ཡུ་རོབ་རྒྱལ་ཁབ་ལི་ཐའོ་ནེ་ཡའི་ནང་ཐའེ་ཝན་དོན་གཅོད་ཁང་དངོས་སུ་སྒོ་ཕྱེ་ཡོད་འདུག

ཁ་སང་ཡུ་རོབ་ཀྱི་རྒྱལ་ཁབ་ལི་ཐའོ་ནེ་ཡ་རུ་ཐའེ་ཝན་གྱི་སྐུ་ཚབ་དོན་གཅོད་ཁང་དངོས་སུ་སྒོ་ཕྱེ་ཡོད་པའི་ཐད་རྒྱ་ནག་གཞུང་གིས་སྐྱོན་བརྗོད་དང་ངོ་རྒོལ་བྱས་ཡོད་པ་རེད།

ཁ་སང་ཕྱི་ཚེས་ ༡༨ ཉིན་ལི་ཐའོ་ནེ་ཡའི་རྒྱལ་ས་ཝིལ་ནེ་སི་ (Vilnius) རུ་ཐའེ་ཝན་གྱི་སྐུ་ཚབ་དོན་གཅོད་ཁང་ཞིག་དངོས་སུ་དབུ་དབྱེད་ཀྱི་མཛད་སྒོ་ཚོགས་ཡོད་པ་དང་། དོན་གཅོད་ལས་ཁུངས་དེ་ནི་ཐའེ་ཝན་གྱི་མིང་ཐོག་ནས་ཡུ་རོབ་ནང་བཙུགས་པའི་སྐུ་ཚབ་དོན་གཅོད་ཁང་ཐོག་མ་དེ་ཆགས་ཀྱི་ཡོད་པ་རེད། དེའི་ཐད་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱིས་རྒོལ་ལན་བསྒྲགས་གཏམ་ཞིག་སྤེལ་བའི་ནང་། ང་ཚོས་ལི་ཐའོ་ནེ་ཡ་ཡིས་གཏན་འབེབས་བྱས་པའི་གནད་དོན་དེར་མོས་མཐུན་རྩ་བ་ནས་མེད་པ་དང་། དེ་ཉིད་འཕྲལ་དུ་བསྒྱུར་བཅོས་བྱ་དགོས་པ་ལས། རྒྱ་ནག་གི་སྲིད་ཇུས་ལ་ཐེ་ཇུས་བྱེད་པ་ནི་ནོར་འཁྲུལ་ཡིན་པ་དང་མཇུག་འབྲས་ངན་པ་ཡོང་སྲིད་པ་སོགས་ཀྱི་ཉེན་བརྡའང་བཏང་ཡོད་པ་རེད།

དེ་འབྲེལ་ཐད་ཐའེ་ཝན་གྱི་ཕྱི་སྲིད་བློན་ཆེན་ལྷན་ཁང་གིས། ཁ་སང་ལི་ཐའོ་ནེ་ཡའི་རྒྱལ་ས་ཝིལ་ནེ་སི་ (Vilnius) རུ་ཐའེ་ཝན་གྱི་སྐུ་ཚབ་དོན་གཅོད་ཁང་དེ་གཞུང་འབྲེལ་གྱིས་དབུ་འབྱེད་བྱས་ཡོད་པ་དང་། ཐའེ་ཝན་སྐུ་ཚབ་དོན་གཅོད་ཁང་དེ་ཉིད་ལ་ཊི་ཝ་ཡར་ཡོད་པའི་ཐའེ་ཝན་གྱི་ཕྱི་འབྲེལ་མི་སྣ་(Eric Huang) ལགས་ཀྱིས་སྣེ་འཁྲིད་བྱ་རྒྱུ་ཡིན་པ་རེད། ཅེས་བརྗོད་འདུག

ལི་ཐའོ་ནེ་ཡའི་ཕྱི་སྲིད་བློན་ཆེན་ (Gabrielius Landsbergis) ལགས་ཀྱིས། ང་ཚོས་དམངས་གཙོའི་རྒྱལ་ཁབ་ཁག་ལ་དཔལ་འབྱོར་གྱི་འབྲེལ་ལམ་འཛུགས་རྒྱུ་ནི་ཡུན་གནས་ཐུབ་པར་ཡིད་ཆེས་བྱེད་ཀྱི་ཡོད། རྒྱུ་མཚན་ནི་ཁོང་ཚོ་ཁྲིམས་མཐུན་གྱི་སྒོ་ནས་གནས་ཡོད་པ་དང་ལི་ཐའོ་ནེ་ཡ་རྒྱལ་ཁབ་ཀྱི་མངོན་འདོད་དང་མཐུན་གྱི་ཡོད་པས་ཡིན། ཞེས་བརྗོད་ཡོད་པ་རེད།

Picture taken on November 18 ,2021 shows the name plaque at the Taiwanese Representative Office in Lithuania, Vilnius. – Taipei announced on November 18 ,2021 it had formally opened a de facto embassy in Lithuania using the name Taiwan, a significant diplomatic departure that defied a pressure campaign by Beijing. (Photo by PETRAS MALUKAS / AFP)

ཨེ་རིག་ (Eric Huang) ལགས་ཀྱིས། ང་ཚོ་ནི་ཐའེ་ཝན་དང་ལི་ཐའོ་ནེ་ཡ་གཉིས་ཀྱི་འབྲེལ་ལམ་ཡར་རྒྱས་དང་མཐུན་རྐྱེན་སྦྱོར་མཁན་ཞིག་ཏུ་གྱུར་བར་དགའ་སྤོབས་ཆེན་པོ་བྱུང་སོང་། ང་ལ་ས་ཁམས་ཆབ་སྲིད་ཀྱི་ཐོག་ནས་ཅི་ཡང་བཤད་རྒྱུ་མེད། ལས་ཁུངས་འདི་རྒྱལ་ཁབ་ཀྱི་ཚབ་མཚོན་ཡིན་པའི་ཆ་ནས། ངའི་དོ་སྣང་བྱེད་ཡུལ་ནི་རྒྱལ་ཁབ་གཉིས་བར་གྱི་འབྲེལ་ལམ་ཡུན་གནས་རྒྱུན་མཐུད་ཡོང་རྒྱུ་དེ་ཡིན་སྐོར་སོགས་བརྗོད་ཡོད་པ་རེད།

འདི་ལོའི་ཕྱི་ཟླ་ ༧ པའི་ནང་ལི་ཐའོ་ནེ་ཡའི་རྒྱལ་ཁབ་ཀྱིས་ཐའེ་ཝན་གྱི་གཞུང་ཚབ་ཁང་གསར་འཛུགས་བྱེད་པར་ངོས་ལེན་བྱས་ཡོད་པའི་བསྒྲགས་གཏམ་སྤེལ་རྗེས། པེ་ཅིང་གིས་ལི་ཐའོ་ནེ་ཡའི་ཐག་གཅོད་དེ་ལ་སྐྱོན་བརྗོད་དྲག་པོ་བྱས་ཏེ། རྒྱ་ནག་གི་གཞུང་ཚབ་པ་ལི་ཐའོ་ནེ་ཡ་ནས་ཕྱིར་འཐེན་དང་ལི་ཐའོ་ནེ་ཡའི་གཞུང་ཚབ་པེ་ཅིང་ནས་ཕྱིར་འཐེན་བྱ་དགོས་པའི་གསལ་བསྒྲགས་བྱས་འདུག་ལ། རྒྱ་ནག་ནས་ལི་ཐའོ་ནེ་ཡ་ལ་ཟས་རིགས་དང་ཅ་དངོས་སྐྱེལ་འདྲེན་བྱེད་པར་བཀག་བསྡོམས་བྱས་ཏེ། ཚོང་འབྲེལ་དང་དཔལ་འབྱོར་གྱི་གནོན་ཤུགས་དྲག་པོ་སྤྲད་ཡོད་འདུག

གསར་འགོད་པ། བསྟན་འཛིན་ཕུར་བུ།