ད་ལྟའི་ཆར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཐོ་འགོད་ནང་གཉན་ནད་རེག་དུག་གི་ནད་པ་གྲངས་ ༥༣ ཡོད་པ་རྣམས་ལ་ལྟ་སྐྱོང་མཐུན་འགྱུར་གང་ལེགས་གནང་མུས་ཡིན་ལ་སྤྱི་ཚོགས་ཀྱིས་ཀྱང་ཁོང་ཚོར་བྱམས་བརྩེའི་སྒོ་ནས་རྒྱབ་སྐྱོར་གནང་དགོས་པའི་འབོད་སྐུལ་གནང་།
དེ་རིང་རྒྱལ་སྤྱིའི་གཉན་ནད་རེག་དུག་གི་ཉིན་མོ་དང་བསྟུན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། སྨན་རྩིས་ཁང་། བདེ་ལེགས་སྨན་ཁང་། རྡ་ས་ས་གནས་བུད་མེད་ལྷན་ཚོགས། ཀུན་ཕན་ནད་གསོ་ཁང་བཅས་མཉམ་རུབ་ཀྱི་ཐོག་ནས་རྒྱལ་སྤྱིའི་གཉན་ནད་རེག་དུག་གི་ཉིན་མོ་སྲུང་གཙི་བྱས་པ་དང་འབྲེལ། འཕྲེད་དར་སོགས་འཕྱར་ནས་རྡ་སའི་ཁྲོམ་གཞུང་དུ་གོམ་བགྲོད་བྱས་པ་དང་། མི་མང་ལ་ཡིག་ཆ་སོགས་འགྲེམ་སྤེལ་བྱས་ཏེ། གཉན་ནད་རེག་དུག་ཁྱབ་གདལ་སོགས་མི་འགྲོ་སླད། ཚང་མས་སོ་སོའི་འཕྲོད་བསྟེན་དང་བདེ་ཐང་སོགས་ལ་ཡིད་འཇོག་བྱེད་དགོས་པའི་རེ་སྐུལ་བྱས་སོང་།
བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཡོངས་ཁྱབ་གསལ་བསྒྲགས་ནང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་འཕྲོད་བསྟེན་སྔོན་འགོག་ཐབས་ལམ་དང་ནད་གཞི་ཕོག་པའི་ནད་པ་རྣམས་ལ་དགོས་གལ་སྨན་བཅོས་ཀྱི་མཐུན་འགྱུར་སོགས་བསྐྲུན་བཞིན་ཡོད་པས། ད་ལྟའི་ཆར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཐོ་འགོད་ནང་ནད་པ་གྲངས་ ༥༣ ཡོད་པ་དང་ཁོང་རྣམས་ལ་ལྟ་སྐྱོང་དང་མཐུན་འགྱུར་ཞུ་མུས་ཡོད། འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་ཆེ་ཁག་ནང་གཉན་ནད་རེག་དུག་ནད་འབུ་ཡོད་མེད་བརྟག་དཔྱད་བྱེད་རྒྱུའི་མཐུན་འགྱུར་ཡོད་པ་དང་། སྨན་ཁང་གི་སྨན་ཞབས་པ་རྣམས་ལ་ནད་གཞི་དང་འབྲེལ་བའི་སློབ་སྟོན་གནང་ཕྱོགས་ཐད་ཟབ་སྦྱོང་ཐེངས་མང་ཕུལ་ཡོད་པས་མང་ཚོགས་ནས་དེ་དོན་ཆ་ཤས་བཞེས་ལེན་ཐུབ་པ་དགོས་པ་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་ཁྱབ་ཁོངས་སྨན་ཁང་བརྒྱུད་ནད་པར་དབྱེར་མེད་ཐོག་ལྟ་རྟོག་དང་རོགས་རམ་ཞུ་བཞིན་ཡོད་ནའང་། སྤྱི་ཚོགས་ནང་ནད་པར་ལྟ་སྟངས་དང་སྤྱོད་ཚུལ་དབྱེ་འབྱེད་བྱེད་སྐབས་ཡིད་གཟབ་དང་དོགས་གཟོན་ངེས་པར་དུ་གནང་དགོས་པ་དང་། དེ་རིང་རྒྱལ་སྤྱིའི་གཉན་ནད་རེག་དུག་ཉིན་མོར་མང་ཚོགས་ནང་གཉན་ནད་རེག་དུག་གི་ནད་གཞིར་གོ་རྟོགས་ཡོད་པའི་ཐོག་སྔོན་འགོག་ཐུབ་ཐབས་དང་། ནད་པར་བྱམས་བརྩེའི་སྒོ་ནས་རྒྱབ་སྐྱོར་གནང་དགོས་པའི་འབོད་སྐུལ་ཞུ་ཡི་ཡོད་སྐོར་སོགས་བཀོད་འདུག
འདི་གའི་གསར་འགོད་པས་ཀུན་ཕན་ནད་གསོ་ཁང་གི་འགན་འཛིན་སྤྱི་འཐུས་ཟླ་བ་ཚེ་རིང་ལགས་སུ་གཉན་ནད་རེག་དུག་སོགས་ཀྱི་ནད་གཞིར་བོད་མིའི་སྒྲིག་འཛུགས་དང་། ཀུན་ཕན་ནད་གསོ་ཁང་སོགས་ནས་གོ་རྟོགས་སྤེལ་མུས་ཡིན་པ་ལྟར། ལས་འགུལ་དེ་ཡིས་སྤྱི་ཚོགས་ནང་ཤུགས་རྐྱེན་ཅི་ཙམ་ཡོང་ཐུབ་ཀྱི་ཡོད་སོགས་དྲིས་པར་ཁོང་གིས། ལས་འགུལ་དེ་དག་གིས་མི་མང་གི་ཁྲོད་དུ་ཤུགས་རྐྱེན་བརྒྱ་ཆ་བརྒྱ་ཐམ་པ་སྤྲད་ཐུབ་ཀྱི་རེད་བསམ་གྱི་ཡོད། རྒྱུ་མཚན་གང་ཡིན་ཟེར་ན། སྔོན་མ་ས་གནས་མགོ་འཛིན་བྱེད་སྐབས་ཁོར་ཡུག་གི་སྐོར་ལ་གོ་རྟོགས་སྤེལ་ནས་མི་མང་ལ་གོ་རྟོགས་ཡག་པོ་བྱུང་ཡོད་པས། ད་ལན་གྱི་ལས་འགུལ་སྤེལ་སྟངས་གཅིག་པ་གཅིག་རྐྱང་བྱས་ནས་སྤེལ་བ་ཡིན། ནད་ཡམས་རྐྱེན་གྱིས་ལོ་གཉིས་ཙམ་ལས་འགུལ་སྤེལ་ཐུབ་མ་སོང་། ཞེས་དང་། ཕྱི་ལོ་ ༢༠༡༢ ལོར་ཀུན་ཕན་གྱི་འགན་བླངས་པ་ནས་བཟུང་ལོ་ལྟར་གཉན་ནད་རེག་དུག་དང་། མྱོས་རྫས་སོགས་རྒྱལ་སྤྱིའི་དུས་དྲན་དེ་དག་ལ་ལས་འགུལ་སྤེལ་བར་བརྟེན། མི་མང་ལ་ཕན་ཐོགས་བརྒྱ་ཆ་བརྒྱ་ཡོད་མེད་བཤད་ཁག་པོ་ཡིན་ཡང་། མུ་མཐུད་ནས་ལས་འགུལ་སྤེལ་ན། མི་མང་ལ་ཕན་ཐོགས་ཡོད་པ་དང་མང་ཚོགས་ཀྱིས་ཀྱང་མཉམ་རུབ་བྱས་ཚེ་ཕན་འབྲས་ཆེན་པོ་ཡོད་སྐོར་སོགས་གསུངས་བྱུང་།
དེ་བཞིན་རྡ་ས་མེག་གྷན་ཁྲོམ་གཞུང་གི་བཞི་མདོ་རུ། ཀུན་ཕན་ནད་གསོ་ཁང་གི་སློབ་ཕྲུག་དང་ལས་བྱེད་ཁག་ཅིག་གིས། རྒྱུན་ལྡན་གྱི་འཚོ་བའི་ནང་འབྱུང་མུས་ཡིན་པའི་གནད་དོན་ལ་གཞི་བཞག་སྟེ། གཉན་ནད་རེག་དུག་ཇི་ལྟར་འགོས་ཁྱབ་བྱུང་གི་ཡོད་མེད་དང་འབྲེལ་བའི་གཏམ་བརྗོད་ཅིག་འཁྲབ་པ་བརྒྱུད། མི་མང་གིས་གཉན་ནད་སོགས་ལས་རང་སྲུང་བྱེད་ཆེད་དུ་སྨན་ཁབ་དང་། སྨ་ར་བྲེག་བྱེད་སོགས་གཡར་རེས་བྱེད་མི་ཉན་པ་དང་། འཁྲིག་སྤྱོད་སོགས་བྱེད་སྐབས་ངེས་པར་དུ་སྲུང་ཤུབ་གྱོན་པ་གཏམ་བརྗོད་ཀྱི་ལམ་ནས་གསལ་སྟོན་བྱས་སོང་ལ། རྡ་ས་ཁུལ་གྱི་མི་མང་རྣམས་ལ་གཉན་ནད་དང་། གཅིན་སྙི། ཁྲག་ཤེད་ཀྱི་ནད་སོགས་རིན་མེད་ཀྱི་ཐོག་ནས་བརྟག་དཔྱད་དང་། རིན་མེད་ཀྱི་ཐོག་ནས་ཁ་རས་དང་། སྲུང་ཤུབ། གཉན་ནད་དང་འབྲེལ་བའི་ཡིག་ཆ་སོགས་བགོ་འགྲེམ་བྱས་སོང་ལ། དེ་རིང་གི་ལས་འགུལ་དེ་བརྒྱུད་མེག་གྷན་དང་ནོར་གླིང་། གངས་སྐྱིད་སོགས་སུ་ཡོད་པའི་མི་མང་རྣམས་ལ་གཉན་ནད་རེག་དུག་གི་སྐོར་ལ་གོ་རྟོགས་སྤེལ་སོང་།
གསར་འགོད་པ། དཔལ་ལྡན།
