རྒྱ་དཀར་ནག་གཉིས་བར་རྩོད་རྙོག་ཏུ་གྱུར་བའི་ཙ་རིའི་ཆུ་རྒྱུན་དུ་རྒྱ་ནག་གཞུང་གིས་གྲོང་གསེབ་ཅིག་གསར་དུ་བསྐྲུན་པར་རྒྱ་གར་གཞུང་གིས་ངོ་རྒོལ་བྱེད་ཀྱི་ཡོད་པ་མ་ཟད། ཆེས་ཤུགས་ཚད་མྱུར་བའི་འཕུར་མདེལ་མཚོན་ཆ་ཞིག་ས་མཚམས་སུ་འགྲེམས་འཇོག་བྱ་རྒྱུ་ཡིན་སྐོར་བསྒྲགས་འདུག
ཨ་རིའི་རྒྱལ་སྲུང་ལྷན་ཁང་གིས་རྒྱ་ནག་གི་དམག་དོན་དང་བདེ་སྲུང་ཐད་ཀྱི་སྙན་ཐོ་ཞིག་ཨ་རིའི་གྲོས་ཚོགས་ལ་ཕུལ་བའི་ནང་། ད་ལྟ་རྒྱ་དཀར་ནག་གཉིས་བར་ས་མཚམས་ཀྱི་རྩོད་རྙོག་ཛ་དྲག་ཏུ་འགྱུར་བཞིན་པའི་སྐབས་འདིར། རྒྱ་ནག་གཞུང་གིས་ཕྱི་ལོ་ ༢༠༢༠ ལོར་རྒྱ་དཀར་ནག་གཉིས་བར་རྩོད་རྙོག་ཏུ་གྱུར་བའི་རྒྱ་གར་གྱི་མངའ་སྡེ་ཨ་རུ་ན་ཅལ་གྱི་ས་མཚམས་སུ་ཁྱིམ་ཚང་བརྒྱ་ལྡན་པའི་གྲོང་གསེབ་ཅིག་འཛུགས་སྐྲུན་བྱས་ཡོད་པ་གསལ་འདོན་གནང་བ་དང་སྦྲགས། རྒྱ་ནག་གིས་རྒྱ་གར་ལ་བཙན་འཛུལ་བྱེད་ཀྱི་ཡོད་སྐོར་བརྗོད་འདུག་པ་དང་། དེ་འབྲེལ་ཐད་རྒྱ་གར་ཕྱི་སྲིད་ལྷན་ཁང་གིས། རྒྱ་ནག་གིས་ཁྲིམས་འགལ་ངང་རྒྱ་གར་གྱི་ས་མཚམས་བདག་བཟུང་བྱས་པར་ངོས་ལེན་མེད་པ་མ་ཟད། རྒྱ་གར་གྱིས་རྒྱལ་འབྲེལ་ཐབས་བྱུས་ཀྱི་ཐོག་ནས་མུ་མཐུད་རྒྱ་ནག་གི་ཁྲིམས་འགལ་གྱི་འགུལ་སྐྱོད་དེའི་རིགས་ལ་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་པའི་ལན་འདེབས་བྱས་ཡོད་པ་རེད།
ཨ་རིའི་རྒྱལ་སྲུང་ལྷན་ཁང་གི་ཞིབ་འཇུག་སྙན་ཐོ་དེའི་ནང་། ཕྱི་ལོ་ ༢༠༢༠ ནང་རྒྱ་དཀར་ནག་གཉིས་བར་རྩོད་རྙོག་ཏུ་གྱུར་བའི་ས་མཚམས་སུ་རྒྱ་ནག་གིས་ཁྱིམ་ཚང་ ༡༠༠ ལྡན་པའི་གྲོང་གསེབ་ཅིག་གསར་བསྐྲུན་བྱས་ཡོད། རྒྱ་ནག་གི་གྲོང་གསེབ་གསར་བསྐྲུན་གྱི་འཛུགས་བསྐྲུན་དེ་དང་རྒྱ་ནག་དཀར་ནག་གི་ས་མཚམས་ཁུལ་གྱི་འཛུགས་བསྐྲུན་གཞན་དག་གིས། རྒྱ་གར་གཞུང་དང་རྒྱ་གར་གྱི་བརྒྱུད་ལམ་ཁག་ལ་ཁོ་ཁྲོང་སློང་གི་ཡོད་ཀྱང་། རྒྱ་ནག་གིས་དེ་ལས་ལྡོག་སྟེ་རྒྱ་གར་གཞུང་ནས་ས་མཚམས་ཁུལ་དུ་འཛུགས་སྐྲུན་རྒྱ་སྐྱེད་ཀྱིས། རྒྱ་དཀར་ནག་གི་ཐིག་མཚམས་ནས་དམག་མིའི་གདོང་ཐུག་བསླངས་ཡོད་པའི་སྐྱོན་བརྗོད་བྱས་ཡོད་པ་མ་ཟད། རྒྱ་གར་གྱིས་རྒྱ་ནག་གི་ངོས་འཛིན་བྱེད་བཞིན་པའི་ཐིག་མཚམས་ནས་འཛུགས་སྐྲུན་མཚམས་འཇོག་དང་དམག་མི་སོགས་ཕྱིར་འཐེན་མ་བྱས་ བར་དུ་རྒྱ་ནག་གི་དམག་མི་ཕྱིར་འཐེན་བྱ་རྒྱུ་མིན་པ་ནན་བརྗོད་བྱས་ཡོད། ཅེས་བཀོད་འདུག
ཨ་རི་གཞུང་འབྲེལ་གྱི་སྙན་ཐོ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༢༠ ལོར་ཆོས་ཟམ་གྲོང་གསེབ་ཀྱི་ཉེ་འཁྲིས་དང་ནག་ཚལ་གྱི་དཀྱིལ་ན་བཞུར་གྱིན་པའི་ཙ་རིའི་ཆུ་རྒྱུན་དུ་གྲོང་གསེབ་གསར་སྐྲུན་བྱས་ཡོད་པ་དང་། ས་ཁུལ་དེ་ནི་ད་ལྟ་རྒྱ་དཀར་ནག་བར་ས་མཚམས་རྩོད་རྙོག་ཏུ་གྱུར་བའི་ཐིག་མཚམས་ཀྱི་ས་ཁུལ་ཞིག་ཡིན་པ་དང་། ཙ་རི་ཞེས་པའི་གནས་དེ་ནི་བོད་ལྷུན་རྩེ་རྫོང་ཁོངས་སུ་གཏོགས་ཀྱི་ཡོད་ཅིང་། གནའ་སྔ་མོ་དག་པོ་ཤེལ་རི་སོགས་གནས་མཇལ་བྱེད་ཡུལ་ཞིག་ཡིན་པར་བཤད། རྒྱ་གར་ཕྱོགས་ནས་ས་ཁུལ་དེར་(Gelensiniak) ཞེས་འབོད་ཀྱི་ཡོད་པ་དང་ཨ་རུ་ན་ཅལ་ཁུལ་གྱི་ (Upper Subansiri) ཟེར་བའི་རྫོང་ཁོངས་ཡིན་པར་བརྗོད་འདུག
ད་ལྟ་ཙ་རིའི་སྟོད་སྨད་བར་གསུམ་གྱི་ཁུལ་དུ་རྒྱ་ནག་གིས་འཛུགས་སྐྲུན་གྱི་རྣམ་པའི་ཁེངས་ཡོད་པར་བརྟེན། རྒྱ་གར་ཕྱོགས་ནས་ཀྱང་ས་ཁུལ་དེར་ལམ་དང་ཟམ་ཆེན་སོགས་འཛུགས་སྐྲུན་གྱི་ལས་གཞི་སྔར་ལྷག་རྩོམ་མུས་ཡིན་པ་དང་། རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་ཨ་རན་ཌམ་བྷ་ཆི་ (Arindam Bagchi) ལགས་ཀྱིས། རྒྱ་གར་གཞུང་གིས་འདི་ལོ་ཕྱི་ཟླ་ ༡ ནང་རྒྱ་ནག་གི་གྲོང་གསེབ་གསར་སྐྲུན་གྱི་ལས་གཞི་དེ་ཤེས་རྟོགས་བྱུང་ཡོད་ལ། རྒྱ་གར་གྱིས་རྒྱ་ནག་གི་གྲོང་གསེབ་འཛུགས་སྐྲུན་ཐད་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད་པ་མ་ཟད། རྒྱལ་ཁབ་ཀྱི་མཐའ་མཚམས་བདག་དབང་སྲུང་སྐྱོབ་སྔར་ལྷག་བྱ་རྒྱུ་ཡིན། ཞེས་བརྗོད་ཡོད་པ་རེད།
ཡང་རྒྱ་གར་རྒྱལ་སྲུང་དམག་སྤྱི་ཆེན་མོ་བྷི་པིན་ General Bipin Rawat) ལགས་ཀྱིས། རྒྱ་ནག་ནི་རྒྱ་གར་གྱི་བདེ་འཇགས་ལ་ཆེས་ཆེ་བའི་ཉེན་ཁ་དེ་ཡིན་པས། ང་ཚོས་འདས་ལོ་ནས་ཧི་མ་ལ་ཡའི་མཐའ་མཚམས་ཁུལ་དུ་འགྲེམས་འཇོག་བྱས་པའི་དམག་དང་མཚོན་ཆ་སོགས་ཕྱིར་འཐེན་མ་བྱས་བར་དུས་ཡུན་གང་འཚམ་རིང་འཇོག་གི་ཡིན། ཞེས་བརྗོད་ཡོད་པ་དང་། དེ་རིང་རྒྱ་གར་གྱི་བརྒྱུད་ལམ་ཁག་ཏུ་ཐོན་པའི་གནས་ཚུལ་ནང་། རྒྱ་གར་གཞུང་གིས་ཧིན་བོད་ས་མཚམས་ཁུལ་དུ་ཧིན་སྒོར་ཀ་རོ་ (Crore) ༡༢༠༠༠ ལྷག་གི་འཛུགས་སྐྲུན་གྱི་ལས་གཞི་སྤེལ་མུས་ཡིན་པར་ཁར། (BrahMos missile) ཞེས་པའི་འཕུར་མདེལ་མཚོན་ཆ་དང་མཚོན་ཆ་གཞན་རིགས་རྒྱ་དཀར་ནག་གི་རྩོད་རྙོག་ཏུ་གྱུར་བའི་ས་མཚམས་ཁུལ་དུ་འགྲེམས་འཇོག་བྱ་འཆར་ཡོད་སྐོར་བསྒྲགས་འདུག
གཞན་ཡང་སྙན་ཐོའི་ནང་། རྒྱ་ནག་གཞུང་གིས་རྒྱ་གར་གྱི་འབྲས་ལྗོངས་ཀྱི་ནུབ་ཕྱོགས་དང་བོད་ཀྱི་གྲོ་མོ་རྫོང་ཁོངས་ཀྱི་ས་མཚམས་སུ་ཚངས་ཐིག་ཅིག་གསར་དུ་བསྐྲུན་ཏེ། རྒྱ་གར་གྱི་ཤར་ནུབ་མངའ་སྡེ་ཁག་རྒྱ་གར་སྤྱི་དང་འབྲེལ་མཐུད་ཡོང་བར་བཀག་འགོག་བྱེད་རྩིས་ཡོད་སྐོར་བརྗོད་ཡོད་པ་དང་འབྲེལ། རྒྱ་ནག་གི་རང་གི་མཐའ་མཚམས་ཁུལ་དུ་འཛུགས་སྐྲུན་རྒྱ་སྐྱེད་ཀྱི་ཐའེ་ཝན་དང་རྒྱ་གར་གཉིས་ལ་དམག་འཁྲུག་རྒྱག་པར་གྲ་སྒྲིག་གསར་པ་བྱེད་ཀྱི་ཡོད་པའི་ཉེན་བརྡའང་བཏང་ཡོད་པ་རེད།
རྒྱ་ནག་གཞུང་གིས་འདས་ལོ་ནས་རྒྱ་དཀར་ནག་གཉིས་བར་རྩོད་རྙོག་ཏུ་གྱུར་བའི་ལ་དྭགས་ཀྱི་གཙོས་བྱང་ཤར་ཁུལ་གྱི་ཐིག་མཚམས་(LAC) ལས་རྒྱ་གར་གྱི་ཕྱོགས་སུ་དམག་དོན་དང་འབྲེལ་བའི་འཛུགས་སྐྲུན་གྱི་རྣམ་གྲངས་རྒྱ་སྐྱེད་གཏོང་མགོ་བརྩམས་ཏེ། རྒྱ་གར་གཞུང་ལ་གནོད་ཤུགས་སྤྲད་ཡོད་པ་དང་། རྒྱ་གར་གྱིས་ཀྱང་རང་ནུས་གང་ལྕོག་གིས་ལ་དྭགས་དང་བྱང་ཤར་ཁུལ་དུ་དམག་མིའི་གྲངས་འབོར་ཇེ་མང་དུ་བཏང་བ་དང་ལམ་ཁ་སོགས་འཛུགས་སྐྲུན་གྱི་ལས་གཞི་མང་དག་ཅིག་རྩོམ་མུས་ཡིན་ཡང་། རྒྱ་གར་གྱི་དམག་མི་རྣམས་གྲང་ངར་ཆེ་བའི་ས་མཐོ་གངས་རིའི་ཁྲོད་མུ་མཐུད་གནས་རྒྱུ་ཁག་པོ་ཡིན་སྟབས། ཟླ་སྔོན་མའི་ནང་རྒྱ་དཀར་ནག་གི་བློན་ཆེན་ལྷན་འཛོམས་བགྱིས་ཏེ་ས་མཚམས་ཁུལ་གྱི་དམག་མི་ཕྱིན་འཐེན་ཡོང་བར་གྲོས་མོལ་བྱས་ནའང་རྒྱ་ནག་གིས་ངོས་ལེན་མ་བྱས་སྟབས། ད་ལྟ་ད་དུང་ཡང་ཕྱོགས་གཉིས་བར་ས་མཚམས་དང་འབྲེལ་རྩོད་རྙོག་གི་གནས་སྟངས་ཛ་དྲག་ཅན་དུ་འགྱུར་བཞིན་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
