རྒྱ་ནག་གཞུང་གིས་ཕྱི་ལོ་ ༢༠༢༥ ལོར་རྒྱལ་ཡོངས་ཀྱི་རྒྱའི་སྐད་ཡིག་ཁྱབ་ཚད་བརྒྱ་ཆ་ ༨༥ ལོན་པ་དང་ཕྱི་ལོ་ ༢༠༣༥ ལོར་རྒྱའི་སྐད་ཡིག་རྒྱལ་ཡོངས་ཀྱི་མི་མང་གི་སྲོག་ཤིང་ལྟ་བུར་བསྒྱུར་རྩིས་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་རྒྱ་ནག་ཤེས་རིག་ལྷན་ཁང་གིས་སྤྱི་ཡོངས་ནས་དུས་རབས་གསར་བའི་སྐད་ཡིག་ལས་དོན་གྱི་བསམ་འཆར་ཟེར་བའི་སྲིད་ཇུས་ཤིག་ཡོངས་ཁྱབ་གསལ་བསྒྲགས་བྱས་ཏེ། ཕྱི་ལོ་ ༢༠༢༥ ལོར་རྒྱའི་སྤྱི་སྐད་ཁྱབ་ཚད་རྒྱལ་ཡོངས་ཀྱི་བརྒྱ་ཆ་ ༨༥ ཟིན་དགོས་ཡོད་སྐོར་བསྒྲགས་འདུག་པ་དང་། དེ་ནི་རྒྱ་ནག་ནང་གི་གྲངས་ཉུང་མི་རིགས་གཞན་གྱི་སྐད་ཡིག་ལ་ཆགས་འཇུག་གི་དྲག་གནོན་འཕར་མ་ཞིག་ཆགས་ཀྱི་ཡོད་འདུག
འདི་ལོའི་ཕྱི་ཟླ་ ༩ པའི་ནང་སྟོན་ཁའི་སློབ་མགོ་ཚུགས་པ་དང་བསྟུན། རྒྱ་ནག་རྒྱལ་ཡོངས་ཀྱི་སློབ་གྲྭ་ཁག་ཏུ་སྤྱི་སྐད་ཅེས་རྒྱའི་སྐད་ཡིག་ཁོ་ན་སློབ་འཁྲིད་དགོས་པའི་སྲིད་ཇུས་ལག་བསྟར་བྱས་ཡོད་པ་ལྟར། ཕྱི་ལོ་ ༢༠༢༥ བར་རྒྱ་ནག་རྒྱལ་ཡོངས་ཀྱི་རྒྱའི་སྐད་ཡིག་བཀོལ་སྤྱོད་ཀྱི་ཁྱབ་ཚད་བརྒྱ་ཆ་ ༨༥ ཟིན་དགོས་ཟེར་བ་ནི་རྒྱའི་སྐད་ཡིག་སློབ་ཁྲིད་ཀྱི་སྲིད་ཇུས་ལ་ཚ་འདེད་བྱས་པ་ཞིག་ཆགས་ཀྱི་ཡོད་པ་དང་། དམིགས་བསལ་དེ་རིང་བསྒྲགས་པའི་རྒྱ་ནག་ཤེས་རིག་ལྷན་ཁང་གི་གནས་ཚུལ་ནང་། གྲངས་ཉུང་མི་རིགས་ཀྱི་ས་ཁུལ་དུ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཕྱི་ལོ་ ༢༠༢༥ བར་རྒྱའི་སྐད་ཡིག་གི་ཁྱབ་ཚད་བརྒྱ་ཆ་ ༨༥ ལོན་པ་བྱས་ཏེ། སྤྱི་སྐད་ཀྱི་ཡ་སྙིང་རྟོགས་པ་དང་རྒྱའི་སྐད་ཡིག་གཞིར་བཞག་པའི་གཅིག་གྱུར་ཞེས་པ་ཡོང་ཐུབ་ཐབས་བྱ་དགོས་སྐོར་བརྗོད་འདུག
རྒྱ་ནག་གཞུང་འབྲེལ་གྱི་གནས་ཚུལ་ནང་། སློབ་གྲྭ་ནི་སྐད་ཡིག་སློབ་གསོ་འདིང་སའི་གཞི་རྟེན་ཡིན་པར་བརྟེན། རྒྱ་ནག་རྒྱལ་ཡོངས་ཀྱི་སློབ་གྲྭ་ཁག་ཏུ་རྒྱའི་སྐད་ཡིག་སློབ་ཁྲིད་ཀྱི་ཁྲིམས་མཐུན་ཐབས་ལམ་དོན་འཁྱོལ་དང་སྐད་ཡིག་གི་བྱུང་བ་དང་ཉམས་ཞིབ། མཐུན་སྦྱོར་སོགས་གོང་མཐོར་བཏང་སྟེ། དུས་སྐབས་གསར་བའི་རྒྱའི་སྐད་ཡིག་བཀོལ་སྤྱོད་ཀྱི་ཚད་གཞི་འདང་ངེས་ལོན་པར་བྱ་དགོས་པ་དང་། བརྒྱུད་ལམ་ཁག་དང་མི་སྒེར་གྱི་དྲ་བའི་སྟེང་དྲག་པོ་དང་མ་རབས་ཐ་ཤལ་གྱི་རྒྱའི་སྐད་ཡིག་བཀོལ་སྤྱོད་ལ་རྡུང་རྡེག་ཚ་གཏོང་བྱས་ཏེ། ངེས་པར་དུ་དྲ་རྒྱའི་སྟེང་སྐད་ཡིག་བཀོལ་སྤྱོད་ཀྱི་ཁོར་ཡུག་ཚུལ་མཐུན་བསྐྲུན་དགོས་སྐོར་སོགས་བརྗོད་འདུག
དམིགས་བསལ་གྲོང་གསེབ་ཁག་དང་གྲངས་ཉུང་མི་རིགས་ཀྱི་ས་ཁུལ་དང་འབྲེལ་ནས། རྒྱའི་སྐད་ཡིག་སློབ་ཁྲིད་དང་རྒྱ་སྐྱེད་ཀྱི་སྲིད་ཇུས་ལྟེ་བར་བཟུང་སྟེ། མི་འབོར་མང་སའི་ས་ཁུལ་དུ་རྒྱའི་སྐད་ཡིག་དར་སྤེལ་གྱི་ལས་དོན་སྤེལ་རྒྱུ་གཙུགས་སུ་འཛིན་དགོས་པ་དང་། སྤྱི་ཡོངས་ནས་རིམ་པས་རྒྱའི་སྐད་ཡིག་བཀོལ་སྤྱོད་ཀྱི་གནས་ཚད་དར་སྤེལ་དུ་གཏོང་དགོས་པ། ད་དུང་རྒྱལ་སྤྱིའི་གནས་བབ་དང་འབྲེལ་ནས། རྒྱལ་སྤྱིའི་ཚོགས་སྡེ་ཁག་གི་ནང་དུ་རྒྱའི་སྐད་ཡིག་བཀོལ་སྤྱོད་དར་སྤེལ་གཏོང་བ་དང་། སློབ་གསོ་དང་ཚན་རིག་གི་གྲུབ་དོན་སོགས་སུ་རྒྱའི་སྐད་ཡིག་སྙོབ་དགོས་པ་མ་ཟད། རྒྱལ་སྤྱིའི་ནང་མཉམ་འབྲེལ་དང་མཉམ་ལས་ཀྱི་ཐོག་ནས་རྒྱའི་སྐད་ཡིག་བཀོལ་སྤྱོད་ཀྱི་ཁོར་ཡུག་བསྐྲུན་པར་འབད་པ་བྱ་དགོས་ཡང་བརྗོད་འདུག
ད་རེས་སྤྱི་སྐད་དམ་རྒྱའི་སྐད་ཡིག་ཁྱབ་ཚད་ཀྱི་ཡོངས་ཁྱབ་བཀའ་དེ། སྔར་དང་མི་འདྲ་བ་ཞིག་ནི་དུས་སྐབས་གསར་པ་ཞེས་བེད་སྤྱོད་གང་མང་བཏང་འདུག་ལ། དོན་དུ་ཞི་ཅིན་ཕིན་གྱི་དུས་སྐབས་གསར་བའི་དགོངས་པ་དང་མཐུན་དགོས་ཟེར་བར་གོ་དགོས་པར་བསྟན་ཡོད། གཞན་ཉེ་ལམ་རྒྱ་ནག་ཤེས་རིག་ལྷན་ཁང་ནས་བསྒྲགས་པ་ནང་ལྟར། ༼ལག་བསྟར་ནས་མགོ་རྩོམ་པ་དང་རྒྱ་སྐྱེད་ལ་དམིགས་པ། ཕྱོགས་ཡོངས་ནས་དར་སྤེལ་དང་སྲ་བརྟན། འཕེལ་རྒྱས་༽ཞེས་པའི་སློབ་གསོའི་ཐབས་ལམ་དང་༼སྤྱི་ལ་ཁྱབ་པ་དང་གཅིག་གྱུར་ཡོང་བ། འཕེལ་རྒྱས་སུ་གཏོང་བ་༽བཅས་ཀྱི་རྒྱའི་སྐད་ཡིག་ཁྱབ་གདལ་གྱི་སྲིད་ཇུས་གཞིར་བཞག་སྟེ། ལྔ་ཚན་གསུམ་ལས་ཕྱི་ལོ་ ༢༠༢༥ ལོར་རྒྱ་ནག་རྒྱལ་ཡོངས་ཀྱི་སྐད་ཡིག་གི་ཁྱབ་ཚད་བརྒྱ་ཆ་ ༨༥ ཟིན་དགོས་པ་དང་། ཕྱི་ལོ་ ༢༠༣༥ ལོར་རྒྱའི་སྐད་ཡིག་རྒྱ་ནག་རྒྱལ་ཡོངས་ཀྱི་མི་མང་གི་སྲོག་ཤིང་ལྟ་བུར་བསྒྱུར་རྩིས་ཡོད་འདུག
འདི་ལོའི་ཕྱི་ཟླ་ ༩ པ་ནས་བཟུང་རྒྱ་ནག་གཞུང་གིས་རྒྱའི་སྐད་ཡིག་སློབ་ཁྲིད་ཀྱི་སྲིད་ཇུས་ལག་བསྟར་བྱས་པ་ནས། ད་བར་བོད་ནང་གི་སེང་འབྲུག་སྟག་རྩེ་སློབ་གྲྭ་གཙོས་པའི་མགོ་ལོག་ཁུལ་གྱི་སློབ་གྲྭ་ ༦ དང་། བྲག་མགོ་དགེ་ལྡན་ནང་བསྟན་སློབ་གྲྭ་སོགས་གཏན་དུ་སྒོ་བརྒྱབ་པ་མ་ཟད། ད་དུང་ཡང་བོད་ནང་གི་སློབ་གྲྭ་ཁག་ཅིག་སྒོ་རྒྱག་དགོས་ཟེར་ནས་བཀའ་བཏང་ཡོད་པའི་གནས་ཚུལ་གོ་རྒྱུ་འདུག
གསར་འགོད་པ། སྐལ་བཟང་སྦྱིན་པ།
