བོད་ནང་བོད་མིའི་ཁ་པར་དང་སྐད་འཕྲིན་ནང་ཞིབ་བཤེར་བྱེད་མཁན་ཆེད་འཛུགས་བྱས་ཏེ་དམ་དྲག་ཆེ་རུ་གཏོང་བཞིན་འདུག
མིང་བརྗོད་འདོད་མེད་པའི་བོད་མི་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། ཉེ་འཆར་ནས་བཟུང་བོད་ནག་ཆུ་རྫོང་ཉེན་རྟོག་ལས་ཁུངས་ཀྱིས། ནག་ཆུའི་བོད་མི་ལས་བྱེད་པ་དང་མང་ཚོགས་ཀྱི་ཁ་པར་དང་སྤྱི་ཚོགས་དྲ་གནས་སྐད་འཕྲིན་སོགས་བརྒྱུད་དེ་སྐད་ཆ་བཤད་པ་དང་ཡི་གེ་བསྐུར་བ། པར་དང་བརྙན་སོགས་གཏོང་ལེན་བྱས་པ་ཚང་མར་དུས་གཅིག་ཏུ་ཞིབ་བཤེར་ཁང་ཆེད་འཛུགས་བྱས་ཏེ་སྔར་ལས་དམ་དྲག་ཆེ་རུ་བཏང་ཡོད་པ་དང་། ནག་ཆུ་ཙམ་མ་ཡིན་པར་བོད་ཀྱི་ས་གནས་གཞན་གི་ཉེན རྟོག་ལས་ཁུངས་ཁག་ཏུའང་ཞིབ་བཤེར་ཁང་དེ་འཛུགས་བཞིན་ཡོད་འདུག
ཡང་ཁོང་གིས། ནག་ཆུ་རྫོང་ཉེན་རྟོག་ལས་ཁུངས་ཀྱི་ཞིབ་བཤེར་ཁང་དེའི་འཕྲུལ་ཆས་མ་ལག་ནང་ནག་ཆུ་ས་ཁུལ་གྱི་གཞུང་ཞབས་ལས་བྱེད་པ་དང་གནད་ཡོད་མི་སྣ་ཤེས་ཡོན་པ་གཙོ་བོ་བྱས་པའི་མང་ཚོགས་ཡོངས་ཀྱི་ཁ་པར་ཨང་གྲངས་ནང་འཇུག་དང་ཐོ་བཀོད་བྱེད་ཀྱི་ཡོད་པ་དང་། ཐོ་བཀོད་བྱས་རྗེས་མི་སུས་ཁ་པར་ནང་སྐད་ཆ་བཤད་པ་དང་སྐད་འཕྲིན་ཚོགས་པའི་ནང་གནས་ཚུལ་གང་ཞིག་སྤེལ་ཡང་ཆ་ཚང་ཞིབ་བཤེར་ཁང་དེའི་ནང་སྒྲིག་བཀོད་བྱས་པའི་གཞུང་གི་ཁ་པར་ནང་ཐད་ཀར་ཤར་ཡོང་བ་ཞིག་བཟོས་ཏེ་དམ་དྲག་ཆེན་པོ་བྱེད་ཀྱི་འདུག་ཅེས་བརྗོད་བྱུང་།
ཟླ་འདིའི་ཕྱི་ཚེས་༡ཉིན་རྒྱ་ནག་གཞུང་གིས་གཉེར་བའི་མི་མང་ཉིན་རེའི་ཚགས་པར་ཐོག ཉིན་དེ་ནས་བཟུང་མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས་དེ་དངོས་སུ་ལག་བསྟར་བྱེད་ཀྱི་ཡོད་པ་དང་མི་སྒེར་གྱི་ཆ་འཕྲིན་ཐག་གཅོད་ཚད་ལྡན་བྱེད་པ་དང་མི་སྒེར་གྱི་ཆ་འཕྲིན་ལུགས་མཐུན་ངང་སྤྱོད་རྒྱུར་སྐུལ་འདེད་གཏོང་དགོས་ལུགས་སོགས་བཀོད་འདུག
གཞན་ཡང་། ཕྱི་ཟླ་༡༠ཚེས་༡༧ཉིན་བོད་ལྗོངས་བརྙན་འཕྲིན་ཁང་གིས་དེ་འབྲེལ་གནས་ཚུལ་སྤེལ་བའི་ནང་། ཕྱི་ཟླ་༡༠ཚེས་༡༧་ཉིན་ནས་བོད་རང་སྐྱོང་ལྗོངས་ནང་རྒྱལ་ཁབ་དྲ་རྒྱའི་བདེ་འཇགས་དྲིལ་བསྒྲགས་གཟའ་འཁོར་ཞེས་པ་ཚོགས་ཏེ། ལས་བྱེད་པ་དང་མང་ཚོགས་ཚོའི་དྲ་རྒྱའི་བདེ་འཇགས་འདུ་ཤེས་ཟབ་ཏུ་གཏོང་བ་དང༌། དྲ་རྒྱའི་བདེ་འཇགས་ཀྱི་འགོག་རགས་བརྟན་པོ་འཛུགས་རྒྱུ་རེད་ཅེས་སོགས་བསྒྲགས་འདུག་ལ། མཚོ་སྔོན་སོགས་བོད་ཀྱི་ས་ཁུལ་གཞན་དུའང་དེ་བཞིན་གྱི་གནས་ཚུལ་སྤེལ་འདུག
ཕྱི་ལོ་༢༠༡༦ལོར་རྒྱ་ནག་གཞུང་གིས་བོད་ནང་རྒྱལ་ཁབ་ཀྱི་དྲ་རྒྱའི་བདེ་འཇགས་སྐོར་གྱི་ཁྲིམས་ལུགས་དོན་ཚན་༡༤ཡོད་པ་ཞིག་སྤེལ་ཡོད་པའི་ནང་དོན་ཚན་༡༢་པའི་ནང་དྲ་རྒྱ་སྤྱད་ནས་རྒྱལ་ཁབ་ཀྱི་བདེ་འཇགས་དང་། མཚན་སྙན། ཁེ་ཕན་བཅས་ལ་གནོད་པའི་བྱེད་སྤྱོད་རིགས་སྤེལ་བ་དང་རྒྱལ་ཁབ་ཀྱི་སྲིད་དབང་རྩ་སློག་གཏོང་རྒྱུ་དང་སྤྱི་ཚོགས་རིང་ལུགས་ཀྱི་ལམ་ལུགས་མགོ་རྟིང་སློག་རྒྱུའི་ངན་སྐུལ་བྱེད་པ། རྒྱལ་ཁབ་ཁ་བྲལ་གཏོང་རྒྱུ་དང་རྒྱལ་ཁབ་གོང་བུ་གཅིག་གྱུར་ལ་གཏོར་བཤིག་གཏོང་རྒྱུའི་ངན་སྐུལ་བྱེད་པ་སོགས་བྱེད་མི་ཆོག་ཚུལ་བཀོད་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་གྲུབ་བཀྲ་ཤིས།
