༧གོང་ས་མཆོག་གིས་རྒྱ་གར་གྱི་རྒྱལ་སྲུང་སྤྱི་ཁྱབ་དམག་སྤྱི་ཆེན་མོ་ཞིག་རྐྱེན་འདས་སུ་ཕྱིན་པར་ཐུགས་གསོ་སྩལ།

༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་གྱི་རྒྱལ་སྲུང་སྤྱི་ཁྱབ་དམག་སྤྱི་ཆེན་མོ་ཞིག་དང་བཟའ་ཟླ་བཅས་ཁྱོན་མི་གྲངས་བཅུ་གསུམ་གནམ་གྲུ་བརྡབ་སྐྱོན་གྱི་དོན་རྐྱེན་ཁྲོད་རྐྱེན་འདས་སུ་ཕྱིན་པར་ཤུལ་ལུས་ནང་མི་ཡོངས་ལ་ཐུགས་གསོ་སྩལ།

དེ་རིང་རྒྱ་གར་གྱི་རྒྱལ་སྲུང་བདེ་འཇགས་ཀྱི་སྤྱི་ཁྱབ་དམག་སྤྱི་བཀོད་འདོམ་དཔོན་གྷན་བྷེ་པིན་ར་ཝ་ཊི་ (Gen Bipin Rawat) མཆོག་གནམ་གྲུ་བརྡབ་སྐྱོན་གྱི་དོན་རྐྱེན་ཁྲོད་རྐྱེན་འདས་སུ་ཕྱིན་པར་༧གོང་ས་མཆོག་གིས་ཐུགས་གསོ་སྩལ་གནང་མཛད་འདུག

དེ་ཡང་མགོན་པོ་གང་ཉིད་མཆོག་གི་ཐུགས་གསོའི་ནང་། ངོས་ནས་རྒྱལ་སྲུང་གི་སྤྱི་ཁྱབ་དམག་སྤྱི་བཀོད་འདོམས་པ་གྷན་བྷེ་པིན་ར་ཝ་ཊི་མཆོག་དང་། ཁོང་དང་ལྷན་དུ་ཐད་འཕུར་གནམ་གྲུའི་ནང་བསྐྱོད་མཁན་དག་རྐྱེན་འདས་སུ་ཕྱིན་པའི་གནས་ཚུལ་ཐོས་པར་ཐུག་ཕམ་བྱུང་།

ངོས་ནས་བརྡབ་སྐྱོན་གྱི་དོན་རྐྱེན་ཁྲོད་སྤྱི་ཁྱབ་དམག་ཆེན་མོ་དང་ཁོང་དང་ལྷན་དུ་འདས་གྲོངས་སུ་ཕྱིན་པ་རྣམས་ཀྱི་ནང་མི་ལྟོས་བཅས་ཡོངས་ལ་གདུང་སེམས་མཉམ་སྐྱེད་དང་བསྔོ་སྨོན་ཞུ་བཞིན་ཡོད།

སྤྱི་ཁྱབ་དམག་སྤྱི་དཔོན་ཁོང་གིས་ཡུན་རིང་རྒྱལ་ཁབ་ལ་ཞབས་འདེགས་ཞུས་པར་གུས་བརྩི་ཞུ་ཡི་ཡོད། ཅེས་གསུངས།

གཞན་ཡང་། དེ་རིང་རྒྱ་གར་རྒྱལ་ཁབ་ཀྱི་རྒྱལ་སྲུང་བདེ་འཇགས་དང་འབྲེལ་བའི་ཆེས་མཐོ་བའི་སྤྱི་ཁྱབ་དམག་སྤྱི་བཀོད་འདོམས་པ་གྷན་བྷེ་པིན་ར་མཆོག་འདས་གྲོངས་སུ་ཕྱིན་པའི་ཐད། སྲིད་བློན་མུ་དྷི་མཆོག་གི་གཙོས་རྒྱ་གར་དང་ཨ་སོགས་འཛམ་གླིང་གི་མགོ་འཁྲིད་མང་པོས་གདུང་སེམས་མཉམ་སྐྱེད་དང་མྱ་ངན་ཞུ་བཞིན་འདུག

སྲིད་བློན་མུ་དྷི་མཆོག་གིས། ངེས་དོན་གྱི་རྒྱལ་ཞེན་ཅན་གྷན་བྷེ་པིན་ར་མཆོག་གིས། ང་ཚོའི་དམག་ཤུགས་དང་བདེ་སྲུང་གི་གནས་བབ་དེང་རབས་ཅན་དུ་བསྒྱུར་ཡོད། ཁོང་ལ་ཐབས་ཇུས་ཀྱི་གནད་དོན་ཐོག་འགྲན་ཟླ་བྲལ་བའི་མཁྱེན་ཡོན་ལྡན་ཡོད། ཁོང་གློ་བུར་དུ་འདས་གྲོངས་སུ་ཕྱིན་པ་དེར་ཧ་ཅང་བློ་ཕམ་བྱུང་། ཞེས་བརྗོད་ཡོད་པ་དང་། ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་བྷི་ལིག་ལགས་ཀྱིས། དེ་རིང་རྒྱ་གར་གྱི་རྒྱལ་སྲུང་དམག་སྤྱི་ཆེན་མོ་གྷན་བྷེ་པིན་ར་མཆོག་དང་། ཁོང་གི་སྐུ་ཟླ་དང་ཕྱག་རོགས་བཅས་རྐྱེན་འདས་སུ་ཕྱིན་པར་གདུང་སེམས་མཉམ་སྐྱེད་ཞུ་ཡི་ཡོད། ང་ཚོས་དམག་སྤྱི་ཁོང་རང་གི་རྒྱལ་ཁབ་ལ་ཁྱད་དུ་འཕགས་པའི་ཞབས་འདེགས་དང་། ཨ་རི་དང་རྒྱ་གར་གྱི་རྒྱལ་སྲུང་བདེ་འཇགས་ཐད་ཞལ་འདེགས་ཞུས་ཡོད་པ་དག་དྲན་བཞིན་ཡོད། ཅེས་བརྗོད་འདུག

དེ་རིང་སྔ་དྲོ་ཆུ་ཚོད་ ༡༡།༤༥ སྟེང་སྤྱི་ཁྱབ་དམག་སྤྱི་ཆེན་མོ་ཁོང་དང་བཟའ་ཟླ། ལས་རོགས་བཅས་ཁྱོན་མི་གྲངས་ ༡༤ ཨུ་རུ་སུས་བཟོ་བསྐྲུན་བྱས་པའི་ (Mi-17V5)  ཐད་འཕུར་གནམ་གྲུ་ཞིག་ལ་བསྡད་ནས། རྒྱ་གར་དམག་གི་གནམ་ཐང་ཆེ་ཤོས་གཉིས་པ་ (Sulur Air Base) ནས་ཊ་མེལ་ན་ཌའུ་(Wellington)རྫོང་དུ། དམག་མི་གསར་བ་རྣམས་ལ་ཐུག་འཕྲད་ཀྱི་མཛད་རིམ་ཞིག་གི་སླད་དུ་བསྐྱོད་བཞིན་པའི་སྐབས། གློ་བུར་དུ་གནམ་གྲུར་བརྡབ་ཤོར་ནས་གནམ་གྲུའི་ནང་གི་མི་གཅིག་མ་གཏོགས་ཚང་མ་འདས་གྲོངས་སུ་ཕྱིན་ཡོད་འདུག

རྒྱ་གར་གཞུང་འབྲེལ་གྱི་གནས་ཚུལ་ལྟར་ན། སང་ཉིན་རྒྱ་གར་གྱི་རྒྱལ་ས་ལྡི་ལི་རུ་དམག་སྤྱི་ཁོང་དང་བཟའ་ཟླ་གཉིས་ཀྱི་འདས་མཆོད་སྒྲུབ་གཏན་འཁེལ་ཡོད་པ་དང་། དམག་སྤྱི་ཆེན་མོ་གྷན་བྷེ་པིན་ར་མཆོག་ནི་སྲིད་བློན་མུ་དྷིའི་གཞུང་འཛིན་སྐབས་ཀྱི་ཆེས་མཐོ་བའི་སྤྱི་ཁྱབ་དམག་སྤྱི་དང་བོ་ཆགས་ཀྱི་ཡོད་ཅིང་། ཁོང་ཕྱི་ལོ་ ༡༩༥༨ ལོར་རྒྱ་གར་གྱི་བྱང་ཕྱོགས་མངའ་སྡེ་ཨོ་ཊར་ཁན་ནང་སྐྱེས་ཤིང་། དམིགས་བསལ་རྒྱ་གར་གྱི་དམག་ཤུགས་དེང་རབས་ཅན་དུ་བསྒྱུར་བར་གཙོ་འདོན་གནང་མཁན་ཞིག་ཡིན་པ་རེད།

གསར་འགོད་པ། སྐལ་བཟང་སྦྱིན་པ།