རྒྱ་ནག་གི་བཙན་དབང་འོག་བྲག་མགོ་དགེ་ལྡན་ནང་བསྟན་སློབ་གྲྭ་རྩ་གཏོར་བྱེད་དུ་བཅུག་འདུག

རྒྱ་ནག་གཞུང་གི་དྲག་གནོན་བཙན་བཀའ་འོག་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་པ་མ་ཟད། སློབ་གྲྭའི་འཛིན་ཁང་དང་ཉལ་ཁང་སོགས་རྩ་གཏོར་གྱིས་སློབ་མ་ཁག་ཅིག་ཕྱིར་རང་ཁྱིམ་དུ་ལོག་དགོས་བྱུང་ཡོད་པ་རེད།

ཁ་སང་བོད་ནས་འབྱོར་བའི་བརྙན་ཞིག་གི་ནང་དུ། བྲག་མགོ་དགེ་ལྡན་ནང་བསྟན་སློབ་གྲྭ་རྒྱ་ནག་གཞུང་གིས་སྒོ་རྒྱག་དགོས་པའི་བཙན་བཀའ་བཏང་བ་ལྟར། ས་གནས་བོད་མི་ཚོས་དགེ་ལྡན་ནང་བསྟན་སློབ་གྲྭ་བཤིག་གི་ཡོད་པའི་ཡུལ་དངོས་ཀྱི་གནས་ཚུལ་ཞིག་མཐོང་བྱུང་བས། དེ་རིང་འདི་གའི་གསར་འགོད་པས་ཕ་ཡུལ་བྲག་མགོ་ནས་ཡིན་པའི་སྐལ་བཟང་ནོར་བུ་ལགས་སུ་གནས་ཚུལ་དེ་དངོས་བདེན་ཡིན་མིན་སྐོར་སྐད་ཆ་དྲིས་པར་ཁོང་གིས། ས་གནས་རྒྱ་ནག་སྲིད་གཞུང་གིས་བྲག་མགོ་དགེ་ལྡན་ནང་བསྟན་སློབ་གྲྭར་ཡིག་ཆ་ཚད་ལྡན་མེད་པར་བསྙད་དེ། ཕྱི་ཟླ་ ༡༠ ཚེས་ ༣༡ ནས་ཉིན་གྲངས་གསུམ་བཞིའི་ནང་ཚུད་དུ་སློབ་གྲྭ་དེ་བཤིག་སྟེ་གཏན་དུ་སྒོ་རྒྱག་དགོས་པའི་བཀའ་བཏང་ཡོད་སྐོར་འགྲེལ་བརྗོད་གནང་བྱུང་།

སྐལ་བཟང་ནོར་བུ་ལགས་ཀྱི་གསུངས་པ་ལྟར་ན། ཕྱི་ཟླ་ ༡༠ བའི་ནང་ས་གནས་རྒྱ་ནག་སྲིད་གཞུང་གིས། བྲག་མགོ་དགའ་ལྡན་རབ་བརྟན་རྣམ་རྒྱལ་གླིང་དགོན་པའི་འཛིན་སྐྱོང་འོག་ཡོད་པའི་དགེ་ལྡན་ནང་བསྟན་སློབ་གྲྭ་སྒོ་བརྒྱབ་དགོས་པའི་བཀའ་བཏང་སྟེ། ཕྱི་ཟླ་ ༡༠ ཚེས་ ༣༡ ཙམ་ནས་ཟླ་ ༡༡ ཚེས་གསུམ་ཡས་མས་ཙམ་ལ་དགོན་པས་སློབ་གྲྭ་དེ་སྒོ་མ་བརྒྱབ་ཚེ། ས་གནས་སྲིད་གཞུང་རང་གིས་ས་སྔོག་བྱེད་ཀྱི་འཕྲུལ་འཁོར་སོགས་འཁྲིད་ཡོང་ནས། སློབ་གྲྭ་གཏོར་རྒྱུ་ཡིན་པ་མ་ཟད། སློབ་གྲྭའི་ཤིང་ཆ་སོགས་ཅ་དངོས་གཅིག་ཀྱང་དགོན་པར་སྤྲོད་རྒྱུ་མིན་པའི་འཇིགས་སྐུལ་བྱས་སྟབས། བྲག་འགོ་དགོན་པས་སློབ་གྲྭ་དེ་ཉིད་སྒོ་མི་རྒྱག་ཁ་མེད་བྱུང་བའི་གནོན་ཤུགས་འོག  ས་གནས་མང་ཚོགས་ལ་རེ་སྐུལ་ཞུས་ཏེ། དགོན་པ་རང་ངོས་ནས་སློབ་གྲྭ་བཤིག་སྟེ་ཤིང་ཆ་རྣམས་དགོན་པ་ནས་ཀེ་ལོ་མེ་ཊར་ཕྱེད་ཀ་ཙམ་གྱི་སར་ཡོད་པའི་དགོན་པའི་སྨན་ཁང་དུ་བཞག་ཡོད་འདུག

བྲག་མགོ་དགེ་ལྡན་ནང་བསྟན་སློབ་གྲྭ་སྒོ་རྒྱག་དགོས་པའི་བཙན་བཀའ་བཏང་བར་དགོན་གྲོང་གཉིས་ཀྱི་ས་གནས་ཡུལ་མིས་རྣམ་འགྱུར་བསྟན་ཡོད་མེད་དྲིས་པར་ནོར་བུ་ལགས་ཀྱིས། ན་ནིང་དང་ད་ལོ་བྲག་འགོ་རུ་དམ་དྲག་ཤུགས་ཆེན་བྱེད་ཀྱི་ཡོད་པ་དང་། དེ་སྔོན་ཕྱི་ལོ་ ༢༠༠༨ ལོའི་ས་ཞི་ཞི་རྒོལ་ཆེན་མོའི་སྐབས་དང་ཕྱི་ལོ་ ༢༠༡༢ ལོར་བཅས་བསྟུད་མར་རྒྱ་གཞུང་ལ་ཞི་བའི་ངོ་རྒོལ་ཤུགས་ཆེན་བྱས་ཡོད་སྟབས། དམ་དྲག་ཧ་ཅང་ཤུགས་ཆེན་བྱེད་ཀྱི་ཡོད་པས། དམིགས་བསལ་ངོ་རྒོལ་གནང་མཁན་བྱུང་མི་འདུག་ལ། ད་རེས་སློབ་གྲྭ་དགོན་པ་རང་གིས་མང་ཚོགས་ལ་མངགས་ནས་བཤིག་པ་དང་རྒྱ་ནག་ཡོང་མེད་པ་རེད། ཅེས་དང་། སློབ་གྲྭའི་ནང་ཉམ་ཐག་གི་སློབ་མ་མང་པོ་ཡོད་པ་དང་ད་ལྟ་སློབ་གྲྭ་སྒོ་བརྒྱབ་པ་ཙམ་དུ་མ་ཟད་རྩ་གཏོར་དུ་བཏང་ཡོད་སྟབས། སློབ་མ་མང་པོ་ཞིག་ཕྱིར་རང་ཉིད་ཀྱི་ཁྱིམ་དུ་ལོག་དགོས་བྱུང་ཡོད་སྐོར་བརྗོད་བྱུང་།

རྒྱུས་ལོན་བྱུང་བ་ལྟར་ན། ད་རེས་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་རྩ་གཏོར་བྱེད་མཁན་གྱི་གཙོ་བོ་ནི། ཉག་རོང་དུ་སྐྱེས་པའི་བྲག་མགོ་ རྫོང་དམར་ཤོག་དྲུང་ཆེ་ཝང་ཏུང་ཧྲིན་(王东升) ཟེར་བ་ཁོ་ཡིན་ཞིང་། འདི་ལོའི་ཕྱི་ཟླ་ ༡༠ པ་ནས་ཁོ་བྲག་མགོ་རུ་གནས་སྤོར་བྱས་ཏེ། ད་ལྟ་ཟླ་གཅིག་ཙམ་མ་གཏོགས་འགྲོ་ཡི་མེད་པ་དང་། ཁོ་བྲག་མགོ་རུ་གནས་སྤོར་བྱས་པ་དང་ཁོས་ག་རེ་བྱས་ན་དེར་རྒྱ་ནག་དབུས་ནས་རྒྱབ་སྐྱོར་ཡོད་པའི་སྐད་ཆ་ཞིག་ས་གནས་མང་ཚོགས་ཀྱི་ཁྲོད་དུ་ཁྱབ་བརྡལ་དུ་འགྲོ་མུས་ཡིན་པ་རེད། ཝང་ཏུང་ཧྲིན་(王东升) ཟེར་བ་ནི་ཁོའི་རྒྱ་མིང་ཙམ་ལས་དོན་དངོས་ཐོག་རིགས་རུས་བོད་པ་ཡིན་པ་དང་། ཁོ་ནི་ཕྱི་ལོ་ ༢༠༡༦ ལོར་གསེར་རྟ་བླ་རུང་ཆོས་སྒར་གྱི་གྲྭ་ཤག་ ༤༥༠༠ དང་ཕྱི་ལོ་ ༢༠༡༧ ལོར་གྲྭ་ཤག་ ༣༢༢༥ ཙམ་གཏོར་བཤིག་དང་། དེ་བཞིན་དུ་ཕྱི་ལོ་ ༢༠༡༧ ལོར་ཕྱོགས་མཐའ་ཁག་གི་གྲྭ་བཙུན་ ༣༧༢༩ དང་། ཕྱི་ལོ་ ༢༠༡༧ ལོར་གྲྭ་བཙུན་ ༨༩༥ བཅས་བཙན་གྱིས་ཕྱིར་ཕུད་གཏོང་མཁན་གྱི་གཏེ་བོ་དེ་ཡིན་པ་རེད་ལ། ཕྱི་ལོ་ ༢༠༡༦ ཟླ་ ༡༢ པའི་ནང་ཁོ་གསེར་རྟ་ཕྱོགས་ཀྱི་དམར་ཤོག་ཚོགས་པའི་དྲུང་ཆེ་གཞོན་པར་བསྐོས་པ་དང་། དེ་རྗེས་གསེར་རྟ་རྫོང་གི་རྫོང་དཔོན་དུ་བསྐོས་ཡོད་འདུག

དགེ་ལྡན་ནང་བསྟན་སློབ་གྲྭ་ནི་ཕྱི་ལོ་ ༢༠༡༤ ལོར་བྲག་མགོ་དགའ་ལྡན་རབ་བརྟན་རྣམ་རྒྱལ་གླིང་དགོན་པས་གསར་འཛུགས་གནང་ཞིང་། ཁམས་བྲག་མགོ་ཕྱོགས་ཀྱི་བོད་བརྒྱུད་ནང་བསྟན་གྱི་གཙོ་བྱས་པའི་བོད་ཀྱི་སྐད་ཡིག་རིག་གནས་སོགས་སློབ་འཁྲིད་བྱེད་སའི་སློབ་གྲྭ་གལ་ཆེན་ཞིག་ཆགས་ཡོད་པ་དང་། སློབ་གྲྭ་དེའི་ནང་བོད་ཀྱི་སྐད་ཡིག་དང་བརྡ་སྤྲོད། རིག་གནས། དབྱིན་ཡིག་དང་རྒྱ་ཡིག དེ་བཞིན་འདུལ་བ་དང་ཕར་ཕྱིན། དབུ་མ་སོགས་སློབ་འཁྲིད་ཀྱིས། བྲག་མགོ་ཕྱོགས་ཀྱི་དགེ་འདུན་པ་རྣམས་ལ་གནའ་དེང་གཉིས་ཀྱི་ཤེས་བྱ་ཡོན་ཏན་བསླབ་ཡུལ་ཞིག་ཡིན་པ་རེད། ཕྱི་ལོ་ ༢༠༡༩ ཙམ་ལ་སློབ་གྲྭ་དེར་སློབ་མ་ཁྱོན་ ༡༣༠ ལྷག་ཡོད་ཀྱང་། ཕྱིས་སུ་རྒྱ་ནག་གིས་སློབ་མ་ ༢༠ ཡས་མས་ཙམ་ལོ་ཆུང་དྲགས་པར་སྙད་འདོགས་བྱས་ནས་རང་ཁྱིམ་དུ་ལོག་བཏང་ཡོད་པ་དང་། ད་ལྟ་ད་དུང་སློབ་གྲྭའི་སློབ་མ་བརྒྱ་ལྷག་ཡོད་འདུག་ལ། ཉམ་ཐག་སློབ་མ་མང་པོ་ཞིག་གཏན་སྡོད་སློབ་གྲྭའི་ནང་གཏན་སྡོད་བྱེད་ཀྱི་ཡོད་པ་རེད།

གསར་འགོད་པ། སྐལ་བཟང་སྦྱིན་པ།