༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཌོལ་མཆོག་སྐུ་གྲོངས་བར་ཐུགས་གསོའི་གསུང་འཕྲིན་ཞིག་སྩལ་བའི་ནང་དམ་པ་ཁོང་ནི་རང་དབང་དང་རིག་གཞུང་རྒྱུན་འཛིན་སླད་འཐབ་རྩོད་བྱེད་མཁན་གྱི་བོད་ལྟ་བུའི་རིགས་ལ་བྱམས་བརྩེ་དང་དོ་འཁུར་གནང་མཁན་ཞིག་ཡིན་སྐོར་གསུངས་འདུག
ཁ་སང་ཨ་རིའི་གྲོས་ཚོགས་གོང་མའི་འཐུས་མི་བོད་དོན་རྒྱབ་སྐྱོར་བ་སྐུ་ཞབས་བྷོབ་ཌོལ་(Bob Dole) མཆོག་སྙུང་གཞིའི་རྐྱེན་གྱིས་དགུང་གྲངས་ ༩༨ ཐོག་སྐུ་གྲོངས་ཡོད་པར་བརྟེན། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་དམ་པ་ཁོང་གི་སྐུ་ཟླ་ལྕམ་སྐུ་ཨེ་ལི་ཛེ་བྷེ་ཐི་ཌོལ་ (Elizabeth Dole) ལགས་སུ་ཐུགས་གསོའི་གསུང་འཕྲིན་ཞིག་སྩལ་གནང་མཛད་པའི་ནང་། སྐུ་ཞབས་བྷོབ་ཌོལ་མཆོག་ནི་བོད་མི་མང་གི་གྲོགས་པོ་ཞིག་ཡིན་སྐོར་དང་། ཁོང་ནི་རང་དབང་དང་རིག་གཞུང་རྒྱུན་འཛིན་སླད་འཐབ་རྩོད་བྱེད་མཁན་གྱི་བོད་ལྟ་བུའི་རིགས་ལ་བྱམས་བརྩེ་དང་དོ་འཁུར་གནང་མཁན་ཞིག་ཡིན་སྐོར་གསུངས་འདུག
དེ་ཡང་གསུང་འཕྲིན་ནང་༧མགོན་པོ་མཆོག་གིས། སྐུ་ཞབས་ཌོལ་མཆོག་ནི་ངོས་ལ་ཨ་རིའི་རྒྱལ་ས་ཝ་ཤིང་ཊོན་དུ་ཆ་རྒྱུས་ཆེན་པོ་ཡོད་པའི་ཨ་རིའི་གྲོས་ཚོགས་གོང་མའི་འཐུས་མི་ཞིག་ཡིན། ངོས་རང་ཁོང་ལ་མཇལ་མོལ་ག་དུས་བྱུང་ནའང་། ཁོང་གིས་མི་ཉམ་ཐག་དང་བོད་མི་ལྟ་བུའི་རང་གི་རང་དབང་དང་རིག་གཞུང་རྒྱུན་འཛིན་སླད་འཐབ་རྩོད་བྱེད་མཁན་རྣམས་ལ་རྒྱུན་དུ་ཞེ་ཐག་པ་ནས་དོ་འཁུར་དང་བྱམས་སྐྱོང་གནང་གི་ཡོད་པ་ཤེས་ཀྱི་ཡོད། ཁོང་ནི་བོད་མི་རྣམས་ཀྱི་གྲོགས་པོ་ཞིག་ཡིན། ཞེས་གསུངས་འདུག
ཡང་༧གོང་ས་མཆོག་གིས། གྲོས་ཚོགས་གོང་མའི་འཐུས་མི་སྐུ་ཞབས་ཌོལ་མཆོག་གིས་ལོ་ངོ་བཅུ་ཕྲག་འགའ་ཤས་རིང་མི་མང་ལ་སྲི་ཞུ་བསྒྲུགས་ཏེ་མི་ཚེ་དོན་སྙིང་ལྡན་པ་ཞིག་བསྐྱལ་ཐུབ་ཡོད། དམ་པ་ཁོང་ནི་ངོས་རང་གིས་བརྩི་བཀུར་ཞུ་སའི་ཨ་རིའི་རིན་ཐང་སྟེ། རང་དབང་དང་། འདྲ་མཉམ། དྲང་བདེན་བཅས་ཀྱི་མཚོན་དོན་ཞིག་རེད། ཁོང་གིས་རང་གི་ཕྱག་རོགས་རྣམས་ལ་ཕན་ཚུན་དབར་ལྟ་གྲུབ་ཀྱི་སྟེང་ནས་མི་མཐུན་པ་བྱུང་སྲིད་ཀྱང་། ཚང་མ་མི་ཡིན་པའི་ཆ་ནས་ཕན་ཚུན་ལ་བརྩི་བཀུར་བྱ་དགོས་པའི་མིག་དཔེ་གསལ་པོ་བསྟན་གནང་ཡོད། ཅེས་གསུངས་ཏེ་དམ་པ་ཁོང་ལ་ཐུགས་སྨོན་མཛད་འདུག
སྐུ་ཞབས་བྷོབ་ཌོལ་མཆོག་ནི་ཕྱི་ལོ་ ༡༩༢༣ ཟླ་ ༧ ཚེས་ ༢༢ ཉིན་ཨ་རིའི་མངའ་སྡེ་ཀན་སིས་ (Kansas) ཡི་རྒྱལ་ས་ར་སལ་ (Russel) དུ་སྐྱེས་ཤིང་། ཕྱི་ལོ་ ༡༩༤༡ ལོར་ Russell High School ནས་གཞི་རིམ་སློབ་སྦྱོང་ཐོན་ཏེ། མངའ་སྡེའི་གཙུག་ལག་སློབ་གྲྭ་ཆེན་མོ་ནས་(University of Kansas) མཐོ་རིམ་སློབ་གཉེར་མགོ་ཚུགས་ཀྱང་འཛམ་གླིང་དམག་ཆེན་གཉིས་པའི་རྐྱེན་གྱིས་སློབ་མཐར་མ་སོན། དེའི་རྗེས་ཕྱི་ལོ་ ༡༩༤༨ ནང་ཨེ་རི་ཛོ་ན་གཙུག་ལག་སློབ་གྲྭར་ (University of Arizona) ལོ་ངོ་གཅིག་རིང་སློབ་སྦྱོང་གནང་བ་དང་། ཕྱི་ལོ་ ༡༩༥༢ ལོར་ཀན་སིས་མངའ་སྡེའི་ནང་རྟེན་གཞི་བྱས་པའི་ (Washburn University) མཐོ་སློབ་ནང་ཁྲིམས་ལུགས་རིག་པའི་ཐོག་གཙུག་ལག་རབ་འབྱམས་པའི་སློབ་མཐར་ཕྱིན་ཡོད་འདུག སྐུ་ཞབས་བྷོབ་ཌོལ་མཆོག་ཕྱི་ལོ་ ༡༩༦༡ ནས་ ༡༩༦༩ དབར་ཨ་རིའི་གྲོས་ཚོགས་འོག་མའི་འཐུས་མིར་བདམས་ཐོན་བྱུང་བ་དང་། དེའི་རྗེས་ཕྱི་ལོ་ ༡༩༦༩ ནས་ ༡༩༩༦ དབར་ཨ་རིའི་གྲོས་ཚོགས་གོང་མའི་འཐུས་མིར་བདམས་ཐོན་བྱུང་སྟེ། ལས་ཡུན་རིང་གྲོས་ཚོགས་ཀྱི་སྤྱི་མཐུན་ཚོགས་པའི་ཚོགས་གཙོ་དང་། གྲོས་ཚོགས་གོང་མའི་དཔལ་འབྱོར་དོ་དམ་ཚོགས་ཆུང་གིས་མཚོན་པའི་གནད་འགག་ཆེ་བའི་སྒྲིག་འཛུགས་དང་ཚོགས་པ་ཁག་གི་འགན་འཛིན་གནང་ཡོད་འདུག་ལ། ཕྱི་ལོ་ ༡༩༩༦ ལོར་སྤྱི་མཐུན་ཚོགས་པའི་སྲིད་འཛིན་འོས་མིར་བདམས་ཡོད་ཀྱང་རྒྱལ་ཁ་ཐོབ་མེད་པ་རེད།
གསར་འགོད་པ། བསྟན་འཛིན་ཕུར་བུ་དང་པ་སངས་ཚེ་རིང་།
