རྒྱ་གར་དང་བལ་ཡུལ་ནང་གནས་སྡོད་བཙན་བྱོལ་བོད་མིའི་ཁྲོད་འདས་པའི་བདུན་ཕྲག་གཅིག་ནང་བོད་མི་ ༣༩ ལ་ཏོག་དབྱིབས་གཉན་རིམས་འགོས་ཡོད་པ་དང་བོད་མི་ ༣ འདས་གྲོངས་སུ་ཕྱིན་ཡོད་འདུག
བདུན་རེའི་རེས་གཟའ་ཕུར་བུ་འཆར་ཅན་དུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས། བོད་མིའི་སྤྱི་ཚོགས་ཁྲོད་ཀྱི་ཏོག་དབྱིབས་ནད་པའི་གནས་སྟངས་སྐོར་དྲ་ལམ་ཐད་གཏོང་བརྒྱུད་གསལ་བསྒྲགས་གནང་གི་ཡོད་པ་ལྟར། དེ་རིང་ཉིན་རྒྱབ་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༨༨ སྤེལ་སྐབས། འདས་པའི་བདུན་ཕྲག་གཅིག་རིང་རྒྱ་གར་ནང་གི་ས་གནས་ ༨ དང་བལ་ཡུལ་གྱི་ས་གནས་གྲངས་ ༡ ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༣༢ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༨༩ བཅས་ཁྱོན་བསྡོམས་ཟུར་བཀག་ཏུ་སྡོད་མཁན་མི་གྲངས་ ༡༢༡ ཡོད་པ་དང་། འདས་པའི་བདུན་ཕྲག་ནང་མི་གྲངས་ ༣༩ ལ་ཏོག་དབྱིབས་རིམས་ནད་འགོས་ཡོད་པ་དང་མི་གསུམ་འདས་གྲོངས་སུ་ཕྱིན་ཡོད་འདུག
འཕྲོད་བསྟེན་ལས་ཁུངས་ཀྱི་ལས་བྱེད་བསྟན་འཛིན་ཀུན་བཟང་ལགས་ཀྱིས། ཉེ་ཆར་ཏོག་དབྱིབས་རིམས་ནད་ཀྱི་ངོ་བོ་གྱུར་ཡོད་སྟབས། ནད་ཡམས་ཁྱབ་གདལ་འགྲོ་ཉེན་ཆེ་བས། རྒྱ་གར་གྱི་ཕྱི་ལོག་ནས་ཕེབས་པའི་བོད་མི་རྣམས་དང་། དགུན་ཚོང་ནས་ཕྱིར་གཞིས་ཆགས་སུ་ལོག་མཁན་རྣམས་ཀྱིས། ཏོག་དབྱིབས་རིམས་ནད་འགོས་ཡོད་མེད་བརྟག་དཔྱད་བྱ་རྒྱུ་དང་། ས་གནས་ཁག་ཏུ་ཟུར་བཀག་ཏུ་སྡོད་དགོས་པ་དང་། ཐོན་ལ་ཉེ་བའི་ཕྱི་ལུགས་དང་ཡི་ཤུའི་ལོ་སར་སོགས་སུ་མི་མང་འདུ་འཛི་ཆེ་བའི་ས་གནས་ཁག་ལ་མི་འགྲོ་བ་དང་། ཚང་མས་ཁ་རས་སོགས་ཏག་ཏག་གྱོན་དགོས་པའི་འབོད་སྐུལ་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། རྒྱ་གར་ནང་དུ་ལོ་བཅོ་བརྒྱད་མན་གྱི་བྱིས་པ་རྣམས་ལ་སྔོན་འགོག་སྨན་ཁབ་བརྒྱག་རྒྱུའི་གྲ་སྒྲིག་བྱེད་ཀྱི་ཡོད་སྟབས། བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ཚོགས་ཆུང་གིས་སློབ་གྲྭ་ཁག་གི་སྨན་ཞབས་པ་དང་། སློབ་གྲྭའི་དབུ་འཛིན། དེ་བཞིན་དགོན་སྡེ་ཁག་ལ་འབྲེལ་བ་བྱས་ཏེ། བྱིས་པ་རྣམས་ཀྱི་མིང་ཐོ་འགོད་དགོས་པའི་ལམ་སྟོན་སོགས་གནང་ཡོད་པ་དང་། ཉེ་ཆར་ཏོག་དབྱིབས་གཉན་སྲིན་གྱི་རྣམ་པ་གྱུར་ནས་འགོས་ཁྱབ་སོགས་མྱུར་བ་ཡོད་པས། མི་མང་གི་སེམས་སུ་དངངས་འཚབ་ཆེན་པོ་ཡོད་ཀྱང་། གཙོ་བོ་རང་རང་གི་འཕྲོད་བསྟེན་ལ་དོ་སྣང་བྱ་རྒྱུ་དང་། ཁ་སང་འཛམ་གླིང་གཉན་ནད་རེག་དུག་གི་ཉིན་མོ་སྲུང་གཙི་བྱས་པ་དང་འབྲེལ། བོད་མི་རྣམས་ཀྱི་གཉན་ནད་སོགས་མི་འགོས་སླད། སོ་སོས་བརྟག་དཔྱད་དང་དོགས་གཟོན་བྱ་དགོས་པའི་ལམ་སྟོན་སོགས་གནང་སོང་།
དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། ཉེ་ཆར་ཏོག་དབྱིབས་གཉན་རིམས་གཉན་སྲིན་གྱི་ངོ་བོ་གྱུར་ཡོད་ཀྱང་། རྒྱལ་སྤྱིའི་ཚན་རིག་པ་རྣམས་ཀྱིས་གཉན་སྲིན་དེར་ཞིབ་འཇུག་བྱེད་མུས་ཡིན་ཀྱང་། དེའི་སྨན་བཅོས་བྱེད་ཐབས་ནི་གཅིག་པ་ཡིན་པས། ཚང་མས་གཟབ་ནན་གྱིས་སྔོན་འགོག་སྨན་ཁབ་དུས་ཐོག་ཏུ་བརྒྱག་རྒྱུ་དང་། ནད་ཡམས་སྔོན་འགོག་བྱ་དགོས་པའི་ལམ་སྟོན་སོགས་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་ ༦༩༣༥ བྱུང་བའི་ཁྲོད་དྲག་སྐྱེད་ཟིན་པ་ ༦༧༡༤ དང་། རྐྱེན་འདས་སུ་ཕྱིན་པ་ ༡༦༢ ། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༥༩ ཡོད་འདུག དེ་བཞིན་རྒྱ་གར་ནང་ཏོག་དབྱིབས་འགོག་ཁབ་གཉིས་ཀ་བརྒྱབ་ཟིན་པའི་མི་གྲངས་ ༤༦༡༤༠ དང་། དང་པོ་བརྒྱབ་ཟིན་པའི་མི་གྲངས་ ༤༠༦༩ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པའི་མི་ ༦༩༨༠ ཡོད་འདུག དང་པོ་བརྒྱབ་ཟིན་པའི་མི་གྲངས་ ༤༨ ཙམ་ཡོད་འདུག
གསར་འགོད་པ། དཔལ་ལྡན།
