སྦེལ་ཇམ་གྱི་མཛངས་མ་ཆེན་མོ་བོད་ཀྱི་བུ་མོ་བསྟན་འཛིན་འཛོམས་སྐྱིད་ལགས་ཀྱིས་ཐའེ་ལན་ཌིའི་ནང་འཚོག་འཆར་ཡོད་པའི་འདི་ལོའི་རྒྱལ་སྤྱིའི་མཛངས་མ་ཆེན་མོའི་འགྲན་སྡུར་སྐབས་དགུ་པར་མཉམ་ཞུགས་གནང་རྒྱུ་ཡིན་འདུག
ཟླ་འདིའི་ཚེས་ ༡༧ ནས་ ཟླ་ ༡༢ ཚེས ༤ བར་ཐའེ་ལན་ཌིའི་གླིང་ཕྲན་ཕུ་ཀེཏ་ (Phuket) དུ། རྒྱལ་སྤྱིའི་མཛངས་མ་ཆེན་མོ ( Miss Grand International ) སྐབས་དགུ་པ་འཚོག་འཆར་ཡོད་ལ། འདི་ལོའི་འགྲན་ཞུགས་པའི་ཁྲོད་འཛམ་གླིང་རྒྱལ་ཁབ་ ༧༠ ལྷག་གི་མཛངས་མ་རྣམས་མཉམ་ཞུགས་བྱེད་ཀྱི་ཡོད་པ་དང་། སྦེལ་ཇམ་གྱི་མཛངས་མ་ཆེན་མོ་བོད་ཀྱི་བུ་མོ་བསྟན་འཛིན་འཛོམས་སྐྱིད་ལགས་ཀྱང་མཉམ་ཞུགས་གནང་རྒྱུ་ཡིན་འདུག
བསྟན་འཛིན་འཛོམས་སྐྱིད་ལགས་ཀྱིས་ཁོང་མོ་སྒེར་གྱི་སྤྱི་ཚོགས་དྲ་ལམ་ཨིན་ས་ཊི་ར་གྷ་རཱམ (Instragram)དུ། འཛམ་གླིང་ས་ཕྱོགས་གང་སར་གནས་པའི་རྒྱབ་སྐྱོར་བ་རྣམས་ཀྱི་རྒྱབ་སྐྱོར་ལ་བརྟེན་ནས། ཁོང་མོར་རྒྱལ་སྤྱིའི་མཛངས་མ་ཆེན་མོའི ( Miss Grand International ) འགྲན་སྡུར་ཁྲོད་ཞུགས་པའི་གོ་སྐབས་བྱུང་བ་དང་། ད་ལོར་འགྲན་སྡུར་ཁྲོད་མཛངས་མ་རྣམས་ཀྱི་པར་རིས་ངོ་དེབ་ཏུ་བཞག་སྟེ་དགའ་རྟགས་དང་བརྒྱུད་སྤེལ་གྱི་གྲངས་མང་ཉུང་ལ་གཞིགས་པའི་འགྲན་སྡུར་ཞིག་བྱེད་མུས་ཡིན་ཞིང་། ཟླ་འདིའི་ཚེས་ ༡༦ ནས་དྲ་ལམ་འགྲན་སྡུར་དེ་མཚམས་འཇོག་གི་ཡོད་སྟབས། ཁོང་མོའི་པར་རིས་རྣམས་ལ་དགའ་རྟགས་དང་བརྒྱུད་སྐུར་མང་པོ་བྱ་དགོས་པའི་རེ་སྐུལ་གནང་འདུག
རྒྱལ་སྤྱིའི་མཛངས་མ་ཆེན་པའི་ངོ་དེབ་ཏུ་གནས་ཚུལ་སྤེལ་བ་ལྟར་ན། མཛངས་མ་ཚོའི་པར་རིས་རྣམས་ལས་ངོ་དེབ་ཏུ་བརྒྱུད་སྐུར་གཅིག་རེ་བྱས་ན་བརྒྱ་ཆ་ ༣ རེ་དང་དགའ་རྟགས་རེར་བརྒྱ་ཆ་ ༡ རེ་ཡིན་ལ། བརྒྱུད་སྐུར་དང་དགའ་རྟགས་མང་ཤོས་ཐོབ་མཁན་གྱི་མཛངས་མ་ལྔ་ལ་རྒྱལ་སྤྱིའི་མཛངས་མ་ཆེན་མོའི་ཚོགས་གཙོ་སྐུ་ཞབས་ནཱ་ཝ་ཊི་ (Nawat Itsaragrisil)ལགས་དང་། ཚོགས་གཞོན་ཊེ་རི་སཱ (Mrs Teresa chaivisut)ལགས། དེ་བཞིན་ ༢༠༢༠ ལོའི་རྒྱལ་སྤྱིའི་མཛངས་མ་ཆེན་མོ་ཨེ་བྷི་ནཱ་ཨེ་ཧྥའ་(Abena Appiah)ལགས་བཅས་ལྷན་དུ་ཁ་ལག་བཟའ་རྒྱུའི་གོ་སྐབས་ཡོད་པ་རེད་འདུག
ད་ལྟ་རང་ལོ ༢༠ ཡིན་པའི་བསྟན་འཛིན་འཛོམས་སྐྱིད་ལགས་ནི་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་འཚར་ལོངས་བྱུང་ཞིང་། ཕྱི་ལོ་ ༢༠༡༡ ཙམ་ལ་སྦེལ་ཇམ་ནང་གནས་སྤོར་བྱས་ཡོད་འདུག ཕྱི་ལོ་ ༢༠༡༧ ལོའི་ཟླ་ ༤ ནང་སྦེལ་ཇམ་གྱི་རྩེ་ཕུད་ཤོམ་སྟོན་མའི་ (Belgium Top Model) འགྲན་བསྡུར་ཞིག་གི་ནང་་མཉམ་ཞུགས་བྱས་ཏེ། འགྲན་ཞུགས་པ་བུད་མེད་ ༤༠༠ ནང་ནས་དངོས་གཞིའི་འགྲན་སྡུར་ཁྲོད་ཚུད་པའི་བུད་མེད་ ༦༥ ནང་འདེམས་ཐོན་བྱུང་ཡོད་འདུག་ལ། འདི་ལོར་སྦེལ་ཇམ་མཛངས་མ་ཆེན་པོའི་འགྲན་སྡུར་ཁྲོད་ཁོང་མོར་ཨང་རིམ་དང་པོ་ཐོབ་ཡོད་པ་རེད།
རྒྱལ་སྤྱིའི་མཛངས་མ་ཆེན་མོའི་འགྲན་སྡུར་ནང་དུ་རྒྱལ་ཁབ་སོ་སོ་ནས་རྒྱལ་ཁ་ཐོབ་པའི་མཛངས་མ་ཚོས་སོ་སོའི་རྒྱལ་ཁབ་ཀྱི་ངོ་ཚབ་བྱས་ཏེ་འགྲན་སྡུར་ནང་མཉམ་ཞུགས་བྱེད་ཀྱི་ཡོད་འདུག་ལ། མཛངས་མའི་འགྲན་སྡུར་དེ་ཐོག་མར་ཕྱི་ལོ་ ༢༠༡༣ ལོར་ཐའེ་ལན་ཌི་ (Thailand) རྒྱལ་ཁབ་ནང་ནས་མགོ་བཙུགས་ཡོདའདུག
གསར་འགོད་པ། དཔལ་ལྡན།
