སྲིད་སྐྱོང་མཆོག་གིས་རྒྱ་གར་གྱི་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་།

ད་རེས་སྲིད་སྐྱོང་མཆོག་གིས་རྒྱ་གར་བྱང་ཕྱོགས་རྡེ་ར་ལྡུན་ཁུལ་གྱི་དགོན་པ་དང་སློབ་གྲྭ གཞིས་ཆགས་ཁག་དང་ཁ་འཐོར་བོད་མི་བཅས་ལ་འཚམས་གཟིགས་དང་སྦྲགས། ཁོ་ཚོའི་གནས་སྟངས་ལ་རྒྱུས་ལོན་བྱས་ཏེ་སང་ཉིན་ཕྱིར་བཞུགས་སྒར་དུ་ཕེབས་རྒྱུ་ཡིན་འདུག

ད་ལྟའི་ཆར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་དབུས་ཀྱི་རྒྱལ་ས་ལྡི་ལི་དང་ཉེ་འཁྲིས་བོད་མིའི་གཞིས་ཆགས་ཁག་དང་བྱང་ཕྱོགས་སོགས་བོད་མིའི་གཞིས་ཆགས་ཁག་ཏུ་གཞུང་འབྲེལ་ཕྱོགས་ཕེབས་གནང་བཞིན་པ་ལྟར། ཁ་སང་ཉིན་རྒྱབ་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་བྱང་ཤར་མངའ་སྡེ་ཨོ་ཊར་ཁན་གྱི་སྤྱི་ཁྱབ་དྲུང་ཆེ་སིག་བྷིར་སིན་སན་དྷའོ་ (Sukbhir Singh Sandhu) ལགས་དང་ཐུག་འཕྲད་ཀྱིས། མངའ་སྡེ་དེར་གནས་པའི་བོད་མི་རྣམས་ཀྱི་བདེ་སྡུག་སྤྱི་དང་འབྲེལ་བའི་ཐོག་ལ་མངའ་སྡེ་གཞུང་ནས་གཟིགས་རྟོགས་དང་རྒྱབ་སྐྱོར་གནང་བའི་འབོད་སྐུལ་ཞུས་ཡོད་པ་རེད།

ཁ་སང་སྔ་དྲོར་སྲིད་སྐྱོང་མཆོག་གིས་སྤྱི་ཁྱབ་དྲུང་ཆེ་ལས་འཕར་སྐུ་ཞབས་ཨ་ནྣཏ་ཝར་ངྷན་(Shri Anand Vardhan) ལགས་དང་མཇལ་འཕྲད་གནང་ཡོད་པ་མ་ཟད། སྐབས་དེར་སྲིད་སྐྱོང་མཆོག་གིས་ཨོ་ཊར་ཁན་མངའ་སྡེ་གཞུང་ནས་དུས་ཡུན་རིང་པོར་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། རྒྱ་གར་གྱི་མངའ་སྡེ་མང་པོས་ལག་བསྟར་བྱེད་བཞིན་པའི་ཕྱི་ལོ་ ༢༠༡༤ ལོའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཞེས་པ་ཨོ་ཊར་ཁན་མངའ་སྡེ་གཞུང་གིས་ཀྱང་མགྱོགས་མྱུར་ལག་བསྟར་ཡོང་བའི་ཞུ་སྐུལ་གནང་ཡོད་པ་མ་ཟད། མངའ་སྡེ་དེའི་ནང་དུ་གནས་པའི་བོད་མི་རྣམས་ཀྱི་དཀའ་ངལ་སོགས་གླེང་སློང་བྱས་ཡོད་པ་རེད།

འདི་གའི་གསར་འགོད་པས་རྒྱུས་ལོན་བྱུང་བ་ལྟར་ན། དེ་རིང་སྲིད་སྐྱོང་སྤེན་པ་ཚེ་རིང་མཆོག་གིས་བྱང་ཕྱོགས་སྤུ་རུ་ཝ་ལ་གཞིས་ཆགས་སུ་ཕེབས་ཏེ། ས་གནས་མང་ཚོགས་ལ་བཀའ་སློབ་དང་སྤུ་རུ་ཝ་ལ་གཞིས་ཆགས་ཀྱི་ཕྱི་རོལ་ལུས་སྦྱོང་ར་བ་ཞིག་དབུ་འབྱེད་གནང་། སང་ཉིན་ཕྱི་ཚེས་ ༦ ཉིན་སྲིད་སྐྱོང་མཆོག་ཕྱིར་བཞུགས་སྒར་དུ་ཕེབས་འཆར་ཡོད་འདུག

ཐེངས་འདི་ནི་སྐབས་བཅུ་དྲུག་པའི་བཀའ་ཤག་གི་སྲིད་སྐྱོང་གཞུང་འབྲེལ་ཕྱོགས་ཕེབས་གནང་བ་ཐེངས་ལྔ་བ་ཆགས་ཀྱི་ཡོད་པ་ལྟར། ཟླ་འདིའི་ཕྱི་ཚེས་ ༢༥ ཉིན་གངས་ཅན་སྐྱིད་གཤོངས་ནས་ཕེབས་ཐོན་གྱིས། ཕྱི་ཚེས་ ༢༦ ཉིན་ཐོག་མར་རྒྱ་གར་བྱང་ཕྱོགས་ལྡེ་ར་རྡུན་ཁུལ་གྱི་ས་སྐྱ་ཆོས་སྒར་དང་འབྲི་གུང་བྱང་ཆུབ་གླིང་དགོན་པ་སོགས་སུ་མཆོད་མཇལ་དུ་ཕེབས་ཡོད་པ་དང་། མངོན་དགའ་སློབ་གྲྭ་གཙོས་རཱཇ་པུར་བུད་མེད་མཉམ་ལས་བཟོ་གྲྭ་དང་མ་སུ་རི་བོད་ཁྱིམ་སློབ་གྲྭའི་ཁྱབ་ཁོངས་འོག་ཡོད་པའི་རཱཇ་པུར་དགེ་འཕེལ་གླིང་རྒས་གསོ་ཁང་བཅས་ཀྱི་མི་མང་དང་ཁ་འཐོར་བོད་མི་རྣམས་འཚམས་གཟིགས་དང་བཀའ་སློབ་སྩལ།

ཕྱི་ཚེས་ ༢༧ ཉིན་ནས་སྲིད་སྐྱོང་མཆོག་ རཱཇ་པུར་བོད་ཁྱིམ་སློབ་གྲྭ་དང་སྲོང་བཙན་དཔེ་མཛོད་ཁང་། དགེ་འཕེལ་གླིང་དང་བདེ་སྐྱིད་གླིང་གཞིས་ཆགས་བཅས་སུ་ཕེབས་ཏེ་ས་གནས་མང་ཚོགས་ལ་བཀའ་སློབ་སྩལ། དེ་བཞིན་ཕྱོགས་ཕེབས་ཀྱི་ཉིན་གསུམ་པར་སྲིད་སྐྱོང་མཆོག་གིས་ངོར་དགོན་པ་དང་རྫ་སྨོན་རྒྱལ་གཡུང་དྲུང་གླིང་། རྙིང་མ་དགོན་པ། དཔལ་སྤུངས་ཀུན་ཁྱབ་ཆོས་གླིང་དགོན་པ་བཅས་སུ་མཆོད་མཇལ་དང་། གླིང་ཚང་གཞིས་ཆགས་དང་ས་སྐྱ་བཙུན་མའི་མཐོ་སློབ། དེ་བཞིན་གླིང་གེ་སར་སློབ་གྲྭ་དང་སེ་ལ་ཀུ་བོད་ཁྱིམ་དང་ལག་ཤེས་བལྟི་གནས་ཁང་གཉིས་བཅས་ལ་མཚམས་གཟིགས་དང་གཞིས་མི་ཡོངས་ལ་བཀའ་སློབ་སྩལ་ཡོད།

གཞན་ཡང་ད་རེས་སྲིད་སྐྱོང་མཆོག་གི་ཕྱོགས་ཕེབས་སྐབས། ལྡེ་ར་རྡུན་ཁུལ་གྱི་སྨིན་གྲོལ་དགོན་པ་དང་བཀྲ་ཤིས་འཁྱིལ་དགོན་པ། དོན་འགྲུབ་གླིང་གཞིས་ཆགས།  དཔལ་བདེ་ཆེན་ཆོས་འཁོར་གླིང་། མ་སུ་རི་བོད་ཁྱིམ་ཁྱབ་ཁོངས་གྷོ་རི་མ་ཕི་སློབ་གྲྭ་དང་སྦ་ལུ་ཝ་ལ་གཞིས་ཆགས། ཁེ་ར་༧གོང་དཀར་ཆོས་སྡེ། ལཱ་ཁན་ཝ་ལའི་གོང་དཀར་ཚེ་སྒྲུབ་ལྷ་ཁང་། དྭང་ཟུར་རྒས་གསོ་ཁང་དང་ཧར་པ་སྤུར། ཧ་རི་སྤུར་སོགས་ཀྱི་གྲྭ་བཙུན་གྱི་གཙོས་སློབ་གྲྭའི་དགེ་སློབ་རྣམ་པ་དང་། ཁ་འཐོར་མི་མང་གིས་གཙོས་ས་གནས་ཀྱི་གཞིས་མི་བཅས་ལ་འཚམས་གཟིགས་དང་བཀའ་སློབ་སྩལ་གནང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།