གྲྭ་རིན་ཆེན་ཚུལ་ཁྲིམས་ལགས་ཀློད་གྲོལ་དགོས་པའི་ཡོངས་ཁྱབ་འབོད་སྐུལ་གནང་།

རྒྱ་ནག་གཞུང་གིས་རྔ་བ་སྣང་ཞིག་དགོན་གྱི་གྲྭ་རིན་ཆེན་ཚུལ་ཁྲིམས་ལགས་འཛིན་བཟུང་བཙོན་འཇུག་བྱས་ཏེ་ལོ་ ༢ ལྷག་འགྲོ་ཡི་ཡོད་ཀྱང་ད་དུང་ཁོང་གི་ཁྱིམ་མི་ཚོས་ཁོང་གང་དུ་ཡོད་མེད་ཙམ་ཡང་ཤེས་རྟོགས་ཐུབ་ཀྱི་མེད་སྟབས། རྒྱལ་སྤྱིའི་ཉེས་ཡངས་ཚོགས་པ་ནས་གྲྭ་རིན་ཆེན་ཚུལ་ཁྲིམས་ལགས་བཅས་རྒྱའི་བཙོན་ཁང་དུ་ཡོད་པའི་བཙོན་པ་ལྔ་གང་མགྱོགས་ཀློད་གྲོལ་གཏང་དགོས་པའི་ཡོངས་ཁྱབ་རེ་སྐུལ་གནང་འདུག

ཕྱི་ལོ་ ༢༠༡༩ ཕྱི་ཟླ་ ༨ ཚེས་ ༡ ཉིན་རྔ་བ་རྫོང་ཁཱ་ཤུལ་སྡེ་བ་ནས་ཡིན་པའི་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ལགས་ཀྱིས། ཕྱི་རྒྱལ་དུ་ཡོད་པའི་བོད་མི་ཚོར་བོད་དོན་གླེང་སློང་བྱས་པའི་ནག་ཉེས་བཀལ་ཏེ། རྔ་བ་རྫོང་ཁོངས་ཀོར་མདོ་ས་ཚིགས་ནས་རྔ་བ་རྫོང་གི་ཉེན་རྟོག་པས་འཛིན་བཟུང་བྱས་རྗེས། ཁོང་ལ་ལོ་བཞི་དང་ཟླ ༦ གི་ཁྲིམས་ཐག་བཅད་ཡོད། འོན་ཀྱང་།  ཁོང་ད་ལྟ་གང་དུ་ཡོད་མེད་དང་གཟུགས་གཞིའི་གནས་སྟངས་སོགས་ཀྱི་གནས་ཚུལ་གང་ཡང་མ་གོ་བར་ལོ་ངོ་གཉིས་དང་ཟླ་བ་ ༤ ལྷག་འགྲོ་བཞིན་ཡོད་སྟབས།  ཟླ་འདིའི་ཕྱི་ཚེས་ ༡ ཉིན་རྒྱལ་སྤྱིའི་ཉེས་ཡངས་ཚོགས་པས་རྒྱ་ནག་ཏུ་འཚོག་འཆར་ཡོད་པའི་ཨོ་རྩལ་འགྲན་ཚོགས་དང་བསྟུན། རྒྱ་ནག་གཞུང་གིས་གཞི་རྩའི་འགྲོ་བ་མིའི་རིགས་ཀྱི་ཐོབ་ཐང་ལ་བརྩི་འཇོག་དང་། ལྷག་པར་དུ་རྒྱལ་སྤྱིའི་ཨོ་ལིམ་པིག་གི་ལམ་སྟོན་ལ་གུས་བརྩི་ཡོད་པའི་ཐོག་བཙོན་འཇུག་བྱས་ཡོད་པའི་ཡུ་གུར་མི་རིགས་ཀྱི་སློབ་དཔོན་ཆེན་མོ་ཨི་ཧིམ་ཐུ་ཊི་(Ilham Tohti)ལགས་དང་། གསར་འགོད་པ་ཀྲང་ཀྲིན་(Zhang Zhan)ལགས། འགྲོ་བ་མིའི་ཐོབ་ཐང་འཐབ་རྩོད་པ་ལི་ཆོ་ཁྲུའུ་( Li Qiaochu)། ཁྲིམས་རྩོད་པ་ཀོ་ཀྲི་ཧྲིན་(Gao Zhisheng)། རྩོམ་པ་པོ་དང་སྐད་ཡིག་འཐབ་རྩོད་པ་གྲྭ་རིན་ཆེན་ཚུལ་ཁྲིམས་ལགས་བཅས་གང་མགྱོགས་ཀློད་གྲོལ་གཏང་དགོས་པའི་ཡོངས་ཁྱབ་ཀྱི་རེ་འདུན་བཏོན་འདུག

དེའི་ཐད་གྲྭ་རིན་ཆེན་ཚུལ་ཁྲིམས་ལགས་ཀྱི་སྲིང་མོ་ཀུན་བཟང་སྒྲོལ་མ་ལགས་ཀྱིས། རྒྱ་ནག་གཞུང་གིས་ཁོང་ཉིད་འཛིན་བཟུང་བྱས་ནས་ད་བར་ནང་མི་སོགས་ཀྱིས་ཐུག་འཕྲད་གཅིག་ཀྱང་བྱས་ཐུབ་མེད་པ་དང་། འདས་ལོའི་ཟླ་བ་གསུམ་པའི་ནང་རྒྱ་ནག་གཞུང་གི་ཉེན་རྟོག་པས། ཁོང་གི་ཁྲིམས་འགལ་གྱི་ལས་ཀ་བྱས་པའི་ཡིག་ཆ་ཞིག་སྤྲད་དེ། རྗེས་སུ་ཁོང་དང་ཐུག་འཕྲད་བྱ་རྒྱུའི་གོ་སྐབས་ཤིག་སྤྲད་རྒྱུ་ཡིན་སྐོར་བརྗོད་ཡོད་ཀྱང་། ད་བར་ནང་མིར་ཐུག་འཕྲད་བྱ་བཅུག་མེད་པའི་ཁར། མཐའ་ན་ཁོང་གི་འཆི་གསོན་གྱི་གནས་སྟངས་ཙམ་ཡང་མི་ཤེས་ལ། རྒྱ་ནག་གཞུང་གིས་ཁོང་ལ་ལོ་བཞི་དང་ཟླ་༦ ཁྲིམས་ཐག་བཅད་ཡོད་ཀྱང་། ཁྲིམས་རྩོད་པ་ཡོད་མེད་དང་ཁོང་གིས་ཁྲིམས་འགལ་གྱི་ལས་ཀ་ག་རེ་བྱས་ཡོད་མེད་ཁ་གསལ་མེད་པ་དང་། ཁོང་གི་ཕ་མ་དང་སྤུན་ཉེ་ཚོས་ཁོང་དང་གང་མགྱོགས་ཐུག་འཕྲད་བྱ་རྒྱུར་རེ་སྒུག་བྱེད་བཞིན་ཡོད་སྐོར་སོགས་བརྗོད་འདུག

འདི་ལོའི་ཕྱི་ཟླ་ ༣ ཚེས་ ༢༦ ཉིན་རྔ་བ་རྫོང་ཉེན་རྟོག་ཁང་གིས་གྲྭ་རིན་ཆེན་ཚུལ་ཁྲིམས་ལགས་ཀྱི་ཕ་མ་གཉིས་སྐད་བཏང་སྟེ།  གྲྭ་ཚུལ་ཁྲིམས་ལགས་སུ་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་ཡོད་པ་དང་། ནང་མི་ཐུག་འཕྲད་དུ་ཡོང་ཆོག་གི་ཡོད་སྐོར་བཤད་ཡོད་ཀྱང་། གྲྭ་ཚུལ་ཁྲིམས་ལགས་སུ་ག་དུས་ནས་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་པ་དང་། ཁྲིམས་ཐག་གཅོད་དོན་དང་ཉེས་འཛུགས་ག་རེ་བྱས་ཡོད་མེད་སོགས་གསལ་བོ་བཤད་མེད་པ་རེད།

ཕྱི་ལོ་ ༢༠༡༨ ལོར་རྒྱ་ནག་གཞུང་གི་ཉེན་རྟོག་པས་གྲྭ་རིན་ཆེན་ཚུལ་ཁྲིམས་ལགས་ཀྱི་སྐད་འཕྲིན་ནང་སྔོག་བཤེར་བྱས་པ་བརྒྱུད། ཁོང་གིས་ཕྱི་ལོགས་ཀྱི་བོད་མི་ཁག་ཅིག་དང་མཉམ་དུ་བོད་དོན་གླེང་སློང་བྱས་ཡོད་སྐོར་ཉེས་འཛུགས་བྱས་ཏེ།  ཁོང་དང་ཁོང་གི་ནུ་བོ་ནོར་བུ་ཚེ་རིང་ཐེངས་གཉིས་འཛིན་བཟུང་བྱས་ཡོད་པ་དང་། དེ་བཞིན་ཕྱི་ལོ་ ༢༠༡༩ ལོའི་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉིན། གྲྭ་རིན་ཆེན་ཚུལ་ཁྲིམས་ལགས་ཀྱིས་ཕྱི་རྒྱལ་ན་ཡོད་པའི་བོད་མི་ཞིག་དང་མཉམ་དུ་དུས་ཚོད་གཉིས་ལྷག་ལ་ཁ་པར་བརྒྱུད་ཁ་བརྡ་བྱས་ཡོད་ལུགས་ཀྱི་བརྒྱུད་རིམ་ཆ་ཚང་སྒྲ་འཇུག་བྱས་ཡོད་འདུག

གཞན་ཡང་། རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱིས་སྦྲག་ཁང་བརྒྱུད་ཕྱི་ལོགས་ནས་འབྱོར་བའི་དཔེ་ཆ་གནད་འགག་ཅན་མང་པོ་ཞིག་བོད་ནང་གི་ས་ཆ་གང་མང་ལ་འགྲེམས་སྤེལ་བྱས་ཡོད་ལུགས་དང་། སྒེར་གྱིས་གཙོ་གཉེར་བྱས་པའི་ཆད་ལྟ་བ་ཞེས་པའི་རྩོམ་རིག་དྲ་ཚིགས་ནང་བོད་སྐད་ཡིག་གི་བདག་དབང་དང་བོད་དོན་དང་འབྲེལ་བའི་རྩོམ་ཡིག་མང་པོ་ཞིག་སྤེལ་ཡོད་པའི་ཉེས་འཛུགས་བྱས་ཏེ་དྲ་ཚིགས་དེ་གཏན་དུ་སྒོ་བརྒྱབ་ཡོད་པ་དང་། དེ་བཞིན་རྒྱ་གར་དུ་ཡོད་པའི་གཅེན་མོ་ཀུན་བཟང་སྒྲོལ་མ་ཤེས་ཡོན་དང་འབྲེལ་བའི་ཚོགས་འདུ་ཁག་ལ་ཞུགས་པའི་འདྲ་པར་ཁག་ཁོང་གི་སྐད་འཕྲིན་རྒྱབ་ལྗོངས་སུ་བཞག་པ་དག་ཀྱང་ཆབ་སྲིད་ལ་འབྲེལ་བ་ཡོད་པའི་ནག་ཉེས་གཡོགས་ཡོད་འདུག

གྲྭ་རིན་ཆེན་ཚུལ་ཁྲིམས་ལགས་ནི་ཁཱ་ཤུལ་སྡེ་བའི་གཉེར་བ་ཚང་ཞེས་པའི་ཞིང་པའི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ད་ལྟ་རང་ལོ་ ༢༩ ཡིན་པ་དང་ཁོང་དགུང་ལོ་དྲུག་ཙམ་ནས་རྔ་ཡུལ་གྱི་བོན་དགོན་ཆེ་ཤོས་སྣང་ཞིག་དགོན་པར་ཆོས་ཞུགས་བྱས་ཏེ་སྔགས་ཀྱི་འཛིན་གྲྭར་ཐོན་ཡོད་འདུག ཁོང་གི་ཕ་མིང་ལ་བཀྲ་ཤིས་དོན་གྲུབ་དང་ལོ་ ༦༨ ཡིན་ཞིང་། མ་མིང་ལ་མཚོ་མོ་ཟེར་ཞིང་ལོ ༥༧ ཡིན་འདུག ཁོང་ལ་ཀུན་བཟང་སྒྲོལ་མ་ཚུད་པའི་ཕ་མ་གཅིག་གི་སྤུན་མཆེད་ ༥ ཡོད་འདུག

གསར་འགོད་པ། དཔལ་ལྡན།