རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པའི་རྐྱེན་གྱིས་ཕྱི་ལོ་ ༢༠༢༢ ལོའི་པེ་ཅིན་དགུན་དུས་ཨོ་རྩལ་འགྲན་ཚོགས་ཐོག་ཨ་རི་དང་དབྱིན་ཡུལ། ཁེ་ན་ཌ། ཨོ་གླིང་བཅས་ནས་ཕྱི་འབྲེལ་མི་སྣ་དང་སྐུ་ཚབ་གཏོང་རྒྱུ་མིན་པའི་ཐག་གཅོད་བྱུང་བ་གསལ་བསྒྲགས་གནང་།
ཟླ་འདིའི་ཕྱི་ཚེས་ ༧ ཉིན་ཨ་རིའི་ཕོ་བྲང་དཀར་པོས་རྒྱ་ནག་གཞུང་གིས་མི་རིགས་རྩ་མེད་གཏོང་ཐབས་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་མཚོན་ཆེད་ཨ་རིའི་གཞུང་འབྲེལ་མི་སྣ་པེ་ཅིན་དགུན་དུས་ཨོ་རྩེད་འགྲན་ཚོགས་ཐོག་མངག་གཏོང་གནང་རྒྱུ་མིན་པའི་ཐག་གཅོད་དང་འབྲེལ། ཨ་རིའི་མཐུན་གྲོགས་རྒྱལ་ཁབ་རྣམས་ཀྱིས་ཀྱང་དེ་ལྟར་གནང་དགོས་པའི་འབོད་སྐུལ་གནང་བ་བཞིན། དེ་རིང་ཁེ་ན་ཌ་གཞུང་ངོས་ནས་ཀྱང་འཚོག་ལ་ཉེ་བའི་རྒྱ་ནག་གི་དགུན་དུས་ཨོ་ལིམ་ཕིག་རྩེད་འགྲན་ཐོག་ཕྱི་འབྲེལ་མི་སྣ་དང་སྐུ་ཚབ་གཏོང་རྒྱུ་མིན་པའི་ཐག་གཅོད་བྱུང་བ་གསལ་བསྒྲགས་གནང་འདུག་ལ། དབྱིན་ཡུལ་དང་ཨོ་གླིང་གཉིས་ནས་ཀྱང་དེ་བཞིན་གྱི་ཐག་གཅོད་བྱུང་བ་གསལ་བསྒྲགས་གནང་ཡོད་པ་རེད།
དེ་རིང་ཁེ་ན་ཌའི་སྲིད་བློན་སྐུ་ཞབས་རྗ་སི་ཊིན་ཊུ་ཌོ་(Justin Trudeau)མཆོག་གིས། ཁེ་ན་ཌ་གཞུང་གི་ངོས་ནས་ཀྱང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་སེམས་འཚབ་ཧ་ཅང་ཆེན་པོ་ཡོད་པར་བརྟེན། རྒྱ་ནག་གཞུང་ལ་ངོ་རྒོལ་མཚོན་ཆེད་དུ་ཁེ་ན་ཌའི་གཞུང་གི་ངོས་ནས་ཕྱི་ལོ་ ༢༠༢༢ ལོར་རྒྱ་ནག་གི་ཨོ་ལིམ་རྩེད་འགྲན་ཐོག་ཕྱི་འབྲེལ་མི་སྣ་དང་སྐུ་ཚབ་གཏོང་རྒྱུ་མིན་པའི་ཐག་གཅོད་བྱས་ཡོད་པ་དང་། ཁེ་ན་ཌའི་རྩལ་འགྲན་པ་རྣམས་མཉམ་ཞུགས་བྱེད་ཆོག་གི་ཡོད་སྐོར་གསུངས་འདུག་ལ། ཁེ་ན་ཌའི་ཨོ་ལིམ་ཕིག་ཚོགས་ཆུང་གིས་གསར་འགོད་ལྷན་ཚོགས་སྟེང་། ཁེ་ན་ཌའི་གཞུང་གི་ངོས་ནས་ཨོ་རྩེད་ནང་ཕྱི་འབྲེལ་མི་སྣ་དང་སྐུ་ཚབ་གཏོང་རྒྱུ་མིན་པའི་ཐག་གཅོད་དེ་ལ་བརྩི་བཀུར་ཡོད་སྐོར་བརྗོད་ཡོད་འདུག
དེ་བཞིན་ཁེ་ན་ཌའི་ཕྱི་སྲིད་བློན་ཆེན་ལྕམ་སྐུ་མེ་ལཱ་ནི་ཇོའེ་ (Melanie Joly) ལགས་ཀྱིས། ཁེ་ན་ཌའི་གཞུང་ནས་འགྲོ་བ་མིའི་ཐོབ་ཐང་ལ་མཐའ་གཅིག་ཏུ་རྒྱབ་སྐྱོར་ཡོད་པ་དང་། རྒྱ་ནག་ལ་ང་ཚོའི་ངོས་ནས་ཡུ་གུར་མི་རིགས་རྣམས་ལ་ཉེས་མེད་ཉེས་འཛུགས་བྱས་པར་སེམས་འཚབ་ཡོད་པས་རྒྱ་ནག་ལ་བརྡ་ལན་སྤྲོད་རྒྱུ་ནི་ཧ་ཅང་གིས་གལ་ཆེན་པོ་རེད། ཅེས་གསུངས་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅན་ (Zhao Lijian)དང་ཝང་བུན་པིན་(Wang Wenbin)ཟེར་བ་གཉིས་ཀྱིས་སྔ་གཞུག་ཏུ་གཞི་མེད་སྐྱོན་འཛུགས་ལ་ངོས་ལེན་མེད་པའི་བསྒྲགས་གཏམ་སྤེལ་ཡོད་པའི་ནང་། ཨ་རིའི་གཞུང་གིས་རང་གི་གཞུང་འབྲེལ་སྐུ་ཚབ་རྣམས་པེ་ཅིན་དགུན་དུས་ཨོ་རྩེད་ནང་མི་གཏོང་རྒྱུའི་ཐག་གཅོད་དེ་ནི་རྫུན་གཏམ་དང་དཀྲོག་གཏམ་ལ་བརྟེན་ནས་བྱུང་བ་ཞིག་ཡིན་པ་དང་། ཨ་རིའི་ངོས་ནས་རྩེད་འགྲན་ཆབ་སྲིད་ཀྱི་ངོ་བོར་བསྒྱུར་ཏེ་པེ་ཅིན་དགུན་དུས་ཨོ་རྩེད་འགྲན་ཚོགས་ལ་བར་ཆད་བཟོ་མི་ཉན་པ་དང་། གལ་ཏེ་དེ་ལྟར་བྱས་ཚེ་རྒྱལ་ཁབ་གཉིས་ཀྱི་གྲོས་མོལ་དང་རྒྱལ་སྤྱིའི་སྟེང་དུ་མཉམ་འབྲེལ་བྱ་འོས་པའི་གནད་དོན་གལ་ཆེན་གྱི་རིགས་ལ་ཤུགས་རྐྱེན་ངན་པ་ཐེབས་ངེས་ཡིན་སྐོར་སྐྱོན་བརྗོད་བྱས་ཡོད་པ་མ་ཟད། ཨ་རིའི་ཐག་གཅོད་དེར་རྒྱ་ནག་ངོས་ནས་ཡ་ལན་ཏན་ཏན་སློག་རྒྱུ་ཡིན་སྐོར་བརྗོད་འདུག
ཁེ་ན་ཌའི་གཞུང་ནས་ཨོ་ལིམ་ཕིག་རྩེད་འགྲན་ལ་ངོ་རྒོལ་གནང་བ་ད་ལན་ཐེངས་དང་པོ་རེད་མི་འདུག ཕྱི་ལོ་ ༡༩༨༠ ལོར་ཨུ་རུ་སུའི་དམག་གིས་ཨབ་གྷན་ནང་ཐེ་ཇུས་བྱེད་ཀྱི་ཡོད་པའི་ངོས་འཛིན་འོག་ཁེ་ན་ཌས་གཞུང་འབྲེལ་ཐོག་ནས་ཨུ་རུ་སུའི་རྒྱལ་ས་མོ་སི་ཁོ་ (Moscow) རུ་འཚོགས་གཏན་འཁེལ་བའི་དབྱར་དུས་ཨོ་ལིམ་ཕིག་རྩེད་འགྲན་ནང་མཉམ་ཞུགས་བྱས་མེད་པ་མ་ཟད། མཐའ་གཅིག་ཏུ་ངོ་རྒོལ་བྱས་ཡོད་འདུག
ཕྱི་ལོ་ ༢༠༡༨ ལོར་ཁེ་ན་ཌ་གཞུང་གིས། རྒྱ་ནག་གཞུང་འབྲེལ་གྱི་ཧཱ་ཝེ་འཕྲུལ་རིགས་བཟོ་ཚོང་ཁང་གི་ནོར་སྲིད་འགན་འཛིན་མེན་ཝན་ཀྲའོ་ (Meng Wanzhou) འཛིན་བཟུང་བཀག་ཉར་བྱས་པ་དང་། རྒྱ་ནག་གིས་ཁེ་ན་ཌའི་གཞུང་འབྲེལ་མི་སྣ་མའེ་ཁེལ་ (Michael Kovrig) དང་མའེ་ཁེལ་སི་པཱ་ཝོར་ (Michael Spavor) གཉིས་འཛིན་བཟུང་གིས་ཁེ་ན་ཌར་རྒོལ་ལན་བསླགས། འདི་ལོའི་ཕྱི་ཟླ་ ༩ པའི་ནང་མེན་ཝན་ཀྲའོ་ཀློད་གྲོལ་བཏང་རྗེས། རྒྱ་ནག་གཞུང་གིས་ཁེ་ན་ཌའི་གཞུང་འབྲེལ་མི་སྣ་མའེ་ཁེལ་ཀོབ་རིག་དང་སི་པཱ་ཝོར་གཉིས་ཀྱང་ཀློད་གྲོལ་བཏང་ཡོད་ནའང་། ཡུལ་གཉིས་ཀྱི་རྒྱལ་ཁབ་གཉིས་བར་ཚོང་འབྲེལ་དང་མི་མང་བར་གྱི་འབྲེལ་ལམ་བཅས་ཇེ་སྡུག་ཏུ་འགྲོ་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
