མཚོ་སྔོན་ཕྱོགས་ཀྱི་བྱ་ཁྱུང་དགོན་དང་དྷི་ཚ་དགོན་གཉིས་ཀྱི་དགེ་འདུན་པ་བརྒྱད་ཅུ་ལྷག་དགོན་པ་ཕྱིར་ཕུད་བཏང་བ་དང་དགོན་པར་དམག་མི་འགྲེམས་འཇོག་གིས་དགེ་འདུན་པའི་མི་འབོར་ལ་ཚོད་འཛིན་བྱེད་ཀྱི་ཡོད་པ་རེད།
དེ་རིང་འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གནས་ཚུལ་མཁོ་གཏོང་གནང་བ་ལྟར་ན། ཕྱི་ཟླ་ ༡༠ ཚེས་ ༢༡ དང་ ༢༢ བར་ལ་རྒྱ་ནག་གཞུང་གིས་ལོ་བཅོ་བརྒྱད་མ་ལོན་པའི་བྱིས་པ་ཚོ་གྲྭ་བ་བྱས་མི་ཆོག་ཟེར་ནས། བོད་མཚོ་སྔོན་ཁོངས་ཀྱི་བྱང་གི་དགོན་ཆེན་བཞིའི་ཡ་གྱལ་བྱ་ཁྱུང་དགོན་པ་དང་། དྷི་ཚ་དགོན་པ་གཉིས་ཀྱི་གྲྭ་བ་ཁྱོན་ ༨༠ ལྷག་དགོན་པ་ནས་ཕྱིར་ཕུད་བཏང་ཡོད་པ་རེད།
འདི་གར་མཁོ་གཏོང་གནང་བའི་གནས་ཚུལ་ནང་། ཟླ་སྔོན་མའི་ཚེས་ ༢༡ དང་ ༢༢ གཉིས་ལ། རྒྱ་ནག་གཞུང་གི་འབྲེལ་ཡོད་ལས་བྱེད་དངོས་སུ་བྱ་ཁྱུང་དགོན་པ་དང་དྷི་ས་དགོན་པ་གཉིས་ལ་ཡོང་ནས། བྱ་ཁྱུང་དགོན་པའི་གྲྭ་བ་ ༢༠ ལྷག་དང་དྷི་ཚ་དགོན་པའི་གྲྭ་བ་ ༥༠ བཅས་ཁྱོན་དགོན་པ་གཉིས་ནས་གྲྭ་བ་ ༨༠ ལྷག་རང་རང་སོ་སོའི་ཁྱིམ་དུ་བསྐྱལ་སོང་། ཞེས་བརྗོད་འདུག་པ་དང་། ད་ལྟ་རང་ལོ་བཅོ་བརྒྱད་མ་ཟིན་པའི་བྱིས་པ་ཚོ་དགོན་པར་ཞུགས་མི་ཆོག་པའི་སྲིད་ཇུས་དེ། མཚོ་སྔོན་ཁུལ་གྱི་མཚོ་ཤར་བ་ཡུན་རྫོང་ཁོངས་ཡོངས་སུ་ལག་བསྟར་བྱེད་མུས་ཡིན་པ་རེད།
གནས་ཚུལ་མཁོ་གཏོང་བ་ལྟར་ན། ད་ལྟ་རྒྱ་གཞུང་ཉེན་རྟོག་པས་ཕྱིར་ཕུད་བཏང་བའི་བྱ་ཁྱུང་དགོན་དང་ངྷི་ཚ་དགོན་གཉིས་ཀྱི་དགེ་འདུན་པ་ ༨༠ ལྷག་སླར་ཡང་དགོན་པར་མི་ཡོང་བའི་ཆེད་དུ། དགོན་ནང་དུ་དམག་མི་འགྲེམས་འཇོག་གིས་ལྟ་སྲུང་དང་བཀག་འགོག་བྱས་ནས་བསྡད་ཡོད་པ་མ་ཟད། ཕྱིར་ཕུད་བཏང་བའི་དགེ་འདུན་པ་དག་རང་ཁྱིམ་དུ་འབྱོར་ཉིན་ནས་གྲྭ་ཆས་གྱོན་མི་ཆོག་པའི་བཙན་བཀའ་བཏང་ཡོད་འདུག
ད་ལྟ་རྒྱ་ནག་གིས་མཚོ་ཤར་བ་ཡུན་རྫོང་ཁོངས་ཡོངས་སུ་དགོན་པའི་དགེ་འདུན་པའི་གྲངས་འབོར་ལ་ཚོད་འཛིན་གྱི་སྲིད་ཇུས་དེ་ལག་བསྟན་བྱེད་མུས་ཡིན་ནའང་། བྱ་ཁྱུང་དགོན་དང་དྷི་ཚ་དགོན་གཉིས་ཀྱི་ཕྱིར་ཕུད་བཏང་བའི་དགེ་འདུན་པའི་གནས་སྟངས་ལས། ས་གནས་གཞན་གྱི་གནས་ཚུལ་ཁ་གསལ་ཤེས་རྟོགས་ཐུབ་ཀྱི་མེད་པ་དང་། རྒྱ་ནག་གཞུང་གིས་དེ་སྔ་ནས་བོད་བརྒྱུད་ནང་བསྟན་གྱི་དགེ་འདུན་པའི་གྲངས་འབོར་ལ་ཚོད་འཛིན་བྱེད་ཀྱི་ཡོད་ཀྱང་། དམིགས་བསལ་འདས་ལོའི་ཕྱི་ཟླ་ ༨ པའི་ནང་བོད་ཀྱི་ལས་དོན་སྐོར་གྱི་ཀྲུང་དབྱང་གི་བཞུགས་མོལ་ཚོགས་འདུ་ཐེངས་བདུན་པ་ཟེར་བའི་སྟེང་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཅན་དུ་བསྒྱུར་དགོས་པའི་གྲོས་གཞིར་བཟུང་དང་། སྤྱི་སྐད་ཅེས་བོད་ཀྱི་སློབ་གྲྭ་ཁག་ཏུ་བོད་ཡིག་སློབ་འཁྲིད་མཚམས་འཇོག་སོགས་དང་འབྲེལ་ནས། ད་ལྟ་བོད་ཀྱི་ཆོས་དང་རིག་གཞུང་གི་སྲོག་རྩར་གྲུབ་པའི་དགོན་པ་དང་སློབ་གྲྭ་ཁག་ལ་དམ་དྲགས་སྔར་ལྷག་བྱེད་འགོ་བརྩམས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
