་ཚོགས་དང་བོད་མི་ཡོངས་ཀྱི་ཚབ་བྱས་ཏེ། ཁྱེད་དང་ཁྱེད་ཀྱི་ནང་མི་རྣམས་ལ་གདུང་སེམས་མཉམ་སྐྱེད་ཞུ། སྐུ་གཤེགས་དམ་པ་ཁོང་གིས་བོད་ཀྱི་རྩ་དོན་ཐད་ནུས་པ་ཤུགས་ཆེན་བཏོན་ཡོད་པ་མ་ཟད། ཁོང་གིས་སྐུ་ཚེ་གང་བོར་བོད་དོན་ལ་རྒྱབ་སྐྱོར་གནང་ཡོད་སྟབས། ཁོང་ལྟ་བུའི་རྒྱབ་སྐྱོར་བ་དང་གྲོགས་པོ་རླབས་ཆེན་ཞིག་བྱུང་བ་ནི། ང་ཚོའི་བསོད་ནམས་ཡིན་ཞིང་། ཁོང་ཉིད་གཏན་དུ་ང་ཚོའི་སེམས་ནང་ཡོད། ཅེས་གསུངས་འདུག
ཡང་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ཁོང་གིས་མི་ལོ་ལྔ་བཅུ་ལྷག་རིང་བོད་དོན་རྒྱབ་སྐྱོར་ཤུགས་ཆེན་གནང་ཡོད་པ་དང་། ལྷག་པར་དབྱིན་ཡུལ་དུ་བོད་དོན་དྲིལ་བསྒྲགས་དང་རྒྱབ་སྐྱོར་ཤུགས་ཆེན་གནང་ཡོད་ཅིང་། སྤྱི་འཐུས་སོགས་དབྱིན་ཡུལ་དུ་ཕྱོགས་སྐྱོད་ལ་ཕེབས་སྐབས། དུས་རྒྱུན་ནས་རྒྱབ་སྐྱོར་གནང་གི་ཡོད་སྟབས། ཁྱེད་ཉིད་བོད་དོན་སོགས་ཀྱི་ཐད་ནས་བཀྲིན་ཆེན་པོ་ཡིན་སྐོར་སོགས་གསུངས་འདུག
དེ་བཞིན་ཟླ་འདིའི་ཚེས་ ༢ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་སྐུ་སྒེར་གྱི་ཊི་ཝེ་ཊར་དུ། སྐུ་ཞབས་དམ་པ་རི་ཀེ་ལགས་སྐུ་གྲོངས་པར་བློ་ཕམ་བྱུང་། ཕྱི་ལོ་ ༡༩༦༠ ཙམ་ནས་ཁོང་གིས་བོད་དང་བོད་མིའི་འབོད་སྒྲར་རྒྱབ་སྐྱོར་གནང་བ་དང་། ཁོང་གི་རོགས་རམ་ནི་འགྲན་ཟླ་བྲལ་བ་ཞིག་ཡིན་སྟབས། ང་ཚོས་ཁོང་གི་ཤུལ་ལུས་ནང་མི་རྣམས་ལ་ཐུགས་གསོ་དང་། ཁོང་ལ་བསྔོ་སྨོན་ཞུ་ཡི་ཡོད་ཅེས་གསུངས་འདུག
ད་ལོ་དགུང་ལོ་ ༧༧ ཡིན་པའི་སྐུ་ཞབས་རི་ཀི་ལགས་ནི་བོད་དོན་རྒྱབ་སྐྱོར་བ་རྙིང་ཤོས་ཀྱི་གྲས་ཤིག་ཡིན་པ་དང་། ཕྱི་ལོ་ ༡༩༨༤ ལོར་ཁོང་གིས་བླ་མ། བོད་ཀྱི་བརྩམས་སྒྲུང་ (Lama; A Norval of Tibet )ཞེས་པ་དང་། དེ་བཞིན། བོད་ཀྱི་སྒྲུང་གཏམ་(Tibetan Folk Tales)ཞེས་པ་གཉིས་བརྩམས་ཡོད་པ་མ་ཟད། ཁོང་ནི་ ༧གོང་ས་སྐྱབས་མགོན་ཆེན་པོ་མཆོག་དང་ཐུགས་འདྲིས་ཆེན་པོ་ཡོད་ཅིང་། དུས་རྟག་ཏུ་བོད་མི་དང་བོད་དོན་ལ་རྒྱབ་སྐྱོར་མཐའ་གཅིག་ཏུ་གནང་མཁན་ཞིག་ཡིན་འདུག
གསར་འགོད་པ། དཔལ་ལྡན།
