ཟླ་འདིའི་ཕྱི་ཚེས་ ༢༤ ཉིན་༧གོང་ས་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད། བྷར་ཛལ་གྱི་གཞུང་འབྲེལ་མ་ཡིན་པའི་ཚོགས་པ་པཱ་ལ་སི་ཨ་ཐེ་ན་ (Palas Athena) ནས་ཇི་ལྟར་གསོལ་བ་བཏབ་པ་ལྟར། སྟོང་ལོ་གསར་པར་སེམས་ཀྱི་ཤེས་ཡོན་ (Educating the Heart in the New Millennium) ཞེས་པའི་བརྗོད་གཞིའི་ཐོག་གསུང་ཆོས་དང་དྲི་བར་བཀའ་ལན་བཅས་སྩལ་གནང་སོང་།
སྐབས་དེར་༧གོང་ས་མཆོག་གིས། དེ་རིང་ཁྱེད་རང་ཚོ་ལ་བཀའ་མོལ་ཞུ་རྒྱུའི་གོ་སྐབས་བྱུང་བར་དགའ་པོ་ཞེ་དྲགས་ཡོད། ང་རང་ཚོ་འགྲོ་བ་མི་ཡིན་པའི་ཆ་ནས་སྤྱིར་བཏང་ཀླད་པའི་དབྱིབས་ཆེ་ཆུང་ལ་བལྟས་ན་གླང་ཆེན་ལས་ཆུང་བ་ཡོད་ཀྱང་། འགྲོ་བ་མི་ལ་ཡོད་པའི་ཐུན་མོང་མ་ཡིན་པའི་ཁྱད་ཆོས་ནི་ཀླད་པ་དང་འབྲེལ་བའི་རྣམ་དཔྱོད་རྨད་དུ་བྱུང་བ་ཡོད་པ་རེད། དེར་བརྟེན་ལོ་ངོ་སྟོང་ཕྲག་གི་རིང་ལ་སངས་རྒྱས་བཅོམ་ལྡན་འདས་གཙོ་བོར་གྱུར་བའི་མཁས་གྲུབ་དང་སྟོན་པ་ལ་སོགས་པ་མིའི་ནང་ལོག་ནས་ཕུལ་དུ་བྱུང་བའི་རྣམ་དཔྱོད་ཅན་མང་པོ་བྱོན་ཡོད་རེད། རྒྱུ་མཚན་ནི་མི་ལ་ཐུན་མོང་མ་ཡིན་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཡོད་པའི་དབང་གིས་བྱུང་བ་རེད། གཞི་རྩའི་ང་ཚོ་མི་ལ་ཡོད་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ནི་རླབས་ཆེན་པོ་ཡོད་ཀྱང་། ཤེས་རབ་རྐྱང་པ་ཁོ་ནར་རྩལ་དུ་སྟོན་པ་ལས་དངངས་འཚབ་དང་ཁོང་ཁྲོའི་ཀུན་སློང་གིས་ཤེས་རབ་ཀྱི་གྲོགས་བྱེད་ན། དེ་ལྟ་བུའི་ཤེས་རབ་འདི་བེད་སྤྱོད་ལོག་པ་ཞིག་ལ་སོང་ནས་སྡུག་རྩུབ་ཀྱི་ཉེན་ཁ་མང་པོ་ཡོང་གི་ཡོད་པ་རེད། དེར་བརྟེན་མི་ལ་ཡོད་པའི་རྣམ་དཔྱོད་འདི་སེམས་པ་བཟང་པོ་དང་ངེས་པར་དུ་འབྲེལ་དགོས་པ་ཆགས་ཀྱི་ཡོད་རེད། དེ་ཡང་སོ་སོ་སྒེར་གཅིག་གི་འཕྲོད་བསྟེན་གྱི་ངོས་ནས་ཞུས་ནའང་རིག་པ་ཡག་པོ་ཡོད་པ་ཁོ་ན་ཡིས་འཕྲོད་བསྟེན་ཡག་པོ་ཡོང་བའི་ངེས་པ་མེད། གལ་སྲིད་རྣམ་དཔྱོད་ཡག་པོ་ཡོད་པ་གང་ཞིག་ལ་རྣམ་དཔྱོད་དེ་ཉིད་སེམས་པ་བཟང་པོ་བྱམས་སྙིང་རྗེ་དང་འབྲེལ་བ་ཆགས་ཡོད་ན། སོ་སོའི་ཆོས་རབ་ཏུ་རྣམ་འབྱེད་ཀྱི་ཤེས་རབ་བེད་སྤྱོད་གཏོང་རྒྱུ་དེའང་བདེ་སྤྱོད་ཚད་དང་ལྡན་པ་དང་དོན་དང་ལྡན་པ་ཞིག་ལ་གཏང་རྒྱུ་ཡོང་གི་རེད། དེ་ནས་ནང་གི་སེམས་པ་བཟང་པོ་དེ་བྱམས་བརྩེའི་ཉམས་ལེན་ཡོད་པར་བརྟེན། སོ་སོའི་རྒྱུད་ལ་ནང་གི་ཞི་བདེ་བྱུང་ན་སོ་སོའི་ལུས་ཁམས་བདེ་པོ་ཡོང་གི་རེད། དེར་བརྟེན་ལུས་པོའི་བདེ་ཐང་ཐོག་ལ་ནང་གི་བྱམས་པའི་ཉམས་ལེན་ཞེ་དྲགས་ཀྱི་གལ་ཆེན་པོ་ཆགས་ཀྱི་ཡོད་རེད། དེ་དག་ནི་ཆོས་ལུགས་ཀྱི་སྐད་ཆ་ཁོ་ན་མིན་པར། དེང་སང་ཚན་རིག་པ་མང་པོ་ཞིག་དང་ལྷག་པར་དུ་ཀླད་པའི་ཚན་རིག་པ་མང་པོས། རིག་པ་གྲུང་པོ་ཡོད་པ་ཁོ་ན་ཡིས་སེམས་ཀྱི་ཞི་བདེ་བསྒྲུབ་ཐུབ་ཀྱི་མི་འདུག དེར་བརྟེན་དེང་སང་ཚན་རིག་པ་དང་ཀླད་པའི་སྨན་པ་ཚོས་ཀྱང་ང་ཚོའི་ནང་གི་སེམས་པ་བཟང་པོ་དགོས་ཀྱི་འདུག་ཟེར་གྱི་ཡོད། མི་ཁ་ཤས་ཀྱི་རྣམ་རྟོག་ལ་བྱམས་སྙིང་རྗེའི་སྐད་ཆ་བཤད་པ་འདི་ཆོས་ལུགས་ཀྱི་སྐད་ཆ་རྐྱང་རྐྱང་རེད་ཟེར་ནས་འབྲི་མཁན་ཡོད་རེད། འོན་ཀྱང་འདི་རྩ་བ་ཉིད་ནས་མ་རེད། ང་ཚོ་སྤྱི་ཚོགས་ལ་བརྟེན་པའི་སེམས་ཅན་ཆགས་ཀྱི་ཡོད་པ་དང་སྤྱི་ཚོགས་ལ་བརྟེན་པའི་སེམས་ཅན་ཡིན་པའི་ཆ་ནས་མའི་བརྩེ་བ་ལ་བརྟེན་དགོས་དུས། མ་ཡི་བརྩེ་བའི་དབང་གིས་ཕྲུ་གུ་ག་འདྲ་ཡིན་རུང་འཚོ་ཡི་ཡོད་པ་རེད། མའི་བརྩེ་བ་ལ་བརྟེན་ནས་ཕྲུ་གུ་འཚོ་བ་ནི་ཆོས་ལུགས་ཀྱི་སྐད་ཆ་མ་རེད། དེར་བརྟེན་ང་ཚོས་བྱམས་སྙིང་རྗེའི་ཉམས་ལེན་དང་ཆོས་ལུགས་དད་པ་ཟེར་བ་གཉིས་འདྲེས་རྒྱུ་མི་འདུག ཅེས་གསུངས།
༧མགོན་པོ་གང་ཉིད་མཆོག་གིས། སྤྱི་ཚོགས་ལ་བརྟེན་མཁན་གྱི་དུད་འགྲོ་སེམས་ཅན་རིགས་དེ་དག་དུད་འགྲོ་སེམས་ཅན་ཡིན་རུང་དུད་འགྲོ་སེམས་ཅན་བྱེ་བྲག་པ་གཅིག་གི་བདེ་སྡུག་ནི་རང་ཁོངས་སུ་གཏོགས་སའི་སེམས་ཅན་གྱི་སྤྱི་ཚོགས་དེ་ལ་བསྟུན་གྱི་ཡོད་པར་བརྟེན། རང་གི་སྤྱི་ཚོགས་དེ་ལ་གཤའ་མ་དག་པའི་སེམས་ཁུར་དང་བརྩེ་བ་གཅིག་མཚུངས་དུད་འགྲོ་ལའང་ཡོད་རེད། འདི་ནི་ལྷན་སྐྱེས་ཀྱི་རང་བཞིན་ལྟ་བུ་ང་རང་ཚོའི་རང་བཞིན་དང་མཐུན་པའི་སྤྱོད་ཚུལ་ཆགས་པ་ཞིག་དང་ལྟོས་གྲུབ་ཡིན་པའི་ཆ་ནས་བྱམས་དང་བརྩེ་བའི་ཉམས་ལེན་འདི་ང་ཚོའི་སྤྱི་ཚོགས་ལ་དགོས་ཀྱི་ཡོད་པར་བརྟེན། རྣམ་དཔྱོད་དང་བྱམས་སྙིང་རྗེའི་ཉམས་ལེན་དེ་གཉིས་ཟུང་འབྲེལ་དུ་འགྲོ་དགོས་རྒྱུ་ནི་གལ་ཆེན་པོ་ཞེ་དྲགས་རེད། ཅེས་དང་། ལོ་ངོ་བརྒྱ་ཕྲག་ཁ་ཤས་གོང་ནས་མིའི་སྤྱི་ཚོགས་ནང་དུ་ཕན་ཚུན་གསོད་རེས་བཏང་བ་དང་༧གོང་ས་མཆོག་སྐུ་ན་གཞོན་དུས་འཛམ་གླིང་དམག་ཆེན་གཉིས་པ་བརྒྱབ་ཡོད་པ། དེ་བཞིན་ད་ལྟའི་ཆར་མི་མང་པོའི་སེམས་ནང་དུ་དམག་ཆེན་གསུམ་པའང་ཡོང་སྲིད་པའི་དངངས་སྐྲག་ཡོང་གི་ཡོད་པ་ནི་ཤེས་རབ་ཀྱི་མ་འདང་བའི་དཀའ་ངལ་མ་ཡིན་པར་ནང་བསམ་བློར་སྟངས་འཛིན་བྱེད་མ་ཐུབ་པས་ཡིན་སྐོར་དང་། བྱམས་སྙིང་རྗེ་ནི་ཆོས་ལུགས་ཀྱི་སྐད་ཆ་ཙམ་མ་ཡིན་པར་ང་ཚོ་ཚང་མ་སྤྱི་ཚོགས་སེམས་ཅན་ཡིན་པའི་ཆ་ནས། བྱམས་སྙིང་རྗེ་ནི་སྤྱི་ཚོགས་ལ་དགོས་གལ་ཧ་ཅང་ཆེ་སྐོར་གསུངས།
ཡང་༧སྐུ་ཉིད་མཆོག་གིས། དེང་སང་འགྲོ་བ་མི་ཡོངས་ཀྱིས་སློབ་སྦྱོང་གལ་ཆེན་པོ་ཡིན་པ་རྩིས་ཀྱི་ཡོད་རེད། བྱམས་སྙིང་རྗེའི་ཉམས་ལེན་དང་འབྲེལ་བའི་སློབ་སྦྱོང་འདི་ཤེས་ཡོན་གྱི་སྡེ་ཚན་ནང་ངེས་པར་དུ་གསར་གཏོད་དགོས་ཀྱི་འདུག དེ་ཡང་ཤེས་བྱའི་སྒོ་བརྒྱད་སྤྱོད་པ་ཙམ་མིན་པར་སོ་སོའི་འཕྲོད་བསྟེན་ཡག་པོ་ཡོང་རྒྱུ་དང་མི་སྒེར་གྱི་སེམས་པ་སྐྱིད་པོ་ཡོང་རྒྱུ་སོགས་ལ་བརྟེན་ནས་རང་གང་དུ་སྡོད་སའི་སྤྱི་ཚོགས་དང་། དེ་ནས་རྒྱ་ཆེ་ས་ནས་རྒྱལ་ཁབ་དང་རྒྱལ་སྤྱི་ཟེར་ནས་འཛམ་གླིང་ཡོངས་ལ་ཁྱབ་ཐུབ་རྒྱུའི་ཁྱད་པར་ཡོང་གི་རེད། ནང་སེམས་སུ་བྱམས་སྙིང་རྗེའི་ཉམས་ལེན་ཡོད་ན་སོ་སོའི་ཅོག་རྩེའེི་མདུན་དུ་མེ་མདའ་ཡོད་རུང་མེ་མདའ་ལ་རྩ་བ་ཉིད་ནས་ལག་པ་འཆང་གི་མ་རེད། དེང་སང་འཛམ་གླིང་འདིའི་ནང་དུ་གོ་མཚོན་བཟོས་པར་དཔལ་འབྱོར་བེད་སྤྱོད་མང་པོ་གཏོང་གི་ཡོད་པ་དེ་དག་ནོར་གྱི་ཡོད་པ་རེད། ད་དུང་རྒྱལ་ཁབ་མང་པོའི་ནང་དུ་སྲུང་སྐྱོབ་ལ་མིང་བཏགས་པའི་དམག་གི་དོན་དུ་འགྲོ་སོང་ཤུགས་ཆེན་པོ་གཏོང་བཞིན་ཡོད་རེད། དེ་འདྲའི་བསམ་བློ་གཏོང་སྟངས་འདི་རྗེས་ལུས་ཐེབས་པ་རེད། ང་ཚོའི་དུས་རབས་འདི་མིང་དོན་མཚུངས་པའི་ཞི་བདེ་དང་ལྡན་པའི་དུས་རབས་ཤིག་ལ་འགྱུར་དགོས་ཀྱི་ཡོད་པར་བརྟེན་གོ་མཚོན་བེད་སྤྱོད་མེད་པ་རེད། དེ་ཡང་སེམས་ནང་དུ་འཇིགས་དངངས་དང་ཁོང་ཁྲོ་ཡོད་པ་དང་། རང་གཅེས་འཛིན་ཁོ་ནའི་བསམ་བློ་གཏོང་མཁན་ཞིག་ལ་གོ་མཚོན་བེེད་སྤྱོད་ཡོད་པ་རེད། འཛམ་གླིང་སྤྱི་ལ་བསམ་བློ་གཏོང་ཐུབ་མཁན་དང་གཅིག་གྱུར་གྱི་འདུ་ཤེས་ཡོད་མཁན། ལྷག་པར་དུ་ཞི་བདེ་འདོད་མཁན་ཡིན་ན་གོ་མཚོན་རྩ་བ་ཉིད་ནས་བེད་སྤྱོད་ཡོད་མ་རེད། དེར་བརྟེན་ཆུང་བྱིས་པའི་དུས་ནས་བྱམས་པའི་སློབ་སྦྱོང་ངེས་པར་དུ་དགོས། དེ་ཡང་རྒྱུན་གཏན་དུ་སློབ་ཚན་བསླབ་པའི་ཐོག་ལ་མི་ཞེ་བདེ་ཅན་བཟོ་རྒྱུའི་སློབ་སྦྱོང་སྤྲོད་ཅིང་། སེམས་ནང་དུ་འཇིགས་སྣང་དང་དངངས་སྐྲག་ཉུང་བ་བཟོས་པའི་དོན་དུ་བྱམས་བརྩེའི་སློབ་སྦྱོང་གི་ཉམས་ལེན་དགོས་ཀྱི་ཡོད་པ་རེད། སློབ་གྲྭའི་སློབ་ཚན་ནང་དུ་བྱམས་བརྩེའི་སློབ་སྟོན་བྱེད་སྐབས་ཆོས་དང་འབྲེལ་བ་མིན་པར་སོ་སོའི་འཕྲོད་བསྟེན་དང་འབྲེལ་བའི་ཐོག་ནས་ཁྱིམ་ཚང་དང་སྤྱི་ཚོགས་བདེ་སྐྱིད་དང་ལྡན་པ། མཐར་ཐུག་ན་འཛམ་གླིང་ཞི་བདེ་དང་ལྡན་པ་ཡོང་རྒྱུའི་དམིགས་ཡུལ་ཕུགས་ལ་བཞག་སྟེ་དགོས་པ་འདི་སྒྲུབ་པའི་དོན་དུ་བྱམས་བརྩེའི་ཉམས་ལེན་ངེས་པར་དུ་སློབ་དགོས་ཀྱི་ཡོད་པ་རེད། ངོས་ཀྱིས་རྒྱུན་གཏན་དུ་དེ་ལྟར་ཞུས་ཀྱི་ཡོད། འདི་ནི་ཡིད་ཆེས་ཙམ་མིན་པར་རང་རྒྱུད་ལ་བྱམས་སྙིང་རྗེ་ཡོད་ན། སེམས་ནང་དུ་ཞི་བདེ་དང་བདེ་སྐྱིད་ཡོང་རྒྱུ་ནི་ཁ་ཡོད་ལག་ཡོད་ཀྱི་གནས་ཚུལ་ཆགས་ཀྱི་ཡོད་པ་རེད། ཅེས་གསུངས།
དྲི་བ་དྲིས་ལན་སྐབས་དགེ་རྒན་དང་སྤྱི་ཚོགས་ནང་ལས་འགུལ་སྤེལ་མཁན་ (Prof. Lourdes Alves de Souza) ལགས་ཀྱིས་དྲག་སྤྱོད་དམ་སྡུག་རྩུབ་དང་སྡུག་བསྔལ་གྱི་ཁྲོད་དུ་གནས་བཞིན་པའི་ནང་སེམས་ཀྱི་བདེ་སྐྱིད་བསྐྲུན་སྟངས་གང་འདྲ་ཡོད་སྐོར་དྲིས་པར། ༧གོང་ས་མཆོག་གིས། སྤྱིར་བཏང་རྒྱལ་ཁབ་སོ་སོའི་ཁེ་ཕན་དང་མི་རིགས་དབྱེ་འབྱེད་ཡོད་ན། དེའི་དབང་གིས་ཁོར་ཡུག་དེའང་བཀྲ་མ་ཤིས་པ་ཞིག་ཏན་ཏན་ཡོད་པ་རེད། དེར་བརྟེན་ང་ཚོ་མི་ཡིན་པ་གཅིག་གྱུར་དང་གོ་ལ་ཆུང་ཆུང་འདིའི་སྒང་ལ་མཉམ་དུ་སྡོད་དགོས་པའི་བསམ་བློའི་འདུ་ཤེས་བཅངས་ནས་ཕན་ཚུན་གཅིག་གྱུར་གྱི་འདུ་ཤེས་ཚང་མས་བཅངས་དགོས་ཀྱི་ཡོད་པ་རེད། དཔེར་ན་ཨབ་གྷ་ནི་སི་ཐན་ (Afghanisthan) དང་ཨ་ཧྥེ་རི་ཀའི་མངའ་སྡེ་ཁ་ཤས་ཤིག་གི་ནང་དུ་གོ་མཚོན་བེད་སྤྱོད་ཞེ་དྲགས་གཏོང་གི་འདུག ནང་གི་ཞེ་བདེ་མེད་པ་དང་ང་ཚོ་དང་ཁོ་ཚོ་ཟེར་ནས་དབྱེ་འབྱེད་ཤུགས་ཆེན་པོ་ཡོང་གི་ཡོད་པར་བརྟེན། ཁོ་རང་ཚོ་ལ་འགྲོ་བ་མི་ཡིན་པ་གཅིག་གྱུར་གྱི་འདུ་ཤེས་དེ་ཁོ་ཚོའི་རྒྱུད་ལ་སྤེལ་དགོས་རྒྱུ་གལ་ཆེན་པོ་མཐོང་གི་འདུག དུས་ཚོད་འགོར་གྱི་རེད་དེ་མི་སྲིད་པ་མ་རེད། ཅེས་ལམ་སྟོན་གནང་།
མཐའ་དོན་དུ་༧གོང་ས་མཆོག་གིས། དེ་རིང་གི་བརྗོད་གཞི་འདི་ང་རང་ཚོའི་ཉིན་རེའི་མི་ཚེ་དང་འབྲེལ་བ་ཆེན་པོ་ཆགས་ཀྱི་འདུག དེར་བརྟེན་ཚང་མས་སོ་སོའི་མི་ཚེའི་ཐོག་ལ་བྱམས་སྙིང་རྗེ་ཉམས་ལེན་གང་ཐུབ་ཐུབ་བྱ་རྒྱུའི་ཐད་ཐུགས་སྣང་མང་ཙམ་གནང་རོགས་གནང་། མི་སུ་འདྲ་ཞིག་ཡིན་རུང་གཉེན་བཤེས་ཀྱི་འདུ་ཤེས་ཡོད་པའི་ཐོག་ནས་བྱམས་སྙིང་རྗེ་ཉམས་ལེན་བྱེད་ཐུབ་ན་རིམ་པས་འཛམ་གླིང་སྤྱི་ལ་ཁྱབ་ཐུབ་པ་ཡོང་གི་རེད། ང་རང་ཚོས་འཛམ་གླིང་སྤྱིའི་བདེ་སྐྱིད་ཐོག་ལ་བསམ་བློ་གཏོང་གི་ཡོད་པ་རེད་མ་གཏོགས་སོ་སོའི་རྒྱལ་ཁབ་དང་སོ་སོའི་མི་རིགས། སོ་སོའི་ཆོས་ལུགས་བཅས་ཀྱི་བསམ་བློ་མེད་པར་སྤྱི་ལ་ཁྱབ་པའི་དགོངས་པ་བཞེས་དགོས་རྒྱུ་དེ་གལ་ཆེན་པོ་ཆགས་ཀྱི་ཡོད་པ་རེད། ཅེས་བཀའ་སློབ་ལམ་སྟོན་གནང་སོང་།
གསར་འགོད་པ། བསྟན་འཛིན་ཕུར་བུ།
