རྒྱ་གར་གྱི་དམག་སྤྱི་ཟུར་པ་སྐུ་ཞབས་བྷག་ཤི་མཆོག་ཆུང་དུས་ནས་བོད་དོན་སྐོར་ལ་དོ་སྣང་དང་བོད་སྐད་ཡིག་སློབ་སྦྱོང་གནང་ཡོད་པ་ལྟར་ཁོང་གིས་འཕགས་བོད་དང་རྒྱ་ནག་བཅས་ཀྱི་ལྟ་ཚུལ་གསར་པ་ཞེས་པའི་ཐོག་གསུང་བཤད་གནང་།
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་བོད་ཀྱི་ཟློས་གར་ཚོགས་ཁང་དུ། འཕགས་བོད་མཛའ་འབྲེལ་ཚོགས་པ་གཙོ་བྱས་པའི་བཞུགས་སྒར་ཁུལ་གྱི་བོད་མིའི་ཚོགས་སྡེ་ཁག་ཐུན་མོང་གི་གོ་སྒྲིག་འོག རྒྱ་གར་གྱི་དམག་སྤྱི་ཟུར་པ་སྐུ་ཞབས་བྷག་ཤི་ (G.D Bhakshi) མཆོག་ནས་བོད་དང་རྒྱ་གར། དེ་བཞིན་རྒྱ་ནག་བཅས་ཀྱི་ལྟ་ཚུལ་གསར་པ་ཞེས་པའི་བརྗོད་གཞིའི་ཐོག་གསུང་བཤད་ཀྱི་ལས་རིམ་ཞིག་གོ་སྒྲིག་གནང་སོང་བ་དང་། མཛད་སྒོའི་སྟེང་སྐུ་མགྲོན་གཙོ་བོ་རྒྱ་གར་གྱི་དམག་སྤྱི་ཟུར་པ་སྐུ་ཞབས་བྷག་ཤི་ (G.D Bhakshi) མཆོག་དང་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག དེ་བཞིན་སྤྱི་འཐུས་ཚོགས་མི་ཟླ་བ་ཚེ་རིང་ལགས་ཀྱི་དབུས་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་གསར་འགོད་པ། མི་མང་བཅས་འཛོམས་འདུག
དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། བོད་ལ་མི་ལོ་ཉིས་སྟོང་ལྷག་གི་ལོ་རྒྱུས་ཀྱི་བྱུང་བ་ཡོད་སྟབས། དེས་བོད་མི་རིགས་ནི་རྒྱ་ནག་གི་ཆ་ཤས་སུ་ནམ་ཡང་གྱུར་མྱོང་མེད་པ་གསལ་འདོན་བྱས་ཐུབ་ཀྱང་། ཕྱི་ལོ་༡༩༥༩ ལོར་རྒྱ་ནག་གཞུང་གིས་བོད་སར་བཙན་འཛུལ་བྱས་ཏེ། བོད་ཀྱི་ཆོས་རིག་རྩ་གཏོར་བཏང་དང་གཏོང་མུས་ཡིན་པ་རེད། དེར་བརྟེན་བཙན་བྱོལ་དུ་ཡོད་པའི་བོད་མི་ཚོས་བོད་ནང་གི་བོད་མི་ཚོའི་མགྲིན་པ་བྱས་ཏེ། རྒྱལ་སྤྱིའི་ཚོགས་སྡེ་ཁག་དང་མི་སྒེར་ལ་བོད་ནང་གི་དངོས་ཡོད་ཀྱི་གནས་སྟངས་དྲིལ་བསྒྲགས་དང་གླེང་སློང་བྱ་རྒྱུ་ནི་ནམ་ཡང་འདོར་ཐབས་མེད་པའི་འགན་འཁྲི་ཉག་ཅིག་ཡིན་པ་རེད། དེ་བཞིན་རྒྱ་ནག་གཞུང་གིས་བོད་མིར་བཙན་གནོན་བྱེད་མུས་ཡིན་སྟབས། ཕྱི་ལོ་ ༢༠༠༩ ནས་བཟུང་བོད་ནང་གི་རྒྱལ་གཅེས་དཔའ་བོ་དཔའ་མོ་བརྒྱ་དང་ལྔ་བཅུ་ལྷག་གིས་སྐུ་ལུས་མེར་སྲེག་བཏང་ཡོད། དེ་ནི་ཁོང་ཅག་ལ་ཟས་གོས་གནས་མལ་གྱི་དཀའ་ངལ་ཡོད་པ་མ་ཡིན་པར། རྒྱ་ནག་གཞུང་གིས་བོད་ནང་དུ་དམ་དྲག་བྱས་ཏེ། བོད་ནང་གི་བོད་མིར་འགྲོ་འདུག་གི་རང་དབང་དང་། སྨྲ་བརྗོད་རང་དབང་སོགས་མེད་སྟབས། ཁོང་ཚོས་བོད་ལ་རང་དབང་དགོས་པ་དང་། ༧གོང་ས་མཆོག་བོད་ལ་གདན་འདྲེན་ཞུ་དགོས་པའི་ཞི་བའི་འབོད་སྒྲ་སྒྲོག་གི་ཡོད་པ་རེད། འོན་ཀྱང་རྒྱ་ནག་གཞུང་གིས་བོད་ནང་དུ་དམ་དྲག་ཤུགས་ཆེ་རུ་བཏང་ནས་དྲག་གནོན་བྱེད་ཀྱི་ཡོད་པ་དང་། མཐའ་ན་༧གོང་ས་མཆོག་གི་སྐུ་པར་སྒྲིག་གཤོམ་དང་ཉར་ཚགས་བྱས་པ་དེར་ནག་ཉེས་བཀལ་ནས་དྲག་གནོན་དང་བཙོན་འཇུག་བྱེད་མུས་ཡིན། རྒྱ་ནག་གཞུང་གིས་བོད་ནང་གི་ཁོར་ཡུག་རྩ་གཏོར་དང་བོད་མི་ཚོའི་རྩྭ་སའི་བདག་དབང་སོགས་ཕྲོག་སྟེ། བོད་ཀྱི་ས་ཁུལ་ཁག་ནས་གཏེར་ཁ་སྔོག་འདོན་བྱེད་ཀྱི་ཡོད། བོད་ཀྱི་གནད་དོན་ནི་རྒྱ་གར་གྱི་བདེ་འཇགས་དང་འབྲེལ་བ་ཡོད་སྟབས། རྒྱ་གར་གཞུང་དམངས་གཉིས་ཀྱིས་བོད་དོན་ལ་སྔར་ལས་ལྷག་པའི་དོ་སྣང་དང་རྒྱབ་སྐྱོར་བྱ་རྒྱུའི་རེ་བ་ཡོད་སྐོར་གསུངས་སོང་།
དེ་རྗེས་ལས་རིམ་གོ་སྒྲིག་གནང་མཁན་གྱི་གྲས་རྒྱ་གར་གྱི་དམག་དཔོན་ཟན་ཇི་པིར་ཤཱར་ (Captain Sanjay Prashar) ལགས་ཀྱིས། ཕྱི་ལོ་ ༢༠༢༡ ལོའི་ཧིན་བོད་དང་རྒྱ་ནག་གི་ལྟ་ཚུལ་གསར་པ་ཞེས་པའི་བརྗོད་གཞི་དང་འབྲེལ་ནས། ང་རང་རྒྱ་གར་གྱི་གྲོང་གསེབ་ཆུང་ཆུང་ཞིག་ནས་ཡིན་པ་དང་འདི་ནི་དྷ་རམ་ས་ལར་ང་རང་ལྟ་སྐོར་དུ་ཡོང་བ་ཐེངས་གཉིས་པ་དེ་ཆགས་ཀྱི་ཡོད་པ་རེད། ཟླ་བ་གཅིག་གི་ནང་དུ་བོད་མི་ཚོ་དང་ལྷན་དུ་ཚར་གཉིས་རིང་ཐུག་འཕྲད་བྱུང་བ་དང་། དམག་སྤྱི་ཟུར་པ་སྐུ་ཞབས་བྷག་ཤི་ལགས་དང་ལྷན་དུ་ཚོགས་འདུ་འདིའི་ནང་མཉམ་ཞུགས་གནང་ཐུབ་པ་དེ་ནི་སྐལ་བ་བཟང་པོ་ཡིན་དྲན་གྱི་འདུག རྒྱ་གར་དང་བོད། རྒྱ་ནག་གི་སྐོར་ལ་སྐད་ཆ་བཤད་ན། ང་རང་རྒྱ་ནག་ཏུ་ཐེངས་མང་ཕྱིན་མྱོང་ཡོད་ལ། རྒྱ་ནག་ནང་གི་དབུལ་ཕྱུག་གཉིས་ཀ་མཐོང་མྱོང་ཡོད་པ་མ་ཟད། རྒྱ་ནག་གི་དྲག་སྤྱོད་ཀྱི་རྣམ་པའང་མཐོང་སོང་། དེ་ཡང་རྒྱ་ནག་གི་བྱ་སྤྱོད་ངན་ཤོས་ནི་ཏོག་དབྱིབས་རིམས་ནད་ཡིན་པ་དང་། ཏོག་ནད་འཛམ་གླིང་ཡོངས་སུ་ཁྱབ་གདལ་ཤུགས་ཆེན་ཕྱིན་ཏེ་མི་མང་གི་འཚོ་བར་བརྡབ་གསིག་ཚབས་ཆེན་བཟོས་པ་དང་མི་མང་པོའི་ཚེ་སྲོག་ཤོར་ཡོད་པ་རེད། དེ་ཡང་མི་ས་ཡ་གཅིག་ལྷག་རྐྱེན་འདས་སུ་ཕྱིན་ཡོད་འདུག རྒྱ་ནག་རྒྱལ་ཁབ་དང་འབྲེལ་བ་ཡོད་པའི་རྩོད་རྙོག་ཆེ་ཤོས་གཉིས་ཡོད་པ་ནི། ཐའེ་ཝན་དང་བོད་ཀྱི་རྒྱལ་ཁབ་གཉིས་པོ་དེ་རེད། བོད་མི་ཁྱེད་རང་ཚོའི་ཡིད་ཆེས་དང་སྨོན་ལམ་ལ་ནུས་ཤུགས་ཆེན་པོ་ཡོད་ལ། མུ་མཐུད་ཡིད་ཆེས་གནང་རོགས་ཞུ་རྒྱུ་ཡིན། རྒྱ་མིའི་ལྟ་བ་མཁྲེགས་པོ་ཡོད་ཀྱང་། ང་ཚོས་རྒྱ་ནག་དམར་པོའི་གཞུང་ལ་རེ་བ་བྱེད་དགོས་ཀྱི་མེད། རྒྱུ་མཚན་ནི་རྒྱ་ནག་གིས་བོད་མི་ཚོར་མེ་མདའ་སོགས་བེད་སྤྱད་ཀྱིས་འཚེ་བའི་ལས་སྣ་མང་བྱས་དང་བྱེད་བཞིན་ཡོད་ཀྱང་། ཁོ་ཚོ་སེམས་ཁྲལ་གྱིས་ཁེངས་པ་མ་ཟད། རྒྱ་ནག་གིས་དུས་ཚོད་བརྒྱ་ཆ་ ༩༠ ཙམ་དྷ་རམ་ས་ལའི་གནས་ཚུལ་དང་འབྲེལ་བའི་སྐོར་ལ་སེམས་ཁྲལ་བྱས་ནས་སྡོད་ཀྱི་ཡོད་པ་རེད། དེར་བརྟེན། བོད་མི་ཁྱེད་རང་ཚོར་དམིགས་བསལ་གྱི་ནུས་ཤུགས་ཤིག་ཡོད་པར་བརྟེན། པེ་ཅིན་བར་དུ་གོ་ཐུབ་པའི་ལག་པ་ཤུགས་ཆེན་པོ་བརྡབ་རོགས་གནང་། ༧གོང་ས་མཆོག་ནི་བོད་གཅིག་པུའི་བླ་ན་མེད་པའི་དབུ་ཁྲིད་རེད་བསམ་གྱི་མི་འདུག རྒྱུ་མཚན་ནི་༧རྒྱལ་བ་རིན་པོ་ཆེ་མཆོག་ནི་གོ་ལ་ཡོངས་ཀྱི་དབུ་ཁྲིད་ཅིག་ཡིན་པར་ངོས་འཛིན་བྱེད་ཀྱི་ཡོད། ཅེས་གསུངས་སོང་།
ད་དུང་ཁོང་གིས་མུ་མཐུད་དུ། མི་སྐྱེས་པའི་རྗེས་སུ་འཆི་དགོས་པ་ལྟར། ཁ་ནས་སྐད་ཆ་བཤད་པ་ལྟར་ལག་བསྟར་མི་བྱེད་པའི་རྒྱལ་ཁབ་དེ་རིམ་གྱིས་རྒྱལ་ཁབ་བྱས་ནས་གནས་ཐུབ་ཀྱི་མེད་པ་དང་། རྒྱ་ནག་གིས་བོད་ཀྱི་ཆོས་དང་རིག་གཞུང་། སྐད་ཡིག་བཅས་རྩ་མེད་བཏང་དང་གཏོང་བཞིན་ཡོད་པ་དང་། བོད་མི་ཚོས་རྒྱ་ནག་གི་དྲག་གནོན་འོག་དཀའ་སྡུག་མྱོང་བཞིན་པའི་སྐབས་འདིར། རྒྱ་གར་གྱིས་བོད་མི་རྣམས་ལ་སྐད་ཡིག་དང་རིག་གཞུང་བཅས་པ་སྲུང་སྐྱོབ་བྱེད་པར་རོགས་རམ་གནང་གི་ཡོད་པ་ནི་ལྟས་དབང་ཞིག་མ་ཡིན་པར། རྒྱ་གར་ཡང་དཀའ་སྡུག་གི་བརྒྱུད་རིམ་འོག་སོང་མྱོང་ཡོད་སྐོར་དང་། བོད་མི་ཚོས་མུ་མཐུད་དུ་རང་ཉིད་ཀྱི་རྒྱལ་ཁབ་ཀྱི་དོན་དུ་ལས་འགུལ་སྣ་མང་སྤེལ་ཏེ་ཡིད་ཆེས་བྱེད་དགོས་པ་དང་། བོད་རང་བཙན་ཐོབ་ཀྱི་རེད་བསམ་དགོས་སྐོར་དང་། ཁོང་རང་མུ་མཐུད་ནས་བོད་མི་ཚོར་ཐུག་འཕྲད་བྱེད་དུ་ཡོང་རྒྱུའི་ཁས་ལེན་དང་། མ་འོངས་པར་བོད་ཀྱི་རྒྱལ་ས་ལྷ་སའི་བར་དུ་བོད་མི་ཚོ་དང་ལྷན་དུ་འགྲོ་རྒྱུ་ཡིན་སྐོར་སོགས་བརྗོད་སོང་།
མཇུག་ཏུ་སྐུ་མགྲོན་གཙོ་བོ་དམག་སྤྱི་ཟུར་པ་སྐུ་ཞབས་བྷག་ཤི་མཆོག་གིས། དེ་རིང་ང་རང་ལས་རིམ་འདིའི་ནང་མཉམ་ཞུགས་བྱེད་ཐུབ་པར་དགའ་པོ་ཞེ་དྲགས་བྱུང་། རྒྱུ་མཚན་ནི་ང་རང་བོད་མི་ཚོ་དང་ལྷན་དུ་དམིགས་བསལ་གྱིས་འབྲེལ་བ་གཏིང་ཟབ་ཡོད། ཆུང་དུས་སྐབས་སུ་ངའི་ཕ་མ་གཉིས་དང་ལྷན་དུ་ (Pachmarhi) ས་ཁུལ་དུ་ཕྱིན་པ་ཡིན། སྐབས་དེ་དུས་ང་རང་ལོ་ ༧ དང་ ༨ ཡས་མས་ཙམ་ཡིན། ངས་འབར་མ་ནས་ཡིན་པའི་ནང་པའི་གྲྭ་པ་གཅིག་མཐོང་སོང་། ངས་གྲྭ་པ་དེ་མཐོང་བ་དང་ཁོང་གི་རྗེས་སུ་ཕྱིན་པ་ཡིན་ལ་ཁོང་དང་མཉམ་དུ་སྐད་ཆ་མང་པོ་བཤད་པ་ཡིན། ཁོང་དང་ང་གཉིས་ཀྱི་བར་ལ་འབྲེལ་བ་སྔོན་མ་ནས་ཡོད་པ་ལྟ་བུ་ཚོར་སོང་། དེ་ནས་ང་རྒྱལ་སྲུང་སློབ་གསོ་ལྟེ་གནས་ཁང་ (National Defence Academy) ནང་སློབ་སྦྱོང་བྱེད་བཞིན་པའི་སྐབས། ངས་བོད་ཀྱི་ནང་ཆོས་སྐོར་གྱི་དེབ་སྣ་མང་བཀླགས་པ་ཡིན་ལ། ང་རང་གིས་དེབ་དེ་དག་བཀླགས་པའི་ཉམས་མྱོང་ལ་བརྟེན་ནས་ཡིད་དབང་འཕྲོག་སོང་། དེར་བརྟེན་ཕྱིས་སུ་ངས་བོད་ཀྱི་སྐད་ཡིག་སྐོར་ལ་སློབ་སྦྱོང་བྱེད་མགོ་བཙུགས་ཡིན་ལ། དེ་དུས་ང་རང་ལ་བོད་ཡིག་སློབ་མཁན་གྱི་དགེ་རྒན་ནི་བླ་མ་འཕྲིན་ལས་རྡོ་རྗེ་ (Bhutia) ལགས་རེད། ད་ལྟའང་ངས་དགེ་རྒན་ཁོང་གུས་ཞབས་དང་ལྡན་པའི་ངང་ནས་དྲན་གྱི་འདུག ཅེས་དང་། རྒྱ་ནག་གིས་བོད་ཀྱི་རྒྱལ་ཁབ་བཙན་འོག་ཏུ་བཅུག་ཚུལ་དང་། བོད་རྒྱལ་ཁབ་ཀྱི་རིག་གཞུང་དང་སྐད་ཡིག་དེ་དག་རིམ་གྱིས་རྩ་མེད་བཏང་དང་གཏོང་བཞིན་ཡོད་ཀྱང་། ཉིན་གཅིག་བོད་རང་བཙན་འཐོབ་སྐོར་དང་། ཉེ་བའི་ཆར་རྒྱ་ནག་གིས་ས་མཚམས་མང་པོ་ཞིག་ཏུ་དམག་སྒར་བརྩིགས་དགོས་དོན་ནི། ཁོང་ཚོར་དམག་མི་ཉུང་དྲགས་པའི་རྐྱེན་གྱིས་ཡིན་པ་དང་། རྒྱ་ནག་གིས་ཆུ་མཛོད་མང་པོ་རྒྱག་དོན་ནི། བོད་ནང་གི་ཆུ་དེ་དག་གསོག་ཉར་བྱེད་ཆེད་དུ་ཡིན་སྐོར། ཉེ་བའི་ཆར་བོད་ནས་རྒྱལ་ཁབ་གཞན་མང་པོ་ཞིག་གི་ནང་རྒྱུག་བཞིན་པའི་ཆུ་ཇེ་ཉུང་དུ་ཕྱིན་དང་འགྲོ་བཞིན་ཡོད་པའི་རྐྱེན་གྱིས། རྒྱལ་ཁབ་མང་པོ་ཞིག་ལ་ཆུ་ཡིས་དཀའ་ངལ་འཕྲད་དེ་ཞི་བདེ་ལྷིང་འཇགས་མེད་པ་ཆགས་ཀྱི་ཡོད་སྐོར་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ།
