བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་བསྡུའི་རེའུ་མིག་བསྐྱར་སྒྲིག་བྱས་པའི་དྲྭ་ཚིགས་ཤིག་དབུ་འབྱེད་གནང་།
དེ་རིང་ཉིན་རྒྱབ་ཆུ་ཚོད་ ༢།༣༠ ཐོག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། འགྲོ་བ་མིའི་ཐོབ་ཐང་ཉིན་མོར་བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་བསྡུའི་རེའུ་མིག་བསྐྱར་སྒྲིག་བྱས་པའི་དྲྭ་ཚིགས་ཤིག་དབུ་འབྱེད་མཛད་སྒོའི་གསར་འགོད་གསལ་བསྒྲགས་སྤེལ་བ་དང་། མཉམ་འབྲེལ་རྒྱལ་ཚོགས་ཀྱི་གཏན་འབེབས་ཆེད་བརྗོད་འདྲ་མཉམ་ཞེས་པ་བདམས་ཏེ་འགྲོ་བ་མིའི་ཐོབ་ཐང་གི་ཉིན་མོ་སྲུང་གཙི་ཞུས་སོང་།
ཐེངས་འདིའི་གསར་འགོད་གསལ་བསྒྲགས་སྟེང་ཐོག་མར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཉི་འོད་ལགས་ཀྱིས། མཉམ་འབྲེལ་རྒྱལ་ཚོགས་ཀྱིས་ཡོངས་ཁྱབ་འགྲོ་བ་མིའི་ཐོབ་ཐང་གསལ་བསྒྲགས་བྱས་ནས་ལོ་ ༧༣ འཁོར་བའི་ཉིན་མོ་དེ་འགྲོ་བ་མིའི་ཐོབ་ཐང་གི་ཉིན་མོ་ཆགས་ཡོད་པ་རེད། དེ་རིང་གི་ཉིན་མོ་གལ་ཆེན་པོ་འདི་དང་སྟབས་བསྟུན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཕྱི་ལོ་ ༡༩༩༠ ནས་ཉར་ཚགས་བྱས་པའི་བོད་ཀྱི་ཆབ་སྲིད་བཙོན་ཟུར་ ༥༥༠༠ ལྷག་གི་གནས་ཚུལ་འཁོད་པའི་གནས་བསྡུས་རེའུ་མིག་ཅིག་དྲྭ་ཚིགས་སུ་བསྐྱར་སྒྲིག་བྱས་ཏེ་འདོན་སྤེལ་བྱེེད་ཀྱི་ཡོད་སྐོར་དང་། ང་ཚོའི་རྒྱལ་ཁབ་འདི་རྒྱ་ནག་གི་བཙན་འོག་ཏུ་ཡོད་པར་བརྟེན། བོད་ནང་གི་འགྲོ་བ་མིའི་ཐོབ་ཐང་དེ་ལོ་རེ་ནས་ལོ་རེ་ཛ་དྲག་ཇེ་ཆེར་འགྲོ་བཞིན་ཡོད་པས། དེ་རིང་གི་ཉིན་མོ་འདི་སོ་སོ་ལ་འགྲོ་བ་མིའི་ཐོབ་ཐང་མེད་པའི་དྲན་གསོ་བྱས་པའི་ཉིན་མོ་གལ་ཆེན་ཞིག་ཆགས་ཀྱི་ཡོད་པ་རེད། དེ་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་གནས་ཚུལ་མཁོ་སྤྲོད་བྱུང་བའི་ནང་། ལོ་གཅིག་གི་ནང་བོད་ནང་གི་བོད་མི་ ༡༦༠ ཙམ་འཛིན་བཟུང་བཀག་ཉར་དང་སྡུག་སྦྱོང་མནར་གཅོད་བཏང་བ། འགྲོ་བ་མིའི་ཐོབ་ཐང་རྡོག་རོལ་བཏང་ཡོད་པའི་གནས་ཚུལ་ལག་སོན་བྱུང་སོང་། སྤྱི་ཡོངས་ཀྱིས་བོད་ནང་སྨྲ་བརྗོད་རང་དབང་དང་ཆོས་དད་རང་དབང་། བསམ་བློའི་རང་དབང་སོགས་མེད་པ་ནི་ང་ཚོ་ཚང་མས་ཧ་གོ་ཡི་ཡོད་པ་རེད། འདི་ལོ་ཕྱི་ཟླ་ ༧ པའི་ནང་ཞི་ཅིན་ཕིང་བོད་དུ་ཡོང་སྟེ་ངེས་པར་དུ་བསྒྲུབ་དགོས་པའི་དོན་ཚན་དགུ་བགྲངས་པའི་ནང་བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་རྒྱུ་དང་རྒྱ་ནག་གི་འོག་ཏུ་མི་རིགས་མཐུན་སྒྲིལ་ཡོང་ཐབས་སུ་ཁ་གཡར་ནས་མི་རིགས་ཁག་གི་དབར་སྤེལ་རིས་དང་མཉམ་འདྲེས་བྱ་དགོས་པའི་སྐུལ་མ་ཤུགས་དྲག་བྱས་ཡོད་ཅིང་། བོད་མིའི་ངོ་བོ་རྩ་བརླག་ཏུ་བཏང་སྟེ་བོད་རིགས་རྒྱ་རིགས་སུ་བསྒྱུར་ཐབས་སུ་ཀྲུང་ཧྭ་མི་རིགས་གཅིག་མཐུན་བསྡུ་སྒྲུབ་ཀྱི་འདུ་ཤེས་ཟེར་བ་ཡོད་དགོས་ཟེར་ནས་བོད་ཀྱི་སྐད་ཡིག་སློབ་སའི་སྒེར་བཙུགས་སློབ་གྲྭ་མང་དག་ཅིག་རིམ་པས་སྒོ་བརྒྱབ་ཏུ་བཅུག་ཅིང་། བོད་ནང་གི་གཞུང་བཙུགས་སློབ་གྲྭ་ཁག་གི་བསླབ་གཞིའི་སྐད་ཡིག་རྒྱ་ཡིག་ཏུ་བསྒྱུར། འདི་ལོའི་ཕྱི་ཟླ་ ༩ པའི་ཚེས་ ༡ ཉིན་བོད་ནང་གི་སྔོན་འགྲོའི་སློབ་གྲྭ་ཡན་ཆད་དུ་རྒྱའི་སྤྱི་སྐད་སློབ་དགོས་པའི་སྒྲིག་གཞི་བཟོས་ཤིང་རྒྱའི་སྤྱི་སྐད་དར་སྤེལ་གྱི་ཕྱོགས་ནས་བོད་རང་སྐྱོང་ལྗོངས་སོགས་སུ་ལས་འགུལ་གྱི་ཚ་རླབས་འཕྱུར་བ་སྤེལ། བོད་ཀྱི་སྲོལ་རྒྱུན་རིག་གནས་ཀྱི་སྲོག་ཤིང་ལྟ་བུའི་དགོན་སྡེ་ཁག་གི་ནང་དུའང་རྒྱའི་སྤྱི་སྐད་དར་སྤེལ་བཏང་སྟེ་རྒྱ་ཡིག་ཏུ་ནང་ཆོས་སློབ་གཉེར་བྱ་རྒྱུའི་འཆར་གཞི་བསྒྲིགས་ཡོད་པ་དང་། ད་དུང་རྒྱ་ནག་གིས་སྒོ་ཤེར་རབ་རྒྱ་མཚོ་སོགས་སྤྱི་ཚོགས་ཁྲོད་ཤུགས་རྐྱེན་ཡོད་པའི་བོད་ཀྱི་ཤེས་ལྡན་མི་སྣ་གལ་ཆེན་མང་དག་ཅིག་དོན་མེད་དུ་འཇུ་བཟུང་བཙན་ཁྲིད་བྱས་ཤིང་། རྒྱ་དམག་གིས་བོད་མི་ཚོའི་ཁང་ཁྱིམ་དང་ཁ་པར་གང་བྱུང་བསྔོག་བཤེར་བྱས་ཏེ་༧གོང་ས་མཆོག་གི་སྐུ་པར་ཉར་བའི་རྒྱུ་མཚན་གཙོ་བོར་བྱས་ནས་རྫ་དབོན་པོ་དང་སྐྱེ་དགུ་མདོ་སོགས་ནས་བོད་མི་བརྒྱ་ལས་བརྒལ་བ་འཇུ་བཟུང་བཀག་ཉར་བྱས་ཤིང་འགའ་ཤས་ཀྱི་གནས་སྟངས་ད་དུང་གསལ་ཁ་མེད་པར་བཙན་དབང་འོག་གར་སོང་ཆ་མེད་དུ་གྱུར་བའི་གནས་སུ་གྱུར་ཡོད། བོད་རིགས་ལས་བྱེད་པ་ཚོའི་ནང་མི་བུ་ཕྲུག་དང་བཅས་པ་ཆོས་ལུགས་ཀྱི་བྱེད་སྒོར་ཞུགས་མི་ཆོག་པའི་བཙན་བཀའ་བཏང་བ་སོགས་འདི་ལོ་ལོ་གཅིག་ཁོ་ནའི་གནས་ཚུལ་ལ་བལྟས་ཀྱང་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་ལ་བཟང་ཕྱོགས་ཀྱི་འགྱུར་བ་ཞིག་གཏན་ནས་མེད་པ་མ་ཟད་ཛ་དྲག་ཇེ་ཆེར་འགྲོ་བཞིན་ཡོད་པ་མངོན་གསལ་རེད། ཅེས་བརྗོད་སོང་།
དེ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ལས་བྱེད་ཟླ་བ་ལགས་ཀྱིས་དྲ་ཚིགས་དང་འབྲེལ་བའི་སྐོར་ངོ་སྤྲོད་གནང་དོན། འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ཀྱི་དོན་ཚན་དང་པོའི་ནང་དུ་མི་ཐམས་ཅད་སྐྱེས་དུས་ནས་རང་དབང་ཡིན་ལ་ཆེ་མཐོང་དང་ཐོབ་ཐང་འདྲ་མཉམ་ཡིན་ཞེས་འཁོད་ཡོད་པ་རེད། དེ་ནི་འགྲོ་བ་མིའི་ཐོབ་ཐང་ཡོངས་རྫོགས་ཀྱི་སྲོག་ཤིང་ཡིན་ལ་མཉམ་འབྲེལ་རྒྱལ་ཚོགས་ཀྱི་ ༢༠༣༠ ལོའི་ཡུན་གནས་གོང་འཕེལ་གྱི་དམིགས་ཚད་ཀྱི་སྙིང་པོའང་ཡིན། བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་མཚན་གཞུང་ཡོད་པའི་དྲྭ་ཚིགས་འདི་བསྐྱར་སྒྲིག་བྱས་པའི་གོ་རིམ་གྱི་ཁྲོད་ང་ཚོས་སྔ་མོ་ནས་ཉར་ཚགས་བྱས་པའི་ཡིག་ཚགས་རེ་རེ་བཞིན་ཞིབ་བཤེར་དང་སྐབས་སོ་སོའི་ཆབ་སྲིད་བཙོན་པ་རྣམས་ཀྱི་གནས་ཚུལ་སྔ་ཕྱི་བར་གསུམ་ཀུན་ལ་རྩད་ཞིབ་ནན་པོ་བྱས་ཏེ་གཟབ་ནན་ངང་བསྐྱར་སྒྲིག་བྱས་པ་ཡིན་པས་འདི་ནི་རྒྱ་ཆེའི་འགྲོ་བ་མིའི་ཐོབ་ཐང་དོན་གཉེར་བ་རྣམ་པ་དང་ཉམས་ཞིབ་པ་རྣམ་པ། ཕྱི་ནང་གི་ཚོགས་སྒེར་གྱི་མི་སྣ་སུས་གཟིགས་ཀྱང་དྲྭ་ཚིགས་འདི་ཉིད་འདས་པའི་མི་ལོ་ ༣༠ ལྷག་གི་རིང་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཅི་འདྲ་ཡིན་མིན་གསལ་པོ་རྟོགས་བྱེད་དུ་ངོས་འཛིན་ཞུ་ཆོག་པ་ཡིན། ང་ཚོ་ལྟེ་གནས་ཁང་གིས་དེ་རིང་འགྲོ་བ་མིའི་ཐོབ་ཐང་ཉིན་མོ་དང་སྟབས་བསྟུན་བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་ཚུལ་གྱི་བདེན་དཔང་བྱས་ནས་བོད་ནང་གི་འགྲོ་བ་མིའི་ཐོབ་ཐང་ལོ་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་འདུག་ཅེས་ནན་བརྗོད་བྱ་རྒྱུ་ཡིན་པ་དང་། མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གྱི་ཚོགས་སྡེ་ཁག་ནས་རྒྱ་ནག་གཞུང་གིས་བོད་ནང་དུ་མི་རིགས་དང་རིག་གཞུང་རྩ་མེད་གཏོང་ཐབས་ཀྱི་ལས་འགུལ་སྤེལ་བཞིན་པ་མཚམས་འཇོག་དགོས་པའི་གནོན་ཤུགས་སྤྲོད་དགོས་པ་དང་༧ཀུན་གཟིགས་པཎ་ཆེན་རིན་པོ་ཆེ་གཙོས་པའི་བོད་ཀྱི་ཆབ་སྲིད་བཙོན་པ་རྣམས་མྱུར་དུ་གློད་གྲོལ་དགོས་པའི་དགོས་འདུན་འདོན་རོགས་ཞེས་རེ་སྐུལ་ཤུགས་དྲག་ཞུ་རྒྱུ་ཡིན་སྐོར་དང་། བོད་ཀྱི་ཆབ་སྲིད་བཙོན་པ་ ༥༥༠༠ ལྷག་གི་གནས་བསྡུའི་རེའུ་མིག་བསྐྱར་སྒྲིག་བྱས་པའི་དྲྭ་ཚིགས་འདིའི་ནང་གི་གནས་ཚུལ་རྣམས་ད་ལྟའི་ཆར་ (pin yin) དང་དབྱིན་ཡིག་ཏུ་ཡོད་སྐོར་དང་། རིམ་པས་བོད་ཡིག་ནང་གང་མགྱོགས་བོད་ཡིག་ཏུ་བཟོ་རྒྱུའི་འཆར་གཞི་ཡོད་སྐོར་བརྗོད་སོང་།
གསར་འགོད་པ། བསྟན་འཛིན་ཕུར་བུ།
