དཔལ་ཇོ་ནང་པའི་སྐབས་དང་པོའི་རྟག་བརྟན་དགེ་བཤེས་ཀྱི་མཛད་སྒོ་ཚོགས།

དཔལ་རྒྱལ་བ་ཇོ་ནང་པའི་སྐབས་དང་པོའི་རྟག་བརྟན་དགེ་བཤེས་ཀྱི་མཐར་ཕྱིན་མཛད་སྒོའི་སྟེང་༧གོང་ས་མཆོག་གི་དབུས་པའི་བོད་ཀྱི་བླ་ཆེན་ཁག་གིས་གསུང་འཕྲིན་སྩལ་གནང་མཛད་པ་དང་ཐེངས་འདིར་ཁྱོན་རྟག་བརྟན་དགེ་བཤེས་བརྒྱད་བྱུང་ཡོད་འདུག

ཁ་སང་ཕྱི་ཚེས་ ༩ ཉིན་སིམ་ལར་རྟེན་གཞི་བྱས་པའི་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དུ། ཇོ་ནང་ཀུན་མཁྱེན་དྲུག་མཆོད་ཆེན་མོ་དང་། འཕགས་ཡུལ་ཇོ་ནང་མ་དགོན་དབུ་བརྙེས་ནས་བགྲང་བྱ་ཉེར་ལྔ་འཁོར་བ། སྐབས་དང་པོའི་ཇོ་ནང་རྟག་བརྟན་དགེ་བཤེས་ཀྱི་མཛད་སྒོ་སྟེ། དུས་ཚོད་གསུམ་འཛོམས་ཀྱི་མཛད་སྒོ་དང་བསྟུན། འཕགས་ཡུལ་ཇོ་ནང་མ་དགོན་ནས་བཀྲིན་རྗེས་དྲན་མཚོན་ཆེད། མཁན་པོ་དང་མཁན་ཟུར་རྣམ་པས་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མ་ནྡྲལ་རྟེན་གསུམ་གྱི་རྟེན་དོད་ཕུལ་བ་དང་སྦྲགས། དམིགས་བསལ་སྐུ་མགྲོན་མཆོག་གིས་དྲུག་བརྒྱ་དྲུག་ཅུའི་ཇོ་ནང་ཀུན་མཁྱེན་དྲུག་མཆོད་ཆེན་མོའི་རྗེས་དྲན་དེབ་ཆུང་དང་ལོ་ཐོ། ཀུན་མཁྱེན་སྐུ་པར་བྱིན་ཅན་བཅས་དབུ་འབྱེད་དང་། སྐབས་དང་པོའི་ཇོ་ནང་དགེ་བཤེས་ཀྱི་མཚན་གནས་བཞེས་མཁན་གྱི་དགེ་བཤེས་བརྒྱད་ལ་བསླབ་པ་མཐར་སོན་གྱི་ཕྱག་འཁྱེར་བཅས་གནང་སོང་།

རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་བླ་མ་ཚུལ་ཁྲིམས་བཟང་པོ་མཆོག་གིས། ཇོ་ནང་ཀུན་མཁྱེན་དྲུག་མཆོད་ཆེན་མོ་དང་། འཕགས་ཡུལ་ཇོ་ནང་མ་དགོན་དབུ་བརྙེས་ནས་བགྲང་བྱ་ཉེར་ལྔ་འཁོར་བ། སྐབས་དང་པོའི་ཇོ་ནང་རྟག་བརྟན་དགེ་བཤེས་ཀྱི་མཛད་སྒོ་སོགས་དང་འབྲེལ་ནས། ཀུན་མཁྱེན་དོལ་པོ་བ་དགོངས་པ་ཆོས་དབྱིངས་སུ་འཐིམས་ཏེ། མི་ལོ་དྲུག་བརྒྱ་དྲུག་ཅུ་འཁོར་བ་དུས་ཆེན་ངོ་སྤྲོད་དང་སྦྲགས། དེ་རིང་མཛད་སྒོར་ཕེབས་པའི་སྐུ་མགྲོན་དང་། སྦྱིན་བདག་དང་དད་ལྡན་མང་ཚོགས་སོགས་ལ་ཐོག་མའི་འཚམས་འདྲི་ཞུས་སོང་ལ་། དེ་བཞིན་དེ་རིང་མཛད་སྒོ་དང་འབྲེལ་ནས། གཡུང་དྲུང་བོན་གྱི་སྨན་རི་གླིང་བཤད་སྒྲུབ་མཁན་པོ་དགེ་བཤེས་ཉི་མ་དོན་གྲུབ་རིན་པོ་ཆེ་མཆོག་དང་། བཀའ་བརྒྱུད་པའི་མཁན་པོ་ཚུལ་ཁྲིམས་བཟང་པོ་མཆོག སྔ་འགྱུར་རྙིང་མའི་སློབ་དཔོན་ཨོ་རྒྱན་བསྟན་འཛིན་མཆོག ས་སྐྱའི་མཁན་པོ་ཁྲིཿའགྱུར་མེད་རྡོ་རྗེ་མཆོག དགེ་ལུགས་པའི་དགེ་བཤེས་ཨ་འཇིགས་མཆོག་བཅས་ཀྱིས། སྐབས་དང་པོའི་ཇོ་ནང་རྟག་བརྟན་དགེ་བཤེས་ཀྱི་མཚན་གནས་བཞེས་མཁན་རྣམས་ཀྱི་གཡུལ་དུ་ཟ་བའི་གྲུབ་འབྲས་ལ་བསྔགས་བརྗོད་གནང་བ་དང་། ལྷག་པར་ཇོ་ནང་མ་དགོན་གྱི་འཛིན་སྐྱོང་ཚོགས་ཀྱི་ལས་དོན་བྱེད་ཕྱོགས་ལ་བསྔགས་བརྗོད་གནང་སོང་ལ། སླད་མར་ཡང་དཔལ་རྒྱལ་བ་ཇོ་ནང་པའི་ཆོས་བརྒྱུད་དེ་ཉིད་གོང་འཕེལ་ཡོང་བའི་སྨོན་འདུན་སོགས་གནང་སོང་།

ཇོ་ནང་གི་མཁན་ཟུར་ཀུན་དགའ་མཚམས་ཆུང་ལགས་ཀྱིས། དེ་རིང་དམིགས་བསལ་ཇོ་ནང་རྟག་བརྟན་དགེ་བཤེས་ཀྱི་མཛད་རིམ་དང་འབྲེལ་ནས།  སྤྱིར་བཏང་སངས་རྒྱས་བཅོམ་ལྡན་འདས་ཀྱི་བསྟན་པ་ལ་ལུང་རྟོག་གི་བསྟན་པ་གཉིས་ཡོད་པ་རེད། ལུང་གི་བསྟན་པ་ཐོས་བསམ་བྱེད་པ་ལ། ཐོག་མར་མདོ་ཕྱོགས་ལ་ང་ཚོས་མཐུན་མོང་གིས་སྡེ་སྣོད་གསུམ་ཞེས་གསུངས་བསྡད་པ་དེ་རེད། དེའི་སྡེ་སྣོད་གསུམ་པོའི་བརྗོད་བྱ་དེ་ཕྱོགས་གཅིག་ཏུ་བསྡུས་ནས་སྡོམ་བརྒྱབ་བཞག་པ་དེ། གཞུང་ཆེན་པོ་ཏི་ལྔ་ཞེས་པ་དེ་ཆགས་ཀྱི་ཡོད་པ་རེད།  གཞུང་པོ་ཏི་ལྔ་ཡི་ནང་དུ་སྡེ་སྣོད་གསུམ་གྱི་བརྗོད་དོན་ཆ་ཚང་འདུས་ཡོད་པ་དེར། གཞུང་ཆེན་པོ་ཏི་ལྔའམ། གཞུང་ཆེན་པོ་ཏི་བཅོ་བརྒྱད་སོགས་བརྩི་སྲོལ་ཁ་ཤས་ཡོད།  དེ་དག་ནང་གི་དོན་དག་ནི་སྡེ་སྣོད་གསུམ་གྱི་བརྗོད་བྱ་ཡོངས་སུ་རྫོགས་པ་འདུས་བཞག་པ་དེ། གཞུང་ཆེན་པོ་ཏི་ལྔ་ཆགས་བསྡད་ཡོད་པ་སོང་ཙང་། དེ་ལན་འདི་ནས་གཞུང་ཆེན་པོ་ཏི་ལྔ་ལ་བསླབ་པ་སློབ་གཉེར་བྱས་པ་ལ་བརྟེན་ནས། མཐར་བསླབ་པ་མཐར་ཕྱིན་རྒྱུའི་འབྲས་རྟགས་དེ་ལ་མཚན་གནས་ཕུལ་བ་དེ་ནི་རྟག་བརྟན་དགེ་བཤེས་ཞེས་པའི་མཚན་གནས་ཕུལ་བ་དེ་རེད། སྤྱིར་བཏང་དེ་འདྲ་ཡི་གཞུང་ཆེན་ལྔར་མཐར་ཕྱིན་པ་དེ་ལ། མཁན་པོ་དང་དགེ་བཤེས། སློབ་དཔོན་སོགས་དེ་འདྲའི་མཚན་གནས་ཕུལ་སྟངས་རིམ་པ་མང་པོ་ཞིག་ཡོད་བསྡད་པ་དེའི་ནང་ནས།  ད་ལན་ང་ཚོས་དགེ་བཤེས་ཀྱི་རིམ་པ་དེར་རྟག་བརྟན་དགེ་བཤེས་ཞེས་མཚན་གནས་ཕུལ་ཡོད་པ་རེད། སྔོན་ཆད་ཀུན་མཁྱེན་ཇོ་ནང་གོང་མ་རྣམས་གསུམ་གྱི་སྐབས་སུ་མདོ་ཕྱོགས་ལ་སློབ་གཉེར་ཧ་ཅང་ཆེན་པོ་ཡོད་པ་རེད།  ཇོ་ནང་རི་ཁྲོད་ཆེན་མོ་དེའང་སྒྲུབ་པའི་རྒྱལ་མཚན་འཛུགས་པ་མ་ཟད། སྒྲུབ་པའི་རྒྱལ་མཚན་བཙུགས་པའི་སྔོན་དུ་ཐོས་པ་སྦྱང་རྒྱུའི་གཞུང་ཆེན་པོ་ཏི་ལྔ་ལ་ཐོས་བསམ་བྱ་རྒྱུའི་ལུགས་སྲོལ་ཞིག་ཡོད་པ་རེད། དེ་བཞིན་ཀུན་མཁྱེན་དོལ་བོ་སངས་རྒྱས་ཀྱི་སྐབས་སུའང་གཞུང་ཆེན་ལ་སློབ་གཉེར་བྱ་རྒྱའི་ལུགས་སྲོལ་ཡོད་པ་རེད། དེ་བཞིན་རྗེས་བཙུན་ཏཱ་ར་ན་ཐ་ཇོ་ནང་རི་ཁྲོད་ཆེན་པོའི་མཁན་པོ་ལ་བཞུགས་ནས།  མདོ་ཕྱོགས་ནས་ཐོས་བསམ་སྒོམ་ཡོད་པ་རེད་འདུག  ད་ལོ་གཞུང་ཆེན་བཀའ་ཕོད་ལྔ་ལ་སློབ་གཉེར་ཚད་ལྡན་གནང་བས་རྟག་བརྟན་དགེ་བཤེས་ཀྱི་མཚན་གནས་ཐོབ་མཁན་བརྒྱད་བྱུང་ཡོད་ཅིང་། དེ་ནི་སྤྱིར་སངས་རྒྱས་ཀྱི་བསྟན་པ་དང་། ནང་དགོས་སུ་རྒྱལ་བ་ཇོ་ནང་པ་དང་མ་དགོན་གཉིས་ཀྱི་གཡུལ་དུ་ཟ་བའི་གྲུབ་འབྲས་ཤིག་ཏུ་ངོས་འཛིན་བྱེད་ཀྱི་ཡོད།  རྟག་བརྟན་དགེ་བཤེས་རྣམས་མཐར་ཕྱིན་ཚར་བའི་རྗེས་ནས་སྔགས་ཀྱི་ཕྱོགས་ལ་སློབ་གཉེར་གྱིས།  དུས་འཁོར་སྦྱོར་དྲུག་ལ་ཉམས་ལེན་བྱ་རྒྱུའི་ལུགས་སྲོལ་ཡོད་པ་བཞིན། དུས་འཁོར་སྦྱོར་དྲུག་གི་ཉམས་ལེན་ལ་ཞུགས་མེད་མཁན་རིགས་ཀྱིས།  དུས་འཁོར་སྦྱོར་དྲུག་གི་ཉམས་ལེན་ལ་ཞུགས་འཆར་ཡོད་པ་རེད། སྤྱིར་རྒྱལ་བ་ཇོ་ནང་པ་ཞིག་ལ་མཚོན་ན་དུས་འཁོར་སྦྱོར་དྲུག་གི་ཉམས་ལེན་ནི་གལ་ཆེན་དུ་རྩི་ཡི་ཡོད་ལ།  དེར་ཞུགས་རྒྱུ་ནི་རྒྱལ་བ་ཇོ་ནང་པའི་མཐུན་མོང་མ་ཡིན་པའི་ལམ་སྲོལ་ཞིག་ཡིན་ཙང་། འདིའི་ཟླ་བ་གསུམ་གྱི་རྗེས་སུ་རྟག་བརྟན་དགེ་བཤེས་རྣམས་དུས་འཁོར་སྦྱོར་དྲུག་གི་ཉམས་ལེན་ལ་ཞུགས་རྒྱུ་ཡིན་པ་རེད།  ཅེས་གསུངས་སོང་།

ཇོ་ནང་ཀུན་མཁྱེན་རྟོན་པ་བཞི་ལྡན་གྱི་འདས་མཆོད་སྟེ་༦༦༠ དུས་དྲན་སྟེང་༧ གོང་ས་རྒྱལ་བ་རིན་པོ་ཆེ་མཆོག་གིས།  དེ་རིང་ཀུན་མཁྱེན་དོལ་པོ་བ་ཁོང་གི་རྗེས་དྲན་སྲུང་ཞུ་བ་ཞིག་ཡོང་གི་ཡོད་རེད། ཀུན་མཁྱེན་དོལ་པོ་བ་དངོས་གནས་དྲང་གནས། བོད་ཀྱི་མཁས་དབང་། ཉམས་ལེན་པ། རྦད་དེ་བསམ་གྱིས་མི་ཁྱབ་པ་ཞིག་རེད། ངས་ནམ་རྒྱུན་འདི་འདྲ་དྲན་གི་ཡོད་པ་རེད།  སངས་རྒྱས་བཅོམ་ལྡན་འདས་ཀྱིས་འཁོར་ལོ་དང་པོ་བདེན་བཞིའི་ཆོས་འཁོར། འཁོར་ལོ་བར་བ་ཤེར་ཕྱིན་གྱི་གཞུང་གིས་ཆོས་རྣམས་བརྟེན་ནས་བཏགས་ཙམ་མ་གཏོགས་ངོ་བོ་ཉིད་ཀྱི་སྤྲོས་པས་སྟོང་བ་དེ་གསུང་གི་ཡོད་རེད། ད་འཁོར་ལོ་ཐ་མའི་སྐབས་ལ་ནི་འཁོར་ལོ་བར་བའི་སྟོང་བ་ཉིད་ཀྱི་ལྟ་བ་དེ་དང་སྦྲེལ་ནས། ཡུལ་ཅན་སེམས་ཀྱི་རྣམ་བཞག་དེ་བསམ་བློ་བཏང་ཡོང་དུས་ན། སེམས་རང་བཞིན་གྱིས་འོད་གསལ་བ། དེའི་སྒང་ལ་དེ་འདྲ་དགོངས་པ་བཞེས་པ་ཞིག་ཆགས་ཡོད། ཇོ་ནང་གི་སྔོན་གྱི་མཁས་པ་ཚོས་དགོངས་པ་བཞེས་པ་ཞིག་དེ་མཐོང་། འཁོར་ལོ་བར་བའི་སྐབས་སུ་བརྟེན་ནས་བཏགས་པའི་རྟེན་འབྱུང་གི་གཏམ་དེ་གསུངས་ཚར་བ་རེད། རྟེན་འབྱུང་དེ་གོམས་མཁན་གྱི་ཡུལ་ཅན་འོད་གསལ་དེའི་སྒང་ནས་མཐར་ཐུག་སྔགས་ལམ་གྱི་གཉུག་མའི་འོད་གསལ་བ་དེ་གསུང་གི་ཡོད་རེད།  སྔོན་ལ་སྔགས་ལམ་ལ་མ་སླེབ་གོང་ནས་འཁོར་ལོ་ཐ་མའི་སྐབས་སུ་སེམས་རང་བཞིན་གྱིས་འོད་གསལ་བ་དེ་དེ་འདྲ་གསུང་གི་འདུག

ཀུན་མཁྱེན་དོལ་པོ་བས། སེམས་རང་བཞིན་གྱིས་འོད་གསལ་བ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མ་འགགས་ནམ་མཁའི་ངོ་བོ་ཉིད། །སོ་སོར་རང་རིག་ཡེ་ཤེས་སྤྱོད་ཡུལ་བ། །ཞེས་ཟེར་བ་དེའི་ཡུལ་ཅན་འོད་གསལ་གྱི་རྣམ་བཞག་དེ་གསུངས་པ་རེད།  ཁ་ཐུག་ལ། འཁོར་ལོ་བར་བས་ཡུལ་གྱི་འོད་གསལ་སྟོང་བ་ཉིད་དེ་གསུང་། འཁོར་ལོ་ཐ་མས་ཡུལ་ཅན་གྱི་འོད་གསལ་དེ་གསུང་། དེ་འདྲ་ཡིན་ཕྱིར། ཡུལ་ཅན་གྱི་འོད་གསལ་ལབ་དུས། རང་བཞིན་གྱིས་སྤྲོད་པས་སྟོང་པ་ད་རེད་དེ་ཁོ་རང་གསལ་ཙམ་རིག་ཙམ་ཞིག་གི་སྒང་ནས་བསམ་བློ་བཏང་གི་ཡོད་པ་རེད། ང་རང་ཚོས་དཔེར་ན་སྒོམ་རྒྱག་པའི་སྐབས་སུ་སྟོང་བ་ཉིད་ཀྱི་ལྟ་བ་གོམས་ཡོང་དུས་དགག་བྱ་བཀག་ཙམ་ཞིག་བློ་ལ་ཤར་བསྡད་པ་ཞིག  དེ་ནས་ཆོས་སྐུའི་ང་རྒྱལ་ཕྱོགས་ནས་བརྩིས་པ་ཡིན་ན།  ངོ་བོ་ཉིད་ཀྱིས་སྟོང་བའི་སེམས་སྐྱེ་འགགས་གནས་གསུམ་དང་བྲལ་བ། དེའང་ཞིབ་ཚགས་སུ་བྱས་ན། རང་བཞིན་བརྒྱད་ཅུའི་ཀུན་རྟོག་དེ་ཕར་བསལ་ནས། ཐ་མར་སྣང་མཆེད་ཐོབ་གསུམ་གྱི་འོད་གསལ་སྒང་ལ་ཕར་སེམས་བཞག་པ་ཞིག  ཀུན་མཁྱེན་དོལ་པོ་བ་ཤེས་རབ་རྒྱལ་མཚན་གྱིས་གསུངས་པ་དེ་དེའི་སྒང་ལ་སླེབ་ཀྱི་བསམ་ནས་ངས་དེ་དྲན་གྱི་ཡོད་རེད། འཁོར་ལོ་ཐ་མའི་སྐབས་ཀྱི། ཡུལ་ཅན་འོད་གསལ་གྱི་རྣམ་བཞག་དེའི་སྒང་ལ་སྟོང་ཉིད་སྒོམ་པ་སྟེ།  དེ་ནས་ཡུལ་ཅན་འོད་གསལ་གྱི་རྣམ་བཞག་གསལ་བ་ཞིབ་ཚགས་པོ་དེ་ཅི་ལྟར་གོམས་མཁན་ཚོའི་འགྲེལ་བཤད་ཡོད་པ་དེ་དང་། སྤྱིར་གསང་སྔགས་དེའི་ནང་ནས་གསང་སྔགས་བླ་མེད་ཀྱི་ཆོས་འཁོར་དེ་ཞེ་བོ་ཞིག་འདུག ཀུན་མཁྱེན་ཇོ་ནང་བས་དགོངས་པ་དེ་བཞེས་ཀྱི་ཡོད་པ་རེད་དྲན།

ཀུན་མཁྱེན་ཇོ་ནང་བས་སེམས་རང་བཞིན་གྱིས་འོད་གསལ་བ་དེའི་སྒང་ནས་དགོངས་པ་དེ་འདྲ་བཞེས་དུས། ཏོག་ཙམ་བསམ་བློ་གུ་དོག་པོར་གཏོང་མཁན་ཚོའི་གྲལ་ནས་ཕར་བལྟས་པ་ཡིན་ན། ཡུལ་གྱི་འོད་གསལ་དེའི་སྐོར་ལ་རྩལ་འདོན་མ་གནངས་པར་བྱས། ཡུལ་ཅན་གྱི་འོད་གསལ་སྒང་ལ་གསུང་ཡོང་དུས།  གཞན་སྟོང་ཟེར་བ་དེའི་སྐད་ཆ་དེ་བཤད་བསྡད་པ་རེད།  ཁོ་ཡག་པོ་ཞིག་བསམ་བློ་བཏང་བ་ཡིན་ན། སོ་སོའི་ཉམས་ལེན་དང་སྦྲེལ་ནས་བསམ་བློ་བཏང་ན། འཁོར་ལོ་བར་ཐ་གཉིས་སྦྲེལ་ནས་འགྲོ་དགོས་པ་དེ་གསལ་བོ་ཞེ་དྲགས་རེད། དེ་རིང་ཀུན་མཁྱེན་དོལ་པོ་བའི་རྗེས་དྲན་དུས་ཚིགས་ཤིག་ཤར་ནས།  བོད་ཀྱི་དངོས་གནས་དྲང་གནས་ཀྱི་མཁས་གྲུབ་གཉིས་ལྡན་གྱི་སྐྱེ་བུ་དམ་པ་དེ་འདྲ་ཞིག་རེད།  དེའི་བཀའ་དྲིན་རྗེས་སུ་དྲན་པའི་ཐོག་ནས། ང་རང་ཚོས། སྤྱིར་བཏང་གཞན་སྟོང་དང་རང་སྟོང་ཟེར་བ་འདྲ་བོ། རྩོད་པ་རྩོད་དུས། ཁ་ཐུག་གིས། དེ་འདྲ་ནམ་རྒྱུན་ཚིག་སྐམ་པོ་ཞིག་ལ་འཇུས་བསྡད་ཡོད་པ་འདྲ་བོ་ཞིག་ཡོང་གི་ཡོད་རེད། ད་དེ་འདྲ་མེད་པ་གྱིས། ལྷོད་ལྷོད་བྱས་ནས།  ཀུན་མཁྱེན་དོལ་པོ་བས་དགོངས་པ་བཞེས་ཕྱོགས་དངོས་གནས་གཞན་སྟོང་ཟེར་ས་དེ། དགོངས་པ་བཞེས་ས་ག་འདྲ་ཞིག་ལ་སླེབ་ཀི་འདུག  ཕར་ཞིབ་ཚགས་པོ་བྱས་ནས་བསམ་བློ་བཏང་། དེ་ནས་ཉམས་མྱོང་དང་སྦྲེལ་ནས་བལྟས་པ་ཡིན་ན་དངོས་གནས་དྲང་གནས་ཀུན་མཁྱེན་དོལ་པོ་བ་ཁོང་ང་ཚོ་བོད་གངས་ཅན་གྱི་ལྗོངས་ཀྱི་མཁས་པའི་དབང་པོ། མཁས་གྲུབ་གཉིས་ལྡན་དེ་འདྲ་ཞིག་ཆགས་བསྡད་ཡོད་པ་རེད། ངོ་ཚོས་རྗེས་དྲན་འོས་པ་ཞིག་ཆགས་བསྡད་ཡོད་པ་ཞིག་རེད།  ཅེས་གསུངས་སོང་།

གཞན་ཡང་༧རྒྱལ་བ་ཀརྨ་པ་མཆོག་ནས་དཔལ་ཇོ་ནང་ཀུན་མཁྱེན་དོལ་པོ་བ་མཆོག་གི་མཛད་འཕྲིན་དང་དཔལ་ཇོ་ནང་ཆོས་བརྒྱུད་ཀྱི་ལོ་རྒྱུས་དང་སྦྲགས། ང་རང་རྒྱ་གར་ལ་བཙན་བྱོལ་དུ་འབྱོར་རྗེས་འཕགས་ཡུལ་ཇོ་ནང་གི་གདན་སའི་མཁན་སློབ་རྣམས་དང་འབྲེལ་བ་བྱུང་བ་རེད་ལ། ཇོ་ནང་མ་དགོན་ལ་ཐེངས་གཅིག་བཅར་རྒྱུའི་གོ་སྐབས་བྱུང་། དེ་བཞིན་ནམ་རྒྱུན་ཡིན་ནའང་ང་རང་ངོས་ནས་ག་ཚོད་ཐུབ་ཐུབ་ཀྱིས་ཇོ་ནང་གི་བསྟན་པ་མི་ཉམས་ཡུན་དུ་གནས་བའི་ཆེད་དུ་སྨོན་ལམ་རྒྱག་གི་ཡོད་ལ། དངོས་ཤུགས་བརྒྱུད་གསུམ་ནས་ག་ཚོད་ཐུབ་ཐུབ་ཀྱིས་ཞབས་འདེགས་ཞུ་ཡི་ཡོད། དེར་བརྟེན་དེ་རིང་དོན་སྙིང་ལྡན་པའི་མཛད་སྒོ་འདི་ལྟ་བུ་ཞིག་ལ་མཉམ་ཞུགས་བྱས་ཏེ་ཚིག་འགའ་ཤས་ཞུ་རྒྱུ་བྱུང་བ་དེར་ཧ་ཅང་དགའ་བོ་བྱུང་། ཞེས་གསུངས་སོང་།

ས་སྐྱ་ཁྲི་འཛིན་༧རཏྣ་བཛྲ་རིན་པོ་ཆེ་མཆོག་ནས། སྤྱིར་བཏང་ང་རང་ཚོ་བོད་བརྒྱུད་ནང་བསྟན་གྱི་རྗེས་འབྲང་པ་ཚང་མས། ཐོག་མའི་ཀུན་སློང་བྱང་ཆུབ་ཀྱི་སེམས་བསྐྱེད་དགོས་པ་དང་བར་དུ་བསོད་ནམས་ཡེ་ཤེས་ཀྱི་ཚོགས་གཉིས་གསོག་པ། མཐར་གོ་འཕང་ཐོབ་པ་སོགས་དགོངས་པ་གཅིག་མཚུངས་རེད། ཡིན་ནའང་རྩལ་སྟོན་ཕྱོགས་ཀྱི་ཐོག་ནས་ཁྱད་པར་ཡོད་པ་རེད། དེའི་ནང་ནས་ཇོ་ནང་གི་ཆོས་བརྒྱུད་འདིའི་༧ཀུན་མཁྱེན་དོལ་པོ་བ་ཤེས་རབ་རྒྱལ་མཚན་མཆོག་གིས་ཐུན་མོང་གདུལ་བྱའི་སྣང་ངོར་བསྟན་དང་འགྲོ་བའི་དོན་དུ་སྲིད་པ་བཟུང་བར་མཛད་པ་དང་ཚུལ་ཁྲིམས་རྣམ་པར་དག་པར་གནས་པའི་ཐོག བླ་མ་དུ་མར་བསྟེན་པར་མཛད་ནས་མདོ་དང་སྔགས་ཀྱི་ཟབ་པ་དང་རྒྱ་ཆེ་བའི་དམ་པའི་ཆོས་རྒྱ་ཆེན་པོ་ལ་གསན་བསམ་མཛད་པ་དང་། དེ་བཞིན་གོམས་པ་ཉམས་ལེན་མཛད་ནས་གོ་འཕང་མཐོན་པོར་གཤེགས་པའི་སྐྱེས་ཆེན་དམ་པ་ཞིག་ཡིན་པ་རེད། ཅེས་དང་ད་དུང་དགུང་ལོ་ ༣༡ སྟེང་ལ་ཇོ་ནང་དུ་ཕེབས་ནས་མཁས་བཙུན་ཡོན་ཏན་རྒྱ་མཚོ་ལས་ཟབ་པ་དང་རྒྱ་ཆེ་བའི་དམ་པའི་ཆོས་གསན་ནས་ཇོ་ནང་གི་ཆོས་བརྒྱུད་ལ་ཞུགས་པར་མཛད་ཡོད་སྐོར་དང་། བསྟན་བཅོས་ཆེན་པོ་དུ་མ་བརྩམས་པ་ལ་སོགས་པའི་ལོ་རྒྱུས་ངོ་མཚར་ཅན་མང་པོ་བྱུང་ཡོད་པ་དང་། དེ་རིང་གི་དུས་ཆེན་འདིར་རྗེས་སུ་ཡི་རངས་ཞུ་རྒྱུ་དང་། ལོ་གཅིག་རིང་བཀའ་དྲིན་རྗེས་དྲན་གྱི་གནང་སྒོ་མཐའ་དག་ལེགས་གྲུབ་ཡོང་བའི་སྨོན་འདུན་ཡོད་སྐོར་གསུངས་སོང་།

དེ་བཞིན་སྨན་རི་ཁྲི་འཛིན་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ནས་གནང་བའི་གསུང་འཕྲིན་ནང་། ད་ལན་ཀུན་མཁྱེན་དོལ་པོ་བ་བདེ་བར་གཤེགས་པའི་དུས་ཚིགས་ཁྱད་པར་བ་ཞིག་ཡིན་སྟབས། མགོན་པོ་གང་ཉིད་ཀྱི་གསང་གསུམ་གྱི་མཛད་འཕྲིན་རྣམས་རྗེས་སུ་དྲན་པའི་ཐོག་ནས་གསུང་གི་བདུད་རྩི་ཟབ་མོ་རྣམས་ཉམས་ལེན་དང་། ཐུགས་ཀྱི་དགོངས་པ་ཇི་བཞིན་སྒྲུབ་པ་ནི་བཀའ་དྲིན་རྗེས་དྲན་གྱི་ཚུལ་ཞིག་རེད། དཔལ་ཇོ་ནང་པའི་གཞུང་ལུགས་དྲི་མ་མེད་པ་གཞུང་ཆེན་ཁག་ལ་ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་བྱས་པའི་འབྲས་རྟགས་སུ། དགེ་བའི་བཤེས་གཉེན་ཆེན་པོའི་དམ་བཅའ་འཇོག་ཐུབ་པ་འདི་ནི་བཀའ་དྲིན་རྗེས་དྲན་ཞུ་སྟངས་ངོ་མ་ཞིག་རེད། དེ་ལས་ལྷག་པའི་བཀའ་དྲིན་རྗེས་དྲན་ཞུ་ཚུལ་ཞིག་ཡོད་པ་མ་རེད། ཅེས་གསུངས་སོང་།

༧ཇོ་ནང་རྒྱལ་ཚབ་རིན་པོ་ཆེ་མཆོག་གིས། དེ་རིང་སྤྱི་ལོ་ ༢༠༢༡ ཟླ་ ༡༢ ཚེས་ ༩ དང་བོད་ཟླ་ ༡༠ ཚེས་ ༦ གི་ཉིན། ཇོ་ནང་སྐུ་ཕྲེང་ཀུན་མཁྱེན་དོལ་པོ་བ་སྐུ་མྱ་ངན་ལས་འདས་ནས་ལོ་ངོ་ ༦༦༠ འཁོར་བའི་དུས་ཚིགས་ཁྱད་པར་ཅན་དང་། ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དབུ་བརྙེས་ཏེ་ལོ་ངོ་ ༢༥ འཁོར་བ། དེ་བཞིན་སློབ་གཉེར་བ་རྣམས་ཀྱིས་སློབ་གཉེར་མཐར་ཕྱིན་ནས་རྟག་བརྟན་དགེ་བཤེས་གཏོང་བ་བཅས་དུས་ཚིགས་གསུམ་འཛོམས་ཀྱི་ཉིན་མོ་ཁྱད་པར་ཅན་འདིར། སྐུ་མགྲོན་རྣམ་པ་གཙོ་བོ་བྱས་པའི་དགེ་འདུན་པ་རྣམ་པ་ཚང་མར་ཐོག་མར་འཚམས་འདྲི་བཀྲ་ཤིས་བདེ་ལེགས་ཞུས་པ་དང་སྦྲགས། དེ་རིང་རྒྱལ་སྤྱིའི་འགྲོ་ཕན་ལྷན་ཚོགས་ཀྱིས་ཚིག་ཁ་ཤས་ཤིག་བཤད་དགོས་རེད་གསུངས་བ་ལྟར། དེ་རིང་ཀུན་མཁྱེན་དོལ་པོ་བའི་བཀའ་དྲིན་རྗེས་དྲན་གྱི་ཚུལ་དུ་མཛད་སྒོ་ཞིག་དབུ་ཚུགས་པ་དང་། ལོ་གཅིག་གི་བཀའ་དྲིན་རྗེས་དྲན་ཞུ་ཡུལ་དེར་མཆོད་འབུལ་དང་བསོད་ནམས་གསོག་པའི་ཐབས་ལ་འབད་འབུངས་བྱེད་པའི་དུས་ཤིག་ཡིན་སྐོར་དང་། འདས་མཆོད་ལ་སོགས་པའི་ཐབས་ལ་མཆོད་འབུལ་བྱས་ནས་བསོད་ནམས་རྒྱ་ཆེན་པོ་གསོག་གི་ཡོད་པ་དང་བསོད་ནམས་དེ་ལ་བརྟེན་ནས་ཡུལ་ཕྱོགས་ས་ཕྱོགས་ཀྱི་སེམས་ཅན་མང་པོར་ཕན་ཡོན་སྒྲུབ་ཀྱི་ཡོད་པ་མདོ་རྒྱུད་མང་པོའི་ནང་གསུངས་ཡོད་སྐོར་གསུངས་སོང་།

ས་གནས་སྤྱི་ཁྱབ་སྐུ་ངོ་མི་འགྱུར་གཡུ་སྒྲོན་ལགས་ཀྱིས།  དེ་རིང་གི་ཉིན་མོ་དང་འབྲེལ་ནས།   སིམ་ལ་སྤྱི་ཁྱབ་ལས་ཁུངས་ཀྱི་ཁྱབ་ཁུངས་སུ་ས་གནས་ཁག་དགུ་དང་། དགོན་ཁག་ ༢ ཡོད་པའི་ནང་ནས་འཕགས་ཡུལ་ཇོ་ནང་མ་དགོན་ཕུན་ཚོགས་གཅིག་ཆགས་ཀྱི་ཡོད་རེད། ༧རྒྱལ་བ་ཇོ་ནང་བ་དེ་བཞིན་སྤྱི་ཡོངས་ཐོག་ནས་བོད་གངས་ཅན་ལྗོངས་ཀྱི་ཆོས་བརྒྱུད་ཆེན་པོ་དྲུག་གི་ནང་གཅིག་ཡིན་པ་དང་། དེ་ཡང་སྟོན་པ་སངས་རྒྱས་བཅོམ་ལྡན་འདས་ཀྱི་མདོ་སྔགས་གཉིས་ཀྱི་ཐོག་ནས། སློབ་གཉེར་དང་ཉམས་ལེན་གནང་མཁན་ཁྱད་པར་འཕགས་པའི་ཆོས་བརྒྱུད་ཅིག་ཆགས་བསྡད་ཡོད་རེད།  དེ་རིང་འཕགས་ཡུལ་ཇོ་ནང་འཕགས་ཡུལ་ཇོ་ནང་མ་དགོན་ཕུན་ཚོགས་ཆོས་གླིང་གི་སྐབས་དང་པོའི་རྟག་བརྟན་དགེ་བཤེས་ཀྱི་མཛད་སྒོ་ཡང་འཁེལ་གྱི་ཡོད་སྟབས། སྐབས་དང་པོའི་དགེ་བཤེས་རྣམས་དང་སློབ་གཉེར་གནང་བཞིན་པའི་མ་འོངས་པའི་དགེ་བཤེས་རྣམ་པས། སངས་རྒྱས་བཅོམ་ལྡན་འདས་ཀྱི་གསུང་སློབ་ཉམས་ལེན་ཞུས་དེ་དག་ད་ལྟའི་དུས་རབས་ ༢༡ འཛམ་གླིང་འདིར་མུན་པ་སེལ་བའི་སྒྲོན་མེ་ལྟར་འཛམ་གླིང་ནས་སྔར་ལས་ལྷག་བདེ་སྐྱིད་བསྐྲུན་ཐུབ་མཁན་གྱི་རྒྱལ་བ་ཇོ་ནང་པའི་ཆོས་བརྒྱུད་འཛིན་མཁན་ཡོང་ཐུབ་པའི་སྨོན་འདུན་ཞུ། ཞེས་གསུངས་སོང་།

ཆོས་རིག་ལས་ཁུངས་ཀྱི་སྐུ་ཚབ་སྐུ་ངོ་བདུད་འདུལ་རྡོ་རྗེ་མཆོག་གིས། ༧གོང་ས་སྐྱབས་མགོན་ཆེན་པོ་མཆོག་གི་ཐུགས་སྐྱོར་གྱི་འོག་ནས། བོད་མི་རྣམས་ནི་བཙན་བྱོལ་བ་འདྲའི་ནང་གི་མི་འདྲ་བ་ཞིག་ཏུ་འགྱུར་ཡོད་པ་རེད། བོད་ནང་དུ་མཚོན་ན། རྒྱ་ནག་གཞུང་གིས་བོད་ནང་གི་རིག་གཞུང་གི་སྟི་གནས་ཁག་དང་། སྒེར་ཚུགས་སློབ་གྲྭ་ཁག་སྒོ་བརྒྱབ་བཅུག་ནས་དྲག་གནོན་བྱེད་མུས་ཡིན་པ་རེད།  བོད་ཀྱི་ཆོས་རིག་ལ་བརྟེན་ནས། བོད་མི་ཚོར་སེམས་ཀྱི་བདེ་སྐྱིད་བསྐྲུན་ཐུབ་པ་དང་། ལྷག་པར་བོད་ཀྱི་ཆོས་རིག་ནི་འཛམ་གླིང་གི་གཅེས་ནོར་དུ་ངོས་འཛིན་བྱེད་ཀྱི་ཡོད་པས། བོད་ཀྱི་ཆོས་རིག་ཉར་ཚགས་དང་། རྒྱུན་འཛིན་བྱ་རྒྱུ་གལ་ཆེན་པོ་ཡིན་པ་རེད། བཙན་བྱོལ་ནང་གི་བོད་ཀྱི་རིག་གཞུང་གི་སྲོག་རྩ་ནི་ཆོས་བརྒྱུད་རིས་སུ་མ་ཆད་པའི་དགོན་སྡེ་ཁག་ཆགས་ཡོད་སྟབས། མི་ལོ་དུ་མར་བསླབ་པ་སློབ་གཉེར་གནང་གི་ཡོད་ལ། ཁོང་ཅག་གིས་ཀྱང་དགོན་སྡེ་སོ་སོར་རང་ཁ་རང་གསོ་བྱེད་མུས་ཡིན་པ་དང་། ལྷག་པར་རྟག་བརྟན་དགེ་བཤེས་རྣམས་ཀྱིས་ཀྱང་ངལ་བ་ཁྱད་དུ་བསད་ནས། གཡུལ་ཟའི་འབྲས་བཟང་སྨིན་པར་དགའ་བསུ་དང་། སླད་མར་ཡང་མུ་མཐུད་ཤེས་རིག་ཡར་སྐྱེད་ཡོང་བའི་སྨོན་འདུན་ཡོད་སྐོར་སོགས་གསུངས་སོང་།

གསར་འགོད་པ། དཔལ་ལྡན།