རྔ་བ་རྨེའུ་རུ་མ་ནས་ཡིན་ཞིང་རང་ལོ་ ༢༠ ལྷག་ཡིན་པ་གྲྭ་འཕྲིན་ལས་ཞེས་པར་༧གོང་ས་མཆོག་གི་བཀའ་སློབ་འགྲེམས་སྤེལ་བྱས་པའི་ཉེས་མིང་འོག་ལོ་ལྔ་ཡི་བཙོན་འཇུག་ཁྲིམས་ཐག་བཅད་འདུག
ཁོང་དེ་སྔ་ཡང་རྒྱ་གཞུང་གིས་གསང་བའི་ངང་འཛིན་བཟུང་ཡང་ཡང་བྱས་ཏེ་ནང་མིར་བློ་འཚབ་རིམ་པར་བྱུང་ཡོད་འདུག་ལ། ཉེ་སྔོན་ཟླ་ ༧ ཚེས་ ༡ ཉིན་ནས་འཛིན་བཟུང་བཀག་ཉར་འདྲི་གཅོད་སོགས་བྱས་ཏེ། ད་ཆ་ཁྲིན་འདུ་གྲོང་ཁྱེར་གྱི་ཉེ་འཁྲིས་མེན་ཡང་ཟེར་བའི་ས་ཁུལ་གྱི་བཙོན་ཁང་ཞིག་ཏུ་བསྐྱལ་ཡོད་འདུག
གྲྭ་འཕྲིན་ལས་ལགས་ཀྱིས་ཤུལ་དུ་བཞག་པའི་ཁ་ཆེམས་སམ་རང་གི་ལངས་ཕྱོགས་མཚོན་བྱེད་ཀྱི་ཡི་གེའི་ནང་། “བཙན་པོ་དགུང་དུ་གཤེགས་གྱུར་ཀྱང་། དེ་ཡི་བཀའ་ལ་འགལ་མི་བྱ།”ཞེས་བྲིས་འདུག
གྲྭ་གཞོན་ཁོང་འཛིན་བཟུང་བྱས་ནས་ཟླ་ཤས་རྗེས་ཏེ་ཟླ་བ་ ༩ བའི་ནང་མ་གཏོགས་ནང་མིས་ཁོང་གར་ཡོད་སོགས་གསལ་བོ་ཤེས་མེད་པ་དང་། མཐར་བཙོན་ཁང་ནས་ཡི་གེ་བསླེབས་ཏེ་གནས་སྟངས་སོགས་གསལ་བོ་ཧ་གོ་སྐབས་ཁོང་ལ་ལོ་ ༥ ཁྲིམས་ཐག་བཅད་ཡོད་འདུག་ལ། ཁྲིམས་ཐག་དེ་ལྟར་བཅད་དགོས་དོན་ནི་ཁོང་གིས་༧གོང་ས་མཆོག་གི་བཀའ་སློབ་དང་། གསུང་རྩོམ་ཕྱག་དེབ་སོགས་འགྲེམ་སྤེལ་བྱས་པའི་ཉེས་འཛུགས་འོག་བྱས་ཡོད་འདུག འདི་ནི་རྔ་ཡུལ་ནས་སྐྱ་སེར་མང་དག་ཅིག་འཛིན་བཟུང་བྱས་དང་བྱེད་བཞིན་པའི་ནང་གི་གསར་ཤོས་ཤིག་རེད།
གནས་ཚུལ་འབྱུང་ཁུངས་སྐྱེས་སར་ཀླུ་སྒྲུབ།
