དྷ་ས་ས་གནས་མགོ་འཛིན་ཀུན་དགའ་ཚེ་རིང་ལགས་ཀྱིས་སེམས་ཅན་གཞན་གྱི་སྲོག་སྐྱོབ་རྒྱུ་ནི་དོན་དངོས་ལག་ལེན་དང་མཐུན་པའི་༧རྒྱལ་བ་དགྱེས་པའི་མཆོད་སྤྲིན་ཡིན་སྐོར་གསུངས་བྱུང་།
ཉིན་ཤས་གོང་ནས་དྷ་སྟེང་བོད་ཁྱིམ་གྱི་ཉེ་འཁྲིས་སུ་ཡོད་པའི་ཌལ་( Dal ) མཚེའུ་དེའི་ཆུ་རགས་བརྡོལ་ནས་ཆུ་སྐམ་པའི་རྐྱེན་གྱིས། མཚེའུ་དེའི་ནང་དུ་ཡོད་པའི་ཉ་མང་པོ་ཞིག་འཆི་ཉེན་ཡོད་པར་བརྟེན། ཀང་རཱ་རྫོང་གི་རོགས་སྐྱོར་དང་དྷ་ས་ས་གནས་མགོ་འཛིན་ལས་ཁུངས་ཀྱི་གོ་སྒྲིག་འོག བཞུགས་སྒར་ཁུལ་གྱི་བོད་མི་རྣམས་ཀྱིས་དྭང་བླང་ཐོག་ནས་ཉ་ཡི་སྲོག་སྐྱོབ་པའི་ལས་ལ་ཞུགས་ཏེ། འདམ་སྙོག་ཁྲོད་ཀྱི་ཉ་དག་འཛིན་བཟུང་གིས་ཀང་རཱ་རྫོང་གི་ཆུ་མཛོད་གཞན་ཞིག་ཏུ་དབོར་འདྲེན་བྱེད་པར་རོགས་རམ་གནང་སོང་།
དེའི་ཐད་དྷ་ས་ས་གནས་མགོ་མཛིན་ཀུན་དགའ་ཚེ་རིང་ལགས་ཀྱིས། ཁ་སང་ཌ་ལེ་ཁུ་ཡི་ཆུ་སྐམ་ནས་ཉ་མང་པོ་ཞིག་ཤི་མུས་ཡིན་པའི་གནས་ཚུལ་གོ་མ་ཐག རྫོང་དཔོན་གཞོན་པ་སོགས་ལ་འབྲེལ་བ་བྱེད་སྐབས། ཁོང་གིས་དེ་རིང་སྔ་དྲོ་ཆུ་ཚོད་ ༡༠ ཙམ་ལ་ཉ་དེ་དག་ས་གནས་གཞན་དུ་སྤོར་རྒྱུ་ཡིན་པས། དེར་བོད་མི་དང་བླང་བ་གང་མང་ཞིག་ཡོང་ཐུབ་ན། ཕན་ཐོགས་ཡོད་སྐོར་སོགས་བརྗོད་བྱུང་བས། སོ་སོའི་ཁྱབ་ཁོངས་ཀྱི་དགོན་སྡེ་ཁག་དང་། ཚོགས་སྡེ་ཁག དེ་བཞིན་མི་མང་བཅས་ལ་རེ་སྐུལ་ཞུས་བ་ལྟར། དེ་རིང་མི་གྲངས་ལྔ་བརྒྱ་ཙམ་ཕེབས་ཡོད་པ་དང་། གཞན་གྱི་ཚེ་སྲོག་སྐྱོབ་པའི་ལས་གཞི་འདི་ཉིད་ནི་༧རྒྱལ་བའི་དགོངས་པ་དང་མཐུན་ཞིང་། རྒྱལ་བ་དགྱེས་པའི་མཆོད་སྤྲིན་དུ་ངོས་འཛིན་བྱེད་ཀྱི་ཡོད་པས། ལས་གཞི་འདིའི་རིགས་ནི་ཧ་ཅང་རླབས་ཆེན་ཞིག་ཡིན་པ་རེད། དེ་བཞིན་ལས་གཞི་འདི་ནི་རྫོང་དང་ཡུལ་མིར་འབྲེལ་ལམ་བཟང་པོ་འཇོག་པའི་ལས་གཞི་གལ་ཆེན་ཞིག་ཡིན་པ་དང། མཚེའུ་དེ་ནས་དབོར་འདྲེན་བྱས་པའི་ཉ་རྣམས་ཀང་རཱ་རྫོང་གི་ཆུ་མཛོད་དུ་འཇོག་རྒྱུ་ཡིན་སྐོར་སོགས་འགྲེལ་བརྗོད་གནང་བྱུང་།
དང་བླང་རོགས་རམ་དུ་ཕེབས་པའི་སྔགས་པ་གུར་སྐྱབས་ཚེ་རིང་ལགས་ཀྱིས། ཉེ་སྔོན་འདིར་ཆུ་ཏོག་ཙམ་ཡོད་ཀྱང་། མདང་ནུབ་ཆུ་རྦབ་དེ་སྐམ་འགྲོ་ཡི་ཡོད་སྟབས། ཁོང་གི་བཟའ་ཟླ་སོགས་ཀྱིས་ཉ་ཤི་འགྲོ་ཡི་འདུག་ལབ་པས། ཁོང་ཚོས་ཆུ་མཛོད་དང་རླངས་འཁོར་སོགས་ཐབས་ཤེས་བྱེད་ཐབས་བྱས་ཀྱང་མ་བྱུང་ཡང་། ང་རང་ཚོ་ནང་པ་སངས་རྒྱས་པ་ཞིག་ཡིན་དུས། ལག་ལེན་གང་ཡང་མེད་པར་ཁ་ནས་ལབ་པ་དེར་དོན་སྙིང་མེད་པས། དེ་རིང་ཞོགས་པ་སྔ་ཤོས་ཀྱི་གྲས་སུ་སླེབས་ནས། ཉ་དེ་དག་སྐྱོབ་ཐབས་བྱས་པ་ཡིན། དེ་ལྟར་བྱེད་དགོས་དོན་ཀྱང་སོ་སོ་ནང་པ་ཞིག་ཡིན་པ་དང་། སངས་རྒྱས་ཀྱི་ཆོས་བྱས་པའི་ལས་འགན་ཞིག་ལ་རྩིས་ནས། དེ་རིང་འདིར་ཆེད་དུ་རོགས་པ་བྱེད་དུ་ཡོང་བ་ཡིན། ཞེས་བརྗོད་བྱུང་།
ཡང་དང་བླང་རོགས་རམ་དུ་ཕེབས་པའི་ཨ་ཅག་བསྟན་འཛིན་སྒྲོལ་དཀར་ལགས་ཀྱིས། ཆུ་སྐམ་ནས་ཉ་རྣམས་ཤི་གྲབས་ཡོད་སྟབས། དེ་དག་སྐྱོབ་འདོད་ཀྱི་ཀུན་སློང་ཞིག་བྱུང་། འོན་ཀྱང་། དངོས་སུ་འདམ་ཆུའི་ནང་འཛུལ་ནས་ལས་ཀ་བྱེད་དུས། ཉ་རྣམས་བླང་ཐུབ་ཀྱི་མི་འདུག་ཀྱང་། དེ་དག་ལ་སྙིང་རྗེ་ཞིག་སྐྱེས་བ་དང། ཉ་དེ་དག་སྐྱོབ་ཐུབ་ན། ཚེ་སྲོག་ཅིག་ཐར་གྱི་ཡོད་པས། ང་རང་འདིར་ཡོང་བ་ཡིན་ཞེས་བརྗོད་བྱུང་བ་དང་། དེ་རིང་ཉའི་སྲོག་སྐྱོབ་ཀྱི་ལས་དོན་ཁྲོད་བོད་མི་རྒན་དར་གཞོན་གསུམ་མང་པོ་ཡོད་པའི་ཁྲོད་བཙས་མ་ཐག་པའི་བྱིས་པ་རྒྱབ་ཏུ་འཁུར་ཏེ་དགེ་བའི་ལས་ལ་བརྩོན་མཁན་ཨ་མ་ལ་སོགས་མཐོང་རྒྱུ་འདུག
ཌལ་ ( Dal ) མཚེའུ་ནི་རྒྱ་གར་བྱང་ཕྱོགས་ཀང་རཱ་རྫོང་ཁོངས་ཀྱི་དྷ་སྟེང་བོད་ཁྱིམ་གྱི་ཉེ་འདབས་སུ་ཆགས་ཤིང་། དེའི་མཐའ་སྐོར་དུ་ནགས་ཚལ་གྱིས་བསྐོར་ཡོད་པ་དང་། མཚེའུ་ཁུལ་དེར་དྷ་སྟེང་བོད་ཁྱིམ་གྱི་གཙོས་པའི་ཉེ་འཁོར་བོད་མི་དང་ས་གནས་ཡུལ་མི་རྣམས་ཀྱིས་སྔ་དགོང་ལུས་སྦྱོང་དང་གཟའ་མཇུག་སྐབས་ཀྱི་ཐུག་སྤྲོད་གཏོང་ཡུལ་ཞིག་ཀྱང་ཡིན་པ་མ་ཟད། ས་ཁུལ་དེ་ནི་དྷ་རམ་ས་ལའི་ཡུལ་སྐོར་སྤྲོ་འཆམ་གྱི་ས་ཚིགས་ཤིག་ཀྱང་ཡིན་པ་རེད།
གསར་འགོད་པ། དཔལ་ལྡན།
