ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་བོད་མི་ལས་འགུལ་བ་བཞི་ཡིས། སུད་སི་དང་རྒྱ་ནག་བར་གྱི་ཚོང་འབྲེལ་ཚོགས་འདུ་ཞིག་གི་སྟེང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་སྟབས། རྒྱ་ནག་དང་ལྷན་དུ་ཚོང་འབྲེལ་མི་བྱེད་པ་དང་རྒྱ་ནག་གི་ཨོ་རྩལ་འགྲན་ཚོགས་ནས་ཕྱིར་འཐེན་དགོས་པའི་ངོ་རྒོལ་ལས་འགུལ་སྤེལ་ཡོད་པ་རེད།
ཁ་སང་ཕྱི་ཚེས་ ༢༥ ཉིན་སུད་སིའི་གྲོང་ཁྱེར་ (Lucerne) ནང་ཕྱི་ལོ་ ༢༠༢༡ ལོའི་ཡུ་རོབ་ཀྱི་གླེང་སྟེགས (Europe Forum Lucerne) ཞེས་སུད་སི་དང་རྒྱ་ནག་བར་གྱི་ཚོང་འབྲེལ་དང་དཔལ་འབྱོར་གྱི་འབྲེལ་བ་རྒྱ་སྐྱེད་ཇི་ལྟར་གཏོང་ཕྱོགས་སྐོར་ལ་ཚོགས་ཆེན་ཚོགས་བཞིན་པའི་སྐབས་སུ། ཡུ་རོབ་བོད་ཀྱི་ན་གཞོན་ལས་འགུལ་བ་བཞི་ཡིས། རྒྱ་ནག་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པ་དང་། འགྲོ་བ་མིའི་ཐོབ་ཐང་མེད་ན་ཚོང་འབྲེལ་མེད། བོད་ལ་རང་དབང་དགོས། ཕྱི་ལོ་ ༢༠༢༢ ལོའི་རྒྱ་ནག་གི་ཨོ་རྩལ་འགྲན་ཚོགས་ལ་ངོ་རྒོལ་ཡོད་ཅེས་པའི་ཕྲེད་དར་འཕྱར་ཏེ། ཚོགས་འདུའི་སྟེང་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་གནང་ཡོད་པ་རེད་ལ། དམིགས་བསལ་ངོ་རྒོལ་ལས་འགུལ་སྤེལ་སྐབས་རྒྱ་ནག་གི་དཔལ་འབྱོར་རིག་པ་བ་ (Keyu Jin) ཟེར་བ་དེས་སུད་སི་དང་རྒྱ་ནག་བར་གྱི་ཚོང་འབྲེལ་སྐོར་ལ་གཏམ་བཤད་སྤེལ་བཞིན་པ་མཚམས་འཇོག་བྱེད་དགོས་བྱུང་ཡོད་པ་རེད།
འདི་གའི་གསར་འགོད་པས་དྲ་ལམ་བརྒྱུད་ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་མི་གཞི་སྲས་ཚང་བཀྲ་ཤིས་ལགས་སུ་བཀའ་འདྲི་ཞུས་པར་མོས། ཁ་སང་སུད་སིའི་གྲོང་ཁྱེར་ (Lucerne) ནང་དུ་ལའོ་ཟར་ནེ་ཡུ་རོབ་གླེང་སྟེགས་ (Europe Forum Lucerne) ཟེར་བའི་ཚོགས་ཆེན་ཞིག་འཚོགས་ཡོད་པ་དང་། དམིགས་བསལ་གྱིས་འདི་ལོའི་ཚོགས་ཆེན་དེ་སུད་སི་དང་རྒྱ་ནག་བར་གྱི་ཚོང་འབྲེལ་དང་དཔལ་འབྱོར་གྱི་འབྲེལ་བ་གང་འདྲ་ཉར་དགོས་ཡོད་པའི་སྐོར་ལ་ཡིན་ཡང་། རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་གླེང་སློང་བྱ་རྒྱུའི་འཆར་གཞི་མེད་པར་བརྟེན། ཡུ་རོབ་བོད་རིགས་གཞོན་ནུ་མཐུན་ཚོགས་ (Tibetan Youth Association in Europe) ནས་རྒྱ་ནག་དང་བོད། ཧོང་ཀོང་། ཤར་ཏུར་ཀི་སི་ཐན་ (East Turkestan)། སོགས་ཀྱི་འགྲོ་བ་མིའི་ཐོབ་ཐང་གི་གནས་སྟངས་དང་། རྒྱ་གཞུང་གིས་བཙན་གནོན་བྱས་དང་བྱེད་མུས་ཡིན་པའི་སྐོར་ལ་གོ་རྟོགས་སྤེལ་སླད་དུ། ཚོགས་ཆེན་གྱི་ནང་དུ་ཕྱིན་ནས་ངོ་རྒོལ་བྱས་པ་ཡིན་ལ། སྐབས་དེར་ཡུ་རོབ་གཞོན་ནུ་མཐུན་ཚོགས་ཀྱི་ཚོགས་གཙོ་ཟུར་བ་འཇིགས་མེད་ལགས་ཀྱིས་མི་མང་ཚང་མའི་མདུན་དུ་ང་ཚོའི་རེ་སྐུལ་དང་ངོ་རྒོལ་བྱེད་དགོས་པའི་རྒྱུ་མཚན་གང་ཡིན་པའི་སྐོར་ལ་སྐད་ཆ་བཤད་པའི་གོ་སྐབས་རག་བྱུང་། ཞེས་བརྗོད་བྱུང་།
ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་གཙོ་ཟུར་པ་འཇིགས་མེད་ལགས་ཀྱིས་ཚོགས་འདུའི་ཚོགས་བཅར་བ་ཡོངས་ལ་ངོ་རྒོལ་ལས་འགུལ་དེ་སྤེལ་དོན་སྐོར་ལ་བརྗོད་དོན། རྒྱ་ནག་གིས་བོད་དང་ཡུ་གུར། ཧོང་ཀོང་བཅས་ཀྱི་རྒྱལ་ཁབ་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་པ་དང་དྲག་གནོན་ཤུགས་ཆེན་བྱེད་ཀྱི་ཡོད་པར་བརྟེན། རྒྱ་ནག་རྒྱལ་ཁབ་ལྟ་བུ་དང་ལྷན་དུ་ཚོང་འབྲེལ་བྱ་རྒྱུ་ནི་དྲང་བདེན་མེད་པ་ཞིག་རེད་ལ། རྒྱ་ནག་དང་ལྷན་དུ་འགྲོ་བ་མིའི་ཐོབ་ཐང་གི་སྐོར་ལ་གླེང་སློང་ངེས་པར་དུ་བྱ་དགོས་པའི་སླད་དུ་ལས་འགུལ་འདི་སྤེལ་གྱི་ཡོད། ཅེས་འགྲེལ་བརྗོད་གནང་འདུག
དེ་འབྲེལ་ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་ངོ་དེབ་ནང་། ཐེངས་འདིའི་ཚོགས་ཆེན་ནང་འགྲོ་བ་མིའི་ཐོབ་ཐང་སྐོར་ལ་དམིགས་བསལ་གྱིས་དོ་སྣང་བྱེད་འཆར་མེད་པར་བརྟེན། ཡུ་རོབ་བོད་རིགས་གཞོན་ནུ་མཐུན་ཚོགས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་སེམས་འཚབ་ཡོད་པའི་གནད་དོན་གླེང་བ་དང་། ཆབ་སྲིད་དང་དཔལ་འབྱོར་ཐོག་ཐག་གཅོད་བྱེད་མཁན་གྱིས་རྒྱ་ནག་གིས་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་ཚུལ་སོགས་ཀྱི་གནད་དོན་དང་འབྲེལ་ནས། འགྲོ་བ་མིའི་ཐོབ་ཐང་ལ་སྲུང་སྐྱོབ་ངེས་པར་དུ་བྱ་དགོས་པའི་ངོ་རྒོལ་ལས་འགུལ་སྤེལ་ཡོད་པ་དང་། ཚོགས་མི་བཞིས་ཚོགས་ཆེན་ནང་དུ་མཉམ་ཞུགས་གནང་སྟེ། ཆབ་སྲིད་དང་དཔལ་འབྱོར་མགོ་ཁྲིད་རྣམས་ཀྱིས་རྒྱ་ནག་དང་ལྷན་དུ་ཆབ་སྲིད་དང་ཚོང་འབྲེལ་སོགས་ཀྱི་འབྲེལ་བ་ཡར་རྒྱས་གཏོང་ཕྱོགས་ཐད་བཀའ་མོལ་གནང་སྐབས། འགྲོ་བ་མིའི་ཐོབ་ཐང་གི་གནས་སྟངས་ཐད་ལ་གཙིགས་ཆེན་འཛིན་དགོས་སྐོར་བརྗོད་དེ་ངོ་རྒོལ་བྱས་ཡོད་འདུག
ད་རེས་བོད་དོན་ལས་འགུལ་སྤེལ་མཁན་ཁྲོད། ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་གཙོ་ཟུར་པ་ཨ་རྡོ་ཚང་འཇིགས་མེད་ལགས་དང་ཚེ་རིང་བཟང་མོ་ལགས། གཞི་སྲས་ཚང་འཕྲིན་ལས་ལགས་དང་ཚེ་ལྷ་ (Tselha Buchli) བཅས་ཡིན་པ་དང་། ཁོང་ཚོས་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་གནད་དོན་དང་འབྲེལ་ནས། ད་ལན་གྱི་སུད་སི་དང་རྒྱ་ནག་བར་གྱི་ཚོང་འབྲེལ་ཚོགས་འདུའི་སྟེང་འགྲོ་བ་མིའི་ཐོབ་ཐང་ཚོགས་པའི་འཐུས་ཚབ་མེད་པ་དང་། ཚོགས་ཞུགས་པ་རྣམས་ལ་སུད་སི་ཡི་གཞི་རྩའི་རིན་ཐང་ནི་འགྲོ་བ་མིའི་ཐོབ་ཐང་ཡིན་པ་སོགས་དྲན་སྐུལ་བྱས་ཡོད་འདུག
ད་དུང་རྒྱ་ནག་གིས་བོད་དང་ཡུ་གུར། སོག་རིགས་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པའི་སྐྱོན་བརྗོད་འོག འདི་ལོའི་ཕྱི་ཟླ་ ༦ ཚེས་ ༢༣ ཉིན་རྒྱལ་སྤྱིའི་ཨོ་རྩལ་ཉིན་མོ་དང་བསྟུན། འཛམ་གླིང་གི་ཡུལ་ལུང་གང་སར་ཡོད་པའི་རྒྱ་གཞུང་ངོ་རྒོལ་ལས་འགུལ་ཁང་དང་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གི་གོ་སྒྲིག་འོག འཛམ་གླིང་གི་གྲོང་ཁྱེར་དང་ས་ཁུལ་གནད་ཆེན་ ༦༠ ལྷག་ནང་ངོ་རྒོལ་སྐད་འབོད་སོགས་ཀྱི་ལས་འགུལ་སྤེལ་བ་བརྒྱུད། འཛམ་གླིང་གི་མགོ་འཁྲིད་དང་། རྒྱལ་ཁབ་སོ་སོའི་ཨོ་རྩལ་ཚོགས་ཆུང་། དེ་བཞིན་ཨོ་ལིམ་ཕིག་རྩེད་འགྲན་གྱི་སྦྱིན་བདག་རྣམ་པ་བཅས་ཀྱིས། ཕྱི་ལོ་ ༢༠༢༢ ལོར་རྒྱ་ནག་གི་རྒྱལ་ས་པེ་ཅིན་དུ་འཚོག་གཏན་འཁེལ་བའི་དགུན་དུས་ཀྱི་ཨོ་རྩལ་འགྲན་བསྡུར་ནང་མཉམ་ཞུགས་མི་བྱ་རྒྱུའི་འབོད་སྐུལ་གནང་ཡོད།
འདི་ལོའི་ཕྱི་ཟླ་ ༡༠ ཚེས་ ༡༩ ཉིན་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་དཔལ་འབར་རྩིས་སྤྲོད་ཀྱི་ཉིན་མོ་དང་བསྟུན། བོད་དང་ཧོང་ཀོང་གི་གཞུང་འབྲེལ་མ་ཡིན་པའི་ཚོགས་པ་ལྔ་ཐུན་མོང་ནས་གྷི་རི་སིའི་གྲོང་ཁྱེར་ཨེ་ཐན་སིའི་ནང་དཔལ་འབར་རྩིས་སྤྲོད་ལ་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་ཏེ། རྒྱལ་སྤྱིའི་སྲིད་གཞུང་དང་། རྒྱལ་ཁབ་སོ་སོའི་ཨོ་ལིམ་ཕིག་གོ་སྒྲིག་ཚོགས་ཆུང་དང་། རྩེད་འགྲན་གྱི་སྦྱིན་བདག དེ་བཞིན་རྩེད་འགྲན་པ་རྣམས་ལ་པེ་ཅིན་གྱི་དགུན་དུས་ཨོ་རྩེད་ནས་ཕྱིར་འཐེན་བྱ་རྒྱུའི་རེ་སྐུལ་ཞུས་ཡོད་པ་དང་། དེ་བཞིན་གྱི་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་བསྟན་འཛིན་གཡང་འཛོམས་དང་ཡོ་རོབ་བོད་རིགས་གཞོན་ནུའི་མཐུན་ཚོགས་ཀྱི་ལས་འགུལ་བ་བསྟན་འཛིན་དགོན་པ་ལགས་གཉིས་ནས་ཨོ་རྩལ་དཔལ་འབར་རྩིས་སྤྲོད་ལ་ངོ་རྒོལ་བྱས་རྐྱེན་ས་གནས་ཉེན་རྟོག་པས་འཛིན་བཟུང་བྱས་པ་སོགས་བྱུང་ཡོད།
གསར་འགོད་པ། བསྟན་འཛིན་ཕུར་བུ།
