ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་ཁྲིམས་ལུགས་གཞིར་བཟུང་རྒས་ཡོལ་དུ་ཕེབས།

ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དགུང་གྲངས་ ༦༥ ཟིན་གྱི་ཡོད་སྟབས། བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་ལྟར་ཁྲིམས་ཞིབ་པ་ཆེ་བའི་ལས་གནས་ནས་རྒས་ཡོལ་དུ་ཕེབས་ཡོད་པ་རེད།དེ་རིང་ཕྱི་ཚེས་ ༡༥ ཉིན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣  དགོངས་དོན་འོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་གནས་ནས་རྒས་ཡོལ་དུ་ཕེབས་ཡོད་པ་ལྟར། བཙན་བྱོལ་བོད་མིའི་བཅའ་ཁྲིམས་དོན་ཚན་རེ་བདུན་ ༦༧ པའི་འོག་བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག་དོན་ཚན་བཅོ་ལྔ་ ༼  ༡༥ ༽ པ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་གསར་པ་ཁྲིམས་ལུགས་ལྟར་འོས་ཐོན་དམ་འབུལ་མ་བྱུང་བར་དེའི་འགན་དབང་རྣམས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཉིས་ནས་ཞབས་ལོ་རྒན་རིམ་དེས་ལེན་རྒྱུ་ཞེས་གསལ་བ་ལྟར། དེ་རིང་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་ཀརྨ་དགྲ་འདུལ་མཆོག་ནས་ཁྲིམས་ཞིབ་པ་ཆེ་བ་གསར་པའི་ཁྲིམས་མཐུན་དམ་འབུལ་མ་ཟིན་བར་ཁྲིམས་ཞིབ་པ་ཆེ་བའི་ལས་ཚབ་ཏུ་བསྐོ་གཞག་གནང་ཡོད་པ་རེད།

དེ་ཡང་ཟླ་འདིའི་ཕྱི་ཚེས་ ༡༣ ཉིན་སྐབས་བཅུ་དྲུག་པའི་བཀའ་ཤག་གིས། ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་ཕེབས་སྐྱེལ་དང་གསར་དུ་དམ་འབུལ་ཞུས་པའི་བཀའ་བློན་གསུམ་གྱི་གཙོས་རྒྱ་བལ་འབྲུག་གསུམ་གྱི་ས་གནས་མགོ་འཛིན་རྣམ་པ་དང་མཉམ་འབྲེལ་དྲུང་ཆེ་རྣམ་པ་བཅས་ལ་གསོལ་སྟོན་མཛད་སྒོ་ཞིག་བསྡུས་པའི་སྟེང་། ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས། ༧གོང་ས་མཆོག་གི་བཀའ་སློབ་ལམ་སྟོན་འོག་བོད་ནང་གི་བོད་མི་རྣམས་ལ་སློབ་སྦྱོང་ཚད་ལྡན་ཞིག་འཐོབ་ཐབས་སུ། རང་ཉིད་ཐོག་མར་དགེ་རྒན་གྱི་ལམ་དུ་ཞུགས་ཏེ། བོད་རྒྱ་གྲོས་མོལ་གྱི་བརྒྱུད་རིམ་ཁྲོད། བཙན་བྱོལ་ནས་བོད་ནང་ལོགས་མཁན་དགེ་རྒན་གྱི་གྲས་སུ་ཡོད་ཀྱང་། ཆབ་སྲིད་ཀྱི་འཕོ་འགྱུར་ཁྲོད་བོད་ནང་ལོག་མ་ཐུབ་པ་དང་། བོད་ཀྱི་གཞོན་ནུ་ལྷན་ཚོགས་ནས་ཕྱི་དྲིལ་ལས་ཁུངས་དང་བོད་རྒྱ་གྲོས་མོལ་ཚོགས་ཆུང་གི་ཚོགས་མི་གནང་བ་སོགས་ངོ་སྤྲོད་དང་སྦྲགས། སང་ཉིན་ནས་ང་རང་ལོ་ ༦༥ ཟིན་ཏེ་རྒས་ཡོལ་དུ་ཐོན་འགྲོ་ཡི་ཡོད། བཙན་བྱོལ་བོད་མིའི་བཅའ་ཁྲིམས་དང་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་རྩ་ཁྲིམས་ནང་གསལ་ལྟར། ཚེས་ ༡༥ ནས་ཁྲིམས་ཞིབ་པ་གཞན་ཀརྨ་དགྲ་འདུལ་ལགས་ནས་ཁྲིམས་ཞིབ་པ་ཆེ་བའི་ལས་ཚབ་གནང་གི་ཡོད། ཅེས་གསུངས་སོང་།

ཡང་སྐབས་དེར་ཁོང་གིས།  འདས་པའི་ལོ་ངོ་ ༣༣ རིང་སྲི་ཞུའི་ལས་བྱེད་གནང་མྱོང་བ་དང་བཅས་ཁྱོན་འདས་པའི་ལོ་ངོ་ ༤༠ ཡི་རིང་བཙན་བྱོལ་བོད་མིའི་སྤྱི་ཚོགས་ནང་ཧུར་ཐག་འཐད་ཐག་གིས་ཞབས་ཕྱི་ཞུས་པའི་བརྒྱུད་རིམ་ངོ་སྤྲོད་དང་སྦྲགས། ང་ཚོ་བཙན་བྱོལ་དུ་ཡོང་དགོས་དོན་ནི་བོད་ཀྱི་བདེན་མཐའ་སེལ་རྒྱུ་དེ་ཡིན་པ་དང་བོད་མིའི་སྒྲིག་འཛུགས་ནང་སྲི་ཞུ་སྒྲུབ་པའི་དམིགས་ཡུལ་ཡང་བོད་ཀྱི་བདེན་མཐའ་སེལ་རྒྱུ་དེ་ཡིན་པས། ང་ཚོ་ཚང་མར་ལས་འགན་འདྲ་མིན་ཡོད་པ་ལྟར། ཕྱི་དྲིལ་ལས་ཁུངས་ཀྱི་འོས་འགན་ནི་འཛམ་གླིང་ནང་བོད་དོན་དྲིལ་བསྒྲགས་དང་རྒྱལ་སྤྱིའི་གཞུང་དང་མང་ཚོགས་ཁྲོད་བོད་དོན་རྒྱབ་སྐྱོར་འཚོལ་ཐབས། ལྷག་པར་དུ་རྒྱ་ནག་གི་ཤེས་ཡོན་ཅན་ཚོར་བོད་དོན་གོ་རྟོགས་སྤེལ་རྒྱུ་ཆགས་བསྡད་ཡོད། ནང་སྲིད་ལས་ཁུངས་ཡིན་ན་ས་གནས་བོད་མིའི་བདེ་བ་དང་སྡུག་བསྔལ་ལ་གཟིགས་རྟོགས་གནང་རྒྱུ་དང་། འཕྲོད་བསྟེན་ཡིན་ན་བཙན་བྱོལ་བོད་མིའི་འཕྲོད་བསྟེན་ལ་གཟིགས་རྟོགས་གནང་རྒྱུ། ཤེས་རིག་ལས་ཁུངས་ཀྱིས་བཙན་བྱོལ་བོད་མིའི་ཤེས་ཡོན་གྱི་གནས་སྟངས་ལ་གཟིགས་དགོས་པ་ནང་ལྟར་རང་རང་སོ་སོར་ལས་འགན་ཡོད། དཔེ་ན་རླངས་འཁོར་ཞིག་ལ་ཆ་བཞག་ན་གཅུར་གཟེར་ཆུང་ཆུང་ཞིག་འཕྲོད་བརླག་ཏུ་ཕྱིན་ཚེ། རླངས་འཁོར་འགྲོ་ཐུབ་ཀྱི་མེད། བོད་པའི་སྤྱི་ཚོགས་ནང་རང་རང་སོ་སོར་འགན་རེ་ཡོད་པ་ལྟར། བོད་མི་ཤེས་ཡོན་ཅན་ཞིག་འཐོན་པ་ཡིན་ན། བོད་པའི་དཔལ་འབྱོར་དང་འཕྲོད་བསྟེན། རིག་གཞུང་སོགས་ལ་ཕན་ཐོགས་ཀྱི་ཡོད། དེར་བརྟེན། ང་ཚོ་ཚང་མས་སོ་སོའི་སྡེ་ཚན་དུ་ཧུར་ཐག་བྱས་པ་ཡིན་ན་བོད་ཀྱི་རྩ་དོན་འགྲུབ་པར་ཕན་ཐོགས་ཆེན་པོ་ཞིག་ཡོང་གི་རེད་ལ། བོད་ཀྱི་བདེན་མཐའ་མ་སེལ་བར་དུ་ང་ཚོ་ཚང་མས་ཧུར་ཐག་འབད་གནང་རྒྱུ་ནི་ཧ་ཅང་གལ་ཆེན་པོ་རེད། ཅེས་གསུངས་སོང་།

དྭགས་པོ་བསོད་ནམས་ནོར་བུ་མཆོག་ནི་་ཕྱི་ལོ་ ༡༩༨༨ ལོར་ལྡི་ལི་སྐུ་ཚབ་དོན་གཅོད་ཀྱི་ཆབ་སྲིད་སྡེ་ཚན་གྱི་རྒན་དྲུང་དུ་ཐོག་མར་བསྐོ་བཞག་གནང་ཡོད་པ་དང་།  ཕྱི་ལོ་ ༡༩༩༠ ལོར་གནས་རིམ་སྤར་ཏེ་བཀའ་དྲུང་ཡིག་ཚང་གི་དྲུང་གཞོན་དང་ཟུང་དྲུང་གི་ཕྱག་ལས་གནང་། ཕྱི་ལོ་ ༡༩༩༣ ལོར་ཨ་རིར་གཞུང་འབྲེལ་སློབ་སྦྱོང་དུ་ཕེབས། ཕྱི་ལོ་ ༡༩༩༤ ལོར་ཕྱི་དྲིལ་ལས་ཁུངས་ཀྱི་རྒྱ་གར་དང་ཕྱི་སྡོད་རྒྱ་རིགས་འབྲེལ་མཐུད་འགན་འཛིན་དུ་བསྐོས་ཡོད་པ་དང་། ཕྱི་ལོ་ ༡༩༩༨ ལོར་ལྡི་ལི་སྐུ་ཚབ་དོན་གཅོད་ཀྱི་དྲུང་ཆེ་དང་། ཕྱི་ལོ་ ༡༩༩༩ ལོ་ནས་ ༢༠༠༤ བར་ཕྱི་དྲིལ་ལས་ཁུངས་ཀྱི་དྲུང་འཕར་དང་དྲུང་ཆེའི་ཕྱག་ལས་གནང་།  ཕྱི་ལོ་༢༠༠༩ ལོར་ཨོ་སི་ཊོ་ལི་ཡའི་སྐུ་ཚབ་དོན་གཅོད་དུ་བསྐོས་བ་དང་། ཕྱི་ལོ་ ༢༠༡༤ ལོ་ནས་བཟུང་ཕྱི་འབྲེལ་དྲུང་ཆེ་ཡི་ཕྱག་ལས་གནང་ཡོད་པ་བཅས། བོད་མིའི་སྒྲིག་འཛུགས་ནང་ལོ་ངོ་ ༣༧ ཙམ་གྱི་རིང་ཕྱག་ལས་གནང་ཡོད་པ་དང་། དེ་སྔོན་བོད་རྒྱ་ཞི་མོལ་ཆེད་སྐུ་ཚབ་ཚོགས་ཆུང་གི་ཚོགས་མི་གནང་སྟེ་རྒྱ་ནག་ཏུའང་ཕེབས་མྱོང་ཡོད་འདུག་ལ། འདི་ལོའི་ཕྱི་ཟླ་ ༩ ནང་ཚོགས་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྟེང་། བོད་མི་མང་སྤྱི་འཐུས་ཚོགས་གཙོ་མཆོག་ཕུད་པའི་ངོ་ཡོད་སྤྱི་འཐུས་ ༤༢ ཀྱིས་འོས་ཤོག་བླུགས་པ་བརྒྱུད། དྭགས་པོ་བསོད་ནམས་ནོར་བུ་མཆོག་ཁྲིམས་ཞིབ་པ་ཆེ་བར་མང་མོས་འདེམས་ཐོན་བྱུང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།