ཉེར་གཅིག་ལོའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ཐོབ་མཁན་རྒྱ་རིགས་ཀྲང་ཀྲན་ལགས་ཀྱི་འཕྲོད་བསྟེན་གནས་སྟངས་ཞན་པོ་ཆགས་ཡོད་པའི་རྒྱལ་སྤྱིའི་ཚོགས་སྡེ་ཁག་ནས་སེམས་འཚབ་བྱེད་ཀྱི་ཡོད་འདུག
ཉེ་ལམ་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། ཕྱི་ལོ་ ༢༠༢༡ ལོའི་རྒྱལ་སྤྱིའི་གསར་འགོད་རང་དབང་གི་གཟེངས་རྟགས་ཐོབ་མཁན་གྱི་མཚན་བྱང་དངོས་སུ་ཡོངས་བསྒྲགས་གནང་སྐབས། རྒྱ་ནག་གི་གསར་འགོད་པ་ཀྲང་ཀྲན་(Zhang Zhan)ལགས་ཀྱིས་རང་ཉིད་ཀྱི་ཚེ་སྲོག་ལ་མ་འཛེམས་པར། ཕྱི་ལོ་ ༢༠༢༠ ལོར་དངོས་སུ་རྒྱ་ནག་གི་གྲོང་ཁྱེར་ཝོ་ཧན་དུ་ཕྱིན་ནས་ཡུལ་དངོས་ཀྱི་ནད་ཡམས་ཀྱི་གནས་སྟངས་ཤར་སྟོན་བྱས་ཡོད་པར་བརྟེན། ཁོ་མོར་ཕྱི་ལོ་ ༢༠༢༡ ལོར་གསར་འགོད་རང་དབང་གི་གཟེངས་རྟགས་ཁྲོད་ཀྱི་སྙིང་སྟོབས་ལྡན་པའི་གསར་འགོད་པའི་གཟེངས་རྟགས་དེ་ཐོབ་པ་གསལ་བསྒྲགས་བྱས་ཡོད་ཀྱང་། ད་ལྟ་ད་དུང་ཁོ་མོ་བཙོན་འཇུག་འོག་ཡོད་པ་དང་ཉེ་ལམ་ནས་འཕྲོད་བསྟེན་གྱི་གནས་སྟངས་ཞན་པོ་ཆགས་ཡོད་སྟབས། ད་ལྟ་རྒྱལ་སྤྱིའི་གསར་འགོད་མཐུན་ཚོགས་དང་གསར་འགོད་རང་དབང་སྲུང་སྐྱོབ་བྱེད་མཁན་ཚོགས་སྡེ་ཁག་གིས་ཁོ་མོའི་འཕྲོད་བསྟེན་གྱི་གནས་སྟངས་ཐད་སེམས་འཚབ་བྱེད་ཀྱི་ཡོད་པ་རེད།
དེ་ཡང་འདི་ལོའི་གསར་འགོད་རང་དབང་གི་གཟེངས་རྟགས་ཁྲོད། སྙིང་སྟོབས་ལྡན་པ་དང་རང་སྐྱ་འཕེལ་བ། དེ་བཞིན་ཤུགས་རྐྱེན་བཅས་ནང་གསེས་གསུམ་ཡོད་པ་ལས། ཀྲང་ཀྲན་ལགས་སུ་སྙིང་སྟོབས་ཀྱི་ཁྱབ་ཁོངས་ནས་གཟེངས་རྟགས་ཐོབ་ཡོད་ཅིང་། ཁོ་མོ་ཕྱི་ལོ་ ༢༠༢༠ ཟླ་ ༢ ནང་དངོས་སུ་ཏོག་དབྱིབས་གཉན་རིམས་ཀྱི་འབྱུང་ཁུངས་དུ་གྱུར་བའི་རྒྱ་ནག་གི་གྲོང་ཁྱེར་ཝོ་ཧན་དུ་ཕྱིན་ནས། སྙིང་སྟོབས་ཆེན་པོས་ས་གནས་སྲིད་གཞུང་གི་དམ་དྲག་ལ་གདོང་ལེན་བྱས་ཏེ། ཝོ་ཧན་གྲོང་ཁྱེར་གྱི་ནད་ཡམས་ཀྱི་ཡུལ་དངོས་ཤར་སྟོན་བྱས་ཡོད་པ་དང་། སྐབས་དེའི་ཁོ་མོའི་གནས་ཚུལ་དག་ནི་ད་ལྟ་འཛམ་གླིང་ནང་ཝོ་ཧན་གྲོང་ཁྱེར་གྱི་ཏོག་དབྱིབས་གཉན་རིམས་ཀྱི་གནས་སྟངས་མངོན་གསལ་མཐོང་ཐུབ་པའི་ཁུངས་དྲག་ཤོས་ཀྱི་གྲས་སུ་བགྲང་གི་ཡོད་པ་རེད།
རྒྱ་རིགས་གསར་འགོད་པ་ཀྲང་ཀྲན་ལགས་ཕྱི་ལོ་ ༢༠༢༠ ཟླ་ ༥ ནང་རྒྱ་ནག་གཞུང་གིས་འཛིན་བཟུང་བྱས་རྗེས། ཟླ་བདུན་རིང་གང་བྱུང་བཀག་ཉར་བྱས་པ་དང་། ཕྱི་ལོ་ ༢༠༢༠ ཟླ་ ༡༢ ཚེས་ ༢༨ ཉིན་ཁ་འཁྲུག་དང་རྩོད་རྙོག་བསླངས་པའི་ཉེས་མིང་འོག ཧྲང་ཧེ་གྲོང་ཁྱེར་གྱི་ཁྲིམས་ཁང་ཞིག་གིས་ཁོ་མོར་ལོ་ ༤ ཡི་བཙོན་འཇུག་ཁྲིམས་ཐག་བཅད་ཡོད། འོན་ཀྱང་། མོས་རང་ཉིད་ལ་ཁྲིམས་ཆད་དེ་འདྲ་ཞིག་བཅད་པ་ནི་དྲང་བདེན་མིན་པ་དང་དབང་ཡོད་བྱེད་ཀྱི་རྒྱུ་མཚན་དྲངས་ཏེ་བཙོན་ཁང་དུ་ཟས་བཅད་ངོ་རྒོལ་སོགས་གནང་ཡོད་པ་རེད་ལ། ཕྱི་ལོ་ ༢༠༢༠ ཡི་ལོ་མགོར་རྒྱ་ནག་གི་གྲོང་ཁྱེར་ཝོ་ཧན་གྱི་ཏོག་དབྱིབས་གཉན་རིམས་ཀྱི་གནས་ཚུལ་ཕྱི་བསྒྲགས་བྱས་པ་ལ་བརྟེན་ནས་སྙིང་སྟོབས་ཅན་གྱི་རྒྱ་རིགས་གསར་འགོད་པ་ཆེས་ ༩ འཛིན་བཟུང་བྱས་པ་ཤེས་རྟོགས་ཐུབ་ཡོད་པ་དང་། དེ་དག་གི་ཁྲོད་ཀྱི་གསར་འགོད་པ་བདུན་ད་དུང་ཡང་འཛིན་བཟུང་བཀའ་ཉར་འོག་གནས་མུས་ཡིན་པ་རེད།
ཡང་ལོ་འཆར་ཅན་ཕུལ་སྲོལ་ཡོད་པའི་གསར་འགོད་རང་དབང་གི་གཟེངས་རྟགས་ལས་ཕྱི་ལོ་ ༢༠༢༡ ལོའི་གཟེངས་རྟགས་ཁྲོད། ཨི་ཟི་རལ་གྱི་སྒེར་གཉེར་གསང་བའི་ཉུལ་ཆས་པེ་གྷ་སི་ (Pegasus) ཞེས་པ་ཡིས་མང་གཙོ་དང་དམར་ཤོག་གི་སྲིད་གཞུང་ ༡༡ གིས་རྒྱལ་སྤྱིའི་གསར་འགོད་པ་ ༢༠༠ ཙམ་ལ་གསང་བའི་རྗེས་འདེད་གཏོང་གི་ཡོད་པའི་གནས་ཚུལ་ཕྱི་བསྒྲགས་བྱས་པར་བརྟེན། གསར་འགོད་པ་དང་གསར་ཁང་ཁག་གི་གསར་འགོད་རང་དབང་དང་གནས་ཚུལ་ཞིབ་འཇུག་སོགས་ལ་རྒྱ་ཆེ་བའི་རམ་འདེགས་བྱས་པའི་ངོས་འཛིན་འོག ཉུལ་ཆས་པེ་གྷ་སིར་ཕྱི་ལོ་ ༢༠༢༡ ལོའི་ཤུགས་རྐྱེན་ཆེ་བའི་གསར་འགོད་རང་དབང་གི་གཟེངས་རྟགས་དེ་འབུལ་གཏན་འཁེལ་ཡོད། ཨི་ཟི་རལ་གྱི་གསང་ཉུལ་ཁང་དེར་རྒྱལ་སྤྱིའི་ཉེས་ཡངས་ཚོགས་པའི་རྒྱབ་སྐྱོར་འོག་འཛམ་གླིང་རྒྱབ་ཁབ་ ༡༡ ནང་གི་རྒྱལ་སྤྱིའི་གསར་ཁང་ ༡༧ གྱི་གསར་འགོད་པ་ ༨༠ ལྷག་ནས་ཞིབ་འཇུག་གི་ལས་ཀ་གཉེར་བཞིན་ཡོད་པ་ཞིག་ཡིན་པ་དང་། གསང་ཉུལ་ཁང་དེས་ཕྱི་ལོ་ ༢༠༢༡ ལོར་ཨ་རི་དང་ཡུ་རོབ། ཨ་རབ། རྒྱ་གར་སོགས་ཀྱི་གཙོས་འཛམ་གླིང་རྒྱལ་ཁབ་ཁག་གི་མགོ་ཁྲིད་དང་ཆབ་སྲིད་མི་སྣ། དེ་བཞིན་གློག་བརྙན་འཁྲབ་སྟོན་པ་སོགས་མིང་དུ་གྲགས་པའི་མི་མང་པོ་ཞིག་གི་གསང་བ་ཕྱིར་བསྒྲགས་པ་ལ་བརྟེན་ནས། གསང་ཉུལ་ཁང་དེ་ནི་ཕྱི་ལོ་ ༢༠༢༡ ལོའི་འཛམ་གླིང་མི་མང་དང་སྲིད་གཞུང་ཁག་གི་དོ་སྣང་བྱེད་ཡུལ་ཆེ་ཤོས་ཤིག་ཏུ་གྱུར་ཡོད།
དེ་བཞིན། པ་ལི་སི་ཐན་གྱི་གསར་འགོད་པ་ཧཱ་སའོ་ནཱ་ (Majdoleen Hassona) ལགས་ཀྱིས་ཊར་ཁེ་དང་ཨི་ཟི་རལ་དང་པ་ལི་སི་ཐན། ཊར་ཁེ་བཅས་དཀྱིལ་ཤར་ཡུལ་གྲུའི་རྒྱལ་ཁབ་འདི་གསུམ་གྱི་ནང་འབྱུང་བཞིན་པའི་གནས་ཚུལ་དག་ཐེར་འདོན་གནང་ཞིང་། ཁོ་མོའི་འགྲོ་འདུག་སྤྱོད་གསུམ་གྱི་རང་དབང་ལ་ཨི་རལ་དང་པ་ལི་སི་ཐན་གཞུང་ཕྱོགས་གཉིས་ནས་དམ་དྲག་བྱེད་མུས་ཡིན་ཁར། དེ་སྔོན་འཛིན་བཟུང་སོགས་བྱས་མྱོང་ཡོད་ཀྱང་། ཁོང་གིས་མུ་མཐུད་སྲིད་གཞུང་དེ་དག་ལ་གདོང་ལེན་གྱིས་གསར་འགོད་པ་ཞིག་གི་རང་དབང་ཞིབ་འཇུག་གི་གནས་ཚུལ་སྤེལ་མཚམས་མ་བཞག་སྟབས། ཕྱི་ལོ་ ༢༠༢༡ ལོའི་གསར་འགོད་རང་དབང་གི་ཞིབ་འཇུག་ཁོངས་ཀྱི་གཟེངས་རྟགས་དེ་ཐོབ་ཡོད་པ་རེད་ལ། ཕྱི་ལོ་ ༢༠༡༩ ནས་ཁོ་མོ་དང་ཁྱོ་ག་གཉིས་ཨི་ཟི་རལ་གྱི་ས་མཚམས་སྐོར་སྲུང་བས་འགྲོ་སྐྱོད་བཀག་སྡོམ་བྱས་ཏེ། ད་ལྟ་ད་དུང་ཡང་ཨི་ཟི་རལ་དང་པ་ལི་སི་ཐན་བར་ཆེས་རྩོད་རྙོག་ཏུ་གྱུར་བའི་ནུབ་མཚོ་འགོག་ (West Bank) ཏུ་ལུས་ཡོད་ཀྱང་། མུ་མཐུད་དཀའ་ངལ་ལ་གདོང་ལེན་གྱིས་ཁུལ་དེའི་གནས་ཚུལ་སྤེལ་མུས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
