Barbados’ first president Sandra Mason, stands after being sworn in at midnight [Jeff J Mitchell/Getty Images via AFP]ཁ་སང་ཕྱི་ཚེས་ ༣༠ ཉིན་གྱི་མཚན་གུང་ཆུ་ཚོད་ ༡༢ སྟེང་འདས་པའི་ལོ་ངོ་ ༤༠༠ ཙམ་རིང་ལ་དབྱིན་ཇིའི་དབང་བསྒྱུར་འོག་ཚུད་པའི་བྱང་ཨ་མེ་རི་ཁའི་ཁེ་རི་བྷི་ཡན་རྒྱ་མཚོའི་(Caribbean) གླིང་ཕྲན་རྒྱལ་ཁབ་བྷར་བྷེ་ཌོ་སི་ (Barbedos)ཡིས་གཞུང་འབྲེལ་ཐོག་དབྱིན་ཇིའི་རྒྱལ་མོ་ཨེ་ལི་ཛེ་བྷེ་ཐི་གཉིས་པའི་(Queen Elizabeth II) དབང་བསྒྱུར་ཡོངས་སུ་མཇུག་བསྒྲིལ་ཏེ། རྒྱལ་ཁབ་ཀྱི་སྲིད་འཛིན་གསར་པ་བསྐོ་གཞག་གིས་འཛམ་གླིང་གི་སྤྱི་མཐུན་རྒྱལ་ཁབ་གསར་ཤོས་དེར་གྱུར་ཡོད་པ་རེད།
Celebrations in the lead up to Barbados becoming a republic and severing ties with the British monarch [Jeff J Mitchell/Getty Images via AFP]མི་འབོར་འབུམ་ ༣ ལས་མེད་པའི་མཚོ་གླིང་རྒྱལ་ཕྲན་བྷར་བྷེ་ཌོ་སི་ཡིས་འདི་ལོའི་ཕྱི་ཟླ་ ༩ པའི་ནང་དབྱིན་ཇིའི་རྒྱལ་མོ་ཨེ་ལི་ཛེ་བྷེ་ཐི་རྒྱལ་ཁབ་དེའི་དབུ་འཛིན་གྱི་གོ་གནས་ནས་འཕོ་འགྱུར་བཏང་སྟེ། བྷར་བྷེ་ཌོ་སི་རང་གི་མི་ཞིག་སྲིད་འཛིན་དུ་བསྐོ་གཞག་བྱ་རྒྱུའི་གསལ་བསྒྲགས་བྱས་ཡོད་པ་རེད། དབྱིན་ཇིའི་དབང་བསྒྱུར་འོག་ཏུ་ཡོད་པའི་ཁེ་རི་བྷིན་རྒྱ་མཚོའི་ཁུལ་གྱི་གླིང་ཕྲན་རྒྱལ་ཁབ་ཁྲོད་ནས། ཕྱི་ལོ་ ༡༩༦༦ ལོར་རང་བཙན་ཐོབ་པའི་རྒྱལ་ཁབ་གྷུ་ཡ་ན་(Guyana) དེ་ཉིད་ཕྱི་ལོ་ ༡༩༧༠ ལོར་སྤྱི་མཐུན་རྒྱལ་ཁབ་ཏུ་གྱུར་ཡོད་པ་དང་། དེ་བཞིན་རྒྱལ་ཕྲན་ཊི་རི་ནི་ཌེཌ་(Trinidad) དང་ཊོ་བྷ་གོ་ (Tobago) གཉིས་ཀྱང་ཕྱི་ལོ་ ༡༩༦༢ ལོར་རང་བཙན་ཐོབ་སྟེ་ཕྱི་ལོ་ ༡༩༧༦ ལོར་སྤྱི་མཐུན་རྒྱལ་ཁབ་ཏུ་གསལ་བསྒྲབས་བྱས་ཡོད་པ་རེད། གཞན་ཡང་ཕྱི་ལོ་ ༡༩༧༨ ལོར་ཁུལ་དེའི་རྒྱལ་ཕྲན་ཌོ་མི་ནི་ཁ་ (Dominica) དེ་དབྱིན་ཇི་ནས་སྤྱི་མཐུན་རྒྱལ་ཁབ་ཀྱི་ངོ་བོའི་ཐོག་ནས་རང་བཙན་ཐོབ་པ་རེད། འོན་ཀྱང་ད་ལྟའི་ཆར་ཨོ་གླིང་དང་། ཁེ་ན་ཌ། ཇེ་མེ་ཁ་ (Jamaica)། ནེའུ་ཛི་ལེན་ཌི། པ་པུ་ཝ་ནེའུ་གྷེ་ནི་ (Papua New Guinea) སོགས་ཀྱིས་མུ་མཐུད་ནས་དབྱིན་ཇིའི་རྒྱལ་མོ་ཨེ་ལི་ཛེ་བྷེ་ཐི་སོ་སོའི་རྒྱལ་ཁབ་ཀྱི་དབུ་འཛིན་དུ་འདོད་ཀྱི་ཡོད་པ་རེད། ད་ལན་བྷར་བྷེ་ཌོ་སི་དབྱིན་ཇིའི་དབང་བསྒྱུར་ནས་ཡོངས་སུ་ཐོན་ཟིན་ནའང་། ཕལ་ཆེ་བ་དབྱིན་ཇིའི་དབང་བསྒྱུར་འོག་ཚུད་མྱོང་བའི་འཛམ་གླིང་གི་རྒྱལ་ཁབ་ ༥༤ ལས་གྲུབ་པའི་ལྷན་ཚོགས་(Commonwealth of Nations)ནང་མུ་མཐུད་ཞུགས་རྒྱུ་ཡིན་པ་རེད།
