ལྷོ་ཨ་ཧྥི་རི་ཁ་ནས་མཆེད་པའི་ངོ་བོ་འགྱུར་བའི་ཏོག་དབྱིབས་གཉན་རིམས་གསར་པ་དེ་ནི་འགོས་ཁྱབ་མྱུར་ཞིང་འཛམ་གླིང་ཡོངས་ལ་ཁྱབ་ཉེན་ཁ་ཧ་ཅང་ཆེ་སྐོར་བསྒྲགས།
ཉེ་ལམ་ལྷོ་ཨ་ཧྥི་རི་ཁ་ནས་ངོ་བོ་འགྱུར་བའི་ཏོག་དབྱིབས་གཉན་རིམས་གསར་པ་ཞིག་བྱུང་བ་དང་འབྲེལ་ནས་བརྒྱུད་ལམ་ཁག་ཏུ་གནས་ཚུལ་འདྲ་མིན་ཐོན་ཡོད། དེ་རིང་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་གསར་དུ་བསྒྲགས་པའི་གནས་ཚུལ་ལྟར་ན། ཨོ་མེ་ཁོ་རོན་(Omicron)ཞེས་པའི་ནད་འབུ་དེ་ནི་ད་སྔ་བར་གྱི་ཏོག་དབྱིབས་ནད་འབུ་དག་ལས་འགོས་ཁྱབ་མྱུར་ཞིང་། ནད་གཞི་ཕོག་པའི་མི་རྣམས་ཧ་ཅང་ཐང་ཆད་པ་དང་འཛམ་གླིང་ནང་འགོས་ཁྱབ་ཀྱི་ཉེན་ཁ་ཧ་ཅང་ཆེ་བའི་ནད་འབུ་ཞིག་ཡིན་པར་ངོས་བཟུང་འདུག་ལ། ཉེ་ཤས་གོང་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་ནད་འབུ་དེར་ཞིབ་འཇུག་བྱས་རྗེས་མ་གཏོགས་ནད་འབུ་དེ་ཡི་ཉེན་ཁ་སོགས་ཀྱི་སྐོར་ཡོངས་བསྒྲགས་བྱ་རྒྱུ་མིན་སྐོར་བསྒྲགས་ཡོད་པ་ལྟར། དེ་རིང་གཞི་ནས་གསལ་བསྒྲགས་བཏང་བ་ཞིག་ཆགས་ཀྱི་ཡོད་པ་རེད།
ཨོ་མེ་ཁོ་རོན་ཞེས་པའི་ནད་འབུ་དེ་ནི། ཟླ་འདིའི་ཕྱི་ཚེས་ ༦ ཉིན་ཐོག་མར་ལྷོ་ཨ་ཧྥི་རི་ཁའི་རྒྱལ་ཁབ་བྷོ་སི་ཝ་ནཱ་ (Botswana) ནས་བྱུང་ཞིང་། དེ་ནི་ངོ་བོ་འགྱུར་བའི་ཏོག་དབྱིབས་གཉན་རིམས་ཀྱི་རིམ་པ་གསར་པ་ཞིག་ཡིན་པ་ཡོངས་གྲགས་ཆགས་པ་དང་། འཛམ་གླིང་འཕྲོད་བསྟེན་སྒྲིག་འཛུགས་ཀྱིས། ནད་འབུ་དེ་ཡི་མིང་ལ་ཨོ་མེ་ཁོ་རོན་ (Omicron) ཞེས་བཏགས་ཡོད། ད་ལྟ་འཛམ་གླིང་ནང་ཨོ་མེ་ཁོ་རོན་འགོས་ཁྱབ་བྱུང་བའི་ནད་པ་གྲངས་ ༡༦༠ ལྷག་ཡོད་པ་དང་། དེ་དག་ལས་ཕལ་ཆེ་བ་ལྷོ་ཨ་ཧྥི་རི་ཁའི་ནང་ཡིན་པ་རེད།
ཟླ་འདིའི་ཕྱི་ཚེས་ ༢༦ ཉིན་ནས་ཨོ་མེ་ཁོ་རོན་ཨ་ཧྥི་རི་ཁའི་རྒྱལ་ཁབ་ཁག་གཙོས་ཡུ་རོབ་དང་དབྱིན་ཇི། ཁེ་ན་ཌ་དང་ཨོ་གླིང་། ཧོང་ཀོང་སོགས་སུ་འགོས་ཁྱབ་ཀྱིས། འཛམ་གླིང་རྒྱལ་ཁབ་མང་པོས་ཉེ་ལམ་ཨ་ཧྥི་རི་ཁ་ནས་ཡོང་བའི་རང་ཁོངས་ཀྱི་མི་རྣམས་ལ་ཨོ་མེ་ཁོ་རོན་ནད་འབུ་འགོས་ཡོད་པའི་དོགས་གཞིའི་དམིགས་བསལ་བརྟག་དཔྱད་བྱེད་ཀྱི་ཡོད་པ་དང་། ད་ལྟ་འཛམ་གླིང་རྒྱལ་ཁབ་ ༧༠ ཙམ་ནས་ལྷོ་ཨ་ཧྥི་རི་ཁའི་རྒྱལ་ཁབ་ཁག་གི་མཁའ་ལམ་འགྲིམས་འགྲུལ་བཀག་སྡོམ་བྱས་ཡོད་པ་རེད། འོན་ཀྱང་། དེ་འབྲེལ་ཐད་ལྷོ་ཨ་ཧྥི་རི་ཁའི་སྲིད་འཛིན་ར་མཱ་ཧྥོ་སཱ་ (Cyril Ramaphosa) ལགས་ཀྱིས། ཚན་རིག་གི་ཐོག་ནས་འགྲིམས་འགྲུལ་བཀག་སྡོམ་གྱིས་ཨོ་མེ་ཁོ་རོན་འགོས་ཁྱབ་བཀག་འགོག་བྱེད་ཐུབ་པ་བརྗོད་མེད་པས། འཛམ་གླིང་རྒྱལ་ཁབ་ཁག་གིས་ཨ་ཧྥི་རི་ཁའི་མཁའ་ལམ་འགྲིམས་འགྲུལ་བཀག་སྡོམ་བྱས་པ་ནི་འདྲ་མཉམ་མེད་པ་དང་། ཨ་ཧྥི་རི་ཁའི་ཚོང་འབྲེལ་ལ་གནོད་ཤུགས་སྤྲོད་ཀྱི་ཡོད་པའི་སྐྱོན་བརྗོད་པ་རེད།
གཞན་ཡང་། ད་ལྟ་ཚན་རིག་པས་ཨོ་མེ་ཁོ་རོན་ནད་འབུ་གསར་བའི་སྐོར་ལ་རྒྱུས་ལོན་ཆ་ཚང་བ་ཞིག་བྱུང་མེད་སྟབས། འཛམ་གླིང་གི་ཚན་རིག་པ་མང་པོས། ཨོ་མེ་ཁོ་རོན་གྱིས་ད་ལྟ་ཡོད་པའི་ཏོག་དབྱིབས་འགོག་ཁབ་ནུས་མེད་དུ་གཏོང་ཐུབ་མིན་དང་། འགོས་ཁྱབ་ཀྱི་མྱུར་ཚད། ཉེན་ཁ་སོགས་ཀྱི་ཐད་ཞིབ་འཇུག་བྱེད་མུས་ཡིན་པ་རེད་ལ། ཨ་རིའི་ཏོག་དབྱིབས་འགོག་ཁབ་(Pfizer) བཟོ་སྐྲུན་ཁང་གིས། ཨོ་མེ་ཁོ་རོན་འགོས་ཁྱབ་ཐད་སེམས་འཚབ་བྱེད་དགོས་དོན་མེད། ང་ཚོས་འདས་པའི་ཟླ་འགའི་རིང་ཏོག་དབྱིབས་ཀྱི་ངོ་བོ་འགྱུར་ནད་རིགས་ཐོན་པར་གྲ་སྒྲིག་བྱས་ཡོད་པས། ད་ལྟ་ང་ཚོས་ངོ་བོ་འགྱུར་བའི་ནད་ཡམས་འདི་ལས་རྒྱལ་ཁ་ལེན་པར་གྲ་སྒྲིག་ཡོད། ཅེས་བརྗོད་ཡོད་པ་རེད།
སྤྱིར་འཛམ་གླིང་འཕྲོད་བསྟེན་སྒྲིག་འཛུགས་དང་ཨ་རི་སོགས་ཀྱི་ཆེད་མཁས་པ་ཚང་མས་མགྲིན་གཅིག་ཏུ། ནད་འབུ་གསར་རྙིང་གང་ཡིན་རུང་འགོག་ཁབ་རྒྱག་རྒྱུ་ནི་ནད་ཡམས་ཀྱི་དཀའ་ངལ་སེལ་བའི་ཐབས་མཆོག་དེ་ཡིན་པར་བསྒྲགས་འདུག་ལ། ད་ལྟ་ཨོ་མེ་ཁོ་རོན་མཆེད་སའི་ལྷོ་ཨ་ཧྥི་རི་ཁ་མཚོན་ན། མི་འབོར་ས་ཡ་ ༦༠ ལྷག་ཡོད་པ་དག་ལས། མི་གྲངས་ས་ཡ་ ༡༤ ལྷག་ལ་ཏོག་དབྱིབས་འགོག་ཁབ་བརྒྱབ་ཟིན་པ་དང་། ད་དུང་ཡང་རྒྱལ་ཁབ་ཀྱི་དཔལ་འབྱོར་སྟོབས་ཤུགས་དང་མི་དབྱིངས་ཀྱི་འཚོ་བ་ཞན་པོ་ཡིན་སྟབས། ད་ལྟ་ལྷོ་ཨ་ཧྥི་རི་ཁའི་གཞུང་ལ་འགོག་ཁབ་ཀྱི་རོགས་སྐྱོར་མཁོ་ཡི་ཡོད་པ་ལྟར། རྒྱ་གར་གཞུང་གིས། ཨོ་མེ་ཁོ་རོན་གྱིས་ཤུགས་རྐྱེན་ཐེབས་པའི་ཨ་ཧྥི་རི་ཁའི་རྒྱལ་ཁབ་ཁག་ལ་སྨན་གྱི་མཐུན་སྦྱོར་བྱ་རྒྱུ་ཡིན་པའི་ཁས་ལེན་བྱས་འདུག་ལ། ད་སྔ་བར་རྒྱ་གར་གཞུང་གིས་རང་ཁོངས་ནས་ཐོན་པའི་ཏོག་དབྱིབས་འགོག་ཁབ་ས་ཡ་ ༢༥ ལྷག་ཨ་ཧྥི་རི་ཁའི་རྒྱལ་ཁབ་གྲངས་ ༤༡ ལ་རོགས་སྐྱོར་གྱི་ཚུལ་དུ་མཁོ་སྤྲོད་བྱས་ཡོད་འདུག
EMMANUEL CROSET/AFP via Getty Images
ཡང་ད་ལྟ་འཛམ་གླིང་རྒྱལ་ཁབ་ཚང་མས་ཨ་ཧྥི་རི་ཁའི་རྒྱལ་ཁབ་ཁག་ནས་ཡོང་བའི་རང་ཁོངས་ཀྱི་མི་རྣམས་ལ་དམིགས་བསལ་བརྟག་དཔྱད་དང་མཁའ་ལམ་འགྲིམས་འགྲུལ་བཀག་སྡོམ་བྱེད་བཞིན་པའི་སྐབས་འདིར། དེ་རིང་ཨ་རིའི་སྲིད་འཛིན་བྷའེ་ཌན་མཆོག་གིས། ངོ་བོ་འགྱུར་བའི་ཨོ་མེ་ཁོ་རོན་ནད་འབུའི་ཛ་དྲག་གནས་སྟངས་འོག ཨ་རིའི་མི་མང་གིས་འགོག་ཁབ་དུས་ཐོག་བརྒྱབ་པ་དང་ཁ་རས་སོགས་ཉིན་རེའི་བྱེད་སྒོ་འཆུག་མེད་ལག་ལེན་བྱས་ཚེ། ཨ་རིའི་ནང་ཁྱིམ་སྡོད་བཀའ་རྒྱའི་གདོང་ལེན་གསར་པ་ཞིག་གནང་མི་དགོས་པའི་འགྲེལ་བརྗོད་བྱས་འདུག
འཛམ་གླིང་འཕྲོད་བསྟེན་སྒྲིག་འཛུགས་ཀྱི་གནས་ཚུལ་ལྟར་ན། ད་ལྟའི་བར་འཛམ་གླིང་ནང་ཏོག་དབྱིབས་གཉན་རིམས་འགོས་ཁྱབ་བྱུང་བའི་ནད་པ་ས་ཡ་ ༢༦༠ ལྷག་དང་། དེའི་ཁྲོད་རྐྱེན་འདས་སུ་ཕྱིན་པའི་མི་ས་ཡ་ ༥ ལྷག་ཡོད་པ་རེད་ལ། འཛམ་གླིང་ཁྱོན་ཡོངས་སུ་མི་གྲངས་ཐེར་འབུམ་ ༤།༢༧ ལྷག་ལ་ཏོག་དབྱིབས་འགོག་ཁབ་བརྒྱབ་ཟིན་པ་དང་དེ་ནི་འཛམ་གླིང་གི་མི་འབོར་གྱི་བརྒྱ་ཆ་ ༥༥ ཙམ་ཡིན་སྟབས། ད་དུང་འཛམ་གླིང་མི་མང་བརྒྱ་ཆ་ ༤༥ ཙམ་ལ་ཏོག་དབྱིབས་འགོག་ཁབ་རག་མེད་པ་རེད།
གསར་འགོད་པ། སྐལ་བཟང་སྦྱིན་པ།
