རྒྱ་ནག་གཞུང་གིས་རྒྱ་ནག་གིས་བགོས་པའི་མཚོ་སྔོན་ཞིང་ཆེན་ཁུལ་གྱི་སློབ་མ་རྣམས་ཀྱིས་དགུན་དུས་ཟབ་སྦྱོང་སོགས་ལ་ཞུགས་མི་ཆོག་པ་དང་། དགེ་རྒན་ཚོས་ཟབ་འཁྲིད་བྱས་མི་ཆོག་པའི་བཙན་བཀའ་བཏང་ཡོད་པ་རེད་འདུག
རྒྱ་ནག་གཞུང་གིས་བོད་མི་རིགས་ཀྱི་སྐད་ཡིག་རྩ་མེད་བཟོ་ཐབས་སུ་བོད་ཡིག་ཆེད་སྦྱོང་བྱེད་སའི་སློབ་གྲྭ་ཁག་རྩ་གཏོར་དང་རྒྱ་ནག་གི་སྤྱི་སྐད་སྦྱང་དགོས་ཟེར་ནས། བོད་ནང་གི་སློབ་གྲྭ་ཁག་གི་བསླབ་གཞི་རྣམས་རྒྱ་ཡིག་ཏུ་སྒྱུར་མུས་ཡིན་པ་ལྟར། ཉེ་ལམ་རྒྱ་ནག་གཞུང་གིས་མཚོ་སྔོན་ཞིང་ཆེན་ཁོངས་ཀྱི་སློབ་གྲྭ་ཁག་གི་དགེ་རྒན་ཚོས་དགུན་གནང་སྐབས་སློབ་མར་ཟབ་ཁྲིད་བྱས་མི་ཆོག་པའི་བརྡ་ལན་ནན་མོ་བཏང་ཡོད་པ་དང་། དེ་བཞིན་དགོན་སྡེ་ཁག་དང་གཞུང་སྒེར་གང་རུང་གིས་རྒྱལ་ཁབ་ཀྱི་ཆོག་མཆན་མེད་པར། སློབ་མ་རྣམས་ཀྱི་གུང་སེང་དང་བསྟུན་ནས། བོད་ཀྱི་སྐད་ཡིག་སོགས་སློབ་འཁྲིད་བྱས་ཚེ། ཁྲིམས་ཐོག་ནས་ཆད་པ་ནན་མོ་གཅོད་རྒྱུ་ཡིན་པའི་འཇིགས་སྐུལ་དྲག་པོ་བྱས་ཡོད་པ་དང་། རྒྱ་ནག་གཞུང་གིས་གྲངས་ཉུང་མི་རིགས་ཀྱི་ས་གནས་ཁག་ཏུ་རྒྱའི་སྤྱི་སྐད་ཟེར་བ་གཙོ་བོ་བཟུང་ནས་སྦྱང་བརྩོན་བྱེད་དུ་བཅུག་སྟེ། གྲངས་ཉུང་མི་རིགས་ཁག་གི་སྐད་ཡིག་རྩ་གཏོར་གཏོང་ཐབས་སུ་ལས་འགུལ་སྣ་མང་སྤེལ་བ་དང་། ཏང་ལ་དགའ་མོས་བྱ་དགོས་པའི་སློབ་གསོ་སྤེལ་མུས་ཡིན་པ་རེད།
དེའི་ཐད་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཀརྨ་བསྟན་འཛིན་ལགས་ཀྱིས་འདི་གའི་གསར་འགོད་པར། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་རྗེས་སུ་རྒྱ་ནག་དཔོན་རིགས་ཁག་གི་ཁྲོད། ལྟ་བ་དང་ལངས་ཕྱོགས་མི་འདྲ་བ་གཉིས་སུ་གྱེས་ནས། རིགས་གཅིག་གིས་རྒྱ་ནག་གཞུང་གིས་བོད་གཙོས་གྲངས་ཉུང་མི་རིགས་རྣམས་ལ་ཐོབ་ཐང་སོགས་སྤྲད་པའི་དབང་གིས། ཞི་རྒོལ་དང་ཡོ་ལང་གི་གནད་དོན་དེ་དག་བྱུང་མུས་ཡིན་སྐོར་བཤད་སྟབས། བོད་མི་རྣམས་ལ་ཐོབ་ཐང་སོགས་སྟེར་མི་ཉན་པའི་ལྟ་བ་ཞིག་མཁྲེགས་བཟུང་བྱས་པ་བརྒྱུད། བོད་ཀྱི་སྤྱི་ཚོགས་དང་བོད་ཀྱི་རིག་གཞུང་བར་དུ་བར་ཐག་བཀྱེད་ཐབས་བྱས་ནས། རྒྱ་ནག་གཞུང་གིས་བོད་ཁུལ་དུ་སྤེལ་མུས་ཡིན་པའི་སྐད་གཉིས་སློབ་གསོའི་ཁོངས་སུའང་ཉིན་གཅིག་ལ་བོད་ཡིག་ཚོགས་ཐེངས་གཅིག་ལས་མེད་པ་དང་། དེ་བཞིན་སློབ་གྲྭའི་གུང་སེང་དང་དགུན་གནང་སོགས་སུ་བོད་ཡིག་སྦྱང་བར་བཀག་བསྡོམས་བྱས་ཚེ། མ་འོངས་པར་བོད་མི་མང་པོ་ཞིག་རྒྱ་མི་རིགས་ཀྱི་ཁྲོད་དུ་མཉམ་འདྲེས་བྱས་ནས་སིམ་འགྲོ་བས། རྒྱ་ནག་གཞུང་གིས་བོད་ནང་གི་སྔོན་འགྲོའི་སློབ་གྲྭ་མང་པོ་ཞིག་ཏུ་རྒྱ་ཡིག་སློབ་འཁྲིད་བྱེད་བཅུག་སྟེ། བོད་ཀྱི་མི་རབས་གསར་པ་ཚོར་བོད་ཀྱི་ཤ་དང་རུས་པ་ཡོད་པ་ཙམ་ལས། བོད་མི་རིགས་ཀྱི་རིག་གཞུང་གི་སྣུམ་ཞག་མེད་པར། རྒྱ་མི་རིགས་ཀྱི་ཁྲོད་དུ་སིམ་རྒྱུའི་འཆར་གཞི་བཏིང་གི་ཡོད་པ་དང་། བོད་ཡིག་སྦྱང་རྒྱུ་ཡོད་པའི་སྒེར་གཉེར་སློབ་གྲྭ་མང་པོ་ཞིག་བཙན་གྱིས་སྒོ་བརྒྱབ་ཏུ་བཅུག་གི་ཡོད་པ་རེད། ཅེས་འགྲེལ་བརྗོད་གནང་བྱུང་།
ཕྱི་ཟླ་ ༨ ཚེས་མགོ་ཙམ་ནས་རྒྱ་ནག་ས་གནས་སྲིད་གཞུང་གིས་མདོ་ཁམས་ཏྲེ་ཧོར་དར་རྒྱས་ཡུལ་གྱི་རྒྱལ་བསྟན་དགེ་རྩའི་བསླབ་གཞི་ཚང་མ་རྒྱ་ཡིག་རྒྱ་སྐད་ནང་བསྒྱུར་ཏེ་ལོ་འཁོར་ཡིག་རྒྱུགས་ཀྱང་རྒྱ་ཡིག་ནང་གཏོང་དགོས་པ་དང་། དེ་ལྟར་མ་བྱས་ཚེ་སློབ་གྲྭ་སྒོ་བརྒྱག་རྒྱུ་ཡིན་པའི་བཙན་བཀའ་བཏང་ཡོད་འདུག གཞན་ཡང་། ཉེ་སྔོན་ཕྱི་ཟླ་ ༧ པའི་ཟླ་མགོར་རྒྱ་ནག་གཞུང་གིས་མགོ་ལོག་དར་ལག་ཏུ་ཡོད་པའི་སེང་འབྲུག་སྟག་རྩེ་དངོས་སུ་དངོས་བརྒྱབ་བཅུག་ཡོད་པ་དང་། དེ་བཞིན་རྨ་ཆེན་རྫོང་ཁོངས་ཀྱི་སློབ་གྲྭ་གསུམ། དགའ་བདེ་རྫོང་ཁོངས་ཀྱི་སློབ་གྲྭ་གཅིག དེ་བཞིན་གཅིག་སྒྲིལ་རྫོང་ཁོངས་ཀྱི་སློབ་གྲྭ་གཉིས་བཅས་སྒེར་གཉེར་སློབ་གྲྭ་ཁག་བདུན་སྒོ་བརྒྱག་དགོས་པའི་བཀའ་བཏང་སྟེ། རྒྱ་ནག་གཞུང་གིས་བོད་ནང་གི་བོད་ཡིག་སྦྱང་སའི་སློབ་གྲྭ་ཁག་སྒོ་བརྒྱབ་ཏུ་བཅུག་ནས། བོད་ཀྱི་སྐད་ཡིག་དང་རིག་གཞུང་། བོད་ཀྱི་ངོ་བོ་སོགས་རྩ་མེད་གཏོང་ཐབས་བྱེད་མུས་ཡིན་པ་རེད།
གསར་འགོད་པ། དཔལ་ལྡན།
